[1] Chhai Kit-kap yû yit-ke phai-lui ôn-to Sṳ-pâ, he Phien-ngâ-mén kî-chhu̍k ngìn Pí-kî-li ke lai-é. Kì phùn yòng-kok hêm-kóng: “Thai-ví lâu ngài-têu mò koân-he! Yâ-sî ke lai-é tui ngài-têu chhiòn-mò hó-chhu! Yî-set-lie̍t-ngìn nâ, chón ló-vuk lòi-hi!”
[2] Só-yî, Yî-set-lie̍t-ngìn chhiòn-phu lì-khôi Thai-ví, thèn Pí-kî-li ke lai-é Sṳ-pâ hi. Chúng-he Yù-thai-ngìn hàn-he tui Thai-ví-vòng chûng-sîm, thèn vòng tui Yok-tan-hò to Yâ-lu-sat-lâng.
[3] Thai-ví-vòng chón-to Yâ-lu-sat-lâng vòng-kiûng, chiông kì yî-chhièn liù hâ-lòi khon-sú vòng-kiûng ke sṳ̍p-ke se-chiá koân hí-lòi, kiûng-kip kì-têu só sî-yeu ke yit-chhiet, chúng-he m̀ lâu kì-têu thùng-fòng. Kì-têu yit-sên-ngìn koân chhai lâng-kiûng, chhiong koá-fu yit-yong.
[4] Vòng tui Â-mâ-sat kóng: “Hi seu-si̍p Yù-thai-ngìn, sâm-ngit nui lâu kì-têu chón-to liá-vi lòi.”
[5] Â-mâ-sat chhiu hi seu-si̍p Yù-thai-ngìn, chúng-he kì mò chhai vòng kûi-thin ke sṳ̀-kiên nui chón-lòi.
[6] Só-yî Thai-ví tui Â-pí-chhî kóng: “Kiâng-pha Pí-kî-li ke lai-é Sṳ-pâ tui ngài-têu ke sông-hoi pí Ap-sâ-liùng hàn-kha thai. Ngì tai ngài ke kiûn-chhui hi tûi kì! Na-he mò, kì voi cham-liâng fòng-ví ke sàng-sṳ, oi chok kì chhiu nàn lé.”
[7] Só-yî Yok-ap ke kiûn-chhui, ke-têu cho kiûng-thìn sṳ-ví chhui ke Kî-li-thì-ngìn lâu Pí-li-thì-ngìn, pin só-yû ke yúng-sṳ chhiòn-phu thèn Â-pí-chhî khiung-ha lì-khôi Yâ-lu-sat-lâng hi tûi Sṳ-pâ.
[8] Kì-têu tûi-to Kî-phiên ke thai ngàm-sa̍k ke-vi ke sṳ̀, Â-mâ-sat lòi ngiàng-chiap kì-têu. Ke-sṳ̀ Yok-ap chok-tén chan-kap, yêu-kiên kiê tô-seu, tô-é chhai tô-seu nui. Yok-ap hiong-chhièn hàng ke sṳ̀, kì ke tô-é tui tô-seu nui tiet hâ-lòi.
[9] Yok-ap tui Â-mâ-sat kóng: “Phèn-yû, ngì phìn-ôn mò?” Chhiu yung chṳn-sú lo̍t Â-mâ-sat ke fù-sî, oi chîm kì.
[10] Â-mâ-sat mò thì-fòng Yok-ap nang-ngoi yit-kî sú só kha̍k-tén ke tô-é; Yok-ap yung liá tô-é chhiuk-ngi̍p kì ke tú-sṳ́, chhòng-tú liù chhai thi-nài-hâ. Yok-ap m̀-sṳ́ chhiuk thi-ngi ha, Â-mâ-sat chhiu sí-thet. Yok-ap lâu kiâ ló-thâi Â-pí-chhî ki-siu̍k hi tûi Pí-kî-li ke lai-é Sṳ-pâ.
[11] Yû yit-ke Yok-ap ke phu̍k-ngìn khî chhai Â-mâ-sat sṳ̂-thí sùn-thèu hêm-kóng: “Sun-fu̍k Yok-ap lâu Thai-ví ke ngìn chhiòn-phu yin-kôi thèn Yok-ap hi!”
[12] Â-mâ-sat ke sṳ̂-thí kûi-sṳ̂n he hiet, soi chhai lu tûng-ông. Yok-ap ke phu̍k-ngìn khon-tó ko-lu ke ngìn chhiòn-phu khî hâ-lòi, chhiu chiông sṳ̂-thí thô-to thièn-tú, fit yit-liâng sâm chiông kì châ-tén.
[13] Sṳ̂-thí tui lu-song sái-khôi yî-heu, thai-kâ chhiu thèn Yok-ap hi tûi Pí-kî-li ke lai-é Sṳ-pâ.
[14] Sṳ-pâ hàng-ko Yî-set-lie̍t tak kî-chhu̍k ke thi-khî, lòi-to Â-pak-Pak-Mâ-kâ; só-yû Pí-kî-li chûng-chhu̍k ke ngìn chhiòn-phu si̍p-ha̍p hí-lòi, thèn kì ngi̍p-sàng.
[15] Yok-ap ke kiûn-chhui thâng-tó Sṳ-pâ chhai ke-vi, chhiu hi vì-kûng ke-sàng. Kì-têu tui-tén sàng ke ngoi-chhiòng, hí kûng sàng ke thú-tôi, yu yung chhùi-è chhong sàng-chhiòng, oi sṳ́ sàng-chhiòng vang hâ-lòi.
[16] Sàng-tú yû yit-ke chhûng-mìn ke fu-ngìn-kâ tui sàng chhiòng-táng hêm-kóng: “Thâng â, thâng â! Hi chhiáng Yok-ap to liá-vi lòi; ngài oi lâu kì kóng-fa.”
[17] Yok-ap hàng-khiûn hi; ke fu-ngìn-kâ mun: “Ngì he Yok-ap mò?” Kì kóng: “He â!” Ke fu-ngìn-kâ kóng: “Chhiáng thâng sṳ́-ńg ke fa.” Yok-ap kóng: “Hó, ngì kóng.”
[18] Ke fu-ngìn-kâ kóng: “Ló-kú ngìn-ngièn kóng: ‘To Â-pak hi chhiáng-kau’, sṳ-chhìn chhiu voi tet-tó kié-kiet.
[19] Ngài-têu liá sàng-tú ke ngìn he Yî-set-lie̍t tông-chûng chui fò-phìn, chûng-sṳ̀n ke ngìn. Ngì cho-má-ke oi fí-me̍t liá ví-thai ke sàng nè? Ngì oi thûn-thet Song-chú ke sán-ngia̍p he-mò?”
[20] Yok-ap en-kóng: “Ngài chhie̍t-tui m̀-voi fí-me̍t ngì-têu ke sàng!
[21] Ke m̀-he ngài-têu ke kie-va̍k. Yû yit-ke ngìn miàng-ham Sṳ-pâ, he Pí-kî-li ke lai-é, tui Yî-fap-lièn sân-khî lòi. Kì san-thung ngìn phoi-ngia̍k Thai-ví-vòng. Ngì-têu chiông liá yit-sà kâu chhut-lòi, ngài chhiu ha-lin chha̍t-thui.” Ke fu-ngìn-kâ tui Yok-ap kóng: “Ngài-têu voi tui sàng-chhiòng táng chiông kì ke thèu-nà fit-pûn ngì!”
[22] Só-yî kì hiong sàng-tú ke ngìn-mìn hien kie-mèu; kì-têu chhiu chiông Sṳ-pâ ke thèu-nà to̍k hâ-lòi, tui sàng-chhiòng táng te̍p-pûn Yok-ap. Yok-ap chhiu phùn yòng-kok, kì ke kiûn-chhui chhiu lì-khôi liá-sàng, chón vuk-hâ hi lé. Yok-ap chón-to Yâ-lu-sat-lâng hi kien Thai-ví-vòng.
[23] Yok-ap cho Yî-set-lie̍t chhiòn kiûn-chhui ke ngièn-soi; Yâ-hò-yâ-thai ke lai-é Pí-nâ-ngâ cho Thai-ví ke sṳ-ví-chóng, thúng-kón Kî-li-thì-ngìn lâu Pí-li-thì-ngìn;
[24] Â-tô-làn cho khú-kûng ke chúng-kón; Â-hî-li̍t ke lai-é Yok-sâ-fap cho li̍t-sṳ́-kôn;
[25] Sṳ-fap cho vòng-sṳt sû-ki; Sat-tuk lâu Â-pí-â-thâ cho chi-sṳ̂;
[26] Ngài-ngí-ngìn Yî-lâ ya cho Thai-ví ke yit-ke chi-sṳ̂.