[1] Thai-ví-vòng si̍p-ha̍p só-yû thèn kì ke ngìn, chiông kì-têu fûn-cho yit-chhiên ngìn lâu yit-pak ngìn cho tân-vi ke kiûn-chhui, tak tân-vi yû kiûn-kôn chṳ́-fî,
[2] yèn-heu chiông kì-têu phiên-cho sâm thai-chhui, fûn-phe̍t he Yok-ap, Yok-ap ke ló-thâi Â-pí-chhî, lâu Kâ-thi̍t-ngìn Yî-thai tai-liâng chhut-fat. Vòng tui kì ke phu-ha kóng: “Ngài chhṳ-kâ ya oi lâu ngì-têu khiung-ha sông chan-chhòng.”
[3] Kì-têu kóng: “Ngì chhie̍t-tui cho-m̀-tet lâu ngài-têu sông chan-chhòng; na-he ngài-têu tá-sû thò-chéu, chhiu-son yû yit-pan ke ngìn pûn-ngìn chhṳ̀-sí, thi̍t-ngìn ya m̀-voi khon-cho chhung-yeu; chúng-he ngì yit-sà tong-tet ngài-têu yit-van ngìn, ngì chui-hó liù chhai sàng-tú, sùi-sṳ̀ pông-chhu ngài-têu.”
[4] Vòng en-kóng: “Ngì-têu ngin-vì ngióng-pân hó, ngài chhiu án-ngiòng cho.” Só-yî vòng khî chhai sàng-mùn sùn, khon-tén kì ke kiûn-chhui yit-pak ke yit-chhui, yit-chhiên ke yit-chhui, cheu sun-si chhut-fat.
[5] Vòng min-lin Yok-ap, Â-pí-chhî lâu Yî-thai kóng: “Vi-tó ngài ke yèn-ku, ngì-têu m̀-hó sông-hoi ke heu-sâng ngìn Ap-sâ-liùng.” Sṳ-pîn chhiòn-phu yû thâng-tó vòng tui kì ke chiong-kôn só-kóng ke min-lin.
[6] Thai-ví ke kiûn-chhui chhut-hi to yâ-thi, lâu Yî-set-lie̍t kiûn-chhui chhai Yî-fap-lièn su-nà tú siông-chhṳ̀.
[7] Thai-ví ke kiûn-chhui tá-yàng Yî-set-lie̍t-ngìn, ke-ngit sí-sông chhî-chhám, khiung yû lióng-van ngìn chan-sí.
[8] Yîn-vi chan-chên khóng-thai to chû-vì yâ-thi, sí chhai su-nà tú ke ngìn pí chhai chan-chhòng pûn-ngìn chhṳ̀-sí ke ngìn kha-tô.
[9] Ap-sâ-liùng fut-yèn tù-tó kí-ke Thai-ví ke phu-ha. Ke-sṳ̀ Ap-sâ-liùng khì-tén lò-è, kîn-ko yit-thèu thai siong-su ke tái-hâ; kì ke thèu-nà-mô chhàn-tó su-kî, lò-è chéu-khôi, kì chhiu koa chhai su-táng.
[10] Yû yit-ke Thai-ví ke phu-ha khon-tó, chhiu po-ko Yok-ap kóng: “Ngài yû khon-tó Ap-sâ-liùng koa chhai yit-thèu siong-su táng!”
[11] Yok-ap en-kóng: “Ngì khon-tó kì! Cho-má-ke m̀ chiông kì tông-chhòng chhṳ̀-sí? Ngì na yû chiông kì chhṳ̀-sí, ngài chhiu voi sóng ngì sṳ̍p-chak ngiùn-pi lâu yit-thiàu phì-tai!”
[12] Chúng-he ke-ngìn tui Yok-ap kóng: “Ngì chhiu-he pûn ngài yit-chhiên chak ngiùn-pi, ngài ya m̀-kám chhut-sú sông-hoi vòng ke lai-é â! Ngài-têu chhiòn-phu yû thâng-tó vòng min-lin ngì, Â-pí-chhî lâu Yî-thai ke fa, kóng: ‘Vi-tó ngài ke yèn-ku, ngì-têu m̀-hó sông-hoi ke heu-sâng ngìn Ap-sâ-liùng.’
[13] Na-he ngài vì-poi vòng ke min-lin, chhṳ̀-thet Ap-sâ-liùng, vòng yit-thin voi tî, má-ke sṳ me màn m̀-ko kì! To-sṳ̀, ngì kám voi pó-fu ngài?”
[14] Yok-ap kóng: “Ngài mò sṳ̀-kiên lâu ngì lò-sô!” Kì kiak-kiak tai-tén sâm-kî chhiông hi, kón Ap-sâ-liùng hàn sâng-sâng koa chhai ke-thèu siong-su táng, chhiu chiông sâm-kî chhiông chhiòn-phu chhiuk-ngi̍p Ap-sâ-liùng ke sîm-kôn tú.
[15] Nâ Yok-ap ke vú-hi yû sṳ̍p-ke sṳ-ví chéu ko-hi vì-tén Ap-sâ-liùng, chiông kì chhṳ̀-sí.
[16] Yok-ap phùn yòng-kok thìn-chṳ́ kûng-kit; kì ke kiûn-chhui chhiòn-phu to-chón-lòi, mò chai tûi Yî-set-lie̍t-ngìn.
[17] Kì-têu chiông Ap-sâ-liùng ke sṳ̂-thí fit chhai su-nà tú ke yit-ke thai-fut tú, chhai táng-kô tôi yit-thai tôi sa̍k-thèu. Só-yû ke Yî-set-lie̍t-ngìn chhiòn-phu hiong chhṳ-kâ ke kâ-hiông thò-chéu.
[18] Ap-sâ-liùng sên-chhièn sṳt chhai Vòng-kuk vi chhṳ-kâ tun yit-ke sa̍k-pî; yîn-vi kì sióng: “Ngài mò lai-é cho-tet sṳ̀n-chiap ngài ke miàng”, só-yî kì chiông sa̍k-pî ôn-to Ap-sâ-liùng. Chhṳ̍t-to kîm-pû-ngit, liá sa̍k-pî hàn-he ham-cho Ap-sâ-liùng Ki-ngiam-pî.
[19] Sat-tuk ke lai-é Â-hî-mâ-sṳ̂ tui Yok-ap kóng: “Ngài lòi-hi chiông liá hó sêu-sit hiong vòng po-ko! Song-chú yí-kîn kiu vòng lì-khôi kì ke sù-thi̍t.”
[20] Yok-ap tui kì kóng: “M̀-hó, kîm-pû-ngit m̀-hó hi po-ko má-ke hó sêu-sit, nang-ngit chang hi! Kîm-pû-ngit m̀-hó hi, yîn-vi vòng ke lai-é sí-thet.”
[21] Só-yî Yok-ap tui yit-ke Kú-sṳ̍t-ngìn kóng: “Ngì hi, chiông só khon-tó ke sṳ hiong vòng po-ko.” Ke Kú-sṳ̍t-ngìn khúi hâ-lòi pai, yèn-heu chéu-tén hi.
[22] Sat-tuk ke lai-é Â-hî-mâ-sṳ̂ hàn-he kiên-chhṳ̀ oi hi, tui Yok-ap kóng: “M̀-kón ngióng-pân, chhiáng pûn ngài thèn ke Kú-sṳ̍t-ngìn ya tai liá sêu-sit hi.” Yok-ap kóng: “Lai-é â, ngì cho-má-ke yit-thin oi hi? Po liá-ke sêu-sit he m̀-voi yû chióng-sóng ke.”
[23] Â-hî-mâ-sṳ̂ kóng: “M̀-kón ngióng-pân, ngài hàn-he oi hi!” Yok-ap kóng: “Án-ngiòng, ngì hi â!” Só-yî Â-hî-mâ-sṳ̂ thèn-tén Yok-tan phìn-ngièn ke lu chéu-tén hi, mò kí-kiú chhiu tûi-ko ke Kú-sṳ̍t-ngìn.
[24] Ke-sṳ̀, Thai-ví chhô chhai nui-ngoi sàng-mùn tûng-ông ke thi-fông. Sú-mong ke ngìn to sàng-chhiòng táng hi, khî chhai mùn-lèu táng khon. Kì khon-tó yit-sà chéu-tén lòi,
[25] chhiu hiong hâ-poi thai-sâng hêm, hiong vòng po-ko. Vòng kóng: “Na-he tân-tân yit-sà, kì yit-thin he po hó sêu-sit ke.” Ke-ngìn ye̍t-chéu ye̍t-khiûn.
[26] Heu-lòi, sú-mong ke ngìn yu khon-tó nang-ngoi yit-sà chéu-tén lòi, chhiu tui chóng sàng-mùn ke ngìn hêm-kóng: “Ngì khon! Yu yû yit-ke ngìn chéu-tén lòi!” Vòng kóng: “Liá-sà me he lòi po hó sêu-sit ke.”
[27] Sú-mong ke ngìn kóng: “Ngài khon thèu-chhièn ke-sà chéu ke yong-é chhiong he Sat-tuk ke lai-é Â-hî-mâ-sṳ̂.” Vòng kóng: “Kì he yit-ke hó-ngìn; kì yit-thin tai hó sêu-sit lòi.”
[28] Â-hî-mâ-sṳ̂ hiong vòng hêm-kóng: “Phìn-ôn lé!” Chhiu chhai vòng mien-chhièn phu̍k chhai thi-song, khúi-pai kóng: “Chan-mî Song-chú — ngì ke Song-ti, Kì sṳ́ ngâ chú ngâ vòng yàng-ko ke-têu phoi-ngia̍k ke ngìn!”
[29] Vòng mun: “Ke heu-sâng ngìn Ap-sâ-liùng phìn-ôn mò?” Â-hî-mâ-sṳ̂ en-kóng: “Tông Yok-ap phai vòng ke phu̍k-ngìn lâu ngài — ngiâ phu̍k-ngìn chhut-hi, ngài khon-tó chung-ngìn chhin-chhàu, chúng-he m̀-tî fat-sên má-ke sṳ.”
[30] Vòng kóng: “Sám-khôi, hi sùn-thèu khî!” Â-hî-mâ-sṳ̂ chhiu thui-to sùn-thèu khî-tén.
[31] Ke-sṳ̀, ke Kú-sṳ̍t-ngìn ya to lé, hiong vòng kóng: “Ngâ chú ngâ vòng, ngài yû hó sêu-sit oi po-ko! Kîm-pû-ngit Song-chú sṳ́ ngì yàng-ko yit-chhiet phoi-ngia̍k ngì ke ngìn!”
[32] Vòng mun: “Ke heu-sâng ngìn Ap-sâ-liùng phìn-ôn mò?” Ke Kú-sṳ̍t-ngìn kóng: “Ngien fat-sên chhai kì sṳ̂n-song ke sṳ fat-sên chhai ngâ chú ngâ vòng ke sù-thi̍t lâu só-yû phoi-ngia̍k ngì ke ngìn sṳ̂n-song!”
[33] Vòng yit thâng-tó, chhiu chhin pî-sông, sông sàng-mùn lèu-táng ke fòng-kiên hi kieu. Kì kín-hàng kín kieu-tén kóng: “Ngâ lai-é Ap-sâ-liùng â! Ngâ lai-é, ngâ lai-é Ap-sâ-liùng â! Ngióng m̀ pûn ngài thoi ngì sí! Ap-sâ-liùng â, ngâ lai-é! Ngâ lai-é!”