[1] Yû-ngìn lâu Yok-ap kóng, Thai-ví-vòng vi Ap-sâ-liùng sông-sîm chhin-kieu,
[2] chṳ-tó ke-ngit Thai-ví chhiòn-kiûn sṳn-li ke fôn-lo̍k chhiòn-phu pien-cho ôi-sông, yîn-vi thai-kâ thâng-kóng vòng vi kì ke lai-é chhin sông-sîm.
[3] Kì-têu tiâm-tiâm chón-to sàng-tú, chhiu-chhiong tui chan-chhòng thò chón-lòi, kám-kok chhin kien-seu ke kiûn-chhui yit-yong.
[4] Vòng êm-tén mien, thai-sâng kieu-tén kóng: “Ngâ lai-é Ap-sâ-liùng â! Ap-sâ-liùng, ngâ lai-é, ngâ lai-é â!”
[5] Yok-ap ngi̍p-hi vòng ke vuk-tú kien vòng, tui kì kóng: “Ngì kîm-pû-ngit vú-yu̍k ngì ke phu-ha — ke-têu kiu ngì lâu ngì chṳ́-ńg pin pû-ngiòng se-chiá sin-miang ke ngìn.
[6] Ngì nâu ke-têu siak ngì ke ngìn, fán-chón siak ke-têu nâu ngì ke ngìn; ngì kîm-pû-ngit mìn-mìn khon m̀-hí ngài liá-têu chiông-kiûn lâu phu-ha. Ngài khon, na-he kîm-pû-ngit Ap-sâ-liùng hàn-sâng, ngài-têu chhiòn-phu sí-thet, ngì chhiu fôn-hí lé!
[7] Liá-ha chhiáng ngì chhut-hi ôn-ví ngì ke phu-ha! Ngài chṳ́-tén Song-chú ke miàng fat-sṳ, na-he ngì m̀ án-ngiòng cho, to kîm-am-pû mò yit-sà voi liù chhai ngì liá-vi; ke chhiu-he ngì liá yit-sên-ngìn só tù-tó chui tet-ngìn-kiâng ke châi-nan.”
[8] Só-yî vòng hí-lòi, chhut-hi chhô chhai sàng-mùn sùn. Kì ke phu-ha thâng-kóng kì chhai ke-vi, chhiu chhiòn-phu chhi-si̍p to kì mien-chhièn. Ke-sṳ̀, Yî-set-lie̍t-ngìn yí-kîn thò-chéu, tak-sà chón chhṳ-kâ ke kâ-hiông hi lé.
[9] Yî-set-lie̍t kok kî-chhu̍k ke ngìn chhiòn-phu ngi-lun fûn-fûn kóng: “Thai-ví-vòng sṳt kiu ngài-têu thot-lì sù-thi̍t; chhiu-he kì kiu ngài-têu thot-lì Fî-li-sṳ-ngìn. Chúng-he liá-ha, kì yîn-vi sám Ap-sâ-liùng chhiu lì-khôi koet-kâ.
[10] Ngài-têu kò-yù sat-li̍p Ap-sâ-liùng cho vòng, chúng-he kì yí-kîn sí chhai chan-chhòng. Án-ngiòng, ngài-têu cho-má-ke m̀ kón-kín hi chiap Thai-ví-vòng chón-lòi nè?”
[11] Thai-ví-vòng phai-ngìn hi ham chi-sṳ̂ Sat-tuk lâu Â-pí-â-thâ hi mun Yù-thai ke-têu chóng-ló: “Yî-set-lie̍t-ngìn yí-kîn chhai thàm-lun chhiáng vòng chón vòng-kiûng lòi, ngì-têu cho-má-ke lo̍k chhai kì-têu ke heu-poi?
[12] Ngì-têu he ngài ke chhîn-chhit, he ngài ke kut-ngiuk, cho-má-ke oi tén-to chui-heu chang chhiáng vòng chón-lòi?”
[13] Thai-ví ya ham kì-têu hi tui Â-mâ-sat kóng: “Ngì kám m̀-he ngài ke kut-ngiuk? Chhiùng-kîm yî-heu, ngài oi ngì cho kiûn-chhui ke ngièn-soi, chiông Yok-ap von hâ-lòi. Na-he ngài m̀ án-ngiòng cho, ngien Song-ti chhûng-chhûng chit-fa̍t ngài!”
[14] Thai-ví ke fa chha̍t-tái tet-tó só-yû Yù-thai-ngìn ke sîm; kì-têu chhiu chhòn-fa pûn vòng, chhiáng kì lâu kì ke kôn-yèn chhiòn-phu chón-lòi.
[15] Chhai chón-lòi ke lu-song, vòng lòi-to Yok-tan-hò, chhiu tù-tó Yù-thai-ngìn; kì-têu to Kit-kap lòi fôn-ngiàng vòng ko-hò.
[16] Thùng-sṳ̀, Pâ-fu-lìm ke Phien-ngâ-mén-ngìn Kî-lâ ke lai-é Sṳ-mî ya tông-kiak to Yok-tan-hò hi ngiàng-chiap Thai-ví-vòng.
[17] Kì tai-tén Phien-ngâ-mén kî-chhu̍k ke yit-chhiên ngìn khiung-ha lòi. Hàn-yû Só-lò kâ-chhu̍k ke phu̍k-ngìn Sé-pâ ya tai-tén kì sṳ̍p-ńg ke lai-é lâu ngi-sṳ̍p ke phu̍k-ngìn khiung-ha lòi. Kì-têu pí vòng siên to Yok-tan-hò.
[18] Kì-têu ko-hò hi, pó-fu vòng ke kâ-kién ko-hò, yu cheu vòng ke yi-sṳ cho kok-yong ke sṳ. Tông vòng oi ko Yok-tan-hò ke sṳ̀, Kî-lâ ke lai-é Sṳ-mî chhiu phu̍k chhai kì mien-chhièn,
[19] kóng: “Ngâ chú ngâ vòng, khiù ngì sa-miên phu̍k-ngìn chhai ngì lì-khôi Yâ-lu-sat-lâng ke sṳ̀ só-fam phoi-ngia̍k ke chhui. Khiù ngì m̀-hó yîn-vi án-ngiòng thin ngài ke chhui, ya m̀-hó chiông liá-sṳ piong chhai sîm-tú.
[20] Phu̍k-ngìn tî chhṳ-kâ yû-chhui, só-yî kîm-pû-ngit, chhai pet-phu kî-chhu̍k tông-chûng ngài he thi-yit ke lòi ngiàng-chiap ngâ chú ngâ vòng ke.”
[21] Sé-lu-ngâ ke lai-é Â-pí-chhî kóng: “Yin-kôi chiông Sṳ-mî chhṳ̀-sí, yîn-vi kì chu-ma Song-chú kò-yù sat-li̍p ke vòng.”
[22] Chúng-he, Thai-ví tui Â-pí-chhî lâu kiâ-kô Yok-ap kóng: “Sé-lu-ngâ ke lai-é â, yû má-ngìn mun ngì-têu ke yi-kien? Ngì-têu oi lâu ngài chhìm mà-fàn he-mò? Ngài liá-ha he Yî-set-lie̍t ke vòng; kîm-pû-ngit, mò yit-ke Yî-set-lie̍t-ngìn voi pûn-ngìn chhṳ̀-sí.”
[23] Só-yî vòng tui Sṳ-mî kóng: “Ngài pó-chṳn ngì m̀-voi pûn-ngìn chhṳ̀-sí.”
[24] Só-lò ke sûn-é Mí-fî-pô-sat ya hâ-lòi ngiàng-chiap vòng. Chhṳ-chhiùng vòng lì-khôi Yâ-lu-sat-lâng chhṳ̍t-to liá-ha phìn-ôn chón-lòi, kì m̀-sṳt sé-kiok, mò siû fù-sî, ya mò sé sâm-fu.
[25] Mí-fî-pô-sat tui Yâ-lu-sat-lâng lòi kien vòng ke sṳ̀, vòng mun kì: “Mí-fî-pô-sat, ngì cho-má-ke mò lâu ngài khiung-ha lì-khôi?”
[26] Mí-fî-pô-sat en-kóng: “Ngâ chú ngâ vòng, ngì tî phu̍k-ngìn he khiò-kiok ke ngìn; ngài yû fûn-fu ngìn yi-phi lì-è, hó pûn ngài khì-tén lì-è lâu vòng khiung-ha hi, chúng-he ngài ke phu̍k-ngìn Sé-pâ chhut-mai ngài.
[27] Kì yu hiong ngâ chú ngâ vòng kóng fâ-liâu hoi ngài; chúng-he ngâ chú ngâ vòng chhiong Song-ti ke thiên-sṳ́ khiung-yong, ngì khon ngióng-pân hó, chhiu ngióng-pân cho!
[28] Ngâ-pâ vuk-hâ só-yû ke ngìn pún-lòi chhiu kôi-sí, chúng-he ngâ chú ngâ vòng ke ên-tién sṳ́ phu̍k-ngìn lâu vòng khiung-chok sṳ̍t-fan, ngài hàn-yû má-ke khièn-li chai yêu-khiù vòng sóng-su ên-tién pûn ngài nè?”
[29] Vòng tui kì kóng: “Ngì ngióng oi-sṳ́ chai thì liá-têu sṳ nè? Ngài yí-kîn kiet-thin, ngì lâu Sé-pâ lióng-sà oi pûn Só-lò ke chhòi-sán.”
[30] Mí-fî-pô-sat tui vòng kóng: “Chiông só-yû chhòi-sán chhiòn-phu pûn Sé-pâ. Ngâ chú ngâ vòng yí-kîn phìn-ôn chón-lòi lé, ngài má-ke tû m̀-sṳ́.”
[31] Kî-lie̍t-ngìn Pâ-sî-lòi yí-kîn tui Lò-kî-lìm hâ-lòi; kì lâu vòng khiung-ha hi Yok-tan-hò, oi sung vòng ko-hò.
[32] Pâ-sî-lòi he yit-ke pat-sṳ̍p se ke ló-ngìn-kâ. Kì tông-pot; vòng he̍t chhai Mâ-ha̍p-ngiam ke sṳ̀, kì sṳt kiûng-kip vòng sṳ̍t-vu̍t.
[33] Vòng tui Pâ-sî-lòi kóng: “Lâu ngài khiung-ha ko-hò, to Yâ-lu-sat-lâng ngài voi cheu-ku ngì.”
[34] Chúng-he Pâ-sî-lòi en-kóng: “Ngài kiâng-pha chhai sṳ-kiên mò kí-kiú, cho-má-ke hàn thèn vòng to Yâ-lu-sat-lâng hi nè?
[35] Ngài yí-kîn pat-sṳ̍p se lé, má-ke sṳ tû mò him-chhi, sṳ̍t-lîm mò kám-kok má-ke mi-tho, nàm-ńg kô-sú mî-hó ke sâng-yîm ya thâng m̀-tó. Phu̍k-ngìn chṳ́ voi kâ-thiâm ngâ chú ngâ vòng ke mà-fàn thin-thin.
[36] Ngài ya khâm m̀-tet vòng án-thai ke sóng-su; phu̍k-ngìn sung vòng hàng yit-chham lu, ko Yok-tan-hò,
[37] yèn-heu pûn ngài chón vuk-hâ, sí chhai ngài pún-sàng, chong chhai yà-ôi fùn-mu ke sùn-thèu! Liá he ngài ke lai-é Kîm-hón; chhiáng ngâ chú ngâ vòng tai kì ko-hi, khon ngióng-pân kha thó-tong, chhiu ngióng-pân tui-thai kì.”
[38] Vòng en-kóng: “Ngài voi tai Kîm-hón khiung-ha hi, cheu ngì só hî-mong ke khoán-thai kì; ngì hàn-yû má-ke yêu-khiù, ngài chhiòn-phu voi tap-yin ngì.”
[39] Yèn-heu, chung-ngìn ko Yok-tan-hò, vòng ya ko-hi. Vòng chîm Pâ-sî-lòi, vi kì chuk-fuk, Pâ-sî-lòi chhiu chón vuk-hâ hi.
[40] Vòng ko-hi to Kit-kap, Kîm-hón ya lâu kì ko-hi. Só-yû Yù-thai-ngìn lâu Yî-set-lie̍t-ngìn ke yit-pan ya chhiòn-phu sung vòng ko-hi.
[41] Heu-lòi, só-yû ke Yî-set-lie̍t-ngìn hi kien vòng, tui vòng kóng: “Cho-má-ke ngài-têu ke hiûng-thi Yù-thai-ngìn láu-tó kì-têu yû-khièn thêu-thêu-é sung vòng lâu vòng vuk-hâ ke ngìn pin phu-ha ko Yok-tan-hò?”
[42] Yù-thai-ngìn en-kóng: “Ngài-têu án-ngiòng cho he yîn-vi vòng lâu ngài-têu he chhîn-chhit. Ngì-têu cho-má-ke fat-khién? Vòng pin mò pûn ngài-têu sṳ̍t-vu̍t, ya mò sóng-su ngài-têu má-ke tûng-sî.”
[43] Yî-set-lie̍t-ngìn kóng: “Chhiu-son vòng lâu ngì-têu he chhîn-chhit, ngài-têu tui Thai-ví-vòng pí ngì-têu kien-kâ yû sṳ̍p-phi ke chhìn-fun. Ngì-têu cho-má-ke khon ngài-têu m̀-hí? M̀-hó m̀ ki-tet, ngài-têu he chui-siên chhâm-siòng chhiáng vòng chón-lòi ke!” Sûng-fông vi liá-sṳ chên-lun, chúng-he Yù-thai-ngìn ke thai-thu pí Yî-set-lie̍t-ngìn hàn-kha ngang.