[1] Thai-ví chang ko sân-táng, fut-yèn khon-tó Mí-fî-pô-sat ke phu̍k-ngìn Sé-pâ khiên-tén lióng-chak lì-è, lì-poi táng chai-tén lióng-pak chak piáng, yit-pak chhon phù-thò-kôn, yit-pak chak ngie̍t-thiên ke súi-kó lâu yit phì-thoi chiú lòi ngiàng-chiap kì.
[2] Thai-ví-vòng mun Sé-pâ: “Ngì tai liá-têu tûng-sî lòi cho-má-ke nè?” Sé-pâ kóng: “Lì-è he pûn koet-vòng vuk-hâ ke ngìn khì ke; piáng lâu ngie̍t-thiên ke súi-kó he pûn thèn ngì ke ngìn sṳ̍t ke; chiú he pûn kì-têu chhai khóng-yâ khioi ke sṳ̀ lîm ke.”
[3] Vòng mun kì: “Ngiâ chú-ngìn Só-lò ke sûn-é Mí-fî-pô-sat chhai nai-vi?” Sé-pâ en-kóng: “Kì liù chhai Yâ-lu-sat-lâng, yîn-vi kì siông-sin Yî-set-lie̍t-ngìn liá-ha yit-thin voi chiông kiâ-kûng Só-lò ke vòng-koet vàn-pûn kì.”
[4] Vòng tui Sé-pâ kóng: “Su̍k Mí-fî-pô-sat só-yû ke chhòi-sán liá-ha chhiòn-phu kûi-pûn ngì lé!” Sé-pâ en-kóng: “Ngâ chú ngâ vòng, ngài khúi-hâ kám-chhia ngì ke thai-ên. Ngien ngài chhai ngì mien-chhièn yún-yén tet-tó cheu-ku!”
[5] Thai-ví-vòng to Pâ-fu-lìm ke sṳ̀, Só-lò ke yit-ke chhîn-su̍k — Kî-lâ ke lai-é Sṳ-mî chhut-lòi kien Thai-ví; kì kín-hàng kín chu-ma Thai-ví.
[6] Sṳ-mî m̀-kiâng Thai-ví yû sṳ̂n-piên ke yúng-sṳ lâu sṳ-ví ke pó-fu, nâ sa̍k-thèu te̍p Thai-ví-vòng lâu kì ke kôn-yèn.
[7] Sṳ-mî chu-ma Thai-ví kóng: “Chhut-hi! Ngì liá liù ngìn-hiet ke hiûng-sú chhut-hi!
[8] Ngì chhióng Só-lò ke vòng-koet, liá-ha Song-chú oi yîn-vi ngì chhṳ̀ Só-lò ke kâ-chhu̍k chit-fa̍t ngì. Song-chú yí-kîn chiông liá vòng-koet kâu-pûn ngiâ lai-é Ap-sâ-liùng lé. Ngì liá hiûng-sú, ngì hoi-tó chhṳ-kâ lé!”
[9] Sé-lu-ngâ ke lai-é Â-pí-chhî tui vòng kóng: “Ngâ chú ngâ vòng, cho-má-ke pûn liá-thiàu sí-kiéu chu-ma ngì nè? Pûn ngài ko-hi to̍k-hâ kì ke thèu lòi!”
[10] Vòng tui Â-pí-chhî lâu kiâ-kô Yok-ap kóng: “Sé-lu-ngâ ke lai-é â, liá lâu ngì-têu mò koân-he! Na-he kì chu-ma ngài, he yîn-vi Song-chú oi kì án-ngiòng cho, má-ngìn yû khièn-li mun kì, cho-má-ke oi án-ngiòng cho nè?”
[11] Thai-ví yu tui Â-pí-chhî lâu só-yû ke kôn-yèn kóng: “Lièn ngài chhṳ-kâ ke lai-é ya oi chhṳ̀ ngài, liá Phien-ngâ-mén-ngìn ke hàng-vì yû má-ke hó khì-koai? Liá he Song-chú oi kì chu-ma ke; yù-chhai kì hi ma!
[12] Yîn-vi ngài kîm-pû-ngit pûn-ngìn chu-ma, khó-nèn Song-chú voi ku-ngiam ngài ke khú-nan, sṳ̂-ên su-fuk pûn ngài.”
[13] Só-yî Thai-ví lâu thèn kì ke ngìn ki-siu̍k hiong-chhièn hàng. Sṳ-mî chhai Thai-ví tui-mien ke sân-kia táng kín-hàng kín chu-ma, yu nâ sa̍k-thèu lâu nài-thòn te̍p kì.
[14] Vòng lâu só-yû thèn kì ke ngìn to Yok-tan-hò ke sṳ̀ kám-kok chhin khioi, chhiu chhai ke-vi hiet-khun.
[15] Ap-sâ-liùng lâu thèn kì ke Yî-set-lie̍t-ngìn chin-ngi̍p Yâ-lu-sat-lâng; Â-hî-tô-fut ya lâu kì khiung-ha.
[16] Thai-ví ke phèn-yû Â-kî-ngìn Fu-chhî hi ngiàng-chiap Ap-sâ-liùng, hêm-tén kóng: “Koet-vòng van-soi! Koet-vòng van-soi!”
[17] Ap-sâ-liùng mun Fu-chhî: “Ngì tui ngì ke phèn-yû Thai-ví ke chûng-sṳ̀n nai-vi hi lé? Ngì ngióng-pân mò thèn kì chéu nè?”
[18] Fu-chhî en-kóng: “Ngài ngióng-pân cho-tet chéu nè? Ngài oi chhin-chûng ke he ke pûn Song-chú, liá-têu ngìn lâu só-yû Yî-set-lie̍t-ngìn kién-sién chhut-lòi ke ngìn, só-yî ngài he su̍k kì ke, ngài oi lâu kì khiung-ha.
[19] Ko-kóng, ngài m̀ fu̍k-sṳ ngài chú-ngìn ke lai-é hàn oi fu̍k-sṳ má-ngìn nè? Ngài ngióng-pân fu̍k-sṳ ngiâ-pâ, liá-ha ngài oi cheu-yong fu̍k-sṳ ngì.”
[20] Ap-sâ-liùng chón-sṳ̂n tui Â-hî-tô-fut kóng: “Ngì yû má-ke kien-ngi? Ngài-têu yin-kôi ngióng-pân cho?”
[21] Â-hî-tô-fut tui Ap-sâ-liùng kóng: “Ngì hi lâu ngiâ-pâ liù hâ-lòi, ke-têu khon-sú vòng-kiûng ke se-chiá khiung-ha soi. Án-ngiòng, mî-yit ke Yî-set-lie̍t-ngìn voi thâng-tó ngì pien-sṳ̀n ngiâ-pâ ke sù-thi̍t; thèn ngì ke ngìn chhiu voi thai-thai kiên-khiòng hí-lòi.”
[22] Só-yî kì-têu chhai vòng-kiûng lèu-táng tap yit-chho pu-phùng pûn Ap-sâ-liùng. Chung-ngìn muk kîm-kîm khon Ap-sâ-liùng ngi̍p pu-phùng, lâu kiâ-pâ ke-têu se-chiá khiung-ha soi.
[23] Chhai ke sṳ̀-thoi, Â-hî-tô-fut mò-lun he vi Thai-ví ya-he vi Ap-sâ-liùng só-chhut ke chú-yi, chhiòn-phu chhiong he tui Song-ti lòi ke fa.