[1] Thi-ngi ngièn chhûn-thiên, chhiu he só-yû ke vòng chhut-hi siông-chhṳ̀ ke sṳ̀, Thai-ví phai Yok-ap tai-liâng phu-ha lâu Yî-set-lie̍t kiûn-chhui chhut-chṳ̂n. Kì-têu tá-yàng Â-mùn-ngìn, kûng-tá Lâ-pâ-sàng. Chúng-he Thai-ví chhṳ-kâ liù chhai Yâ-lu-sat-lâng.
[2] Yû yit-ngit ke lìm-am-é, Thai-ví soi-muk hong-hí-lòi, to vòng-kiûng ke vuk-táng san-phu, khon-tó yit-ke fu-ngìn-kâ sé-sṳ̂n; ke fu-ngìn-kâ sṳ̍p-fûn chiâng.
[3] Thai-ví phai-ngìn hi-chhà kì he má-ngìn, tî kì ôn-to Pha̍t-sṳ-pâ, he Yî-lièn ke moi-é, Het-ngìn Vû-li-â ke pû-ngiòng.
[4] Thai-ví phai-ngìn hi, chiông Pha̍t-sṳ-pâ chiap ko-lòi, Thai-ví chhiu lâu kì thùng-fòng. (Ke-sṳ̀ Pha̍t-sṳ-pâ ke ngie̍t-kîn yí-kîn chhiang-li.) Sṳ-heu, Pha̍t-sṳ-pâ chón vuk-hâ hi.
[5] Ko mò kí-kiú, Pha̍t-sṳ-pâ fat-hien chhṳ-kâ yû sṳ̂n-yín, chhiu sung-sin pûn Thai-ví, lâu kì kóng: “Ngài yû sṳ̂n-hong lé!”
[6] Só-yî Thai-ví phai-ngìn lâu Yok-ap kóng: “Ngì phai Het-ngìn Vû-li-â to ngài liá-vi lòi.” Yok-ap chhiu phai Vû-li-â hi kien Thai-ví.
[7] Vû-li-â chón to-lòi, Thai-ví mun kì Yok-ap lâu kiûn-chhui hó-se mò, chan-chên ke chhìn-khóng ngióng-pân?
[8] Yèn-heu Thai-ví tui Vû-li-â kóng: “Ngì chón vuk-hâ sé-liòng hiet-khun!” Vû-li-â lì-khôi yî-heu, Thai-ví phai-ngìn sung yit-fun lî-vu̍t to kiâ vuk-hâ hi.
[9] Chúng-he Vû-li-â pin-mò chón vuk-hâ; kì lâu vòng ke sú-ví soi chhai vòng-kiûng mùn-héu.
[10] Thai-ví thâng-kóng Vû-li-â mò chón vuk-hâ, chhiu mun kì: “Ngì chhut-mùn án-kiú, liá-ha chón-lòi, cho-má-ke m̀ chón vuk-hâ hi?”
[11] Vû-li-â en-kóng: “Yî-set-lie̍t lâu Yù-thai ke sṳ-pîn chhiòn-phu chhai chan-chhòng, yok-khui ya chhai ke-vi, Yok-ap ngièn-soi lâu kì ke phu-ha chhiòn-phu chhai yâ-ngoi ôn-yàng, ngài ngióng-pân cho-tet chón vuk-hâ lîm-sṳ̍t, lâu pû-ngiòng thùng-fòng nè? Ngài chṳ́-tén ngì ke sâng-miang fat-sṳ, ngài chhie̍t-tui m̀ cho án-ngiòng ke sṳ!”
[12] Só-yî Thai-ví kóng: “Án-ngiòng, ngì kîm-pû-ngit hàn-he liù chhai liá-vi, thiên-kông-ngit ngài sung ngì chón-hi.” Ke-ngit Vû-li-â chhiu liù chhai Yâ-lu-sat-lâng.
[13] Thi-ngi ngit, Thai-ví ham kì lòi lâu chhṳ-kâ khiung-ha lîm-sṳ̍t, pûn kì lîm-to chui-chui. Chúng-he ke am-pû, Vû-li-â hàn-he mò chón vuk-hâ; kì to vòng-kiûng sú-ví-sṳt hi, soi chhai chhṳ-kâ ke thán-è hong.
[14] Thi-ngi chêu-sṳ̀n, Thai-ví siá yit-fûng sin-é, fûn-fu Vû-li-â tai-hi pûn Yok-ap.
[15] Sin chûng kóng: “Chiông Vû-li-â tiau-to chui kit-lie̍t ke chhièn-sien, yèn-heu ngì-têu chha̍t-thui, pûn kì chan-sí.”
[16] Só-yî, Yok-ap kûng-sàng ke sṳ̀, kì phai Vû-li-â to thi̍t-kiûn fòng-phi chui-khiòng ke thi-fông hi.
[17] Thi̍t-kiûn tui sàng-tú chhut-lòi, kûng-kit Yok-ap ke kiûn-chhui. Thai-ví ke kiûn-kôn yû-têu chan-sí; Het-ngìn Vû-li-â ya chan-sí.
[18] Sṳ-heu, Yok-ap chiông chan-chên ke kîn-ko po-ko Thai-ví;
[19] Yok-ap chṳ́-sṳ sung-sin ke ngìn kóng: “Ngì hiong vòng po-ko liá-pái chan-chên ke kîn-ko yî-heu,
[20] kì khó-nèn voi fat-khién, chit-phi kóng: ‘Ngì-têu siông-chhṳ̀ cho-má-ke vá án-khiûn sàng-chhiòng? Kám-kóng ngì-têu m̀-tî thi̍t-ngìn voi tui sàng-chhiòng sa-chien?
[21] Ngì-têu m̀ ki-tet Kî-thien ke lai-é Â-pí-mí-le̍t he ngióng-pân sí ke? Kì he chhai Thì-phi-sṳ̂ pûn yit-ke fu-ngìn-kâ tui sàng-chhiòng táng súng hâ-lòi ke yit-te mo-sa̍k chak-sí ke. Ngì-têu siông-chhṳ̀ cho-má-ke vá án-khiûn sàng-chhiòng?’ Na-he vòng mun liá-têu fa, ngì chhiu lâu kì kóng: ‘Vòng ke kiûn-kôn Het-ngìn Vû-li-â me sí-thet lé!’ ”
[22] Sung-sin ke ngìn to Thai-ví ke-vi, cheu Yok-ap chṳ́-sṳ kì ke fa hiong Thai-ví po-ko,
[23] kóng: “Thi̍t-kiûn pí ngài-têu kha-khiòng; kì-têu tui sàng-tú chhung chhut-lòi, chhai sàng-ngoi lâu ngài-têu tui-tá. Ngài-têu chiông thi̍t-kiûn kiuk-chón sàng mùn-héu;
[24] thi̍t-ngìn chhiu tui sàng-chhiòng táng tui ngài-têu sa-chien. Koet-vòng ke kiûn-kôn yû-têu chung-chien chan-sí; Het-ngìn Vû-li-â me sí-thet lé.”
[25] Thai-ví tui sung-sin ke ngìn kóng: “Ngì chón-hi ôn-ví Yok-ap, ham kì m̀-sṳ́ nàn-ko, yîn-vi chhai chan-chhòng má-ngìn sí, má-ngìn sâng he mò-ngìn thòn tet-tó ke. Kú-li kì si̍p-chûng li̍t-liong, chiông sàng kûng-pho.”
[26] Vû-li-â ke pû-ngiòng Pha̍t-sṳ-pâ thâng-tó ló-kûng chan-sí ke sêu-sit, chhiu vi kì ôi-sông.
[27] Ôi-sông ke ngit-khì ko-heu, Thai-ví chiông Pha̍t-sṳ-pâ chiap-ngi̍p vòng-kiûng; kì chhiu sàng-cho Thai-ví ke pû-ngiòng, vi kì kiung yit-ke lai-é. Chúng-he, Song-chú tui Thai-ví só cho liá-sṳ chhin mò fôn-hí.