[1] Heu-lòi, Thai-ví yu kûng-kit Fî-li-sṳ-ngìn, tá-yàng kì-têu, kiet-suk kì-têu chhai liá-te thú-thi ke thúng-chhṳ.
[2] Kì yu tá-yàng Mô-ap-ngìn. Kì ham kì-têu soi chhai thi-song, yung yit-thiàu sok-è liòng kì-têu, chiông thèu lióng-pái liòng-tó ke ngìn chhṳ̀-sí, thi-sâm pái liòng-tó ke ngìn chhiu liù kì-têu ke miang. Só-yî Mô-ap-ngìn kûi-sun Thai-ví, hiong kì chin-kung.
[3] Thai-ví yu tá-yàng Só-pâ-vòng Li-ha̍p ke lai-é Ha̍p-thai-tí-chhia. Tông Ha̍p-thai-tí-chhia hiong Yu-fat-lâ-tí-hò thi-khî chin-kiûn, oi fî-fu̍k kì ke thúng-chhṳ ke sṳ̀,
[4] Thai-ví chok-tó kì ke khì-pîn yit-chhiên chhit-pak ngìn, phu-pîn lióng-van ngìn. Tui chok-lòi ke mâ tông-chûng, Thai-ví liù-hâ oi thô yit-pak liòng chan-chhâ la-ngiak ke chan-mâ, chiông khì-thâ chan-mâ ke kiok-kîn chhiòn-phu to̍k-thôn.
[5] Thai-mâ-sṳ-kiet ke Si-li-â-ngìn phai kiûn-chhui hi pông-chhu Só-pâ-vòng Ha̍p-thai-tí-chhia ke sṳ̀, Thai-ví kûng-tá kì-têu, chhṳ̀-thet lióng-van lióng-chhiên ngìn.
[6] Yèn-heu, Thai-ví phai kiûn-chhui chu chhai Thai-mâ-sṳ-kiet, Si-li-â-ngìn ke koet-nui; kì-têu chhiòn-phu kûi-sun Thai-ví, hiong kì chin-kung. Thai-ví mò-lun hi-to nai-vi, Song-chú sṳ́ kì tak-pái tá-yàng.
[7] Thai-ví chhióng-tó Ha̍p-thai-tí-chhia ke-têu kiûn-kôn só nâ ke kîm tún-phài, tai-chón Yâ-lu-sat-lâng hi,
[8] yu tui Ha̍p-thai-tí-chhia thúng-chhṳ ke lióng-chak sàng-sṳ Pí-thâ lâu Pí-lò-thâ chhióng-tó chhin-tô ke thùng.
[9] Ha̍p-mâ-vòng Thò-yî thâng-kóng Thai-ví tá-yàng Ha̍p-thai-tí-chhia ke chhiòn-kiûn,
[10] chhiu phai kì ke lai-é Yok-làn hi hiong Thai-ví-vòng chhiáng-ôn, chuk-fo kì tet-tó sṳn-li (ngièn-lòi Thò-yî lâu Ha̍p-thai-tí-chhia sṳ̀-sòng siông-chhṳ̀). Yok-làn tai-lòi kîm, ngiùn, thùng chṳ-chho ke lî-vu̍t sung-pûn Thai-ví,
[11] Thai-ví-vòng chiông liá-têu lî-vu̍t lièn thùng kì tui khì-thâ koet-kâ chhióng-lòi ke kîm-ngiùn, chhiu-he tui kì só chṳ̂n-fu̍k ke Yî-tûng, Mô-ap, Â-mùn, Fî-li-sṳ, Â-mâ-li̍t, hàn-yû tui Só-pâ-vòng Li-ha̍p ke lai-é Ha̍p-thai-tí-chhia ke-vi chhióng-lòi ke lûng-chúng fûn-phe̍t vì-sṳn hien-pûn Song-chú.
[13] Thai-ví chhai Yàm-kuk chhṳ̀-thet yit-van pat-chhiên Yî-tûng-ngìn, chón-lòi yî-heu chhiu tet-tó tông-thai ke miàng-sâng.
[14] Kì phai kiûn-chhui chu chhai Yî-tûng ke tak thi-fông; ke thi-fông ke ngìn-mìn chhiòn-phu kûi-sun kì. Thai-ví mò-lun hi-to nai-vi, Song-chú sṳ́ kì tak-pái tá-yàng.
[15] Thai-ví thúng-chhṳ chhiòn Yî-set-lie̍t, hiong ngìn-mìn sṳ̍t-hàng kûng-ngi.
[16] Sé-lu-ngâ ke lai-é Yok-ap cho ngièn-soi; Â-hî-li̍t ke lai-é Yok-sâ-fap cho li̍t-sṳ́-kôn;
[17] Â-hî-thut ke lai-é Sat-tuk lâu Â-pí-â-thâ ke lai-é Â-hî-mí-le̍t cho chi-sṳ̂; Sî-lòi-ngâ cho vòng-sṳt sû-ki;
[18] Yâ-hò-yâ-thai ke lai-é Pí-nâ-ngâ cho Thai-ví ke sṳ-ví-chóng, thúng-kón Kî-li-thì-ngìn lâu Pí-li-thì-ngìn; Thai-ví ke-têu lai-é chhiòn-phu cho chi-sṳ̂.