[1] Liá-sṳ yî-heu, Ap-sâ-liùng vi chhṳ-kâ yi-phi yit-liòng chan-chhâ lâu chhin-tô mâ-é, yu phai ńg-sṳ̍p ke ví-pîn chhai kì thèu-chhièn khôi-lu.
[2] Kì sòng-sòng tá-chó hong-hí-lòi chhiu to sàng mùn-héu ke lu-sùn khî-tén, tù-tó ngìn yû fûn-chên ke sṳ oi lòi khiù vòng kié-kiet, Ap-sâ-liùng chhiu voi ham kì ko-lòi, mun kì tui nai lòi. Tông ke-sà ngìn kóng-mìn he su̍k Yî-set-lie̍t nai-ke kî-chhu̍k yî-heu,
[3] Ap-sâ-liùng chhiu voi kóng: “Ngì khon, ngì ke sṳ yû chhìn yû lî; khó-sit vòng mò phai-ngìn lòi thâng ngì ke on-khien.”
[4] Yèn-heu kì hàn voi kâ-song yit-ki: “Tông hî-mong ngài cho yit-ke fap-kôn! Yû-ngìn tù-tó fûn-chên ya-he chhiáng-khiù, cho-tet to ngài liá-vi lòi, ngài yit-thin voi pûn kì kûng-phìn ke sṳ́m-phan.”
[5] Na-he yû-ngìn hàng-khiûn Ap-sâ-liùng, oi pai kì, Ap-sâ-liùng chhiu voi chhûn-sú fù-tén kì, chîm kì.
[6] Ap-sâ-liùng hiong tak-ke to vòng ke-vi khiù sṳ́m-phan ke Yî-set-lie̍t-ngìn chhiòn-phu án-ngiòng cho, só-yî Ap-sâ-liùng chhiu sṳ̂-ha tet-tó Yî-set-lie̍t-ngìn ke sîm.
[7] Si-ngièn heu, Ap-sâ-liùng tui Thai-ví-vòng kóng: “Chhiáng chún ngài to Hî-pak-lùn hi, vàn ngài hiong Song-chú hí ke ngien!
[8] Ngiâ phu̍k-ngìn hàn he̍t chhai Si-li-â ke Kî-sut sṳ̀, ngài sṳt hiong Song-chú hí-ngien kóng, na-he Kì tai ngài chón Yâ-lu-sat-lâng, ngài chhiu voi chhai Hî-pak-lùn kin-pai Kì.”
[9] Vòng kóng: “Cho ngì ôn-sîm hi â!” Ap-sâ-liùng chhiu to Hî-pak-lùn hi lé.
[10] Chúng-he kì am-chûng phai sṳ́-chá to Yî-set-lie̍t tak kî-chhu̍k hi, kóng: “Tông ngì-têu thâng-tó yòng-kok hióng ke sṳ̀, chhiu hêm-kóng: ‘Ap-sâ-liùng chhai Hî-pak-lùn cho vòng lé!’ ”
[11] Ap-sâ-liùng tui Yâ-lu-sat-lâng chhiáng lióng-pak ke ngìn, lâu kì khiung-ha hi; kì-têu yit-si̍t-é me m̀-tî nui-chhìn, chhiòn-phu he tân-sùn thèn-tén hi ke.
[12] Ap-sâ-liùng hien-chi ke sṳ̀, kì thùng-sṳ̀ phai-ngìn chhiáng Kî-lò-sàng ke Â-hî-tô-fut lòi; liá-ke ngìn he Thai-ví-vòng ke chhâm-mèu. Só-yî phoi-ngia̍k ke sṳ-li̍t ye̍t-lòi ye̍t-thai, thèn-tén Ap-sâ-liùng ke ngìn ya ye̍t-lòi ye̍t-tô.
[13] Yû sṳ́-chá hiong Thai-ví po-ko kóng: “Yî-set-lie̍t-ngìn ke sîm chhiòn-phu kûi-hiong Ap-sâ-liùng lé.”
[14] Thai-ví chhiu tui ke-têu thèn kì chhai Yâ-lu-sat-lâng ke kôn-yèn kóng: “Na-he ngài-têu sióng-oi sám Ap-sâ-liùng, chhiu oi ngiàm-sṳ̀ lì-khôi liá-vi, na-mò chhiu voi lòi m̀-chhat lé. Kiak-kiak chéu! Kiâng-pha kì fut-yèn-kiên lòi-to, voi sông-hoi ngài-têu, chhṳ̀-sí chhiòn-sàng ke ngìn!”
[15] Vòng ke kôn-yèn en-kóng: “Ngâ chú ngâ vòng, phu̍k-ngìn chhiòn-phu chún-phi sîm, oi cheu ngì só kiet-thin ke hi-cho!”
[16] Só-yî vòng tai-tén chhiòn kâ-ngìn lì-khôi, chṳ́ liù-hâ sṳ̍p-ke se-chiá khon-sú vòng-kiûng.
[17] Vòng lâu só-yû thèn-tén kì ke ngìn-mìn lì-khôi Yâ-lu-sat-lâng, to sàng chui mî-hong yit-kiên vuk chhiu thìn hâ-lòi.
[18] Vòng ke kôn-yèn chhiòn-phu chhai kì mien-chhièn kîn-ko; ke-têu cho sṳ-ví ke Kî-li-thì-ngìn lâu Pí-li-thì-ngìn, pin ke liuk-pak ke tui Kâ-thi̍t lòi thèn kì ke ngìn ya chhiòn-phu chhai kì mien-chhièn kîn-ko.
[19] Vòng tui Kâ-thi̍t-ngìn ke liâng-chhiu Yî-thai kóng: “Ngì cho-má-ke thèn ngài-têu khiung-ha chéu nè? Chón-hi liù chhai sîn-vòng ke-vi! Yîn-vi ngì he ngoi-koet ngìn, he yén-lì chhṳ-kâ ke koet-kâ phit-nan ke.
[20] Ngì chhai liá-vi ke sṳ̀-kiên tông-tón, ngài ngióng cho-tet pûn ngì lâu ngài-têu khiung-ha liù-long? Lièn ngài chhṳ-kâ me m̀-tî oi to nai-vi hi. Chón-hi â! Tai-tén ngì ke thùng-pâu khiung-ha chéu! Ngien Song-chú yung chhṳ̀-oi sin-sṳ̍t khoán-thai ngì!”
[21] Yî-thai en-kóng: “Ngâ chú ngâ vòng, ngài chṳ́-tén yún-sên ke Song-chú hiong ngì fat-sṳ, mò-lun ngâ chú ngâ vòng to má-ke thi-fông, phu̍k-ngìn oi thèn ngì, he sâng he sí, ngài ya ngien-yi.”
[22] Thai-ví tui Yî-thai kóng: “Tông-hó, ki-siu̍k hiong-chhièn chhut-fat.” Án-ngiòng Kâ-thi̍t-ngìn Yî-thai tai-tén kì ke kiûn-chhui lâu kì-têu ke kâ-kién chhiòn-phu hàng ko-hi.
[23] Thai-ví lâu thèn kì ke ngìn lì-khôi ke sṳ̀, pún-thi ke ngìn-mìn chhiòn-phu khôi-sâng thai-kieu. Vòng ko Khi̍p-lùn-hâi, kì ke phu-ha ya thèn-tén ko-hi; kì-têu khiung-ha hiong khóng-yâ hi.
[24] Ke-sṳ̀, chi-sṳ̂ Sat-tuk ya lòi lé; kông Song-ti yok-khui ke Li-vi-ngìn ya lâu kì khiung-ha chhai ke-vi. Kì-têu chiông Song-ti ke yok-khui piong hâ-lòi, tén só-yû ngìn-mìn lì sàng heu chai kông hí-lòi. Chi-sṳ̂ Â-pí-â-thâ ya chhai ke-vi.
[25] Vòng tui Sat-tuk kóng: “Chiông Song-ti ke yok-khui kông chón sàng-tú hi! Na-he Song-chú fôn-hí ngài, yû yit-ngit Kì voi pûn ngài chón-lòi, chai khon-tó yok-khui lâu ôn-piong ke thi-fông.
[26] Na-he Kì mò fôn-hí ngài, án-ngiòng, ngien Kì cheu chhṳ-kâ ke hó-yi khoán-thai ngài.”
[27] Vòng ki-siu̍k tui chi-sṳ̂ Sat-tuk kóng: “Ngì m̀-he siên-kien mâ? Ngì lâu Â-pí-â-thâ cho-tet tai ngì ke lai-é Â-hî-mâ-sṳ̂ lâu Â-pí-â-thâ ke lai-é Yok-nâ-tân khiung-ha ôn-sîm chón sàng-tú hi.
[28] Ngài chhai khóng-yâ thu-sòn-thèu ke-phién tén ngì-têu ke sêu-sit.”
[29] Só-yî Sat-tuk lâu Â-pí-â-thâ chiông Song-ti ke yok-khui kông chón Yâ-lu-sat-lâng, kì-têu chhiu liù chhai ke-vi.
[30] Thai-ví kieu-tén sông Kám-lám-sân; kì tá-chhak-kiok, pî-sông to êm-tén thèu-nà. Só-yû thèn kì ke ngìn ya chhiòn-phu êm-tén thèu-nà, kín-hàng kín-kieu.
[31] Yû-ngìn hiong Thai-ví po-ko, kóng Â-hî-tô-fut lâu Ap-sâ-liùng khiung-ha chho-fán. Thai-ví chhiu khì-tó kóng: “Song-chú â, khiù Ngì sṳ́ Â-hî-tô-fut ke kie-mèu chhiòn-phu ngong thet-hi!”
[32] Thai-ví to sân-táng, kin-pai Song-ti ke thi-fông, kì ke phèn-yû Â-kî-ngìn Fu-chhî chhá-lan sâm, ve nài-sâ chhai thèu-nà táng, chhut-lòi ngiàng-chiap kì.
[33] Thai-ví tui kì kóng: “Ngì thèn-tén ngài, tui ngài yit-si̍t-é hó-chhu me-mò.
[34] Ngì na-he chón sàng-tú hi, tui Ap-sâ-liùng kóng: ‘Vòng â, ngài ngien-yi chûng-sîm fu̍k-sṳ ngì, chhiong thèu-pái fu̍k-sṳ ngiâ-pâ khiung-yong’, án-ngiòng, ngì chhiu voi pông-chhu ngài pho-fái Â-hî-tô-fut ke kie-mèu.
[35] Lióng-ke chi-sṳ̂ Sat-tuk lâu Â-pí-â-thâ kám m̀-voi chhai ke-vi mâ? Ngì cho-tet chiông ngì chhai vòng kiûng-tú thâng-tó ke mî-yit khien sṳ lâu kì-têu kóng.
[36] Sat-tuk ke lai-é Â-hî-mâ-sṳ̂ lâu Â-pí-â-thâ ke lai-é Yok-nâ-tân ya lâu kì-têu khiung-ha. Ngì chhiu chiông tá-tham tó ke sêu-sit kâu-pûn kì-têu tai-lòi pûn ngài.”
[37] Só-yî, Thai-ví ke phèn-yû Fu-chhî chón sàng-tú hi; tú-hó Ap-sâ-liùng ya chhai ke-sṳ̀ to Yâ-lu-sat-lâng.