[1] Thai-ví yu seu-si̍p Yî-set-lie̍t chûng ke chîn-pîn, khiung yû sâm-van ngìn,
[2] tai kì-têu to Yù-thai ke Pâ-lâ hi, sióng-oi tui ke-vi chiông Song-ti ke yok-khui yun ko-lòi; liá yok-khui ke miàng he cheu ke chhô chhai kî-lu-pak táng ke Song-chú — Van-kiûn Ngièn-soi ke miàng ôn ke.
[3] Kì-têu chiông Song-ti ke yok-khui piong chhai yit-liòng sîn-chhâ táng, tui sân-táng Â-pí-nâ-tha̍t ke vuk-hâ yun chhut-lòi, Â-pí-nâ-tha̍t lióng-ke lai-é — Vû-sat lâu Â-hî-yok fu-chit sṳ́-chhâ;
[4] Â-hî-yok chhai yok-khui thèu-chhièn hàng.
[5] Thai-ví lâu só-yû Yî-set-lie̍t-ngìn lûng-chúng fong-se thiau-vú chhong-kô, yùng-kông Song-chú. Kì-têu thàn-cheu yung chham-é cho ke kok-chúng ngo̍k-hi, yû su-khìm, chhit-hièn-khìm, lìn-kú, hióng-pán, hàn-yû chhê-é.
[6] Kì-têu lòi-to Nâ-không ke tá-ma̍k-chhòng, ke-sṳ̀ lâi chhâ-é ke ngiù kang-tó, hiám-hiám khúi lo̍k-hi, Vû-sat chhiu chhûn-sú fù-tén Song-ti ke yok-khui.
[7] Chú Song-ti yîn-vi Vû-sat vì-fam kûi-thin, chhiu hiong kì fat-khién, kit-tá kì. Kì chhiu sí chhai Song-ti yok-khui ke sùn-thèu;
[8] ke thi-fông chhiu ham-cho Pí-lie̍t-sṳ̂-Vû-sat, chhṳ̍t-to kîm-pû-ngit. Yîn-vi Song-chú hiong Vû-sat fat-khién, chhú-fa̍t kì, Thai-ví sîm-tú tông mò fôn-hí.
[9] Ke-ngit, Thai-ví hak-tó, chhin kiâng Song-chú, chhiu kóng: “Ngài liá-ha ngióng-kám chiông Song-chú ke yok-khui chhiáng ko-lòi nè?”
[10] Só-yî Thai-ví kiet-thin m̀ chiông Song-chú ke yok-khui yun-ngi̍p Thai-ví ke sàng, chhiu tui phe̍t-thiàu lu chiông yok-khui yun-to Kâ-thi̍t-ngìn Ngò-phe̍t-Yî-tûng vuk-hâ.
[11] Song-chú ke yok-khui chhai Ngò-phe̍t-Yî-tûng vuk-hâ thìn-liù sâm-ke ngie̍t; Song-chú su-fuk pûn kì lâu kì chhiòn-kâ.
[12] Thai-ví-vòng thâng-kóng, Song-chú yîn-vi yok-khui ke yèn-ku su-fuk pûn Ngò-phe̍t-Yî-tûng chhiòn vuk-hâ ngìn lâu só-yû su̍k kì ke, chhiu fôn-fôn hí-hí tui Ngò-phe̍t-Yî-tûng vuk-hâ chiông Song-ti ke yok-khui chiap-to Thai-ví ke sàng.
[13] Kông Song-chú yok-khui ke ngìn hàng liuk phu-kiok ke sṳ̀, Thai-ví chhiu ham kì-têu thìn hâ-lòi. Kì hiong Song-chú hien ngiù-kú lâu phì ke se-ngiù cho chi-vu̍t.
[14] Thai-ví chṳ́-yû chhai yêu-kiên vì-tén yit-liâng mà-sâ yî-fut-tet, fong-se thiau-vú, yùng-kông Song-chú.
[15] Kì lâu só-yû ke Yî-set-lie̍t-ngìn fôn-fû phùn yòng-kok, chiông Song-chú ke yok-khui chiap-to Yâ-lu-sat-lâng.
[16] Song-chú ke yok-khui ngi̍p Thai-ví-sàng ke sṳ̀, Só-lò ke moi-é Mí-kap tui chhûng-mùn khon chhut-lòi, khon-tó Thai-ví-vòng chhai Song-chú mien-chhièn fong-se thiau-vú, chhiu khon-khiâng kì.
[17] Kì-têu chiông Song-chú ke yok-khui kông hâ-lòi, piong chhai Thai-ví yi-phi hó ke chong-phùng tú. Yèn-heu, Thai-ví hien sêu-fa-chi lâu phìn-ôn-chi pûn Song-chú;
[18] hien-chi heu, Thai-ví fung Song-chú — Van-kiûn ke Ngièn-soi ke miàng chuk-fuk ngìn-mìn,
[19] yu chiông sṳ̍t-vu̍t pûn-pûn kì-têu; só-yû chhai Yî-set-lie̍t ke ngìn, mò-lun nàm-ńg, tak-sà chhiòn-phu tet-tó yit-te piáng, yit-te ngiuk lâu yit-te phù-thò-piáng; thai-kâ chhiu chón vuk-hâ hi.
[20] Chón vuk-hâ heu, Thai-ví oi lâu kâ-su̍k chuk-fuk. Só-lò ke moi-é Mí-kap chhut-lòi ngiàng-chiap kì, kóng: “Yî-set-lie̍t ke vòng kîm-pû-ngit chṳ̂n yû thí-mien ô! Kì chhiong ha-liù ke ngìn, chhai ke-têu kôn-yèn ke nù-pî mien-chhièn tá chhak-pok!”
[21] Thai-ví tui Mí-kap kóng: “Ngài thiau-vú he vi-tó yùng-kông Song-chú. Kì sién-li̍p ngài thoi ngiâ-pâ lâu ngiâ-pâ ke kâ-chhu̍k, sṳ́ ngài cho Kì Yî-set-lie̍t chṳ́-mìn ke liâng-chhiu. Só-yî ngài oi ki-siu̍k thiau-vú yùng-kông Song-chú,
[22] sṳ́ ngài chhṳ-kâ ko-kha pî-chhien. Ngì khó-nèn kám-kok ngài m̀-tî kien-seu, chúng-he ke-têu nù-pî kám-kok ngài yin-kôi su chûn-kin nè!”
[23] Só-lò ke moi-é Mí-kap yit-sên-ngìn mò kiung chṳ́-ńg.