[1] Yû yit-pái, Thai-ví mun: “Só-lò kâ-chhu̍k hàn-yû hàn-sâng ke ngìn mò? Na-he yû, ngài oi yîn-vi Yok-nâ-tân ke yèn-ku hó-hó khoán-thai kì.”
[2] Só-lò-kâ yû yit-ke phu̍k-ngìn ôn-to Sé-pâ; yû-ngìn ham kì hi-kien Thai-ví. Vòng mun kì kóng: “Ngì he Sé-pâ mò?” Sé-pâ en-kóng: “He! Chhiáng koet-vòng fûn-fu.”
[3] Vòng yu mun: “Só-lò kâ-chhu̍k hàn-yû hàn-sâng ke ngìn mò? Ngài oi cheu Song-ti ke chhṳ̀-oi khoán-thai kì.” Sé-pâ en vòng kóng: “Hàn-yû Yok-nâ-tân yit-ke lai-é; kì he lióng-kiok pâi-kiok ke ngìn.”
[4] Vòng mun: “Kì chhai nai-vi?” Sé-pâ en vòng kóng: “Kì chhai Lò-Tí-pâ, Â-mí-li ke lai-é Mâ-kit ke vuk-hâ.”
[5] Só-yî Thai-ví-vòng phai-ngìn chiông kì chiap-lòi.
[6] Só-lò ke sûn-é — Yok-nâ-tân ke lai-é Mí-fî-pô-sat lòi-to ke sṳ̀, chhiu kiûng-kiûng kin-kin phu̍k chhai Thai-ví mien-chhièn. Thai-ví ham kì: “Mí-fî-pô-sat!” Kì en-kóng: “Koet-vòng, chhiáng fûn-fu.”
[7] Thai-ví kóng: “M̀-sṳ́ kiâng, ngài voi yîn-vi ngiâ-pâ Yok-nâ-tân ke yèn-ku hó-hó khoán-thai ngì. Ngài voi chiông ngiâ-kûng Só-lò ke thú-thi chhiòn-phu vàn-pûn ngì; ngì ya cho-tet sòng-sòng lâu ngài khiung-chok sṳ̍t-fan.”
[8] Mí-fî-pô-sat yu hiong Thai-ví phu̍k-pai, kóng: “Ngiâ phu̍k-ngìn chhiong-he yit-thiàu sí-kiéu, hàn tet-tó vòng án-ngiòng ên-thai!”
[9] Vòng ham Só-lò ke phu̍k-ngìn Sé-pâ ko-lòi, tui kì kóng: “Ngài oi chiông Só-lò lâu kiâ kâ-chhu̍k só-yû ke chhòi-sán su-pûn ngiâ chú-ngìn ke sûn-é Mí-fî-pô-sat.
[10] Ngì lâu ngì ke-têu lai-é, nù-phu̍k, chhiòn-phu oi vi ngiâ chú-ngìn Só-lò ke kâ-chhu̍k kâng-thièn, chiông sû-sṳ̀n nâ-lòi pûn kì-têu sṳ̍t, Mí-fî-pô-sat pún-ngìn oi sòng-sòng cho ngài ke ngìn-hak, lâu ngài khiung-chok sṳ̍t-fan.” (Sé-pâ yû sṳ̍p-ńg ke lai-é, ngi-sṳ̍p ke nù-phu̍k.)
[11] Sé-pâ en vòng kóng: “Ngâ chú ngâ vòng ke min-lin, phu̍k-ngìn chhiòn-phu voi chûn-cheu hi-phan.” Án-ngiòng, Mí-fî-pô-sat sòng-sòng lâu Thai-ví khiung-chok sṳ̍t-fan, chhiu-chhiong he vòng ke lai-é.
[12] Mí-fî-pô-sat yû yit-ke lai-é hàn-se, ôn-to Mí-kâ. Só-yû Sé-pâ vuk-hâ ke ngìn chhiòn-phu sàng-cho Mí-fî-pô-sat ke nù-phu̍k.
[13] Án-ngiòng, lióng-kiok pâi-kiok ke Mí-fî-pô-sat chhiu he̍t chhai Yâ-lu-sat-lâng, sòng-sòng lâu vòng khiung-chok sṳ̍t-fan.