[1] Só-lò ke lai-é Yî-sṳ̂-pô-sat thâng-tó Ap-nì-ngí chhai Hî-pak-lùn pûn-ngìn chhṳ̀-sí, chhiu tông kiâng; só-yû Yî-set-lie̍t ngìn-mìn ya tông chho̍k-kiâng.
[2] Yî-sṳ̂-pô-sat yû lióng-ke kiûn-chóng — Pâ-nâ lâu Li-kap; kì-têu he Phien-ngâ-mén kî-chhu̍k Pí-liu̍k ngìn Lìm-mùn ke lai-é. (Pí-liu̍k he Phien-ngâ-mén ke yit-ke thi-khî.
[3] Yî-chhièn he̍t chhai Pí-liu̍k ke ngìn yí-kîn thò-to Kî-thâ-yîm hi; kì-têu tui ke-sṳ̀ hí yit-chhṳ̍t chhiam-he̍t chhai Kî-thâ-yîm.)
[4] (Só-lò ke lai-é Yok-nâ-tân, kì yû yit-ke lai-é ôn-to Mí-fî-pô-sat. Só-lò lâu Yok-nâ-tân pûn-ngìn chhṳ̀-sí ke sṳ̀, kì chang ńg-se. Tông kì-têu sí-thet ke sêu-sit tui Yâ-sṳ̂-lie̍t chhòn-lòi, kì ke nen-ôi nám-tén kì thò-chéu; yîn-vi nen-ôi thet kín-chông, sa pûn se-ngìn-è tiet hâ-lòi, kì chhiu sàng-cho pâi-kiok ke.)
[5] Pí-liu̍k ngìn Lìm-mùn ke lióng-ke lai-é Li-kap lâu Pâ-nâ to Yî-sṳ̂-pô-sat he̍t ke thi-fông hi, to ke-vi ke sṳ̀, tú-hó he chhin-ngie̍t ke tông-chu-thèu, Yî-sṳ̂-pô-sat chhai soi tông-chu.
[6] Chóng-mùn ke fu-ngìn-kâ yîn-vi poi ma̍k-é tông khioi, chhiu tuk-muk-soi. Lióng hiûng-thi Li-kap lâu Pâ-nâ chhiu thêu-thêu-é ngi̍p-hi.
[7] Kì-têu ngi̍p-hi yî-heu, chhiu to Yî-sṳ̂-pô-sat ke fòng-kiên, Yî-sṳ̂-pô-sat tông hó-soi, kì-têu chiông kì chhṳ̀-thet, yèn-heu chiông kì ke thèu-nà to̍k hâ-lòi, tai-tén hàng yit am-pû ke lu, kîn-ko Yok-tan sân-lak.
[8] Kì-têu chiông Yî-sṳ̂-pô-sat ke thèu-nà tai-to Hî-pak-lùn hien-pûn Thai-ví-vòng, tui kì kóng: “Khon â, liá he ngì ke sù-thi̍t Só-lò ke lai-é Yî-sṳ̂-pô-sat ke thèu-nà. Só-lò yit-chhṳ̍t sióng chhṳ̀ koet-vòng. Kîm-pû-ngit Song-chú chhai Só-lò lâu kì ke heu-thoi sṳ̂n-song vi ngâ chú ngâ vòng po yên-sù.”
[9] Thai-ví en Li-kap lâu Pâ-nâ, tui kì-têu kóng: “Ngài chṳ́-tén kiu ngài lì-khôi só-yû ngùi-hiám ke yún-sên Song-chú ló-sṳ̍t lâu ngì-têu kóng:
[10] Chhai Sé-kiet-lâ yû-ngìn hiong ngài po-ko Só-lò sí-thet ke sêu-sit, kì láu-tó tai-lòi hó sêu-sit! Ngài chhiu chiông kì chok hí-lòi chhṳ̀-thet. Liá chhiu-he ngài pûn po sêu-sit ke ngìn ke chióng-sóng!
[11] Ngì liá lióng-ke fái tûng-sî! Ngì-têu chiông vù-kû ke ngìn chhṳ̀-sí chhai kiâ vuk-hâ, chhai chhṳ-kâ ke mìn-chhòng táng, sṳ̍t-chhai chṳ̂n kôi-sí! Liá-ha ngài oi yîn-vi ngì-têu mèu-sat kì lòi po-fu̍k ngì-têu, chiông ngì-têu tui thi-song chhù-me̍t!”
[12] Só-yî, Thai-ví min-lin kì ke phu̍k-ngìn, kì-têu chhiu chiông Li-kap lâu Pâ-nâ chhṳ̀-thet, pin to̍k-thôn kì-têu ke sú-kiok, chiông sṳ̂-thí koa chhai Hî-pak-lùn ke pî-thòng sùn, yèn-heu chiông Yî-sṳ̂-pô-sat ke thèu-nà chong chhai Hî-pak-lùn, chhai Ap-nì-ngí ke fùn-mu tú.