[1] Thai-ví ke lai-é Ap-sâ-liùng yû yit-ke tông-chiâng ke ló-moi, ôn-to Thap-mâ. Thai-ví nang-ngoi yit-ke lai-é Am-nun oi-tó kì.
[2] Yîn-vi Thap-mâ hàn-he yit-ke thùng-chṳ̂n-ńg, Am-nun sióng m̀-chhut yû má-ke kî-fi chhîn-khiun kì, kì chhiu sṳ̂-ngiam to pot phiang-é.
[3] Am-nun yû yit-ke phèn-yû ôn-to Yok-nâ-tha̍t, he Thai-ví ke â-kô Sṳ-mí-â ke lai-é. Yok-nâ-tha̍t tông káu-va̍t;
[4] kì mun Am-nun kóng: “Vòng-chṳ́ â, ngì cho-má-ke yit-ngit pí yit-ngit mò ngièn-hi? Ngì cho-tet lâu ngài kóng mò?” Am-nun en-kóng: “Ngài oi-tó Thap-mâ — ngài khiung-yà mò khiung-ôi ke hiûng-thi Ap-sâ-liùng ke ló-moi.”
[5] Yok-nâ-tha̍t tui kì kóng: “Ngì cho-tet ká pot phiang-é, soi chhai mìn-chhòng táng. Ngiâ-pâ lòi khon ngì ke sṳ̀, chhiu yêu-khiù kì: ‘Chhiáng-ham ngâ ló-moi Thap-mâ lòi cheu-ku ngài, chhai ngài mien-chhièn vi ngài phoi kí-te piáng-è, pûn ngài hó khon-tó kì, ham kì chhîn-sú nâ-pûn ngài sṳ̍t.’ ”
[6] Só-yî Am-nun ká pot phiang-é, soi chhai mìn-chhòng táng. Thai-ví-vòng hi khon kì; Am-nun tui vòng kóng: “Chhiáng ham ngâ ló-moi Thap-mâ lòi, pûn kì chhai ngài mien-chhièn vi ngài phoi kí-te piáng-è, chhîn-sú nâ-pûn ngài sṳ̍t.”
[7] Só-yî, Thai-ví phai ngìn to vòng-kiûng lâu Thap-mâ kóng: “Ngì hi ngiâ-kô Am-nun ke vuk-hâ, cho-têu tûng-sî pûn kì sṳ̍t!”
[8] Thap-mâ chhiu hi kiâ-kô Am-nun vuk-hâ; Am-nun chhai mìn-chhòng táng soi-tén. Thap-mâ nâ-têu mien, chhai Am-nun ke mien-chhièn cho kí-te piáng, yèn-heu nâ-hi phoi.
[9] Thap-mâ chiông phoi-hó ke piáng tui phàn-tú tó chhut-lòi, kâu-pûn kì, chúng-he Am-nun m̀-sṳ̍t. Am-nun kóng: “Ham thai-kâ hàng-khôi!” Só-yî thai-kâ chhiu hàng-khôi.
[10] Am-nun tui Thap-mâ kóng: “Chiông piáng-è tai-to ngài mìn-chhòng sùn, chhîn-sú chhṳ ngài.” Thap-mâ chhiu chiông kì só cho ke piáng-è tai ko-hi kiâ-kô Am-nun ke mìn-chhòng sùn.
[11] Thap-mâ chhṳ kì ke sṳ̀, kì khiú-tén Thap-mâ, kóng: “Ló-moi, lòi â! Lâu ngài khiung-ha soi!”
[12] Thap-mâ kóng: “Â-kô, cho-m̀-tet! M̀-hó pet ngài cho liá kien-seu ke sṳ. Chhai Yî-set-lie̍t chûng cho-m̀-tet yû liá-chúng sṳ. Ngì m̀-hó án-ngong!
[13] Chhai ngìn ke mien-chhièn, ngài thèu-nà hàn voi khià tet-hí mò? Ngì chhai Yî-set-lie̍t-ngìn mien-chhièn ya voi chhin mò mien-chṳ́. Chhiáng hi khiù vòng, kì yit-thin voi chiông ngài ka-pûn ngì.”
[14] Chúng-he Am-nun m̀-thâng; kì hi-li̍t pí Thap-mâ thai, chhiu yung phau-li̍t khiòng-kiên kì.
[15] Sṳ-heu, Am-nun chhiu fî-sòng nâu Thap-mâ; kì nâu Thap-mâ ke chhàng-thu pí yî-chhièn oi kì hàn-kha li-hoi. Kì tui Thap-mâ kóng: “Hong-hí-lòi! Chhut-hi!”
[16] Thap-mâ kóng: “Ngài m̀ chhut-hi! Ngì án-ngiòng kiuk ngài chéu, só fam ke chhui pí ngì siên-chhièn fam ke hàn-kha chhûng!” Chúng-he Am-nun m̀-thâng;
[17] kì ham fu̍k-sṳ chhṳ-kâ ke phu̍k-ngìn lòi, tui kì kóng: “Chiông liá ńg-chṳ́ kiuk-chéu, chiông mùn só-hó!”
[18] Ke phu̍k-ngìn chhiu chiông Thap-mâ kiuk-chéu, chiông mùn só-hó. Thap-mâ chok-tén tông-sṳ̀ màng ka-ngìn ke kûng-chú sòng chok ke chhái-set ngoi-phàu.
[19] Kì nâ fó-fôi ve chhai thèu-nà táng, chhá-lie̍t ngoi-phàu, sûng-sú êm-tén mien, kín-hàng kín-kieu.
[20] Kiâ-kô Ap-sâ-liùng khon-tó, chhiu mun kì: “Am-nun khî-fu ngì he-mò? Ló-moi, m̀-hó kân-khú sîm. Am-nun he ngì khiung-yà mò khiung-ôi ke â-kô, ngì m̀-hó lâu ngìn thì-hí liá-khien sṳ.” Thap-mâ chhiu kû-kû tân-tân he̍t chhai kiâ-kô Ap-sâ-liùng ke vuk-hâ.
[21] Thai-ví-vòng thâng-tó liá-sṳ, chhiu thai fat-khién.
[22] Ap-sâ-liùng yîn-vi Am-nun vú-yu̍k kiâ ló-moi Thap-mâ, yen-hen Am-nun khi̍t-chhṳ̂m, mò-oi lâu kì kóng-fa.
[23] Lióng-ngièn heu, Ap-sâ-liùng chhai vá-khiun Yî-fap-lièn ke Pâ-li̍t-Ha-só chhiáng ngìn chién yòng-mô; kì yêu-chhiáng só-yû ke vòng-chṳ́ to ke-vi hi ko-chiet.
[24] Ap-sâ-liùng hi kien Thai-ví-vòng, kóng: “Koet-vòng â, ngài yí-kîn chhiáng ngìn chién yòng-mô lé, chhiáng ngì lâu ngì ke kôn-yèn thèn ngài khiung-ha hi ko-chiet.”
[25] Vòng en-kóng: “Lai-é â, m̀-sṳ́ án-ngiòng! Na-he ngài-têu chhiòn-phu hi, kiâng-pha thet mà-fàn ngì lé.” Chúng-he Ap-sâ-liùng chai-sâm yêu-chhiáng; vòng hàn-he m̀ tap-yin, tân-tân vi kì chuk-fuk.
[26] Ap-sâ-liùng kóng: “Án-ngiòng, chhiáng ngì chṳ-séu pûn ngâ-kô Am-nun thèn ngài hi.” Vòng kóng: “Ngióng-sṳ́ kì hi nè?”
[27] Chúng-he Ap-sâ-liùng chai-sâm khién-khiù, Thai-ví chhiu tap-yin pûn Am-nun lâu vòng khì-thâ ke lai-é thèn Ap-sâ-liùng khiung-ha hi. Ap-sâ-liùng yi-phi fî-sòng phông-phai ke yèn-si̍t, chhiu-chhiong vòng ke yèn-si̍t.
[28] fûn-fu phu-ha kóng: “Ngì-têu chu-yi, khon Am-nun lîm chiú-chui, ngài yit min-lin, ngì-têu chhiu chhut-sú chhṳ̀-thet kì. M̀-sṳ́ kiâng, só-yû heu-kó ngài fu-chit. Ngì-têu oi yúng-kám kiên-khiòng hi-cho!”
[29] Phu-ha chhiu cheu Ap-sâ-liùng ke chṳ́-sṳ chhṳ̀-thet Am-nun. Vòng khì-thâ ke lai-é chhiòn-phu khì lò-è thò-chéu.
[30] Tông kì-têu hàn chhai lu-song ke sṳ̀, yû fûng-sâng chhòn-to Thai-ví ke-vi kóng: “Ap-sâ-liùng chhṳ̀-thet vòng só-yû ke lai-é, yit-ke me mò liù!”
[31] Vòng khî hí-lòi, ôi-sông to chhá-lie̍t chhṳ-kâ ke sâm, soi chhai thi-song. Vòng ke kôn-yèn ya chhiòn-phu chhá-lie̍t sâm, khî chhai sùn-thèu.
[32] Chúng-he Thai-ví kiâ-kô Sṳ-mí-â ke lai-é Yok-nâ-tha̍t kóng: “Ngâ chú â, ngì ke-têu lai-é pin mò sí, chṳ́-yû Am-nun yit-sà pûn-ngìn chhṳ̀-sí. Chhṳ-chhiùng Am-nun vú-yu̍k Ap-sâ-liùng ke ló-moi Thap-mâ yî-heu, Ap-sâ-liùng chhiu kiet-thin oi chhṳ̀ kì.
[33] Ngâ chú ngâ vòng, chhiáng m̀-hó siông-sin ke mò khok-sṳ̍t ke sêu-sit, kóng vòng ke lai-é chhiòn-phu sí-thet; khì-sṳ̍t, chṳ́-yû Am-nun yit-sà pûn-ngìn chhṳ̀-sí.”
[34] Ap-sâ-liùng yí-kîn thò-chéu lé. Chhiu chhai ke-sṳ̀, sú-ví ke pîn-é khon-tó yit-khiùn ngìn tui Hò-lò-ngiam sân-táng ke lu hâ-lòi, chhiu chiông só khon-tó ke hiong vòng po-ko.
[35] Yok-nâ-tha̍t tui Thai-ví-vòng kóng: “Khon nâ, vòng ke lai-é chhiòn-phu lòi lé, chhiu-chhiong ngiâ phu̍k-ngìn thèu-siên só kóng ke.”
[36] Kì ke fa chang kóng-so̍t, vòng ke lai-é chhiu chhiòn-phu ngi̍p-lòi. Kì-têu khôi-sâng thai-kieu; vòng lâu kì ke kôn-yèn ya chhiòn-phu pî-sông thai-kieu.
[37] Ap-sâ-liùng chéu-to Kî-sut-vòng Â-mí-fut ke lai-é Tha̍t-mâi ke-vi hi, chhai ke-vi he̍t sâm-ngièn. Thai-ví-vòng vi kì ke lai-é Am-nun pî-sông tông-kiú;
[39] chúng-he kì sông-sîm ko-thet, chhiu tông sióng-ngiam Ap-sâ-liùng.