[1] Yî-set-lie̍t só-yû kî-chhu̍k chhiòn-phu to Hî-pak-lùn lòi kien Thai-ví, tui kì kóng: “Ngài-têu he ngì ke kut-ngiuk chṳ̂-chhîn.
[2] Yî-chhièn, tông Só-lò hàn-cho ngài-têu ke vòng, ngì chhiu yí-kîn tai-liâng ngài-têu Yî-set-lie̍t ngìn-mìn chhut-ngi̍p chan-chhòng. Song-chú sṳt yin-hí ngì kóng: ‘Ngì oi cho mu̍k-ngìn liâng-thô Ngài ke chṳ́-mìn Yî-set-lie̍t, cho kì-têu ke thúng-chhṳ-chá.’ ”
[3] Só-yû Yî-set-lie̍t ke chóng-ló chhiòn-phu to Hî-pak-lùn kien Thai-ví-vòng. Thai-ví chhai Song-chú mien-chhièn lâu kì-têu li̍p-yok, kì-têu chhiu kò-yù sat-li̍p kì cho Yî-set-lie̍t ke vòng.
[4] Thai-ví cho vòng ke sṳ̀ sâm-sṳ̍p se, chhai-vi khiung si-sṳ̍p ngièn.
[5] Kì chhai Hî-pak-lùn thúng-chhṳ Yù-thai chhit-ngièn pan, chhai Yâ-lu-sat-lâng thúng-chhṳ chhiòn Yî-set-lie̍t lâu Yù-thai khiung sâm-sṳ̍p sâm-ngièn.
[6] Thai-ví-vòng lâu kì ke kiûn-chhui chún-phi oi kûng-tá Yâ-lu-sat-lâng. Ke-thi ke Yâ-pu-sṳ̂-ngìn ngin-vì Thai-ví mò khó-nèn chṳ̂n-fu̍k liá-sàng, chhiu tui Thai-ví kóng: “Ngì yún-yén mò fap-thu chin-ngi̍p liá-sàng, chhiu lièn mô-muk ke lâu pâi-kiok ke ya voi chiông ngì kiuk-chéu!”
[7] (Chúng-he Thai-ví hàn-he cham-liâng kì-têu ke Siak-ôn sàng-pó; ke chhiu-he heu-lòi yû-miàng ke Thai-ví-sàng.)
[8] Ke-ngit, Thai-ví tui kì ke phu-ha kóng: “Má-ngìn lâu ngài khiung-yong án nâu Yâ-pu-sṳ̂-ngìn, oi kûng-tá kì-têu, chhiu oi tui liá súi-kiêu am-lùng sông-hi, kûng-tá ke-têu mô-muk ke lâu pâi-kiok ke!” (Yîn-vi án-ngiòng, yû yit-ki siu̍k-ngî kóng: “Mô-muk ke lâu pâi-kiok ke cho-m̀-tet ngi̍p Song-chú ke thien.”)
[9] Cham-liâng sàng-pó yî-heu, Thai-ví chhiu sái ngi̍p-hi, yu chiông kì ke miàng ôn-to Thai-ví-sàng. Thai-ví chhai liá sàng-pó ke chû-vì hí sàng-chhiòng, tui sân tûng-phién thùn-phiàng ke thòi-thi khôi-sṳ́ hí.
[10] Thai-ví ke vòng-koet yit-ngit pí yit-ngit hîn-vong, yîn-vi Song-chú — Van-kiûn ke Ngièn-soi Song-ti lâu kì khiung-ha.
[11] Thai-ngì-vòng Hî-làn phai sṳ́-chá to Thai-ví ke-vi hi, tai-tén hiông-pak-su, muk-siong lâu tá-sa̍k sṳ̂-fu, thoi Thai-ví hí vòng-kiûng.
[12] Thai-ví chhiu tî Song-chú sat-li̍p kì cho Yî-set-lie̍t-vòng ke sṳ yí-kîn vàn-sṳ̀n lé, ya tî Song-chú he yîn-vi chhṳ-kâ ke chṳ́-mìn sṳ́ kì ke vòng-koet hîn-vong.
[13] Thai-ví lì-khôi Hî-pak-lùn to Yâ-lu-sat-lâng heu, yu thó se-chiá, yu kiung chṳ́-ńg.
[14] Chhai Yâ-lu-sat-lâng kiung ke yû: Sâ-mû-â, Sok-pa, Nâ-tân, Só-lò-mùn,
[15] Yit-hot, Yî-li-sû-â, Nì-fî, Ngâ-fî-â,
[16] Yî-li-sâ-mâ, Yî-li-ngâ-thai, Yî-li-fap-lie̍t.
[17] Fî-li-sṳ-ngìn thâng-tó Thai-ví yí-kîn pûn-ngìn kò-yù li̍p-cho Yî-set-lie̍t-vòng, chhiu phai thai kiûn-chhui lòi chhìm Thai-ví. Thai-ví yit thâng-kóng, chhiu to sàng-pó hi.
[18] Fî-li-sṳ-ngìn lòi-to Li-fa̍t-yîm sân-lak, cham-liâng ke thi-fông.
[19] Thai-ví khiù-mun Song-chú: “Ngài yin-kôi hi kûng-tá Fî-li-sṳ-ngìn mò? Ngì voi sṳ́ ngài tá-yàng mò?” Song-chú en-kóng: “Hi! Ngài yit-thin voi chiông Fî-li-sṳ-ngìn kâu chhai ngì sú-chûng.”
[20] Só-yî, Thai-ví to Pâ-li̍t-Pí-lâ-sîm hi, chhai ke-vi tá-yàng Fî-li-sṳ-ngìn. Kì kóng: “Song-chú chhûng-san ngài ke sù-thi̍t, chhiong thai-súi chhûng-fái sa̍k-pok.” Só-yî ke thi-fông ham-cho Pâ-li̍t-Pí-lâ-sîm.
[21] Fî-li-sṳ-ngìn thò-miang ke sṳ̀ chiông kì-têu ke ngiéu-siong fit chhai ke-vi, Thai-ví lâu kì ke phu-ha chhiu chiông kì-têu tai-chéu.
[22] Mò kí-kiú, Fî-li-sṳ-ngìn yu chón-to Li-fa̍t-yîm sân-lak lòi, cham-liâng ke thi-fông.
[23] Thai-ví yu khiù-mun Song-chú; Song-chú kóng: “M̀-hó tui liá-vi kûng-tá kì-têu, oi tîn-to kì-têu heu-poi, tui sông-é-su su-nà ke-phién lòi kûng-tá.
[24] Ngì yit thâng-tó sông-é su-mî táng yû kiok-phu sâng, chhiu kiak-kiak chin-kûng, yîn-vi Ngài — Song-chú yí-kîn hàng-to ngì thèu-chhièn hi kûng-tá Fî-li-sṳ-ngìn ke kiûn-chhui.”
[25] Thai-ví chhiu cheu Song-chú ke min-lin hi cho. Kiet-kó, kì chiông Fî-li-sṳ-ngìn tá-thui, tui Kâ-pâ kiuk-to Kî-set.