[1] Thai-ví-vòng he̍t chhai vòng-kiûng. Song-chú sṳ́ kì hióng-su thai-phìn, mò su si chû-vì sù-thi̍t ke chhîm-fam.
[2] Vòng tui siên-tî Nâ-tân kóng: “Ngì khon, ngài he̍t chhai hiông-pak-su hí ke vòng-kiûng, chúng-he Song-ti ke yok-khui hàn chhai chong-phùng tú!”
[3] Nâ-tân tui vòng kóng: “Ngì chhiu cheu ngì ke sîm-yi hi-cho, yîn-vi Song-chú lâu ngì khiung-ha.”
[4] Chúng-he, ke am-pû Song-chú tui Nâ-tân kóng:
[5] “Hi lâu Ngài ke phu̍k-ngìn Thai-ví kóng, Song-chú án-ngiòng kóng: ‘Kám-he ngì hí sṳn-thien pûn Ngài he̍t?
[6] Chhṳ-chhiùng Ngài tui Âi-khi̍p tai Yî-set-lie̍t ngìn-mìn chhut-lòi to liá-ha, Ngài mò he̍t-ko sṳn-thien; Ngài yit-chhṳ̍t he̍t chhai chong-phùng, tak só-chhai sái-lòi sái-hi.
[7] Ngài lâu Yî-set-lie̍t ngìn-mìn khiung-ha liù-long ke-têu ngièn-ngit, ke-têu Ngài sién-lòi khon-ku Ngài chṳ́-mìn só-yû ke liâng-chhiu, Ngài chhiùng-lòi m̀-sṳt mun-ko má-ngìn, cho-má-ke m̀ vi Ngài hí yit-chho hiông-pak-su ke sṳn-thien.’
[8] “Só-yî, ngì oi lâu Ngài ke phu̍k-ngìn Thai-ví kóng, Ngài — Song-chú, Van-kiûn ke Ngièn-soi án-ngiòng kóng: ‘Ngì chhai yâ-thi chóng-yòng, Ngài chiông ngì fû-seu chhut-lòi, li̍p ngì cho Ngài chṳ́-mìn Yî-set-lie̍t ke vòng.
[9] Ngì mò-lun to má-ke thi-fông, Ngài lûng-chúng lâu ngì khiung-ha; Ngài chhù-thet ngì só-yû ke sù-thi̍t. Ngài oi sṳ́ ngì lâu sṳ-kie chui ví-thai ke ngìn khiung-yong án yû-miàng.
[10] Ngài vi Ngài ke chṳ́-mìn Yî-set-lie̍t sién yit-ke thi-fông, chiông kì-têu ôn-tún chhai ke-vi, sṳ́ kì-têu m̀-voi chai pûn-ngìn khî-fu. Chhṳ-chhiùng kì-têu sái-to liá-te thú-thi, Ngài yu sat-li̍p sṳ-sṳ̂ lòi chhṳ-lî kì-têu, kì-têu sa sòng-sòng pûn ok-pa khî-ap; chúng-he liá-chúng sṳ m̀-voi chai fat-sên lé.
[11] Ngài oi sṳ́ ngì hióng-su thai-phìn, m̀-voi pûn sù-thi̍t chhîm-fam. Ngài — Song-chú ya tui ngì siên-ko, Ngài oi su-pûn ngì yû heu-thoi.
[12] Ngì sí-heu lâu chú-siên chong khiung-ha ke sṳ̀, Ngài voi li̍p ngì yit-ke lai-é cho vòng, sṳ́ kì ke koet khiòng-sṳn.
[13] Kì chang he vi Ngài ke miàng hí sṳn-thien ke ngìn; Ngài oi kiên-ku kì ke vòng-vi chhṳ̍t-to yún-yén.
[14] Ngài oi cho kì ke â-pâ; kì oi cho Ngài ke lai-é. Kì na fam-chhui, Ngài voi chit-fa̍t kì, chhiong ngìn yung kun-é ya-he phì-piên chhú-fa̍t ngìn khiung-yong.
[15] Chúng-he, Ngài m̀-voi sû-chón Ngài tui kì ke thung-siak, chhiong Ngài sû-chón tui Só-lò ke thung-siak án-ngiòng; Ngài sṳt chiông Só-lò fi-thet, li̍p ngì cho vòng.
[16] Ngì ke heu-thoi lâu ngì ke koet voi chhai Ngài mien-chhièn yún-yén kiên-ku; ngì ke vòng-vi voi yún-yén chhùn-chhai.’ ”
[17] Nâ-tân chiông Song-ti hiong kì khí-sṳ ke tak-khien sṳ chhiòn-phu lâu Thai-ví kóng.
[18] Thai-ví-vòng ngi̍p-hi sṳn-chong-phùng, to Song-chú mien-chhièn, chhô-tén khì-tó kóng: “Chṳ-kô ke Song-chú â! Ngì vi ngài só cho ke yit-chhiet, ngài sṳ̍t-chhai khâm m̀-tet, ngài ke kâ-chhu̍k ya khâm m̀-tet.
[19] Chúng-he, Chṳ-kô ke Song-chú â, Ngì su-pûn ngài án-tô, sṳm-chṳ yin-hí chhai chiông-lòi ke ngit-è oi ên-thai Ngì phu̍k-ngìn ke chṳ́-sûn. Chṳ-kô ke Song-chú â, kám-kóng liá he phìn-sòng ke séu sṳ-chhìn mâ?
[20] Chṳ-kô ke Song-chú â, ngài hàn-yû má-ke fa hó kóng nè? Yîn-vi Ngì tî Ngì ke phu̍k-ngìn.
[21] Ngì án-ngiòng cho he yîn-vi Ngì só yin-hí ke fa, ya he cheu Ngì ke sîm-yi; Ngì cho liá yit-chhiet ke thai-sṳ, he vi-tó pûn Ngì ke phu̍k-ngìn mìn-pha̍k.
[22] Chṳ-kô ke Song-chú â, Ngì án ví-thai! Nai yû lâu Ngì pí é-tet ke! Ngài-têu tî, chhù-liáu Ngì yî-ngoi, mò phe̍t-ke Song-ti.
[23] Sṳ-kiên me mò yit-ke koet-kâ chhiong Yî-set-lie̍t; Ngì kiu Yî-set-lie̍t ngìn-mìn lì-khôi Âi-khi̍p, sṳ́ kì-têu cho Ngì chhṳ-kâ ke chṳ́-mìn. Ngì vi kì-têu cho ví-thai khì-meu ke sṳ, sṳ́ Ngì ke thai-miàng chhòn-to chhiòn sṳ-kie; Ngì sṳm-chṳ vi-tó chhṳ-kâ ke chṳ́-mìn, chiông ngoi-chhu̍k lâu kì-têu ke sṳ̀n-mìn chhiòn-phu kiuk-chéu.
[24] Ngì sṳ́ Yî-set-lie̍t yún-yén cho Ngì chhṳ-kâ ke chṳ́-mìn, Ngì — Song-chú ya cho kì-têu ke Song-ti.
[25] “Chú Song-ti â, khiù Ngì sṳ̍t-hien Ngì yû-koân ngài lâu ngài heu-thoi ke yin-hí; khiù Ngì yún-yén cheu Ngì só-kóng ke fa hi-cho.
[26] Ngien Ngì ke miàng yún-yén su chûn-kin; ngien ngìn-mìn yún-yén chhṳ̂n-siung: ‘Song-chú — Van-kiûn ke Ngièn-soi he chhṳ-lî Yî-set-lie̍t ke Song-ti!’ Án-ngiòng, Ngì voi sṳ-sṳ thoi-thoi pó-sú Ngì phu̍k-ngìn Thai-ví ke vòng-chhèu.
[27] Song-chú — Van-kiûn ke Ngièn-soi, Yî-set-lie̍t ke Song-ti â, ngài thai-tám chhai Ngì mien-chhièn án-ngiòng khì-tó; yîn-vi Ngì chiông liá yit-chhiet hiong ngài — Ngì ke phu̍k-ngìn khí-sṳ chhut-lòi, lâu ngài kóng, Ngì oi li̍p ngài ke heu-thoi cho vòng.
[28] “Chṳ-kô ke Song-chú â, chṳ́-yû Ngì he Song-ti. Ngì ke fa he chṳ̂n-sṳ̍t ke; Ngì tui Ngì ke phu̍k-ngìn ya yû án khì-meu ke yin-hí.
[29] Liá-ha khiù Ngì su-fuk pûn phu̍k-ngìn ke heu-thoi, sṳ́ kì-têu ki-siu̍k hióng-su Ngì ke ên-fi. Chṳ-kô ke Song-chú â, Ngì yí-kîn yin-hí. Ngien Ngì yún-yén ên-thai phu̍k-ngìn ke heu-thoi.”