[1] Ko yit-pok-é, Â-mùn-ngìn ke vòng Nâ-hot sí-thet; kì ke lai-é Ha̍p-nun sṳ̀n-chiap kì ke vòng-vi.
[2] Thai-ví kóng: “Ngài oi tui Ha̍p-nun péu-sṳ yû-hó, chhiong kiâ-pâ Nâ-hot tui ngài yû-hó yit-yong.” Só-yî Thai-ví chhiu phai sṳ́-chá hi ôn-ví kì. Kì-têu lòi-to ke sṳ̀,
[3] Â-mùn-ngìn ke liâng-chhiu tui Ha̍p-nun-vòng kóng: “Ngì láu-tó Thai-ví phai liá-têu ngìn lòi he vi-tó chûn-kin ngiâ-pâ, hiong ngì péu-sṳ ôn-ví mâ? Tông-yèn m̀-he! Kì phai liá-têu ngìn to liá-vi lòi he oi tá-tham liá-sàng ke chhìn-khóng, hó chṳ̂n-fu̍k ngài-têu!”
[4] Ha̍p-nun chhiu chiông Thai-ví phai-hi ke sṳ́-chá chok hí-lòi, chiông tak-sà ke fù-sî thi-thet yit-pan, chiông kì-têu ke chhòng-sâm ha-pan chiet to sṳ́-vut kot-thôn, yèn-heu kiuk kì-têu lì-khôi.
[5] Liá-têu ngìn kám-kok tông kien-seu, m̀-kám chón-hi. Thai-ví thâng-tó liá-sṳ, chhiu ham ngìn thûng-tî kì-têu liù chhai Yâ-li-kô, tén fù-sî sâng-chhòng chang chón-lòi.
[6] Â-mùn-ngìn tî kì-têu yí-kîn lâu Thai-ví kiet yên-sù, chhiu tui Pak-Li-ha̍p lâu Só-pâ chêu-mok lióng-van Si-li-â phu-pîn, tui Thò-pak chêu-mok yit-van lióng-chhiên ngìn, yu tui Mâ-kâ-vòng ke-vi chêu-mok yit-chhiên ngìn.
[7] Thai-ví tet-tó sêu-sit, chhiu min-lin Yok-ap tai-liâng chhiòn-kiûn chhut-hi siông-chhṳ̀.
[8] Â-mùn-ngìn chhut-pîn, chhi-si̍p chhai Lâ-pâ-sàng mùn-héu; khì-thâ ke Si-li-â kiûn lâu tui Thò-pak, Mâ-kâ lòi ke chhiu chhai sàng-ngoi pài-chhṳn.
[9] Yok-ap khon-chhut thi̍t-kiûn voi tui chhièn-heu lióng-thèu lòi kûng-kit, chhiu sién-chhut Yî-set-lie̍t chui chîn-liòng ke phu-chhui, ham kì-têu pài-chhṳn chin-kûng Si-li-â kiûn-chhui,
[10] chiông khì-thâ ke phu-chhui kâu-pûn kiâ ló-thâi Â-pí-chhî tai-liâng. Â-pí-chhî chṳ́-fî liá-têu phu-chhui pài-chhṳn chin-kûng Â-mùn-ngìn.
[11] Yok-ap tui Â-pí-chhî kóng: “Na-he ngì khon-tó Si-li-â-ngìn tá-yàng ngài, ngì chhiu ko-lòi kiu ngài; na-he Â-mùn-ngìn tá-yàng ngì, ngài chhiu ko-hi kiu ngì.
[12] Oi yúng-kám kiên-khiòng! Vi ngài-têu ke thùng-pâu lâu Song-ti ke sàng-chṳ́n tá-piang chan-teu! Ngien Song-chú sṳ̀n-chhiòn Kì ke chṳ́-yi!”
[13] Yok-ap lâu kì ke phu-chhui hiong-chhièn kûng-tá; Si-li-â-ngìn tá-sû, kón-kín thò-chéu.
[14] Â-mùn-ngìn khon-tó Si-li-â-ngìn thò-chéu, kì-têu ya tui Â-pí-chhî mien-chhièn thò-chéu, thui-chón sàng-tú hi. Só-yî Yok-ap lì-khôi Â-mùn-ngìn ke-vi, chón-to Yâ-lu-sat-lâng.
[15] Si-li-â-ngìn khon-tó chhṳ-kâ pûn Yî-set-lie̍t-ngìn tá-sû lé, chhiu chai seu-si̍p só-yû ke kiûn-chhui.
[16] Ha̍p-thai-tí-chhia-vòng phai-ngìn hi chiông Yu-fat-lâ-tí hò-tûng ke Si-li-â kiûn-chhui tiau ko-lòi, kì-têu chhiu chhai Ha̍p-thai-tí-chhia kiûn-chhui ke ngièn-soi Sok-fap ke tai-liâng chṳ̂-ha lòi-to Hî-làn.
[17] Thai-ví thâng-tó liá sêu-sit, chhiu seu-si̍p Yî-set-lie̍t kiûn-chhui, ko Yok-tan-hò, hiong Hî-làn, chhiu-he Si-li-â-ngìn hiong Thai-ví pài-chhṳn ke thi-fông chhièn-chin. Chan-chên yit khôi-sṳ́,
[18] Yî-set-lie̍t-ngìn chhiu tá-yàng Si-li-â kiûn-chhui. Thai-ví lâu kì ke kiûn-chhui chhṳ̀-thet chhit-pak liòng chan-chhâ ke ngìn lâu si-van khì-pîn, yu chiông thi̍t-kiûn ke ngièn-soi Sok-fap chhṳ̀-sí chhai chan-chhòng.
[19] Ha̍p-thai-tí-chhia su̍k-hâ ke-têu vòng khon-tó chhṳ-kâ pûn Yî-set-lie̍t-ngìn tá-sû, chhiu lâu Yî-set-lie̍t-ngìn kóng-fò, kûi-sun kì-têu. Yî-heu Si-li-â-ngìn m̀-kám chai lâu Â-mùn-ngìn then-sú.