[1] Thai-ví thúng-chhṳ khì-kiên sṳt tù-tó thai kî-fông, chiuk-chiuk sâm-ngièn kiú. Thai-ví vi liá-sṳ khiù-mun Song-chú; Song-chú kóng: “Liá he yîn-vi Só-lò lâu kì ke kâ-chhu̍k fam mèu-sat chhui; kì chhṳ̀-sí Kî-phiên-ngìn.”
[2] (Kî-phiên-ngìn m̀-he Yî-set-lie̍t-ngìn; kì-têu he Â-mô-li-ngìn tông-chûng chhûn-tó ke ngìn. Yî-set-lie̍t-ngìn sṳt lâu kì-têu li̍p-yok, oi pó-fu kì-têu, chúng-he Só-lò sióng phan-fap oi sêu-me̍t kì-têu, yîn-vi Só-lò tân-tân siak Yî-set-lie̍t-ngìn lâu Yù-thai-ngìn.) Thai-ví-vòng ham Kî-phiên-ngìn lòi, tui kì-têu kóng:
[3] “Ngài yin-tông vi ngì-têu cho-má-ke? Ngài yin-kôi yung má-ke lòi su̍k-chhui, ngì-têu chang hén vi Song-chú ke chṳ́-mìn chuk-fuk?”
[4] Kî-phiên-ngìn en-kóng: “Ngài-têu lâu Só-lò-kâ ke yên-sù m̀-he kîm-ngiùn só nèn kié-kiet ke; ngài-têu ya mò-oi sat-hoi Yî-set-lie̍t-ngìn.” Thai-ví mun: “Án-ngiòng, ngì-têu ngin-vì ngài yin-kôi vi ngì-têu cho-má-ke?”
[5] Kì-têu tui vòng kóng: “Só-lò mèu-hoi ngài-têu, oi sêu-me̍t ngài-têu, m̀-pûn ngài-têu liù chhai Yî-set-lie̍t koet-nui he̍t.
[6] Só-yî, chhiáng ngì tui kì ke heu-thoi chûng kâu-chhut chhit-ke nàm-ngìn lòi; ngài-têu oi chhai Kî-pí-â, chhiu-he chhai Song-chú sién-li̍p Só-lò cho vòng ke thi-fông, chhai Song-chú mien-chhièn tiau-sí kì-têu.” Vòng kóng: “Ngài voi chiông kì-têu kâu chhut-lòi.”
[7] Thai-ví-vòng yîn-vi sṳt lâu Só-lò ke lai-é Yok-nâ-tân chhai Song-chú mien-chhièn li̍p-yok, só-yî liù-hâ Yok-nâ-tân ke lai-é, chhiu-he Só-lò ke sûn-é Mí-fî-pô-sat,
[8] chúng-he chiông Oi-â ke moi-é Li-sṳ̂-pâ vi Só-lò kiung ke lióng-ke lai-é Â-mô-nì lâu Mí-fî-pô-sat kâu chhut-lòi. Kì ya chiông Só-lò ke moi-é Mí-lâ vi Mí-hò-lâ-ngìn Pâ-sî-lòi ke lai-é Â-tet-lie̍t só-kiung ke ńg-ke lai-é kâu chhut-lòi.
[9] Thai-ví-vòng chiông kì-têu kâu-pûn Kî-phiên-ngìn; Kî-phiên-ngìn chhiu chhai sân-táng, chhai Song-chú ke mien-chhièn tiau-sí kì-têu. Liá chhit-ke ngìn chhiu khiung-ha sí-thet; kì-têu pûn-ngìn chhú-sí ke sṳ̀ tú-hó he chhûn-thiên heu-khì, khôi-sṳ́ sû-kot thai-ma̍k ke kui-chiet.
[10] Oi-â ke moi-é Li-sṳ̂-pâ yung mà-pu chhai sṳ̂-thí fu-khiun ke phàn-sa̍k táng tap chong-phùng, tui sû-kot thai-ma̍k to lo̍k chhiû-yí ke sṳ̀ yit-chhṳ̍t he̍t chhai ke-vi; kì ngit-sṳ̀-thèu m̀ pûn fî-niâu thìn chhai sṳ̂-thí mien-táng, am-pû-sṳ̀ m̀ pûn yâ-chhu vá-khiun.
[11] Yû-ngìn chiông Só-lò ke se-chiá Li-sṳ̂-pâ só cho ke sṳ lâu Thai-ví kóng,
[12] Thai-ví chhiu hi Kî-lie̍t ke Ngâ-pí-ngìn ke-vi, chiông Só-lò lâu kiâ lai-é Yok-nâ-tân ke kut-hài pân chón-lòi. (Fî-li-sṳ-ngìn chhai Kî-li-pô-sân chhṳ̀-sí Só-lò ke-ngit, chiông kì-têu ke sṳ̂-thí koa chhai Pak-Sân ke kóng-chhòng; Ngâ-pí-ngìn yí-kîn chiông sṳ̂-thí thêu chón-hi.)
[13] Thai-ví tai-chón Só-lò lâu kiâ lai-é Yok-nâ-tân ke kut-hài, ya chiông ke chhit-ke pûn-ngìn tiau-sí ke ngìn ngi̍p-liam.
[14] Cheu vòng ke chṳ́-sṳ, kì-têu chiông Só-lò lâu kiâ lai-é Yok-nâ-tân ke kut-hài chong chhai Phien-ngâ-mén thi-fông ke Sé-lâ, chhai Só-lò kiâ-pâ Kî-sṳ ke fùn-mu tú. Ke-sṳ̀ yî-heu, Song-ti chhiu thâng kì-têu vi koet-kâ khì-tó.
[15] Fî-li-sṳ-ngìn lâu Yî-set-lie̍t-ngìn yu yû chan-chên; Thai-ví tai kì ke kiûn-chhui hi kûng-tá Fî-li-sṳ-ngìn. Yit-chhòng chan-chên tá hâ-lòi, Thai-ví tông khioi lé.
[16] Yû yit-ke khî-ngìn, miàng ôn-to Yî-sṳ̍t-Pí-nok; kì tai-tén chhûng sâm kûng-kîn pan ke thùng-chhiông, kiê-tén sîn-kiam, sióng-oi chhṳ̀ Thai-ví.
[17] Chúng-he Sé-lu-ngâ ke lai-é Â-pí-chhî ko-lòi hia̍p-chhu Thai-ví kûng-tá ke Fî-li-sṳ-ngìn, chiông kì chhṳ̀-sí. Heu-lòi Thai-ví ke phu-ha yêu-khiù Thai-ví tap-yin kì-têu, kóng: “Chhiáng m̀-hó chai lâu ngài-têu hi siông-chhṳ̀, miên-tet Yî-set-lie̍t ke tên-fó vû-thet.”
[18] Liá-sṳ yî-heu, Yî-set-lie̍t-ngìn chhai Kô-pak yu lâu Fî-li-sṳ-ngìn siông-chhṳ̀. Fu-sâ-ngìn Sî-pí-kâi chhṳ̀-sí yit-ke khî-ngìn ham-cho Sat-fut.
[19] Chhai Kô-pak, Yî-set-lie̍t-ngìn lâu Fî-li-sṳ-ngìn yu yû nang-ngoi yit-chhòng chan-chên. Pak-li-hèn-ngìn Ngài-ngí ke lai-é Yî-le̍t-ha̍p-nàn chhṳ̀-thet Kâ-thi̍t-ngìn Kô-li-â; liá-ngìn ke chhiông-piang chhiong chṳt-pu-kî ke chhâ-sîm án-chhû.
[20] Heu-lòi chhai Kâ-thi̍t yu yû chan-chên. Ke thi-fông yû yit-ke khî-ngìn; kì ke sú-chṳ́ lâu kiok-chṳ́ lûng-chúng he liuk-kî, chúng-khiung yû ngi-sṳ̍p si-kî.
[21] Kì hiong Yî-set-lie̍t-ngìn ma-chhṳn; Thai-ví ke â-kô Sṳ-mí-â ke lai-é Yok-nâ-tân chiông kì chhṳ̀-thet.
[22] Yî-song si-ke ngìn chhiòn-phu he Kâ-thi̍t khî-ngìn ke heu-thoi; kì-têu chhiòn-phu sí chhai Thai-ví lâu kiâ phu-ha ke sú-chûng.