[1] Liá-sṳ yî-heu, Thai-ví khiù-mun Song-chú: “Ngài cho-tet sông Yù-thai ke yit-ke sàng-sṳ hi mò?” Song-chú en-kóng: “Cho-tet.” Thai-ví mun: “Nai-ke sàng nè?” Song-chú kóng: “Hî-pak-lùn.”
[2] Só-yî Thai-ví to Hî-pak-lùn hi, tai-tén kì lióng-ke pû-ngiòng — Yâ-sṳ̂-lie̍t-ngìn Â-hî-nôn lâu Kâ-me̍t-ngìn Nâ-pa ke koá-fu Oi-pí-kâi.
[3] Thai-ví ya tai-tén phu-ha lâu kì-têu ke kâ-chhu̍k khiung-ha hi. Kì-têu chhai Hî-pak-lùn chû-vì ke sàng-sṳ he̍t.
[4] Yù-thai-ngìn chhiu to Hî-pak-lùn lòi, kò-yù sat-li̍p Thai-ví cho Yù-thai ke vòng. Thai-ví thâng-kóng Kî-lie̍t thi-khî Ngâ-pí-sàng ke ngìn-mìn mài-chong Só-lò,
[5] chhiu phai sṳ́-chá to ke-vi hi, tui kì-têu kóng: “Ngien Song-chú su-fuk pûn ngì-têu, yîn-vi ngì-têu tui chú-ngìn Só-lò chûng-sîm, chiông kì mài-chong.
[6] Ngien Song-chú tui ngì-têu sin-sṳ̍t, yún-yén oi-fu ngì-têu; ngài ya voi yîn ngì-têu só-cho ke lòi hó khoán-thai ngì-têu.
[7] Oi yúng-kám kiên-khiòng! Ngì-têu ke chú-ngìn Só-lò sí-thet, chúng-he Yù-thai ke ngìn-mìn yí-kîn kò-yù sat-li̍p ngài cho kì-têu ke vòng.”
[8] Só-lò kiûn-chhui ke ngièn-soi Nì-ngí ke lai-é Ap-nì-ngí sṳt chiông Só-lò ke lai-é Yî-sṳ̂-pô-sat tai-ko Yok-tan-hò, to Mâ-ha̍p-ngiam hi.
[9] Chhai ke-vi, Ap-nì-ngí li̍p Yî-sṳ̂-pô-sat cho vòng, thúng-chhṳ Kî-lie̍t, Â-sat, Yâ-sṳ̂-lie̍t, Yî-fap-lièn, Phien-ngâ-mén, sṳ-sṳ̍t song he chhiòn Yî-set-lie̍t.
[10] Só-lò ke lai-é Yî-sṳ̂-pô-sat cho Yî-set-lie̍t-vòng ke sṳ̀ si-sṳ̍p se; kì thúng-chhṳ Yî-set-lie̍t khiung lióng-ngièn. Chúng-he Yù-thai kî-chhu̍k chhiòn-phu tui Thai-ví chhin chûng-sîm;
[11] Thai-ví chhai Hî-pak-lùn cho vòng chhṳ-lî Yù-thai khiung chhit-ngièn pan.
[12] Nì-ngí ke lai-é Ap-nì-ngí lâu Só-lò ke lai-é Yî-sṳ̂-pô-sat ke kôn-yèn tui Mâ-ha̍p-ngiam to Kî-phiên hi.
[13] Sé-lu-ngâ ke lai-é Yok-ap lâu Thai-ví ke kôn-yèn to Kî-phiên ke pî-thòng sùn lâu kì-têu siông-fi. Thai-kâ chhiòn-phu chhô-hó lé, yit-chhui chhai pî-thòng liá-phién, yit-chhui chhai pî-thòng ke-phién.
[14] Ap-nì-ngí tui Yok-ap kóng: “Ngài-têu kok phai kí-ke heu-sâng ngìn chhut-lòi pí-vú piang khon-é hó-mò?” Yok-ap en-kóng: “Hó.”
[15] Só-yî, yû sṳ̍p-ngi ke ngìn thoi-péu Só-lò ke lai-é Yî-sṳ̂-pô-sat lâu Phien-ngâ-mén kî-chhu̍k chhut-lòi, lâu Thai-ví ke-phién ke sṳ̍p-ngi ke ngìn pí-vú.
[16] Tak-sà lûng-chúng khiú-tén tui-fông ke thèu-nà, yung kiam chhiuk-ngi̍p tui-fông ke hia̍p-hâ. Án-ngiòng, ngi-sṳ̍p-si ke ngìn chhiòn-phu vang lo̍k-hi, sí khiung-ha. Só-yî Kî-phiên ke thi-fông chhiu ôn-to “Kiam-chhòng”.
[17] Ke-ngit, sûng-fông tá-to chhin li-hoi. Ap-nì-ngí lâu Yî-set-lie̍t-ngìn pûn Thai-ví ke-phién ke ngìn tá-sû lé.
[18] Fu-ńg Sé-lu-ngâ ke sâm-ke lai-é chhiòn-phu chhai ke-vi, kì-têu sâm-sà he Yok-ap, Â-pí-chhî lâu Â-sat-het. Â-sat-het chéu hí-lòi chhiong yâ-lu̍k án-kiak,
[19] kì chhiu hi tûi Ap-nì-ngí, mò phiên chó-yu, chhṳ̍t-chhṳ̍t tûi-tén hi.
[20] Ap-nì-ngí chón-thèu yit-khon, kóng: “Â-sat-het, he ngì mò?” Â-sat-het kóng: “He!”
[21] Ap-nì-ngí tui kì kóng: “M̀-hó tûi ngài, hi tûi phe̍t ke pîn-é, chhióng kì ke tûng-sî.” Chúng-he Â-sat-het hàn-he kín tûi m̀ piong kì chéu.
[22] Ap-nì-ngí chai-ko tui Â-sat-het kóng: “M̀-hó tûi ngài! Ngì oi ngài chhṳ̀ ngì he-mò? Chhṳ̀-thet ngì, ngài ngióng-voi yû mien-phì kien ngiâ-kô Yok-ap nè?”
[23] Chúng-he Â-sat-het hàn-he m̀-hén vat-thèu chón-hi. Só-yî, Ap-nì-ngí hiong heu-poi te̍p-chhiông, chhiuk-chhôn Â-sat-het ke tú-sṳ́; chhiông tui kì ke poi-nòng chhôn chhut-hi, kì chhiu vang hâ-hi sí-thet. Chung-ngìn tûi to Â-sat-het vang hâ-hi sí-thet ke thi-fông, chhiòn-phu thìn-kiok khî-tén.
[24] Chúng-he, Yok-ap lâu Â-pí-chhî hong-hí-lòi tûi Ap-nì-ngí. Ngit-thèu hâ-sân ke sṳ̀, kì-têu lòi-to Â-mâ-sân, chhiu-he chhai Kî-â ke tûng-phién, thûng-to Kî-phiên khóng-yâ ke lu-song.
[25] Phien-ngâ-mén kî-chhu̍k yu chhi-si̍p só-chhûn ke ngìn thèn-tén Ap-nì-ngí, chóng-tén yit-chho sân-thèu.
[26] Ap-nì-ngí tui Yok-ap thai-sâng hêm-kóng: “Ngài-têu oi yit-chhṳ̍t chhṳ̀ hâ-hi mò? Kám-kóng ngì m̀-tî, to-thèu lòi sûng-fông ke yên-sù voi ye̍t-kiet ye̍t-chhṳ̂m? Ngài-têu he ngì ke thùng-pâu, ngì hàn-oi tén kí-kiú chang ha-lin thìn-chṳ́ tûi ngài-têu nè?”
[27] Yok-ap kóng: “Ngài chṳ́-tén yún-sên ke Song-ti fat-sṳ, na m̀-he ngì khôi-choi, thiên-kông chêu-sṳ̀n yî-chhièn, ngài ke kiûn-chhui hàn-he voi tûi ngì-têu.”
[28] Só-yî Yok-ap phùn yòng-kok, min-lin kì ke kiûn-chhui m̀-hó chai kiuk Yî-set-lie̍t-ngìn, siông-chhṳ̀ chhiu thìn hâ-lòi.
[29] Ap-nì-ngí lâu kì ke kiûn-chhui theu-ya hàng kiûn, kîn-ko Yok-tan sân-lak, ko Yok-tan-hò, yu hàng kûi chêu-sṳ̀n chang chón-to Mâ-ha̍p-ngiam.
[30] Yok-ap tûi Ap-nì-ngí chón-lòi yî-heu, chhiu chhi-si̍p kì só-yû ke kiûn-chhui, fat-hien séu Â-sat-het yî-ngoi, hàn séu Thai-ví ke ngìn sṳ̍p-kiú sà.
[31] Chúng-he Thai-ví liá-phién ke kiûn-chhui chhṳ̀-sí Ap-nì-ngí tui Phien-ngâ-mén kî-chhu̍k tai-lòi ke ngìn khiung sâm-pak liuk-sṳ̍p sà.
[32] Yok-ap lâu phu-ha chiông Â-sat-het ke sṳ̂-thí tai-to Pak-li-hèn, chong chhai kì-têu kâ-chhu̍k ke fùn-mu tú. Yèn-heu, Yok-ap lâu thèn kì ke ngìn theu-ya hàng, to thiên-kông chang chón-to Hî-pak-lùn.