[1] Sé-lu-ngâ ke lai-é Yok-ap tî Thai-ví-vòng tông sióng-ngiam Ap-sâ-liùng,
[2] chhiu phai-ngìn hi Thì-kô-â, tui ke-vi chhìm yit-ke chhûng-mìn ke fu-ngìn-kâ lòi, tui kì kóng: “Chhiáng ngì ká-cho sú-hau ke, chok hau-fu̍k, m̀-hó tá-pan, chhiu-chhiong yit-ke sú-hau tông-kiú ke fu-ngìn-kâ,
[3] yèn-heu to vòng ke-vi hi, chiông ngài lâu ngì kóng ke fa tui vòng kóng.” Só-yî Yok-ap chhiu kâu ke fu-ngìn-kâ ngióng-pân kóng.
[4] Thì-kô-â ke fu-ngìn-kâ chhiu hi kien vòng, kiûng-kiûng kin-kin phu̍k chhai thi-song, kóng: “Koet-vòng â, khiù ngì pông-chhu ngài!”
[5] Vòng mun kì: “Ngì yû má-ke sṳ?” Kì kóng: “Ngài he yit-ke chhin chhôi-ko ke koá-fu, ló-kûng chó chhiu sí-thet lé.
[6] Ngiâ sṳ́-ńg yû lióng-ke lai-é, yû yit-ngit kì-têu chhai thièn-tú chhàu hí-lòi chhiu siông-tá, mò phe̍t-ngìn chhai ke-vi khien-khôi kì-têu, só-yî khì-chûng yit-sà tá-sí nang-ngoi yit-sà.
[7] Koet-vòng, liá-ha ngài só-yû ke chhîn-su̍k chhiòn-phu khon ngài cho tui-thi̍t, kì-têu oi ngài chiông lai-é kâu chhut-lòi pûn kì-têu, oi yung chhṳ̀ hiûng-thi ke chhui phan kì sí-hìn. Kì-têu án-ngiòng cho, ngài chhiu lièn yit-ke lai-é me mò lé! Kì-têu oi me̍t-thet ngài ke hiông-fó, sṳ́ ngâ ló-kûng chhai sṳ-song mò lai-é hó chhòn-chûng chiap-thoi.”
[8] Vòng tui kì kóng: “Cho ngì chón vuk-hâ hi! Ngài voi vi ngì chhú-lî liá-khien sṳ.”
[9] Thì-kô-â ke fu-ngìn-kâ yu tui vòng kóng: “Ngâ chú ngâ vòng, ngien liá-chhui kûi ngài lâu ngài ke kâ-chhu̍k, lâu vòng pin vòng ke kâ-chhu̍k mò koân-he.”
[10] Vòng en-kóng: “Na-he yû-ngìn tui ngì kóng-chhòng kóng-tón, chiông kì tai-to ngài liá-vi lòi, kì chhiu m̀-voi chai chhàu ngì lé.”
[11] Fu-ngìn-kâ kóng: “Koet-vòng â, chhiáng hiong Song-chú — ngì ke Song-ti khì-tó, m̀-hó pûn ngài ke-têu chhîn-su̍k vi-tó oi vi ngài sí-thet ke lai-é po hiet-sù, sa chhṳ̀-thet ngài chhûn-tó ke lai-é.” Vòng en-kóng: “Ngài chṳ́-tén yún-sên ke Song-chú tap-yin ngì: Ngiâ lai-é ke yit-thiàu thèu-nà-mô ya m̀-voi tiet chhai thi-song.”
[12] Ke fu-ngìn-kâ yu kóng: “Ngâ chú ngâ vòng, chhiáng chún sṳ́-ńg chai kóng yit-ki fa.” Vòng en-kóng: “Ngì kóng!”
[13] Fu-ngìn-kâ tui vòng kóng: “Ngì cho-má-ke voi sióng-tó hoi Song-ti ke chṳ́-mìn? Ngì pûn ngì ke lai-é liù-mòng chhai-ngoi, m̀-chún kì chón-lòi; ngì thèu-siên kóng ke chhiu yí-kîn thin-liáu ngì chhṳ-kâ ke chhui.
[14] Ngài-têu chhiòn-phu yit-thin voi sí, chhiong fu̍k-súi nàn-sû. Song-ti pin mò chhióng-chéu ngìn ke sâng-miang, chúng-he Kì thin-chho̍k yû phan-fap sṳ́ yit-ke liù-mòng ke ngìn chón-lòi.
[15] Ngâ chú ngâ vòng, ngài lòi hiong ngì kóng-fa he yîn-vi yû-ngìn hak ngài, só-yî sṳ́-ńg sióng, ngài yin-kôi tui vòng thì-hí, fe̍t-chá vòng voi cheu sṳ́-ńg só khiù ke cho.
[16] Ngài sióng vòng voi thâng, kiu sṳ́-ńg thot-lì ke sióng-oi chhṳ̀ ngài lâu ngâ lai-é, chiông ngài-têu tui Song-ti su Kì chṳ́-mìn ke thú-thi song chhù-thet ke ngìn.
[17] Sṳ́-ńg yu sióng, koet-vòng ke fa yit-thin voi ôn-ví ngài, yîn-vi koet-vòng chhiong Song-ti ke thiên-sṳ́ khiung-yong, nèn fûn-phe̍t sṳ-fî. Ngien Song-chú — ngì ke Song-ti lâu ngì khiung-ha!”
[18] Vòng en-kóng: “Ngài mun ngì yit-ke mun-thì, ngì yit-thin oi cheu-sṳ̍t fì-tap ngài.” Fu-ngìn-kâ kóng: “Ngâ chú ngâ vòng, chhiáng ngì kóng!”
[19] Vòng mun: “Kám he Yok-ap ham ngì lòi khien ngài ke?” Fu-ngìn-kâ en-kóng: “Ngài chhai ngâ chú ngâ vòng mien-chhièn fat-sṳ, ngì kóng ke mò m̀-chho̍k. Khok-sṳ̍t he ngì ke ngièn-soi Yok-ap fûn-fu ngài án-ngiòng cho, kâu ngài án-ngiòng kóng ke.
[20] Ngì ke ngièn-soi Yok-ap án-ngiòng cho he oi ván-fì liá-khien sṳ. Koet-vòng chhiong Song-ti ke thiên-sṳ́ án chhûng-mìn, nèn tî sṳ-song só-yû ke sṳ.”
[21] Heu-lòi, vòng tui Yok-ap kóng: “Ngài thùng-yi ngì án-ngiòng cho. Ngì hi chiông ke heu-sâng ngìn Ap-sâ-liùng tai-chón liá-vi lòi!”
[22] Yok-ap kiûng-kiûng kin-kin phu̍k chhai vòng mien-chhièn, kóng: “Ngâ chú ngâ vòng, Song-ti su-fuk pûn ngì! Liá-ha phu̍k-ngìn chang tî ngì pûn ngài ke ên-tién yû kí-thai, yîn-vi vòng tap-yin ngài ke chhiáng-khiù.”
[23] Só-yî Yok-ap hong hí-lòi, to Kî-sut hi, tai Ap-sâ-liùng chón Yâ-lu-sat-lâng.
[24] Chúng-he vòng ha-lin m̀-chún Ap-sâ-liùng he̍t chhai vòng-kiûng. Vòng kóng: “Ngài mò-oi khon-tó kì.” Só-yî Ap-sâ-liùng chón chhṳ-kâ ke vuk-hâ hi, mò hi kien vòng ke mien.
[25] Chhai chhiòn Yî-set-lie̍t, mò yit-sà chhiong Ap-sâ-liùng án yèn-tàu, ngìn-ngìn hiûn-mu, tui thèu-nà táng to kiok tái-hâ mò yit-si̍t-é khiet-tiám.
[26] Kì ke thèu-nà-mô chhin-chiâng, tak-ngièn oi chién yit-pái, na-mò chhiu voi thet-chhòng thet-phûn. Ke chién hâ-lòi ke thèu-nà-mô, cheu vòng-kâ ke phêu-chún hi-chhṳn, thai-yok chhûng lióng kûng-kîn.
[27] Ap-sâ-liùng yû sâm-ke lai-é, yit-ke moi-é; moi-é ôn-to Thap-mâ, sâng-to fî-sòng chiâng.
[28] Ap-sâ-liùng he̍t chhai Yâ-lu-sat-lâng lióng-ngièn, mò kien-ko vòng ke mien.
[29] Yèn-heu, Ap-sâ-liùng phai-ngìn hi hêm Yok-ap lòi, oi chhiáng kì hi hiong vòng khiù-chhìn, chúng-he Yok-ap m̀-hén lòi. Ap-sâ-liùng chai yit-pái phai-ngìn hi chhiáng Yok-ap, kì hàn-he m̀-hén lòi.
[30] Ap-sâ-liùng chhiu tui kì ke phu̍k-ngìn kóng: “Ngì-têu khon, Yok-ap ke thièn-yèn chhiu chhai ngài kak-piak, yû chung thai-ma̍k; ngì-têu hi piong-fó chiông kì sêu-thet.” Só-yî Ap-sâ-liùng ke-têu phu̍k-ngìn chhiu hi piong-fó sêu ke-te thièn.
[31] Yok-ap chhiu hí-sṳ̂n, to Ap-sâ-liùng vuk-hâ hi mun kì kóng: “Cho-má-ke ngì ke-têu phu̍k-ngìn piong-fó sêu ngài ke thièn nè?”
[32] Ap-sâ-liùng en Yok-ap kóng: “Ngài ham ngìn chhiáng ngì lòi, ngì m̀ lòi. Ngài sióng chhiáng ngì to vòng ke-vi hi thoi ngài kóng chhìn, mun kì cho-má-ke oi ngài lì-khôi Kî-sut chón-lòi; ngài hàn-he liù chhai ke-vi kha-hó. Liá-ha, chhiáng ngì vi ngài ôn-phài kî-fi hi kien vòng; na-he ngài yû chhui, chhiu pûn vòng chhṳ̀-sí ngài hó lé.”
[33] Só-yî, Yok-ap hi kien vòng, chiông Ap-sâ-liùng só-kóng ke hiong kì po-ko, vòng chhiu phai-ngìn hi ham Ap-sâ-liùng lòi. Ap-sâ-liùng lòi kien vòng, phu̍k chhai vòng mien-chhièn khúi-pai; vòng chhiu chîm Ap-sâ-liùng.