[1] Ammoo, jalqaba torbanii, guyyaa Dilbataa barii, dubartoonni sun axiraa fi dibata qopheeysan san, fudhatanii ti gara qabriitti deeman.
[2] Dhagaaniis qabricha irraa konkolaafamee ti arkan.
[3] Qabricha keeysa hogguu ol seennaan ammoo, reefka Gooftaa Yesuus hin agarre.
[4] Haala kanaan wareeranii odoo jiranii, dingatuma namoonni lama, kanneen wayaa walaqqisu uffatan, kunoo isaan cinaa dha dhadhaabbatan.
[5] Dubartoonni suniis hedduu birratanii ti lafuma ilaalan; namoonni sun ammoo, “Isa jiraataa maaliif warra du'an keeysa barbaaddu?
[6] Kunoo, inni as hin jiru, ka'ee ti jira! Galiilaa odoo jiruu, waan inni isinitti himee ture yaadadhaa!
[7] ‘Ilmi Namaa harka warra dilaawootaatti kannamuuf, fannifamuuf, guyyaa sadeeysaattiis du'aa ka'uuf deema’ jedhe” isaaniin jedhan.
[8] Hogguus isaan dubbii isaa qaxab jedhan.
[9] Bakka qabrii san irraa hogguu deebi'an, tana hundumaa ergamoota kudha tokkoowwanii fi warra kaan hundumaattiis ni odeeysan.
[10] Warri tana wajjiin ergamootatti odeeysan, Maariyaam Magdalaa, Yo'anaa, Maariyaam haadha Yaaqoobii fi ammaas dubartoonni biraa tiis turan.
[11] Jarri ammoo, dubbii maalaa-yaanii tan hundee hin qabne isaanitti fakkaattee ti, waan isaan odeeysaniis hin amanne.
[12] Haa tahu malee, Phexiroos ka'ee ti gara qabrii fiigee, gadi godhatee ilaallaan, kunoo huccuu kafanaa qofa arke; tana booddee waan tahe tana ajaa'ibaa ti achii deeme.
[13] Guyyuma san isaan keeysaa namni lama, gara ganda Emaahus jedhamu, kan Yerusaaleem irraa hanga kiilo metrii kudha tokkoo fagaatuu, deemaa ti turan.
[14] Isaan kun waan jidduu tana tahe hundumaa kaasanii, karaa irratti wajjiin haasawaa ti deemu turan.
[15] Odoo isaan haasawaa, irrattiis dudubbachaa deemanii, Yesuus ifumaa fuu isaanitti dhihaatee ti, isaaniin wajjiin deeme.
[16] Akka isa hin hubanneef ammoo, ijji isaanii qabamtee ti turte.
[17] Hogguus Yesuus, “Wanni isin deemaa wajjiin haasoytan tun maali?” jedhee isaan gaafannaan, gaddaan ija buusanii usaniituma dhadhaabbatan.
[18] Isaan keeysaa inni tokko kan Qileyoophaa jedhamu deebisee ti, “Warra Yerusaaleem jiraatan keeysaa waan achitti jidduu tana tahan kan hin beeyne, si'uma qofaa?” jedheeni.
[19] Inni ammoo deebisee, “Maaltu tahe?” isaaniin jennaan, isaan ammoo, “Waa'ee Yesuus nama Naazireet; inni nabiyyii dha ture, Rabbii fi nama hundumaa duratti hojii fi dubbittiis jabaa dha ture.
[20] Luboonni warri angafoonninii fi warri nu bulchaniis duuti akka itti faradamtuuf dabarsanii ti isa kannan; akkasitti isa fannisan.
[21] Nuti ammoo, kan Israa'el furuuf deemu isa, jennee abdannee ti turre; eeyye, irrattuu kun hundumaa eega tahe arra guyyaa sadeeysaa ti.
[22] Tana malees, warra keenya keeysaa dubartoonni tokko ganama bariisaa bakka qabrichaa dhaqanii ti, baasa nutti fidan.
[23] Isaan reefka isaa hin agarre; dhufanii maleeykoonni Rabbii itti mullatanii ti, ‘Yesuus jiraataa dha!’ akka isaaniin jedhan nutti himan.
[24] “Warra nu wajjiin turan keeysaa hangi tokko, gara qabrichaa dhaqanii ti, akkuma dubartoonni sun jedhan tahuu dha mirkaneeysan; isa ammoo hin agarre” jedhanii ti itti himan.
[25] Inni ammoo, “Isin gowwootuma akkami, waan nabiyyoonni dubbatan hundumaa amanuuf qalbiin teeysan akkam dhibooytuu dha.
[26] Kiristoos, dararama kana hundumaa fudhatee, ulfina isaatti galuun, barbaachisaa hin turree ree?” isaaniin jedhe.
[27] Inni niis Kitaaba Musee tii fi kitaabota nabiyyootaa hunduma keeysatti, bakka itti waa'ee isaa tiif dubbatu hundumaa isaaniif hiike.
[28] Akkasitti gara ganda jarri lamaan itti deemaa turanitti dhihaannaan, Yesuus akka waan dabree deemuu fakkaatee ti mullate.
[29] Isaan ammoo, “Kunoo, guyyaan dhihee ti jiraa, aduuniis seentee, nu wajjiin turi!” jedhanii jabeeysanii ti isa kadhatan; kanaaf isaan wajjiin turuuf ol seene.
[30] Jaraan wajjiin nyaatatti hogguu dhihaatees, biddeenticha fuudhee ti eeybisee, kukkutee tiis isaaniif kanne.
[31] Hogguus ijji isaanii ni banamteef, isa tahuus ni hubatan; inni ammoo ija isaanii duraa, masxuuraan dahate.
[32] Isaaniis, “Wayta inni karaa irratti nutti dubbachaa, Barreeyfama Qulqullootaas nuuf bane san, qalbiin teenya nu keeysatti mirqaantee mitii?” waliin jedhan.
[33] Hogguusuma ka'anii ti Yerusaaleemitti deebi'an; achitti ammaas barattoota kudha tokkanii fi warra isaaniin wajjiin walitti qabaman arkan.
[34] Warri walitti qabaman sun, “Gooftaan dhugumaan du'aa ka'ee ti jira, Simoonittiis mullatee ti jira” jechaa ti turan.
[35] Hogguus jarri lamaan, waan karaa irratti tahe hundumaa, ammaas biddeena kutuu isaa tiin, akkaataa itti isa beekuu dandayaniis ni odeeysan.
[36] Jarri lamaan tana odeeysaa oduma jiranii ti, Yesuus ifumaa fuu isaan jidduu dhaabbatee ti, “Nagayni isin wajjiin haa tahu!” isaaniin jedhe.
[37] Isaan ammoo ruuhaaniyyii waan arkan itti fakkaatee ti, nahanii sodaatan.
[38] Ammaas inni isaaniin, “Maaliif yaadaan rakkattan? Shakkiiniis maaliif qalbii teeysan keeysatti kakaati?
[39] Harkeen kiyyaa fi miillan kiyya kunoo milladhaa, anuma mataa koo tii, mee qaqqabadhaa na laalaa, ruuhaaniyyiin foonii fi lafee hin qabu, ani ammoo akkaan qabu ni agartu” jedheeni.
[40] Eega tana jedhe booda, harkeen isaa tii fi miillan isaa, isaan agarsiise.
[41] Isaan amanuu dadhabanii gammaduu fi ajaa'ibuu irra oduma jiranii ti, “Waan nyaatan takka illee asii qabduu?” jedheeni.
[42] Hogguus isaan kalluuna waadamaa muraa tokko kanninaaniif.
[43] Inni niis fudhatee ti fuula isaanii duratti nyaate.
[44] Tana booddees Yesuus, “Waytaan isin wajjiin ture, ana ilaalchisee, wanni Seera Musee keeysatti, nabiyyoota keeysatti, akkasumatti ammaas Kitaaba Faarfannaa keeysattiis barreeyfaman hundinuu, raawwatamuu dha qaba jedhee isinitti hime, kunoo kana gaa!” isaaniin jedhe.
[45] Eegasii Barreeyfama Qulqulluu hubachuu akka dandayaniif, qalbii isaanii ti baneef.
[46] “Kiristoos dararamuun, guyyaa sadeeysaattiis du'aa ka'uun akka isa irra jiru,
[47] toowbaanii fi oomfiin dilii dhaa, maqaa isaa tiin Yerusaaleemii jalqabee ummata hundumaatti akka lallabamuuf deemu, barreeyfamee ti jira” jedhee ti isaanitti hime.
[48] “Isiniis waan kanneeniif raga-baatuu dha.
[49] Kunoo, isa Abbaan kiyya isin abdachiise isiniif erguufiin deema, ammoo ol irraa hanga humna uffattanitti mandaricha keeysa turaa” isaaniin jedhe.
[50] Kana booddee Yesuus mandaricha keeysaa isaan baasee ti, naannoo Bitaaniyaa geeysee ti; harka isaa lamaanuu ol kaafatee ti isaan eeybise.
[51] Oduma isaan eeybisaa jiruu, isaan irraa gargar bahee ti, gara samiitti ol fudhatame.
[52] Isaaniis isaaf sagadanii ti, gammachuu guddoo dhaan Yerusaaleemitti deebi'an.
[53] Guyyuu tiis, Beeytal Maqdas keeysatti maqaa Rabbii galateeyfachaa ti turan.