[1] Jalqaba qoowlichaa tu ture; qoowlichi niis Rabbii wajji ture; qoowlichinuu Rabbi ture.
[2] Inni jalqabumaa kaasee Rabbii wajji ture.
[3] Wanti hundi niis isumaan tahe; waan tahe keeysaa hiis isaan malee kan tahe tokko illeen hin jiru.
[4] Jireenyi isa keeysa ture; jireenytichi suniis ifa namootaa ti ture.
[5] Ifichi dukkana keeysatti ifa, dukkanti garuu isa moohachuu hin dandeenye.
[6] Namticha Rabbi biraa ergame tokkoo tu ture, maqaan isaa tiis Yohannis jedhama.
[7] Inni kun ragaa tahee ti; namoonni hundinuu dubbii isaa tiin akka amananiif, waa'ee ificha sanaaf ragaa bahuuf dhufe.
[8] Inni ifichaaf raguma tahuuf qofaaf dhufe malee, inni mataan isaa ificha hin turre.
[9] Ifaan dhugaa, kan namayyuuf ifa kannu, gara addunyaa dhufaa ti ture.
[10] Inni addunyaa keeysa ture; ammaas biiyti addunyaa isumaan tan taate taatu illee, biiyti addunyaa garuu isa hin beeyne.
[11] Gara kanneen isaa turetti dhufe; kanneen isaa warri turan garuu isa hin simanne.
[12] Warra isa simatan hundumaa, kanneen maqaa isaattiis amananiif garuu, joollee Rabbii akka tahan isaan dandeeysise.
[13] Isaan kun Rabbi irraa dhalatan malee, dhiiga irraa, yookiin fedha foonii irraa, yookiin fedha dhiiraa irraa warra dhalatanii miti.
[14] Qoowlichi jasada tahee ti, nu jidduus jiraate. Ulfina isaa kan ni'imaa fi dhugaa dhaan guutamees agarre; ulfinni isaa tiis kan Ilmi tokkichi Abbaa isaa irraa arkatu ture.
[15] Yohannis waa'ee isaa tiif ragaa baha; qooqa isaa ol kaasee, “‘Inni ana booddee dhufu, ana dura waan tureef jecha ana irra caala’ jedhee waa'ee isaa kaniin dubbadhe, kunoo isa kana” jedhe.
[16] Guutummaa ni'imaa isaa irraa hundi keenya ni'imaa irratti ni'imaa fudhannee ti jirra.
[17] Seerri Musee dhaan kanname; ni'imaanii fi dhugaan garuu Yesuus Kiristoosiin arkaman.
[18] Nam tokko illeen takkaa Rabbi hin agarre, ilma tokkicha isa Abbaa cinaa ture sanii tu waa'ee isaa hiikee beeysise malee.
[19] Hogguu Yihudoonni Yerusaaleem irraa lubootaa fi Leewoota Yohannisitti erganii, “Ati eenyu?” jedhanii isa gaafachiisan, Yohannis,
[20] odoo hin rincicin, “Ani Kiristoos abdachiifamee miti” jedhee ti mullisee ragaa bahe.
[21] Warri ergamaniis deebisanii, “Eegasuu ati eenyu? Ati Eliyaasii?” jedhanii ti isa gaafatan. Inni ammoo, “Lakkii, ani isaa miti” jedhe. Isaan, “Ati nabiyyichaa ree?” isaan jennaan, “Miti” jedhee ti deebiseef.
[22] Isaaniis, “Eenyu ati? Warra nu erganitti waan deebifnu nutti himi; ati eenyu ifiin jetta?” isaan jedhan.
[23] Yohannis deebisee, “Isaayyaas nabiyyichi akkuma dubbatetti, ‘Ani sagalee namaa, tan karaa Gooftaan irra deemu diriirsaa’ jettee, huffee gammoojjii keeysa iyyitee dha” jedhe.
[24] Warri isatti ergaman kanneen Fariisota keeysaa turan.
[25] Itti dabalanii, “Ati Kiristoos, yookiin Eliyaas, yookiin nabiyyicha eega hin tahin, maaliif cuuphxa ree?” jedhanii ti isa gaafatan.
[26] Yohannis ammoo, “Ani bishaaniiniin cuupha, garuu tokko kan isin isa hin beeynee tu isin jidduu dhaabbata.
[27] Inni na booddee dhufu isa; ani ammoo haada kophee isaa tii illee hiikuuf nama gahuu miti” jedhee ti isaaniif deebise.
[28] Wanti tun hundinuu Bitaaniyaatti Yordaanos gama, bakka Yohannis itti cuuphaa turetti tahe.
[29] Guyyaa borumtii Yohannis odoo Yesuus gara isaa dhufaa jiru arkee, “Kunoo hoolaan Rabbii kan dilii addunyaa irraa dhiqu.
[30] ‘Namtichi ana booddee dhufu, ana dura waan tureef, ana irra caala’ jedhee waa'ee isaa kaniin dubbadhe, kunoo isa kana.
[31] Ani mataan koo isa hin beekuun ture, garuu sababniniin ani bishaaniin cuuphaa dhufeef, akka inni Israa'elitti mullifamuufis” jedhe.
[32] Yohannis ragaa baheefii, “Ruuhal Qudus akka himiimitti samii irraa gad bu'ee kan isa irra qubateen arke.
[33] Ani ifii fuu isa hin beekuun ture; garuu inni akkaan ani bishaaniin cuuphuuf na erge sun, ‘Namticha Ruuhal Qudus isa irratti gad bu'ee qubachuu agartu sun, isa, kan Ruuhal Qudusiin cuuphu’ jedhee ti anatti hime.
[34] Ani kunoo arkee tiin jira, inni kun ilma Rabbii tahuu, isaa ragaan baha” jedhe.
[35] Guyyaa borumtii dhaa Yohannis barattoota isaa keeysaa nama lama wajji achi dhaabbata ture.
[36] Yohannis hogguu Yesuus achiin dabru arkee ti, “Kunoo, hoolaan Rabbii” jedhe.
[37] Barattoonni Yohannis lamaan tana jechuu isaa dhageenyaan, Yesuus duukaa dha bu'an.
[38] Yesuus if duuba garagalee isa duukaa bu'uu isaanii agarraan, “Maal barbaaddan?” jedhee ti isaan gaafate. Isaan ammoo, “Yaa mu'allimuu, eeysa qubatte?” jedhanii tti deebisaniif; “Mu'allimuu’ jechuun “Barsiisaa” jechuu dha.
[39] Yesuus ammoo, “Kottaa tii laalaa!” jedhee ti isaaniif deebise. Barattoonni suniis deemanii, bakka Yesuus qubate arkanii, guyyaa sana isa bira oolan; wayti isaa akka sa'aatii kudhanii ti ture.
[40] Barattootta lamaan dubbii Yohannis dhagayanii, Yesuus duukaa bu'an keeysaa, tokko Indiriiyaas obboleeysa Simoon Phexiroos ture.
[41] Wanni Indiriiyaas dura godhe, obboleeysa isaa Simoon arkee, “Masiihicha agarre” jedhee ti itti hime; “Masiihi” jechuun “Kiristoos” jechuu dha; kuniis “Muudamaa” jechuu dha.
[42] Indiriiyaas akkasitti Simoon gara Yesuusitti fide; Yesuus isa laalee ti, “Ati Simoon ilma Yohannis; asii achi ‘Keefaas’ jedhamtee ti yaamamta” jedheeni. “Keefaas” jechuun afaan Griigitti “Phexiroos” jechuu dha; hiikaan isaa tiis “Dhagaa siibaa” jechuu dha.
[43] Guyyaa borumtiis Yesuus Galiilaa dhaquuf ka'e; Filiphoos agarraan, “Na duukaa bu'i!” isaan jedhe.
[44] Filiphoosiis akkuma Indiriiyaasii fi Phexiroos, nama magaalaa Beetesayidaa tii ture.
[45] Filiphoos Naatanaa'el arkee, “Kan Museen Kitaaba Seeraa keeysatti, nabiyyoonni niis ammaas kitaaba isaanii keeysatti waa'ee isaa barreeysan agarree ti jirra; inni nama Naazireet, Yesuus ilma Yoseef” jedheeni.
[46] Naatanaa'el hogguus, “Naazireet keeysaa wanti gaariin arkamuun ni malaa?” jedhee ti Filiphoos gaafate; Filiphoos ammoo, “Mee koottuu tii ilaali!” jedhee ti deebiseef.
[47] Yesuus, odoo Naatanaa'el gara isaa dhufaa jiruu arkee, “Kunoo ti, namni aslii Israa'el, kan sobni keeysa hin jirre” jedhee ti waa'ee isaa dubbate.
[48] Naatanaa'el, “Eeysatti na beeyta?” jedhee ti isa gaafate; Yesuus ammoo deebisee, “Filiphoos odoo si hin yaamin, muka habruu jalattiin si arke” jedheeni.
[49] Hogguus Naatanaa'el, “Yaa Mu'allima! Ati ilma Rabbii ti, ati mootii Israa'el!” jedheeni.
[50] Yesuus ammaas deebisee, “Muka habruu jalattiin si arke waaniin siin jedheef amantaa? Waan kana irra caalu illee arkuuf jirta” jedheeni.
[51] Itti dabalee tiis, “Dhugumaan isinitti hima, samiin banamtee, maleeykoonni Rabbii tiis ilma namaa irra odoo ol bahanii gad bu'anii arkuuf teeysu” jedheeni.