[1] Waa xiqqo booddee Yesuus mandarootaa fi gandeen keeysa deemee, Oduu Gammachuu Mootummaa Rabbii labsaa ti ture; barattoonni isaa kudha lamaaniis isaa wajjiin turan.
[2] Akkasumatti ammaas dubartoonni ruuhaanota hamoo fi dhukkuba adda addaa irraa fayyifamaniis, isa duukaa ni bu'u turan; isaaniis Maariyaam Magdalaa tan jedhamtu, tan ruuhaanonni hamoon torba keeysaa baafamaniis,
[3] Yo'anaa niitiin Kuuzaa, namticha kaadamaa mana Herodis ture, Susaanaa fi warri biraa tiis hedduu dha turan. Isaan kanneen qabeenya mataa isaanii tiin, Yesuusii fi barattoota isaa tiis, ni tajaajilu turan.
[4] Namoonni hedduun magaalaa adda addaa irraa, walitti qabamanii hogguu gara Yesuus dhufan; Yesuus fakkeenya kana isaanitti hime;
[5] “Namtichi tokko shanyii facaasuuf bahe; odoo facaasuu hangi tokko karaa cinaa bu'an, achitti namni irra ejjate; shimbirroonni niis funaannatanii ti nyaatan.
[6] Kaan ammoo lafa dhagaa kattaa qabdu irra bu'an; eega biqilan booda biyyeen isii reeqasa waan hin qabneef jecha ni xoolaqan.
[7] Shanyii keeysaa hangi kaan qoree keeysa bu'an; qoreeniis wajjiin biqilanii ti isaan huute.
[8] Warri kaan ammoo biyyee gaarii keeysa bu'an; biqilanii, guddatanii ti dachaa dhibba adduma addaan firii godhatan” jedheeni. Yesuus sagalee isaa ol fuudhee ti, “Gurra dhagayuun kan qabu haa dhaggeeyfatu!” jedheeni.
[9] Eegasii barattoonni isaa, “Hiikkaan fakkeenya kanaa maali?” jedhanii ti Yesuus gaafatan.
[10] Yesuus deebisee ti, “Hiccitii Mootummaa Rabbii beekuun isiniif kannamtee ti jirti; warra kaaniif ammoo, oduma laalanii akka hin agarreef, oduma dhagayanii akka hin hubanneef fakkeenyaan kannamaaf” isaaniin jedhe.
[11] “Hiikkaan fakkeenya namticha shanyii facaasuu tana; shanyichi Qoowlii Rabbii ti.
[12] Karaa cinaan, fakkeenya warra Qoowlii Rabbii dhagayanii, hogguusuma Sheeyxaanni dhufee akka isaan amananii najaa hin baaneef, qoowlicha qalbii isaanii keeysaa butatuu ti.
[13] Lafti dhagaa, fakkeenya warra qoowlicha dhagayanii gammachuu dhaan fudhatanii ti; ammoo hidda gadi fagoo waan hin qabneef jecha, waytumaaf amanu; hogguu fitinaan dhuftu irraa kukkufu.
[14] Lafti qoree, fakkeenya warra qoowlicha dhagayanii, cinqiin shoorarka'uun, taajirummaa fi qananiin jireenyaa itti dacha'anii isaan huunaan, firii godhatan odoo hin bilcheeysin kanneen hafanii dha.
[15] Lafti gaariin, fakkeenya warra qoowlicha dhagayanii, sirritti qalbii dhaan akka gaaritti fudhatanii, rakkina hundumaa obsanii warra firii godhatanii ti” jedheeni.
[16] “Nam tokko illeen ibsaa qabsiisee, taguuga jala yookiin siree jala hin kaahu; warri mana san seenan hundinuu ificha akka arkaniif, madabaa irra kaaya malee.
[17] Wanti dhooyfamte takka illeen ifatti bahuun isii hin haftu; ammaas wanni dhooysaan eegamees, kan odoo zaahir bahee hin beekamin hafu hin jiru.
[18] “Eegasuu akkamitti akka caqastan itti yaadaa! Nama qabuuf, itti dabalamee ti kannamaaf; nama waa hin qabne ammoo, hammuma silaa qabuu huu irraa fuudhama” jedheeni.
[19] Hogguus haati Yesuusii fi obboleeyyan isaa, isa barbaacha dhufan; ammoo hoddomina namaa tiif jecha isa bira gahuu hin dandeenye.
[20] Kanaaf namtichi tokko, “Haati tee tii fi obboleeyyan kee, ala dhaabbatanii ti jiruu, si arkuu dha barbaaduus” isaan jedhe.
[21] Yesuus ammoo deebisee, “Haati tiyyaa fi obboleeyyan kiyya kanneen Qoowlii Rabbii dhagayanii hojiin raawwatanii dha” jedheeni.
[22] Gaaf tokko Yesuus barattoota isaa wajjiin doonii seenee ti, “Koottaa mee, garba bishaanii kana gamatti haa ceenuu!” isaaniin jedhe; akkasitti bishaan irra karaa bu'an.
[23] Oduma doonii dhaan gama ceehuu irra jiranii ti, Yesuus achuma keeysa rafe. Ammaas bubbeen jabduun takka garba bishaanii irratti gadi bubbisaa ti dhufte; doonii isaanii tittiis bishaan guutuu jalqabnaan, lubbuu isaanii tii fuu ni sodaatan.
[24] Hogguus barattoonni Yesuusitti dhihaatanii, dammaysanii ti, “Yaa barsiisaa, barsiisaa, ka'i, kunoo nuti dhumuuf deemna!” jedhaniin. Hogguusuma dammaqee ti, bubbichaa fi bishaan wal darbaa ture saniis oofe; bubbeenii fi wal darbaan bishaanii tiis hafanii ti, nagayni sabate.
[25] Kana booddee inni barattoota isaa tiin, “Meerree amantiin teeysan?” jedheeni; isaan ammoo birrachaa ajaa'ibaa ti, “Namtichi kun eenyu? Kunoo, bubbee fi bishaaniis ni ajaja; isaaniis ni ajajamuuf” waliin jedhan.
[26] Doonii dhaan gara kutaa Gergeesaatti ceehan; inni niis fuullee Galiilaa ti ture.
[27] Yesuus bishaan qarqaratti hogguu bahe, kunoo namtichi magaalaa sanii, kan ruuhaanonni hamoon keeysa turan tokko itti dhufe. Namtichi bara dheeraaf qullaa dha deema ture, qabroota keeysa gala malee, manatti hin galu ture.
[28] Inni hogguu Yesuus arke iyyee ti, fuula isaa duratti lafa dhawee, sagalee guddaa dhaaniis, “Yaa Yesuus Ilma Rabbii Gooytaa, maal na irraa barbaadda? Sin kadhadhaa hadaraa na hin zaliilin!” jedheeni.
[29] Kuniis ruuhaanichi hamaan namticha keeysaa akka bahuuf, Yesuus isa ajajee waan tureefi. Wayta hedduu ruuhaan hamaan isatti ka'ee shanshalataan harkaa fi miila isaa hidhanii yoo eegan illee, hidhaa san ciree, humna ruuhaanota hamoo tiin, huffee gammoojitti ni geeyfama ture.
[30] Yesuus ammaas, “Maqaan kee eenyu?” jedhee gaafannaan, “Maqaan kiyya ‘Jundii dha’” jedhee ti deebise; sababni isaa tiis ruuhaanonni hamoon hedduun namtichatti waan galaniif.
[31] Ruuhaanonni hamoon hunquuftutti akka isaan hin ergine Yesuus kadhatan.
[32] Ededa gaaraa san irraas kunoo, bobbaan booyyee ni dheeduu turan; ruuhaanonni hamooniis, booyyee kanneenitti galuuf isa kadhannaan, inni niis isaaniiif hayyame.
[33] Hogguus ruuhaanonni hamoon namticha keeysaa bahanii, booyyee kanneenitti waan galaniif, bobbaan sun hundinuu hallayyaa irraa garba bishaanitti gadi konkolaatanii ti liqimfamanii ti karraqaman.
[34] Warri booyyee tiysaniis, waan tahe tana hogguu arkan orihanii ti, warra magaalaa keeysaattii fi warra biyyaattiis odeeysan.
[35] Ummanni dhagayaniis waan tahe san laaluuf bahanii ti, gara Yesuus dhufan. Achittiis kunoo namtichi ruuhaanonni hamoon keeysaa bahan, huccuu uffatee, kan qalbii fayyaa dhaan miila Yesuus jala taa'u arkan; hogguus hundi isaanii tuu ni sodaatan.
[36] Warri duraan achi turan kanneen akkaataa namtichi ruuhaa hamoon qabame itti fayye arkaniis, isaaniif odeeysan.
[37] Kana booddee ummanni kutaa Gergeesaa martinuu, hedduu waan sodaataniif jecha, nu biraa deemi jedhanii ti, Yesuus gaafatan; akkasitti inni niis doonii seenee ti achii deebi'e.
[38] Namtichi ruuhaanonni hamoon keeysaa bahan, “Si wajjiin haa deemuu?” jedhee isa kadhannaan; Yesuus ammoo, akkana jedhee ti isa if jalaa deebise;
[39] “Mana kee titti deebi'ii, waan guddaa Rabbiin siif godhe odeeysi!” isaan jedhe. Namtichi niis deemee ti, magaalaa keeysa naannawee, waan guddaa Yesuus isaaf godhe odeeyse.
[40] Hogguu Yesuus [garba bishaanii gamatti] deebi'e, ummanni hundinuu dhufa isaa eeggachaa waan turaniif jecha, gammachuun isa simatan.
[41] Kunoo, namtichi geggeeysituu mana sagadaa tokko, kan Yaayiros jedhamu dhufee ti, miila Yesuus jalatti kufee, gara mana isaa akka dhufuuf isa kadhate.
[42] Intalti takkittiin inni qabu, tan bara kudha lama geeyse, duraa yarattee ti turte. Hogguu Yesuus dhaquuf karaa bu'e, hoddominni namaa jihaa hundumaan isa hacuuce.
[43] Tana jidduttiis dubartiin takka tan bara kudha lama dhiiyni irraa yaa'uu dhaan rakkatte achi turte, ogeeysota fayyaa biraas dhaquu dhaan horii isii hundumaa fixxe; haa tahu malee, namni tokko illeen isii fayyisuu hin dandeenye.
[44] Isiin tun duuyda Yesuus duubaan dhuftee ti, handaara uffata isaa tuuynaan, hogguusuma dhiiyni irraa yaa'u cite.
[45] Yesuus ammoo, “Eenyuu tu na tuqe?” jedhee ti gaafate. Hundi isaanii “Anaa miti” jedhanii inkaarraan, Phexiroos, “Yaa barsiisaa, ummanni kunoo sitti marsee si dhiibaa ti jira” jedheeni.
[46] Yesuus ammoo, “Lakkii, namni tokko na tuqee ti jiraa, humniti na keeysaa bahuuniis, anatti dhagayamee ti jira” jedhe.
[47] Hogguus dubartittiin akka dhokachuu hin dandayin hubatte, hollachaa dhuftee ti miila Yesuus jalatti lafa dhooyte; ummata san hundumaa duratti, maaliif akka isa tuuyxee fi waytuma sanattiis akka fayyite ni himte.
[48] Hogguus Yesuus, “Yaa intala too, amantiin tee si fayyiftee ti jirtii, nagayaan deemi!” isii dhaan jedhe.
[49] Odoo inni tana dubbachaa jiruu, kunoo namtichi tokko mana namticha geggeeysituu mana sagadaa sanii irraa ergaa himuuf dhufee ti, Yaayirosiin, “Intalti tee duutee ti jirtii, asii achi barsiisaa hin laffaasisin!” jedheeni.
[50] Yesuus ammoo tana dhagayee ti Yaayirosiin, “Hin sodaatin, numa amani qofa! Isiiniis ni fayyiti” jedheeni.
[51] Mana bira hogguu gahees, Phexiroos, Yohannis, Yaaqoob akkasumatti ammaas abbaa intalaa tii fi haadha isii malee, namni biraa isaa wajjiin akka ol seenu hin hayyamne.
[52] Namoonni hundinuu intalattiif, lakkaawwachaa booyaa ti turan. Yesuus ammoo, “Hin booyinaa! Intalti rafutti jirti malee hin duune” jedheeni.
[53] Hundi isaanii ammoo, intalti akka duute waan beekaniif jecha itti koflan.
[54] Haa tahu malee, Yesuus harka isii qabee, “Intalo, ol ka'i!” jedhee ti yaame.
[55] Hogguusuma lubbuun itti deebitee, ol kaate; inni ammaas waan nyaattu akka kannaniif ajaje.
[56] Haawwan isii gammachuun if wallaalan; Yesuus ammoo, waan tahe kana eenyutti illee akka hin himne isaan ajaje.