[1] Hogguus Yesuus barattoota isaa, odoo hin hifanne wayta hundumaa, kadhachuun akka isaan irra jiru barsiisuuf jecha, fakkeenya tokko itti hime.
[2] “Daanyaa Rabbi hin sodaanne, kan namaas hin kabajne tokkoo tu, magaalaa tokko keeysa ture.
[3] Mandaruma san keeysa ammaas gursummeeytii takka, tan hogguu isatti deddeebitee, ‘Adawwii tiyya irratti firdii qaceelaa naaf kanni!’ jettee kadhattuu tu ture.
[4] Inni ammoo rincicee ti hanga takka dubbii lafa irra duraa harkise; booddee ammoo innummaan ifiin, ‘Ani Rabbi sodaachuu baadhuus, namni maal naan jedhaa illee qabaachuu dhabuus;
[5] gursummeeytiin tun waan ana hiffifteef jecha, asii achi deddeebitee akka ana hin dadhabsiifneef, niin faradaaf’ jedhee ti dubbate” jedhe.
[6] Gooftaan as irratti, “Waanuma daanyaan firdii jallaa kun jedhu dhaggeeyfadhaa!
[7] Rabbi ammoo warra filatamoo isaa, kanneen halkanii fi guyyaa isaatti iyyataniif, haqa isaanii hin baasuufii? Yookiin lafa irra duraa harkisinnaa?
[8] Ani isinittiin hima, inni daddafiin haqa isaanii baasaaf; haa tahu malee, Ilmi Namaa wayta dhufu, amantii lafa irratti ni arkaa laataa?” jedhe.
[9] Yesuus namoota hanga tokko, kanneen qaceelummaa isaanitti if amananii, warra kaan hundumaa tuffatanitti, fakkeenya kana hime.
[10] “Jara lamaa tu kadhata godhuuf jecha, Beeytal Maqdas seenan; tokko Fariisticha, inni kaan nama qaraxa guurtuu dha turan.
[11] Fariistichi ol ka'ee ti, dhaabbatee garaa isaa keeysatti, ‘Yaa Rabbi, akka namoota kaanii, warra saamtuu, jalloota, ejjitoota yookiin, akka namticha qaraxxuu kanaa illee waaniin hin tahiniif siin galateeyfadha.
[12] Torbaan keeysaa guyyaa lama niin soomana; waaniin arkadhu hundumaa keeysaahiis kudhan keeysaa tokko niin kanna’ jedhee ti kadhate.
[13] Inni qaraxa guuru sun ammoo, achi fagaatee dhaabbatee, ija isaa tiin illee gara samii odoo ol hin ilaalin, qoma isaa if dhawaa, ‘Yaa Rabbi, ani nama dilaawaa dhaa naaf araarami!’ jedhe.
[14] Ani isinittiin hima, namticha kaan odoo hin tahin, namtichi kun Rabbi duratti qaceelatti lakkaawamee ti mana isaatti gala; kan ol if kaasu eenyu illeen gadi qabama, kan if gadi qaqqabu ammoo ol kaafama” jedhe.
[15] Yesuus harka isaa akka isaan irra kaayuuf, namoonni daa'imman isatti ni fidu turan; barattoonni kana hogguu arkan, oofanii ti isaan dhoorkan.
[16] Yesuus ammoo daa'imman kana yaamee ti, “Dhiisaa, daa'imman gara kiyya haa dhufanii, hin dhoorkinaa, Mootummaan Rabbii kunoo warra akkanaa tiif taati.
[17] Dhugumaan isinitti hima, eenyu illeen Mootummaa Rabbii akka daa'imni fudhatutti kan hin fudhanne, gonkumaa itti hin galu” jedhe.
[18] Yihudootaa keeysaa namtichi beekamaan tokko, “Yaa barsiisaa gaarii, jireenya bara baraatti galuuf maal haa godhu?” jedhee ti isa gaafate.
[19] Yesuus ammoo deebisee, “Maaliif gaarii naan jetta? Rabbii tokkicha qofa malee, namni gaariin tokko illeen hin jiru.
[20] Heera isaa ni beeyta, ‘Hin ejjin, zinaa hin godhin, hin ajjeesin, hin hatin, kijibaan nama irratti ragaa hin bahin, abbaa kee tii fi haadha tee tiif kabajaa godhi!’” jedheeni.
[21] Namtichi ammoo, “Kana hundumaa ijoollummaa kiyya irraa jalqabee raawwachaa tiin jira” jedheeni.
[22] Yesuus hogguu tana dhagaye namtichaan, “Amma illee waan takkaa tu si irraa hafa, waan qabdu hundumaa gurgurii tii, warra deegoof hiri, samii irrattiis badhaadhinni walitti siif qabama; eegas, koottuu ana duukaa bu'i!” jedheeni.
[23] Namtichi ammoo hogguu tana dhagaye, taajira diittaa waan tureef jecha, hedduu dha gadde.
[24] Yesuus gadda namtichaa hogguu arke, “Warra taajirootaaf Mootummaa Rabbii seenuun akkamitti rakkoo dha.
[25] Taajirri tokko Mootummaa Rabbii seenuu irra, gaalli qaawa lilmee keeysaan hulluuquu tu irra sablata” jedhe.
[26] Warri tana dhagayaniis, “Akkana taanaan, eenyuu tu najaa bahuu dandaya?” jennaan,
[27] Yesuus ammoo, “Wanni namaaf hin dandayamne, Rabbiif ni dandayama” jedhee ti deebiseef.
[28] Phexiroos hogguus, “Kunoo, nuti qa'ee teenya dhiifnee si duukaa buunee ti jirra” jedheeni.
[29] Yesuus ammoo, “Dhugumaan isinitti hima, nam tokko illeen, mana, niitii, yookiin obboleeyyan yookiin abbaa fi haadha, yookiin joollee isaa, sababa mootummaa Rabbii tiif jecha kan dhiise;
[30] bara jireenya isaa keeysatti dachaa hedduu caalaa kan hin arkanne hin jiru; bara dhufutti ammoo jireenya bara baraatti gala” isaaniin jedhe.
[31] Yesuus eegasii barattoota kudha lamaan kophaatti baasee ti, “Kunoo, gara Yerusaaleem ol bahuu keenya, waa'ee Ilma Namaa tiif nabiyyootaan wanni barreeyfame martinuu, ni raawwatama.
[32] Harka saba Israa'el hin tahinitti ni kannama, itti ni hanjamama, ni arrabsama, ittiis ni tufama;
[33] niis ni tumu, ni ajjeesuus, inni ammoo guyyaa sadeeysaa dhaa du'aa ni ka'a!” isaaniin jedhe.
[34] Barattootaaf dubbiin tun takka illee nuu hin galleef, ma'anaan jecha kanaa isaan jalaa dhokattee ti turte, waanuma jedhamee huu qabachuu hin dandeenye.
[35] Yesuus wayta Yerikootti dhihaate, namtichi jaamaan tokkoos, karaa cinaa taa'ee, dhoortoo kadhachaa ti ture.
[36] Namoota dila dabraa jiru dhagayee ti, maal akka tahe isaan gaafate.
[37] Isaan ammoo, “Yesuus nama Naazireetii tuu, asiin dabraa jira” jedhanii ti itti himan.
[38] Akkasitti inni, “Yesuus, yaa ilma Daawwid naa rahamati!” jedhee ti iyye.
[39] Warri fuula dura deeman ammoo, “Cal-jedhi!” jedhanii ti isa oofan; inni ammoo daranuu iyyaa ti, “Yaa Ilma Daawwid, na maari!” jedheeni.
[40] Hogguus Yesuus dhaabbatee ti, namticha jaamaa san gara isaa akka fidaniif ajaje; namtichi niis gara isaa ti dhihaate.
[41] Yesuus ammaas, “Maal akkaan siif godhu barbaadda?” jedhee ti isa gaafate; hogguus inni, “Yaa Gooftaa koo, ani arkuun barbaada!” jedhee ti deebiseef.
[42] Yesuus ammaas, “Amantiin tee si fayyifte, agartuun tee siif haa banamtu” isaan jedhe.
[43] Hogguusuma ijji isaa banamteef; namtichi niis Rabbiif hamdii dhiheeysaa ti, Yesuus duukaa bu'e. Namoonni hundinuu hogguu tana arkan, Rabbiif hamdii dha galchan.