[1] Yesuus waan hundumaa ummata dhageeysisee eega raawwatee booddee, Qifirnaahom deeme.
[2] Kaadamaan abbaa dhibbaalaa tokko, kan inni hedduu mararfatu, duraa dhukkubsatee yaratee ti ture.
[3] Abbaan dhibbaalaa waa'ee Yesuus dhagayee ti, akka dhufee kaadamaa isaa du'a irraa oolchuuf jecha manguddoota Yihudootaa itti ergate.
[4] Isaaniis hogguu gara Yesuus dhufan, gadi jabeeysanii ti isa kadhatan, “Namtichi kun, akka ati tana gootuuf nama malu.
[5] Inni, nama ummata keenya jaalatu, mana sagadaa tiis kan nuuf ijaare isa” jedhaniin.
[6] Akkasitti Yesuus ka'ee manguddoota saniin wajjiin deeme. Abbaan dhibbaalaa ammoo Yesuus mana isaatti hogguu dhihaate, dhaamsa akka itti himaniif firoota isaa itti ergee, “Yaa Gooftaa if hin dararin, ati wixina mana kiyyaa jala akka seentuuf ani nama gahu miti.
[7] Kanaaf jechaan, ani ifii koo tii si bira dhufuuf nama gahu anatti hin fakkaatu; achumaa jecha tokko qofa dubbadhu, kaadamaan kiyyaas ni fayya.
[8] Aniis bar hoogganaa na ajaju niin qabaa, ammaas loltuus if jalaa niin qaba. Isa tokkoon ‘Deemi!’ yoon jedhe ni deema, kaaniiniis ‘Koottu!’ yoon jedheen ni dhufa; kaadamaa kiyyaan ‘Kana godhi!’ yoon jedheen ni godha” jedhe.
[9] Yesuus tana hogguu dhagaye ajaa'ibee ti, warra isa duukaa jiranitti garagalee ti, “Ani Israa'el keeysatti illee amantii guddoo akkanaa takkaa tuu hin agarre” jedheeni.
[10] Warri ergaman sun mana abbaa dhibbaalaatti hogguu deebi'an kaadamaan sun duruun fayyee ti arkan.
[11] Eegasii Yesuus magaalaa Naayin jedhamtu takka dhaqe; barattoonni isaa tii fi namoonni hedduun isaa wajjiin dhaqan.
[12] Inni balbala keellaa mandarichaatti hogguu dhihaate, kunoo namoonni reefka baadhatanii ti bahuu irra turan; gurbaan du'e suniis haadha isaa gursummeeytiif ilma tokkicha ture. Namoonni magaalaa sanii hedduun haadha isaa wajjiin turan.
[13] Gooftaan hogguu isii arke nahee tiif, “Hin booyin!” jedheeni.
[14] Itti dhihaatee wasaasicha harkaan qabannaan, warri baadhatan ni dhaabbatan; inni ammoo, “Dargaggeeysana, ka'iin siin jedha!” jedheeni.
[15] Hogguusuma inni du'ee ture ol godhatee taa'ee, dubbachuus jalqabe; Yesuus akkasitti haadha isaa tiif deebise.
[16] Hundi isaanii tiis birratanii ti, “Nabiyyii guddaa tu nu keeysatti mullate; Rabbi ummata isaa tiif dirmate!” jedhanii ti Gooytaaf hamdii dhiheeysan.
[17] Oduun tuniis guutummaa Yihudaa tii fi naannoo sanii hunduma wal geeyse.
[18] Barattoonni Yohannis waan kanneen hundumaa isatti himan; as irratti Yohannis barattoota isaa keeysaa lama ifitti yaamee ti,
[19] Gooftatti isaan ergee ti, “Inni dhufuuf deemu sihi moo, yookiin kan biraa haa eeggannu?” jedheeni.
[20] Hogguus warri ergaman gara Yesuus dhufanii ti, “Yohannis cuuphaan, ‘Inni dhufuuf deemu sihi moo, yookiin kan biraa haa eeggannu?’ jennee akka si gaafannuuf sitti nu erge” jedhaniin.
[21] Waytuma san Yesuus namoota hedduu uzrii isaanii irraa, da'iifummaa isaanii irraa, ruuhaanota hamoo irraahiis fayyise; jaamoota hedduufiis ija bane.
[22] Warra ergamaniiniis, “Deebi'aa tii, waan agartanii fi waan dhageeysaniis Yohannisitti himaa! Warri jaaman ni arku, naafoonni ni deemu, dhukkuba coraa tiin warri gaddaafaman ni fayyu, dhegelaan ni dhagayu, warri du'aniis ni ka'u, miskiinootaafiis Wangeelli ni lallabama.
[23] Namni mamee anatti hin gufanne gammachuu akkam qabaata!” jedheeni.
[24] Ergamoonni Yohannis eega deeman booddee, inni waa'ee Yohannis Cuuphaa namootatti dubbachu jalqabe; “Maal daawwachuuf huffee gammoojjii dheeyxan? Gobeensa qilleensi raasuu?
[25] Yookiin maal daawwachuuf baatan? Nama uffata bareedaa qaama irraa miidhagu uffatee? Warri uffata miidhagu uffatanii fi qananitti jiraatan, mana mootummaa keeysa jiru.
[26] Mee anumatti himaa, maal daawwachuuf baatan? Nabiyyii dhaa? Eeyye, nabiyyii irraa huu kan caaluun isiniin jedha.
[27] Barreeyfamni Qulqulluun waa'ee Yohannis laalchisuun, ‘Ilaa kunoo, karaa kee akka siif qopheeysuuf, ergamaa kiyya si duran erga’ jedhee dubbatee ti jira.
[28] “Ani isinittiin hima, nama tahee lafa irratti kan dhalate keeysaa, Yohannis irra kan caalu hin jiru; haa tahu malee, Mootummaa Rabbii keeysatti inni hundumaa irra xiqqaatu illeen isa irra ni caala” jedhe.
[29] Ummanni hundinuu tana hogguu dhagayan, warri qaraxa fuudhan illeen abbaa haqummaa Rabbiif quudhanii ti, cuuphaa Yohannisiiniis ni cuuphaman.
[30] Fariisonninii fi barsiisonni seeraa ammoo, Yohannisiin cuuphamuu irraa ooluu dhaan waan Rabbi isaaniif yaade, irratti didan.
[31] Yesuus itti dabalee ti, “Ummata dhaloota ammaa kana maalittiin fakkeeysa? Maal fakkaatuusi?
[32] Isaan akka joollee dirree magaalaa keeysa tattaa'anii, ‘Ulullee isiniif afuufnaan, sirbuu dha diddan; lakkaawannee faarsinaaniis booyuu dha diddan’ jedhanii walitti wacanii ti.
[33] Yohannis Cuuphaan hogguu dhufe, biddeena hin nyaatu, daadhiis hin dhugu ture; isin ammoo, ‘Sheeyxaana qaba’ jettaniin.
[34] Ilmi Namaa hogguu dhufe, ni nyaata ni dhugaasi; isin ammoo ‘Kunoo nama bololaa fi farshaanaa, saahiba warra qaraxxuu tii fi warra tuffatamoo’ jettuuni.
[35] Haa tahu malee, hikmaan Rabbii sirrii tahuun joollee isii hundumaan mirkanooyte” jedhe.
[36] Fariisota keeysaa tokko nyaataaf isa afeerraan, Yesuus mana Fariistichaa seenee ti maadditti dhihaate.
[37] Magaalaa saniis dubartii dilooytuu takkaa tu ture; Yesuus mana Fariistichaa maadditti dhihaatee akka jiru hogguu dhageeyse, bilqaaxa axira Alabaasxaraa fudhattee ti dhufte.
[38] Isa duubaan dhaabbattee odoo boochuu, imimmaan isii tiin miila isaa jiifnaan, rifeensa mataa isii tiin irra hayxee ti, miila isaa dhudhungattee axiraas irratti dhangalaafte.
[39] Fariistichi isa afeere sun tana hogguu arke, “Namtichi kun silaa dhugumaan nabiyyii tahee, dubartiin miila isaa qaqqabattu tun dhalaa akkam akka isiin taate, silaa ni beeka ture; isiin kunoo dilooytuu dha” jedhee ti garaa isaa keeysatti yaade.
[40] Yesuus ammoo deebisee ti, “Yaa Simoon, waaniin sitti himuun qaba” jennaaniin, inni ammoo, “Maal yaa barsiisaa?” jedheeni.
[41] “Namtichi tokko, jara lama irraa horii qaba ture, isa duraa irra qarshii dhibba shan, isa lammeeysaa irra ammoo qarshii shantamii tu ture.
[42] Isaan lachuu waan deebisaniif dhabnaan akkasumatti dhiiseef; jara lamaan san keeysaa kam tu abbaa horii kana caalatti jaalata?” jedheeni.
[43] Simoon hogguu deebisu, “Namticha qarshiin dhibbi shan dhiifamtee fii tu caalchisee jaalata anatti fakkaata” jedheeni. Yesuus ammaas, “Dhuga baanta”.
[44] Gara dubartitti fuula deebi'ee ti, Simooniin, “Dubartii tana agartaa? Ani mana kee dhufnaan, ati bishaan miilaa ti illee anaaf hin fichisiifne; isiin ammoo, imimmaan isii tiin miila kiyya jiiftee ti, rifeensa mataa isii tiiniis irraa hayxe.
[45] Ati hogguu na simatte ana hin dhunganne, isiin ammoo, eega asitti na agartee jalqabdee, miila kiyya dhungachuu irraa gargar hin dhaabne.
[46] Ati mataa kiyya illee zeeta na hin dibne; isiin ammoo, miila kiyya axira na dibde.
[47] Tanaaf jecha ani dhugumaan sitti hima, isiin hedduu waan jaalatteef jecha, diliin isii tan hedduu turte, isiif dhiifamte. Namni diliin waa xiqqo oomfii godhamteef, waa xiqqo jaalata.”
[48] Achi irratti Yesuus deebisee isiin akkana jedhe, “Dilii tee oomfii siif godhaman.”
[49] Hogguus warri isaa wajjiin maadditti taa'anii turan, akkana waliin jechuu dha eegalan, “Kun eenyu, kan dilii namaaf oomfii godhu?”
[50] Kana booddee Yesuus dubartittii dhaan, “Amantiin tee si fayyiftee ti jirtii, nagayaan deemi!” jedheeni.