[1] Warri qaraxa guuranii fi warri tuffatamoon adda addaa tiis isa dhaggeeyfachuuf itti dhihaatan.
[2] Fariisonninii fi barsiisonni seeraa ammoo, “Namtichi kun dilaawoota ni simata, isaanii wajjiiniis ni nyaata” jechaa ti Yesuus irratti guunguman.
[3] As irratti Yesuus fakkeenya kana isaanitti hime,
[4] “Isin keeysaa namni tokko, kan hoolaa dhibba qabu, dhibba san keeysaa tokko yoo duraa bade, sagaltamii saglanuu dirreetti dhiisee, isa badde san hanga arkatutti barbaacha kan hin deemne eenyu mee?
[5] Hogguu arkatees, gammachuuni gurmuu isaa irra kaayata.
[6] Hogguu manatti galees, firoota isaa tii fi olloota isaa yaamee ti, ‘Hoolaa kiyya kan na duraa bade waaniin arkadheef jecha anaa wajji gammadaa!’ jedhaan.
[7] Akkuma kanatti, qaceeltota sagaltamii saglan warra toowbachuun isaan hin barbaachifne caalaa, dilaawaa toowbate tokkoof jecha, samii irratti gammachuun akka taatuun isinitti hima” jedhe.
[8] Itti dabalee ammaas, “Dubartiin takka tan qarshii kudhan qabdu, kurnan san keeysaa tokko yoo duraa bade, ibsaa ibsitee mana isii hartee, hanga arkattutti tan fardeeyfattee hin barbaanne eenyu?
[9] Hogguu arkattees firoottan isii tii fi olloota isii yaamtee, ‘Qarshii kiyya kan na duraa bade waaniin arkadheef anaa wajji gammadaa!’ jetti.
[10] Haaluma kanatti, dilaawaan tokko toowbatee karaa Rabbii hogguu deebi'u, maleeykoonni Rabbii akka gammadaniin isinitti hima” jedhe.
[11] Yesuus itti furee, “Namticha tokko kan joollee dhiiraa lama qabuu tu ture.
[12] Ilmi xiqqaan abbaa isaa tiin, ‘Yaa abbaa kiyya, qabeenya kee keeysaa waan na gahu miraaza kiyya naaf kanni!’ jennaan, abbaan isaanii tiis waan qabu hundumaa ilmaan isaa lamaaniif gargar hire.
[13] Guyyaa muraasa booddee ilmi xiqqaan sun waan qabu hundumaa walitti qabatee, mana abbaa isaa tii bahee ti fagoo deeme; achittiis akka malee jiraachuu dhaan horii isaa hundumaa istiraafe.
[14] Hogguu inni waan qabu hundumaa fixe, abaar jabaan sanitti bu'e; kanaaf rakkoon isa mudatte.
[15] Akkasitti deemee ti nama dhaloota sanii tokkotti maxxane; namtichi niis booyyee akka tiiysuuf gara lafa isaatti isa erge.
[16] Beelti jabeeysinaan, hashara booyyeen nyaattuun garaa guuttachuu ni kajeela ture, ammoo sanuma illee namni isatti kannu hin turre.
[17] “Hogguus gurbichi qalbii isaa keeysatti, ‘Warri mo'oya abbaa kiyyaaf hojjatanii biddeenni isaan irraa hafu misti kumi? Ani ammoo asittiin, beelaan du'utti jira.
[18] Ka'ee tiin gara abbaa kiyyaa deemee, “Yaa abbaa koo, Rabbii fi sittiis yakkee tiin jira.
[19] Asii achiis ani ilma kee jedhamuuf hin gahuu, hojjatoota kee keeysaa akkuma tokkootti na lakkawiin jedhaani’” jedhe.
[20] Akkasitti ka'ee ti, gara abbaa isaa dhufe; abbaan isaa ammoo fagotti isa arkee ti, garaan isaaf nahee, isa afaan fiigee harka itti maratee ti dhudhungate.
[21] Ilmi isaa tiis, ‘Yaa abbaa kiyya, ani Rabbii fi sittiis yakkee tiin jira, asii achi ani ilma kee jedhamee yaamamuuf hin gahu’ jedheeni.
[22] Abbaan isaa ammoo kaadamtoota isaa tiin, ‘Dafaa tii uffata keeysaa kan caalatti bareedu fidaa tii itti uwwisaa, hamartii quba isaatti kaayaa, kophees miila isaatti kaayaa.
[23] Dibicha gabbataa san fidaa tii qalaa, nyaannee haa gammadnuu!
[24] Ilmi kiyya kun du'ee ti ture, kunoo deebi'ee ti jiraate, badee ti ture, kunoo arkameesi’ jedhe. Akkasitti gammaduu jalqaban.
[25] “Hanga ammaa, ilmi namtichaa angaftichi ooyiruu keeysa ture; deebi'ee manatti hogguu dhihaate, sagalee weeyduu tii fi tan sirbaa ti dhagaye.
[26] Hogguus hojjatoota keeysaa tokko yaamee ti, ‘Maaltu tahe?’ jedhee gaafate.
[27] Inni niis deebisee, ‘Obboleeysa kee tii tu deebi'ee gale; kanaaf nagayaa fi fayyaa waan isa arkeef jecha, abbaan kee dibbicha gabbataa dha qalchiise’ jedheeni.
[28] As irratti ilmi angaftichi aaree ti manatti galuu didnaan; hogguus abbaan isaa itti gadi bahee ti, ol galchuuf sossobe.
[29] Inni ammoo deebisee abbaa isaa tiin, ‘Kunoo, ani bara kanneen hundumaa akka gabrichatti siif hojjachaa tiin jira; takkaa amrii tee tiis didee hin beeku, ati ammoo ilmoo re'ee takka illee hiriyoota kiyyaan wajjiin akkaan itti gammaduuf takkaa anaaf kannitee hin beeytu.
[30] Amma ammoo ilmi kee kan qabeenya kee hundumaa ejjitoota wajjiin fixe kun deebi'ee dhufnaan, kunoo dibbicha gabbataa dha qalteef’ jedheeni.
[31] Abbaan isaa ammaas deebisee, ‘Yaa ilma kiyya, ati wayta hundumaa anaan wajjiin jirta, wanniniin ani qabu hundi niis kee ti.
[32] Amma ammoo obboleeysi kee kun, du'ee kan ture, deebi'ee waan jiraateef, badee tiis kan ture, waan arkameef jecha, fanxaziyyaa goonee gammaduu tu nu irra jira’ jedheeni” jedhe.