[1] Yesuus barattoota isaa tiin ammaas, “Namtichi taajirri tokko, qabeenya isaa hundumaa irratti itti gaafatamaa, hoji deemsiftuu tokko qaba ture; hoji deemsiftuun isaa suniis, qabeenya isaa akka duraa bittimsaa jiru, namtichatti ni himame.
[2] Hogguus namtichi isa yaamsisee ti, ‘Maal wanniniin si irratti dhagayu tun? Gabaasa hojii itti gaafatamummaa tee tii fidi! Asii achi hojii tiyya deemsisuu hin dandeeysu’ isaan jedhe.
[3] Hogguus hojii deemsiftuun sun garaa isaa keeysatti, ‘Alaqaan kiyya hojii tana irraa hogguu na baasu, maal godhuun qaba? Qonna illee hin dandayu, dhoortoo kadhachuufiis, niin qaanfadha’ ifiin jedhe.
[4] ‘Hogguun ani hojii tana irraa baafamu, namoonni akka ifitti na fudhataniif, amma waaniin godhu anaa tu beeka’ jedhe.
[5] Warra gooftaan isaa, liqii irraa qabu hundumaa, tokko tokkoon yaamee ti, kan duraa tiin, ‘Liqiin gooftaa kiyyaa hammam tu si irra jira?’ jennaan.
[6] Namtichi niis, ‘Dhadhaa ejersaa tanakaa dhibba’ jedhee ti deebise. Hoji deemsiftuuniis namtichaan, ‘Hoodho kunoo, fiirmaa liqii si irra jirtuu, taa'ii tii, dafii shantama jedhii barreeysi’.
[7] Kan biraa tokkoon ammaas, ‘Liqiin hammam tu si irra jira?’ jennaan, inni niis, ‘Qamadii daawullaa dhibba’ jedhe. Isa kanaaniis, ‘Hoodho kunoo, fiirmaa liqii si irra jirtuu, saddeettama jedhii barreeysi!’ isaan jedhe.
[8] “Gooftichi niis, hoji deemsiftuu hin amanamne san, miliquu dandayuu isaa tiif jecha, ni quudheef; dhaloonni ammaa kun, joollee ifaa irra caalaa, akka itti wal jalaa miliqaa wajjiin jiraatan ni beeku.
[9] Ani isinittiin hima, qabeenya addunyaa irraa tiin, ifii keeysaniif fira ittiin horadhaa; inni eega dhume booda, bakka jireenya bara baraatti ni simatamtu!” jedhe.
[10] Yesuus itti furee, “Namni waan xiqqoo irratti aamina tahe, waan guddaa irrattiis amanamaa ni taha; waan xiqqoo irratti aamina kan hin tahin, waan guddaa irratti amanamaa hin tahu.
[11] Isin, warra qabeenya addunyaa irrattuu aamina hin tahinitti, qabeenya dhugaa ammoo eenyumaa tu amanee isinitti kanna ree?
[12] Qabeenya nama biraa irratti aamina yoo tahuu baattan, qabeenya keeysanuu [isa dhugaa] eenyuu tu isinitti kanna ree?
[13] Gabrichi tokko gooftaa lamaaf ajajamuu hin dandayu; isa tokko jibbee, isa kaan jaalata, isa tokkoof aamanaa tahee isa kaan ammoo ni tuffata. Akkasuma isiniis Rabbii fi horiis kaadamuu hin dandeeysan” jedheeni.
[14] Fariisonni warri horii jaalatan, tana hundumaa dhagayanii ti, Yesuusitti hanjaman.
[15] Inni ammoo deebisee, “Isin namoota biratti qaceelota if godhuu dha barbaaddu, Rabbi ammoo garaa keeysan ni beeka; wanni namoota jiddutti, gatiin guddaan kannamuuf, Rabbi biratti ammoo jibbamaa dha.
[16] Seerrinii fi nabiyyoonni hanga bara Yohannis cuuphaatti turan, eegasii jalqabee Wangeela Mootummaa Rabbii tu lallabamaa jira, namayyuu itti galuuf dhiibbachaa ti jira.
[17] Seera keeysaa qafxiin takka hafuu irra, samii fi dachiin dabruu tu irra sablata.
[18] “Namni jaartii isaa hiikee tan biraa fuudhu hundinuu, zinaa dha godha, dubartii jaarsi isii dhaa hiike kan fuudhuus zinaa dha godha” jedheeni.
[19] Ammaas kunoo, “Namticha taajira tokkoo tu ture; inni niis uffata liinoo wariiqa aslii godhatee, guyyuu tuu, jireenya qananii nama jiraatu ture.
[20] Karra isaa dura ammoo, miskiinticha Alaazaar jedhamu, kan madaan qaama isaa fuutee tu ciisa ture.
[21] Inni hambaa gabatee taajirtichaa irraa bubu'u nyaachuu dha kajeela ture; saroonni niis dhufanii madaa isaa ni arraabu turan.
[22] Gaaf tokko namtichi deegaan sun du'ee ti, maleeykoota Rabbii tiin Abrahaam cinaa geeyfame; ammaas taajirtichi saniis du'ee ti awwaalame.
[23] Jahannam keeysatti azzabamaa odoo jiruu ol laalee, Abrahaam fagotti, Alaazaariis isa cinatti arke.
[24] Hogguus, ‘Yaa abbaa kiyya Abrahaam, naaf nahi; fiinxa quba isaa bishaan cuuphee, arraba kiyya akka anaaf qabbaneeysuuf Alaazaar anaaf ergi. Ani kunoo, ibidda kana keeysatti azzabamaa tiin jira’ jedhee ti iyyate.
[25] Abrahaam ammoo, ‘Yaa ilma koo, bara jireenya kee tii keeysatti waan gaggaarii akkachuu kee yaadadhu! Hogguus Alaazaar ammoo, waan hamtuu tu isa mudate. Amma ammoo inni asitti shurur godhama, ati ammoo azzabamaa ti jirta.
[26] Waan kanneen hunduma malee ammaas, nuu fi isin jidduu, handaqa guddaa tu godhamee jira; asii nu biraa gama keeysan dabruu warri barbaadan akka hin dandeenyeef, achi isin biraahiis gama keenyatti dabruu, tokko illee nuu hin dandayan’ isaan jedhe.
[27] “Inni ammoo deebisee, ‘Eegasuu yaa abbaa kiyya, mana abbaa kiyyatti akka isa ergituun si kadhadha.
[28] Obboleeyyan shaniin qabaa, isaaniis akka bakka musiibaa tana hin dhufneef isaan haa dinniinu’ jedheeni.
[29] Abrahaam ammoo, ‘Isaan Musee fi nabiyyoota ni qabanii, isaanuma haa dhaggeeyfatanii’ jedhee ti deebiseef.
[30] Inni ammoo, ‘Akkasii miti, yaa abbaa koo Abrahaam, warra du'an keeysaa namni tokko isaanitti yoo dhaqe, ni toowbatu’ jedhe.
[31] Abrahaam deebisee, ‘Musee fi nabiyyoota yoo dhagayuu baatan, warra du'an keeysaa tokko yoo ka'e illee isaan warra fudhatuu miti’ isaan jedhe” jedhe.