[1] Guyyaa Sanbata tokko Yesuus angafoota warra Fariisotaa keeysaa mana tokkootti nyaachuuf dhaqe, jarri niis qalbiin isa toohachaa ti turan.
[2] Kunoo, namtichi dhukkuba qaama iiteysuun rakkatu tokkoos, fuula isaa dura ture.
[3] Hogguus Yesuus, “Guyyaa Sanbataa nama fayyisuun seera moo, seeraa miti?” jedhee ti barsiisota seeraa tii fi Fariisota gaafate.
[4] Isaan ammoo caluma jedhan. Inni ammoo namticha dhukkubsataa san harkaan qabee ti fayyisee, isa geggeeyse.
[5] Kana booddee Yesuus gara isaanii garagalee ti, “Isin keeysaa mucaan isaa yookiin horiin isaa boolla bishaanii keeysatti yoo duraa kufe, guyyaa Sanbataa illee yoo tahe, hogguusuma kan hin baafne jiraa ree?” jedheeni.
[6] Isaan ammoo waan jawaaban dhaban.
[7] Yesuus keeysummoonni afeeraman barcumoota kabajaa filachuu isaanii hogguu hubate, fakkeenya kana isaanitti hime.
[8] “Mana aruuzaatti hogguu afeeramte, bakka ol aanu ifumaan filattee hin taa'in; inni si afeere sun nama si caalaa kabajaa qabu afeeree ti jira taha.
[9] Inni sii fi namtichaas afeere sun dhufee, ‘Bakka tana namticha kanaaf gadi dhiisi’ yoo siin jedhe, qaanfachaa bakka namtichaaf dhiiftee, bakka hundumaa irra gadi aantii taate dheeyxee ti teeysa.
[10] Ati ammoo hogguu afeeramtu, dhaqii tii bakka hundumaa irra gadi aantuu taa'i, inni si afeere dhufee, ‘Saahiba koo, bakka wayyaa tanatti ol koottu’ akka siin jedhuuf. Hogguus namoota sii wajjiin maadditti taa'an hundumaa duratti kabajaa ni arkatta.
[11] Kan ol if kaasu hundinuu gadi deebifama, gadi kan if qabu hundinuu ol kaafama” jedhe.
[12] Yesuus ammaas namticha nyaataaf ssa afeereen, “Hiraata yookiin laaqana hogguu gootu, saahibban yookiin obboleeyyan kee yookiin firoottan kee yookiin taajiroota ollaa kee tii hin afeerin; yoo afeerte ammoo, isaaniis faraqaa isaanii deebisanii si afeeru taha. Akkasitti harka siif kafalu.
[13] Ati ammoo azuumaa hogguu gootu, warra deegoo, warra dhagni qaamaa irruu, warra naaffatan, warra jaaman afeeri!
[14] Isaan waan siif deebisan qabaachuu baatan illee, ati ni eeybifamta. Rabbi ammoo Guyyaa Qiyaamaa warra qaceeltootaatti, zajaa siif ni deebisa” jedhe.
[15] Warra isaan wajjiin gabatee nyaataatti taa'an keeysaa tokko, tana hogguu dhagaye Yesuusiin, “Gabatee mootummaa Rabbitti kan dhihaatu eeybifamaa dha” jedhe.
[16] Yesuus ammoo, “Namtichi tokko azuumaa guddoo qopheeysee ti, namoota hedduus afeere.
[17] Waytiin nyaataa hogguu geeyse, ‘Amma koottaa, waa hundinuu qophaawee ti jira’ jedhee ti warra afeeraman yaadachiisuuf kaadamaa isaa itti erge.
[18] Warri afeeraman hundinuu ammoo, ‘Akka itti dhufnu hin qabnu’ jedhanii ti sababa adda addaa himachuu dha jalqaban. Inni duraa, ‘Lafaan amma bitee tu jira, dhaqee lafa tana laaluu tu ana irra jira, kanaaf dhiifama!’ jedheeni.
[19] Inni lammeeysaaniis, ‘Haraashii qindii shan bitee tiin jira, qotuu fi qotuu dhaba isaanii laaluuf kunoo karaa irraan jira, kanaaf dhiifama!’ jedheeni.
[20] Inni kaaniis, ‘Dhihoon niitii fuudhe, tanaaf jecha dandayee hin dhufu’ jedheeni.
[21] Kaadamtichi deebi'ee ti, tana gooftaa isaatti hime. As irratti abbaan manaa aaree kaadamaa isaa tiin, ‘Dafii karaa gurguddaa fi karaa qaxxaamuraa magaalaa keeysaa dhaqii tii warra deegoo, warra dhagni qaama isaanii irrate, warra jaaman, warra naaffataniis fidii ol galchi!’ jedheeni.
[22] Hogguus kaadamtichi, ‘Yaa gooftaa, akkuma ati ajajjetti raawwatamee ti jira, ammoo amma illee bakki hafee ti jira!’ jedheeni.
[23] Gooftichi ammaas kaadamtichaan, ‘Gara karaa uugaa keeysaatti, dallaya duubattiis bahii tii, manni kiyya hanga guutamutti akka ol galan godhi!’ jedheeni.
[24] Kunoo ani isinittiin hima, jarreen duraan afeeramanii didan keeysaa nam tokko illeen gabatee tiyya irraa waa hin dhandhamu!” jedheeni.
[25] Ummanni hizaaba hin qabne isaa wajjiin odoo deemanii, Yesuus gara isaanii garagalee ti,
[26] “Namni gama kiyya dhufu, abbaa isaa tii fi haadha isaa, niitii isaa tii fi joollee isaa, obboleeyyan isaa, ammaas matuma isaa tuu kan ana irra caalaa jaalatu, barattuu tiyya tahuu hin dandayu.
[27] Fannoo isaa baadhatee na duukaa kan hin buune, barattuu tiyya tahuu hin dandayu.
[28] “Isin keeysaa namni tokko mana darbii ijaaruu yoo barbaade, horii ittiin mana kana ijaaree raawwatu gahaa qabaachuu isaa, taa'ee durumaan kan hizaaba hin goone eenyu?
[29] Yookaan bu'ura isaa kaayee ijaarsa manichaa yoo raawwachuu dadhabe, kan arku hundinuu itti qoosa;
[30] ‘Kunoo, namtichi kun ijaaruu jalqabee ammoo fixuu dha dadhabe’ jedhuun.
[31] Yookiin mootiin tokko, mootii biraa tiin wajji kan lola seenuuf deemu, loltuu kuma kudhaniin, isa kan loltuu kuma diiydamiin itti dhufuun, morkuu dandayuu isaa kan duraan dursee gadi taa'ee itti hin yaadne eenyu?
[32] Yoo kan hin dandeenye tahe ammoo, mootichi isatti duuluuf ka'e sun fagoo odoo jiruu, namoota isaa itti ergee akkaataa nagayni itti bu'u ni gaafata.
[33] Akkuma kanattiis eenyu illeen isin keeysaa qabeenya isaa hundumaa kan gadi hin dhiifne barattuu tiyya tahuu hin dandayu” jedhe.
[34] Itti furee tiis, “Soogiddi waan gaari, soogiddi ammoo dhama isaa yoo dhabe, maaliin deebi'ee soogiddaawa ree?
[35] Biyyee fi dikeefiis faaydaa hin qabu, gadi naqamuu malee; gurra dhagayu kan qabu haa dhaggeeyfatu!” jedhe.