[1] Gaaf tokko Yesuus Garba Bishaan Genesaarex jedhamu cinaa dhaabbatee, namoonni hedduun ammoo Qoowlii Rabbii dhageeyfachuuf isa irratti wal dhiibaa ti turan.
[2] Doonii lama qarqara bishaaniitti hidhamanii ti arke; kalluuna-qabduuniis keeysaa bahanii, shabaka isaanii dhiquu irra turan.
[3] Dooniilee san keeysaa doonii Simoon seenee ti, Simoon doonii isaa bishaanitti buusee, qarqara irraa xiqqoo gara jidduutti akka hiiysuuf gaafate; hogguusuma gadi taa'ee ti, doonii irraa ummata barsiisa ture.
[4] Dubbii isaa eega raawwate booddee, Simooniin, “Gara tuujjitti doonii achi hiiysaa tii, kalluuna qabuuf shabaka keeysan darbaa!” jedheeni.
[5] Simoon ammoo deebisee, “Yaa barsiisaa, eda halkan guutuu hedduu itti laffaanee, humaa tiis hin qabne; amma ammoo qoowluma ati dubbatte irratti irkadhee, shabakticha niin darba” jedheeni.
[6] Hogguu isaan shabaka isaanii baharitti darban, shabaktichi isaanii hanga tarsa'uu gahutti, kalluuna hedduu dha qaban.
[7] Shariikkan isaanii warri doonii biraa keeysa turan, dhufanii akka isaan gargaaraniif harkaan hawwatan; jarri niis isaaniif dirmachuu dhufanii ti, doonii lamaanuu kalluunaan guutnaan, ulfinaan liqimfamuu dha gayan.
[8] Simoon Phexiroos waan tahe kana hogguu arke, Yesuus duratti jilbiiffatee ti, “Yaa Gooftaa, ana irraa fagaadhu, ani nama dilaawaa dha” jedheeni.
[9] Simoonii fi isaa wajjiin kanneen turan hundinuu, kalluuna hedduu qabuu isaanii ni ajaa'iban.
[10] Yaaqoobii fi Yohannis, ilmaan Zabdewos warri hojii dhaan shariikoota Simoon turaniis, akkuma warra kaanitti baaseeyfatan. Yesuus hogguus Simooniin, “Abshir hin sodaatin, asii achi ati nama namoota walitti qabu taata” jedheeni.
[11] Doonii isaanii gara qarqaratti eega baasan booddee, waa hundumaa dhiisanii ti, Yesuus duukaa bu'an.
[12] Yesuus magaalaa tokko keeysa odoo jiruu; namticha qaamni isaa guutuun dhukkuba coraa tiin gaddaafame tokkoo tu achi dhufe; inni Yesuus hogguu arke, adda isaa tiin lafa gahee ti, “Yaa Gooftaa, fedha kee yoo tahe na fayyisuu ni dandeeysa” jedhee ti isa kadhate.
[13] Yesuus hixatee harkaan isaa tiin qabatee ti, “Niin fedhaa, fayyi!” jedheeni; hogguusuma namtichi dhukkuba coraa isaa irraa fayyee ti qulqullaawe.
[14] Yesuus ammoo, “Waan kana nam tokkotti illee hin himin, ammoo deemii luba if ilaalchisi, namoota hundumaaf ragaa akka tahuuf, akka Museen ajajetti fayyuu kee tiif kannaa tee dhiheeysi!” jedhee ti isa ajaje.
[15] Haa tahu malee, oduun Yesuus caalaatti odeeyfamnaan, namoonni hizaaba hin qabne isa dhaggeeyfachuu fi uzrii isaanii irraahiis fayyuuf gara isaa ti yaa'an.
[16] Inni ammoo kadhata godhuuf jecha, gara lafa umnaatti jalaa deeme.
[17] Gaaf tokko Yesuus odoo barsiisaa jiruu, Fariisonninii fi barsiisonni seeraa tiis gandeen kutaa Galiilaa tii fi Yihudaa, magaalaa Yerusaaleem irraa hiis dhufanii, achi tattaa'u turan. Qiwwaan Rabbii Gooytaa, aafihuuf Yesuus wajjiin turte.
[18] Kunoo jarreen tokko nama qaamni isaa laamshawe siree dhaan fidanii ti, ol galchanii Yesuus dura kaayuu dha yaalan.
[19] Ammoo hoddomina namootaa tiif karaa dhabnaan, mana irratti ol baasanii ti, wixina manaa buqqaasanii, akkuma siree irra ciisetti Yesuus duratti gadi buusan.
[20] Yesuus amantii jarreen kanaa hogguu arke, namticha dhukkubsataa dhaan, “Namtichana, diliin tee hundinuu oomfii siif godhamtee ti jirti” jedheeni.
[21] Barsiisonni seeraa tii fi Fariisonni, “Eenyu namtichi akkanatti arrabsu kun? Rabbii tokkicha qofa malee, eenyuu tu dilii namaaf oomfii godhuu dandaya?” jechaa ti, gaaffii if keeysatti guungumuu jalqaban.
[22] Yesuus yaada isaanii bira gahuu dhaan, “Maaliif tana qalbii teeysan keeysatti yaaddu?” jedhee ti isaan gaafate.
[23] “Kam tu irra sablata? Diliin tee oomfii siif godhamte, jechuu dha moo, yookiin ka'ii tii miilaan deemi jechuu dha?
[24] Ammoo Ilmi Namaa lafa irratti dilii oomfii godhuuf amrii akka qabu beekaa!” jedhe. Hogguusuma namticha laamshawaa dhaan, “Ka'ii tii siree tee fudhadhuu mana keetitti galiin siin jedha” jedheeni.
[25] Hogguusuma oduma isaan laalanii, ka'ee siree irra ciisaa turees fudhatee ti, Rabbiif hamdii dhiheeysaa mana isaatti kute.
[26] Hogguus hundi isaanii birratanii, Rabbiif hamdii dhiheeysan; naasuuniis isaan qabatte, “Arra baasa takkaa hin tahin agarre” jedhan.
[27] Yesuus kana booddee achii bahee odoo deemuu, namticha qaraxxuu Leewii jedhamu tokko, bakka qaraxaa odoo taa'uu arkee ti, “Na duukaa bu'i!” jedheeni.
[28] Hogguusuma Leewiin waan hundumaa dhiisee ka'ee ti, isa duukaa bu'e.
[29] Eegasii Leewiin Yesuus simachuuf mana isaatti azuumaa guddoo dha qopheeyse; qaraxxoonninii fi namoonni biraa hedduun, isaanii wajjiin gabatee nyaataa bira taa'anii ti turan.
[30] Hogguus Fariisonninii fi barsiisonni seeraa barattoota Yesuus irratti guungumuun, “Warra qaraxxuu dhaa fi warra tuffatamoo wajjiin maaliif nyaattu? Maaliif dhuyduusi?” jedhanii ti gaafatan.
[31] Yesuus deebisee, “Namoonni fayyaa qaban ogeeysa fayyaa hin barbaadan, dhukkubsatoo tu barbaada malee.
[32] Ani warra jireenya qaceeloo jiraatan yaamuuf hin dhufne, dilaawoota gara toowbaatti yaamuufiin dhufe malee” isaaniin jedhe.
[33] Hogguus jarreen kun deebisanii Yesuusiin, “Barattoonni Yohannis wayta hedduu ni soomu, ni kadhatuus, barattoonni Fariisotaa tiis akkasuma godhu; barattoonni kee ammoo ni nyaatu, ni dhuguus” jedhaniin.
[34] Yesuus ammoo, “Odoo aruuztichi isaaniin wajjiin jiruu, warra millisee soomansiisuu ni dandeeysuu?
[35] Guyyaan aruuztichi isaan biraa itti fudhatamu dhufuuf jira; hogguus ni soomanu” isaaniin jedhe.
[36] Yesuus fakkeenya kanaas isaanitti hime, “Nam tokko illeen erbee huccuu haaraya irraa baqeeysee huccuu moofaa irratti hin erbu. Akkana yoo godhe, huccuu irraa baqaqe haaraya saniis ni balleeysa; erbeen isii tiis huccuu moofaa dhaan wajjiin wal hin fudhatu.
[37] Nam tokko illeen daadhii inabaa haaraya qandii moofaatti hin naqu; akkana yoo godhe, daadhichi qandicha ni dhoosa, daadhiiniis ni dhangala'a, lachuu tuu ni badu.
[38] Daadhii inabaa haaraya qandii haarayatti naqu.
[39] Namni daadhii bilchaatte eega dhuge booddee daadhii qaccee hin barbaadu, daadhii bilchaattee tu irra wayyaa dha jedha” jedhe.