[1] Xibeeriyos Qeesaar, mootomee bara kudha shanaffaatti, Phonxos Philaaxos hogguus bulchaa Yihudaa, Herodis ammoo kan Galiilaa, Filiphoos obboleeysi isaa kan Ituriyaa tii fi Tiraakonii, Lisaaniyaasiis kan Abiliinyaa bulchoota turan.
[2] Bara Haannaasii fi Qayyaafaan angafoota lubootaa turan san, Yohannis ilmi Zakkaariyaas huffee gammoojjii keeysa odoo jiruu ti, Qoowliin Rabbii isatti dhufte.
[3] Yohannis naannoo Yordaanos hundumaa keeysa deemaa, “Dilii teeysaniif oomfii akka arkattan, toowbadhaa tii cuuphamaa!” jechaa lallabaa ti ture.
[4] Kuniis kitaaba nabi Isaayyaas keeysatti, “Sagaleen huffee gammoojjii keeysa ni iyyiti, akkana jechaa, Gooftichaaf karaa qopheeysaa, xurree inni irra deemuus diriirsaa!
[5] Sululli hundinuu ol haa guutaman, tulluunii fi gaarri hundinuu gadi haa caphan, karaan jajallaan haa qaceelfamu, caccaphaaniis wal haa qixxeeyfamu.
[6] Banii-Aadam hundinuu najaata Rabbii ni arku” kan jedhu barreeyfamee ti jira.
[7] Yohannis ummata cuuphamuuf heddomminaan gara isaa dhufaniin akkana jedhe, “Isin yaa ilmaan buutii, balaa isinitti bu'uuf deemtu jalaa akka dheeysitaniif, eenyuu tu isin gorse?
[8] Ammaas firii toowbaaf taatu mullisaa! Abbaaf Abrahaam qabna ifiin jechuus hin jalqabinaa; Rabbi, Abrahaamiif dhagaaggee kanneen irraa, joollee kaasuu ni dandayaan isiniin jedha bar!
[9] Ammuma illee qottoon hidda mukkeenii irra kaayamtee ti jirti; mukni firii gaarii hin goone hundinuu muramee ti ibiddatti naqama” jedhe.
[10] As irratti ummanni sun, “Eegasuu maal haa goonu ree?” jedhanii ti Yohannis gaafatan.
[11] Inni ammoo, “Uffata lama namni qabu, kan hin qabne wajjiin adda haa fudhatu; nyaata kan qabuus akkasuma haa godhuu!” jedhee ti deebiseef.
[12] Warri qaraxa guuraniis cuuphamuuf dhufanii ti, “Yaa barsiisaa, nuti hoo maal haa goonu?” isaan jennaan.
[13] Inni ammoo, “Waan seeraan murame irra caalchiftanii hin fuudhinaa!” jedheeni.
[14] Warri loltuuniis, “Nuti ammoo maal haa goonu ree?” jedhanii ti gaafatan; inni ammoo, “Nama, horiin hin zallaminaa; sobaaniis nama hin kasasinaa; mindaan keeysan isiniif haa gahu!” jedheeni.
[15] Ummanni abdii dhaan eeggachaa turan hundinuu, qalbii isaanii keeysatti, Yohannis kunuu Kiristoos tahinnaa laata? jechaa yaadaa ti turan.
[16] Yohannis hunduma isaanii tiif jawaaba kana kanne, “Ani bishaaniiniin isin cuupha, ammoo inni ana irra jabaa dhaa, kaniin ani haaduma kophee isaa tuu hiikuuf illee hin geenye dhufa jira; inni Ruuhal Qudusii fi ibiddaan isin cuupha.
[17] Uuda isaa kan ittiin azooru, manshiin harka isaa ti jirti; midhaan qulleeyfamees gootaraa isaatti galcha; qashaa ammoo ibidda hin dhaamneen guba” jedhee ti barsiise.
[18] Kana malees gorsa adda addaa ummataaf kannaa, Oduu Gammachuu isaanitti lallabe.
[19] Herodis bulchaan biyyaa, niitii obboleeysa isaa Filiphoos, Herodiyaas tan jedhamtu, fuudhuu isaa tii fi, badii inni hojjate hundumaaf Yohannis ittiin mormee dubbannaan,
[20] Herodis hammeenya kana hundumaa, irratti dabalee ti, Yohannis mana hidhaatti galche.
[21] Waytuma ummanni hundinuu cuuphamaa turan san, Yesuusiis cuuphamee, odoo kadhachutti jiruu, kunoo samiin ni banamte.
[22] Ruuhal Qudus uunkaa himiimii fakkaatee ti irratti bu'e; sagaleen takkaas samii irraa dubbatte, “Ati Ilma kiyya kaniin ani jaaladhu; akka gaarittiis sittiin gammade” jette.
[23] Yesuus hojii isaa hogguu jalqabu, umriin isaa toora bara soddomaa ti turte; abaabuu dhaloota isaa hogguu lakkaawaniis akka ilma Yoseefitti lakkaawame; Yoseef ilma Elii,
[24] ilma Maataat, ilma Leewii, ilma Malkii, ilma Yaanaayi, ilma Yoseef,
[25] ilma Maataatiyaas, ilma Amoos, ilma Naahom, ilma Eslii, ilma Naagee,
[26] ilma Maa'at, ilma Maataatiyaas, ilma Seeme'i, ilma Yosee, ilma Yihudaa,
[27] ilma Yohannaan, ilma Resaa, ilma Zarubaabel, ilma Salaatihel, ilma Nerii,
[28] ilma Melkii, ilma Adii, ilma Qosaam, ilma Elmaadaam, ilma Eer,
[29] ilma Yoshu'aa, ilma Elii'ezaar, ilma Yooraam, ilma Maataat, ilma Leewii,
[30] ilma Simi'oon, ilma Yihudaa, ilma Yoseef, ilma Yoonaam, ilma Eliyaaqim,
[31] ilma Meleyaa, ilma Maayinaan, ilma Maaxaataa, ilma Naataan, ilma Daawwid,
[32] ilma Isseyi, ilma Yoobeed, ilma Bohaaz, ilma Salmoon, ilma Nahasoon,
[33] ilma Aminaadaab, ilma Aaram, ilma Arnii, ilma Hesrom, ilma Faares, ilma Yihudaa,
[34] ilma Yaaqoob, ilma Yisihaaq, ilma Abrahaam, ilma Taaraa, ilma Naahor,
[35] ilma Seruug, ilma Raagaawu, ilma Feleg, ilma Ebeer, ilma Shaalaa,
[36] ilma Qaayinaam, ilma Arfaaksaad, ilma Seem, ilma Nohi, ilma Laamek,
[37] ilma Maatusaalaa, ilma Henook, ilma Yaared, ilma Mahalaalel, ilma Qaayinaan,
[38] ilma Enosh, ilma Sheet, ilma Addaam, ilma Rabbii.