[1] Yesuus ol godhatee ti, taajiroota kannaa isaanii mudaaya buusii keeysa buusaa jiruu ti arke.
[2] Gursummeeytiin miskiinni takkaas suldii diddiimtuu lama, mudaaya buusii san keeysa odoo keeysuu ti arke.
[3] Hogguus inni, “Dhugumaan isinitti hima, gursummeeytiin miskiintittiin tun hunduma isaanii irra caalaa buuftee ti jirti.
[4] Isaan kun hundinuu nafaqaa isaanii irraa hafee waan ol kaayatame keeysaa hi, mudaaya buusii keeysa naqan; isiin tun ammoo hiyyummaa isii irraa, waan ittiin jiraachuuf qabdu hunduma kannite” jedhe.
[5] Isaan keeysaa muraasni, dhagaa miidhagaa dhaanii fi kannaa wareegaa tiiniis faayamuu Beeytal Maqdas dububbachaa ti turan.
[6] As irratti Yesuus, “Wanni isin ilaaltan tun hundinuu, dhagaan tokko illeen wal irratti odoo hin hafin, guyyaan itti diigamu dhufa jira” isaaniin jedhe.
[7] Isaan ammoo, “Yaa Barsiisaa, kun yoom taha? Wanni kun hogguu tahuuf dhihaate, milikkinni isaa maali?” jedhanii ti isa gaafatan.
[8] Hogguus Yesuus, “Akka isin hin gowwoomsine if eegaa! Hedduun, ‘Ani Kiristoosi, waytiiniis geeyse’ jechaa maqaa kiyyaan dhufuuf deemu. Isin ammoo isaan jala hin deeminaa!
[9] Duulaa fi rabbashamuus hogguu dhageeysan hin sodaatinaa! Kanneen duraan dursanii tahuun isaan irra jira; ammoo xumurri hogguusuma hin tahu” jedheeni.
[10] Itti furee tiis, “Sabni saba irratti, mootummaaniis mootummaa irratti ni kaka'u.
[11] Sossooha dachii gurguddaa tu taha, abaarii fi aafaanni niis hundumatti ni bu'u, waan nama baareeysuu fi milikkinni gurguddaaniis samii irraa ni mullatu.
[12] Kana hundumaa dura ammoo, isin ni qabu, isin ni arihatuus; yaa'ii warra mana sagadaatti, mana hidhaattiis dabarsanii isin ni kannu; anaaf jecha fuula mootootaatti, fuula bulchoota biyyaattiis ni geeyfamtu.
[13] Kuniis, ragaa akka anaaf baataniif, carraa gaarii dha isiniif taha.
[14] Duraan dursitanii, ‘Maal jennee ti falmanna’ jettanii cinqamuu hin baddinaa.
[15] Ani kunoo, waan dubbattanii fi hikmaas, kanneen warri isinitti falaman tokko illeen dura dhaabbachuu fi faalleeysuus hin dandeenyeen isiniif kanna.
[16] Kunoo, haawwaniin, obboleeyyaniin, firootaa fi saahibban keeysaniin dabarfamtanii ti kannamtu; isin keeysaa hanga tokkoos ni ajjeesu.
[17] Maqaa kiyyaaf jecha hundinuu isin jibbu.
[18] Haa tahu malee, rifeensi mataa keeysanii tokko illeen hin badu.
[19] Rakkina obsuu keeysaniiniis, lubbuu teeysan ni eewaltu” jedhee ti isaaniif deebise.
[20] Yesuus itti furee, “Yerusaaleem loltuu dhaan marfamtee hogguu agartan ammoo, diigamuun isii akka dhihaate beekaa.
[21] Hogguus warri Yihudaa jiran gara gaarotaatti haa baqatanii, magaalaa keeysa warri jiraniis achii haa bahan, baadiyyaa warri jiraniis magaalaa hin seenin.
[22] Wanni barreeyfame hundinuu akka raawwatamuuf jecha, guyyoonni sun guyyoota iqaabaa ti.
[23] Ammoo guyyoota san keeysa dubartoota ulfaa tii fi warra hoosisaniif magan! Balaan guddoon lafa irratti, lolli Rabbii tiis ummata irratti ni dhufa.
[24] Namoonni habalee dhaan ni du'u, ammaas booji'amanii tiis saboota hundumaa keeysa geeyfamu; hanga waytiin isaaniif kannamte raawwatamtuttiis, saboonni qomoo Israa'el hin tahin Yerusaaleem ni daammacu” jedhe.
[25] Itti furee tiis, “Asxaan aduu, ji'aa fi urjoota irratti ni mullatti; goohaa fi wal-darbaa bahar irraa kan ka'e ummanni hundi ni muddama, waan godhuus ni wallaala.
[26] Namoonni waan lafa addunyaa irratti dhufaa jiru if irratti eegaa naasuun ni gaggabu, eemarri samii keeysaa tiis ni raafamu.
[27] Hogguus Ilmi Namaa humnaa fi durrii ulfina guddaa tiin, duumeeysaan odoo dhufuu ni arku.
[28] Kun hundinuu hogguu tahuu jalqabu, ka'aa tii dhaabbadhaa mataa keeysaniis ol qabadhaa laalaas; najaa bahuun keeysan, kunoo dhihaatee ti jira” jedhe.
[29] Eegasii Yesuus fakkeenya kana isaanitti hime, “Muka habruu tii fi mukkeen hundumaa laalaa.
[30] Hogguu isaan baala lalisan, birraan akka dhihaate ni hubattu.
[31] Akkasumatti isiniis hogguu wanni kanneen hundinuu tahuu isaanii agartan, Mootummaan Rabbii akka dhihaatte beekaa.
[32] Dhugumaan isinitti hima, wanni kanneen hundinuu hanga raawwatamanitti dhaloonni ammaa kun hin dabru.
[33] Samii fi dachiin dabruuf deemu, qoowliin tiyya ammoo gonkumaa hin dabartu” jedhe.
[34] Yesuus hogguus, “Kordiidummaanii fi farshaanuun, ammaas cinqii addunyaa tiiniis, onnee teeysan isin da'iifsee, guyyaan sun isin dagee akka hillimatti qacam akka isin hin goone if eeggadhaa!
[35] Akkuma kanatti namoota guutummaa addunyaa irra jiraatan hundumatti dingata dhufa.
[36] Wayta hundumaa dammaqaa, waan tahuuf deemu kana hundumaa jalaa bahuu fi Ilma Namaa duraas dhaabbachuuf humna akka arkattaniif kadhadhaa” jedheeni.
[37] Yesuus guyyuu Beeytal Maqdas keeysatti ni barsiisa ture, galgala galgala ammoo gara gaara “Gaara Ejersaa” jedhamutti ol bahee ti, achi bula ture.
[38] Namoonni hundinuu ganama bariisaan ka'anii isa bira dhufanii Beeytal Maqdas keeysatti isa ni dhaggeeyfatu turan.