[1] Ummanni hanga wal irra ijaajjetanitti, kumaa hedduu dhaan, hogguu walitti qabaman, Yesuus dura barattoota isaa tiin, “Rushii warra Fariisotaa irraa, jechuun fakkeeysummaa isaanii irraa if eeggadhaa.
[2] Wanni hagoogamee jiru hundinuu kan odoo hin mullatin hafu hin jiru, wanni dhooysatti eegamaa jiruus kan odoo hin beekamin hafu hin jiru.
[3] Kanaaf wanni isin dukkana keeysatti dubbattan, ifa guyyaatti bahee ti dhagayama; wanni isin deeraa keeysatti gurra namaatti hasaastaniis, mana gubbaa irraa lallabamee ti dhagayama” jedheeni.
[4] Itti furee tiis, “Yaa saahibban koo, ani isinittiin hima, warra jasaduma qofa ajjeesanii, kanaa achi humaa godhuu hin dandeenye, hin sodaatinaa.
[5] Ammoo sodaachuun kan isin irra jiruun isin agarsiisa; eega jasada ajjeese booddee jahannamitti isin darbuu kan dandayu sodaadhaa; eeyye, isa kana sodaa dhaan isiniin jedha.
[6] Shinbirroon biicuun shan, saantiima lamatti gurguramuu mitii? Ammoo isaan keeysaa takka illeen Rabbiin hin dagataman.
[7] Isin rifeensi mataa keeysanii hundi illeen lakkaawamaa dha; kanaafiis hin sodaatinaa, isin bar biicuu hedduu irra guddaa dha caaltu.
[8] “Ani isinittiin hima, namuma namoota duratti, anatti amanuu isaa ragaa bahee mulliseef, Ilmi Namaa tiis maleeykoota Rabbii duratti akkasumatti ragaa bahaaf.
[9] Ammoo kan namoota duratti na ganu, maleeykoota Rabbii duratti ni ganama.
[10] Ilma Namaa irratti waa kan dubbatu hundinuu, oomfii ni arkata; Ruuhal Qudus kan arrabsu ammoo oomfii hin qabu.
[11] “Mana sagadaa yookiin bulchaa biyyaa, yookiin daanyoota dura kasasanii yoo isin geeysan, akkamitti falmanna? Yookiin maal jenna? jettanii hin cinqaminaa!
[12] Waytuma sanitti maal jechuun akka isin irra jiru, Ruuhal Qudus isin barsiisa” jedhe.
[13] Ummata keeysaa namtichi tokko, “Yaa barsiisaa, miraaza keenya akka adda nuu hiruuf obboleeysa kiyyatti anaaf himi!” jedheeni.
[14] Yesuus ammoo, “Namtichana, isin lamaan jiddutti daanyaa tahee miraaza akkaan isiniif hiru eenyuu tu na shuume?” jedhee ti deebiseef.
[15] Kanatti aansee hunduma isaanii tiin, “Jireenyi namaa hoddomina qabeenya isaa tiin waan hin dhaabbanneef jecha if eeggadhaa, bololummaa hunda irraa if tiysaa!” jedheeni.
[16] Kana booddee Yesuus fakkeenya kana isaanitti himee, “Kunoo, namticha taajira midhaan isaa hedduu toleef tokkoo tu ture.
[17] Inni niis, ‘Midhaan kiyya bakkaan itti galfadhu hin qabuu maal haa godhu?’ jedhee ti if gaafate.
[18] ‘Akkanaan godha, gootaraa kiyya hundumaa diigee tiin, midhaan kiyya hundumaa fi qabeenya biraa tiis akka anaaf fuudhutti guddisee tiin ijaara.
[19] Eegas ifii koo tiin, yaa lubbuu too, bara hedduuf waan siif gahu waan gaarii hundumaa lafaa qabdaa, if hin dararinii taa'ii, nyaadhuu, dhugii, bashannaniin’ jedhaan.
[20] Rabbi ammoo ‘Ati yaa gowwaa, edanuma lubbuun tee si keeysaa fuudhamuuf jirtii; eegasuu wanni ati qopheeyfatte tun hundinuu eenyuuf taati ree?’ isaan jedhe.
[21] Namni ifiif waa ol tuullatu, Rabbi biratti ammoo taajira waan hin tahiniif, kunoo tanumaa tu isa mudata” jedhe.
[22] Eegasii Yesuus barattoota isaa tiin, “Akkana waan taheef, isin jireenya keeysaniif waan nyaattaniif, yookiin qaama keeysanitti waan uffattaniif hin cinqaminaa!
[23] Jireenyi nyaata irra caala, qaamni niis uffata irra caala.
[24] Harraageeysa laalaa, hin facaasan, hin haamaniis; gootaraa yookiin makzanaas hin qaban, ammoo Rabbii tu isaan soora; isin ammoo hedduu guddaa dha allaattii irra caaltu.
[25] Isin keeysaa namni tokko illeen cinqamuun umrii isaa irratti za'aa takka illee kan ida'achuu dandayu eenyu?
[26] Eegasuu waan jibir akkasii illee godhachuu eega hin dandeenye, waan biraa tiif maaliif cinqamtu ree?
[27] Ililliin dirree akkamitti akka biqilanii guddatan laalaa! Hin carraaqan, niis erban; akkasuma illee tahee, Solomoon mootichi ulfina guddaa qabaachaa ture sun illeen, isaan kanneen keeysaa hanga isii takkaa akka hin shallamaminiin isinitti hima.
[28] Eegasuu Rabbi citaa arra dirreetti arkamee, boru ibiddatti naqamu akkanatti bareechee kan uwwisu taanaan, irrattuu isin faa hammam caalchisee haa uwwisu ree! Isin yaa warra amanti-qaliil,
[29] isin kunoo, maal nyaannaa fi maal dhuyna irratti qalbii teeysan hin hidhinaa! Tanattiis if hin cinqinaa!
[30] Saboonni addunyaa irraa hundinuu qalbiin isaanii waan kanneen irratti hidhanii ti jiru; kun akka isin barbaachisuus Abbaan keeysan ni beeka.
[31] Irrattuu isin mootummaa Rabbii fardeeyfadhaa malee, kanneen hafan hundinuu wajjiin isiniif ni dabalamu” jedheeni.
[32] Yesuus itti dabalee, “Isin yaa murna xiqqaa, hin sodaatinaa; Abbaan keeysan mootummaa isiniif kannuuf gammachuun jaalatee ti jira.
[33] Qabeenya keeysan gurguraatii warra deegoof dhoortoo kannaa! Korojoo hin moofoyne, badhaadhummaa dhuma hin qabnees samii irratti, bakka hattuun bira hin geenyetti, biliiniis hin balleeysinetti walitti qabadhaa!
[34] Qalbiin teeysan bakka badhaadhinni keeysan jiru jirti” jedheeni.
[35] Itti furee tiis, “Mudhii teeysan hidhattanii ibsaa keeysaniis qabsiifadhaa!
[36] Waardiyyoota manaa kanneen gooftaan isaanii afeerraa aruuzaa irraa wayta deebi'ee dhufu, akkuma inni balbala dhadhaween irraa banuuf qophaawanii isa eegan fakkaadhaa!
[37] Hojjatoonni kanneen gooftaan isaanii hogguu deebi'ee dhufu dammaqanii isaan arku, akkam eeybifamoo dha! Dhugumaan isinitti hima, gooftaan isaanii marxifatee dhaabbatee isaan teeysisee ti kaadama.
[38] Hanga waaritti yookiin hanga iyyansa lukkutti turee yoo dhufe illee, dammaqanii warri inni arku sun akkam eeybifamoo dha.
[39] Tanaas ammoo yaadadhaa, abbaan manaa wayta hattuun itti dhuftu odoo beekee, qottee akka seentu itti hin dhiisu ture.
[40] Akkasumatti ammaas Ilmi Namaa tiis wayta isin, nnni ni dhufa, jettanii itti hin eeynetti waan dhufuuf jecha, isiniis qophaawoo tahaa!” jedheeni.
[41] Hogguus Phexiroos, “Yaa Gooftaa, fakkeenya kana nummaafi moo yookiin hundumaaf dubbatta?” jedhee ti gaafate.
[42] Gooftaan ammoo deebisee, “Eegasuu kaadamaan amanamaanii fi aaqilli, kan gooftaan isaa hojjatoota mana isaa irratti shuumee, waytatti nyaata isaaniif akka kannuuf kan wakkalatu eenyu ree?
[43] Kunoo, kaadamaan wayta gooftaan isaa deebi'ee dhufu akkanumatti odoo hojjatuu arku eeybifamaa dha.
[44] Dhugumaan isiniin jedha, gooftaan isaa qabeenya isaa hundumaa irratti ajajjuu dha isa godhata.
[45] Ammoo kaadamaan sun qalbii isaa keeysatti, ‘Gooftaan kiyya dafee hin galu’ jedhee dhiiraa fi dhalaa warra isaa wajjiin hojjatan tumuu fi ifiif ammoo nyaachuu, dhuguu, farshaanuus yoo jalqabe;
[46] gooftaan isaa guyyaa inni hin yaadinii fi za'aa inni itti quba hin qabaatinitti ni dhufa, addaan isa tarsaasa, warra amanti-dhableen wajjiiniis isa ramada.
[47] Hojjataan waan gooftaan isaa, isa irraa barbaadu beeku, akka irraa barbaadame sanitti ammoo kan hin qopheeysine yookiin kan hin goone, hedduu dha tumama.
[48] Waan godhuun isa irra jiru kan hin beekin ammoo, yoo waan isa adabsiisu godhe illee, waa xiqqo tumama; nama hedduun itti kanname irraa harkaa hedduu tu barbaadama; nama imaanaan hedduun bira kaayamte irraa, hedduu guddaa dha gaafatu” jedhe.
[49] Yesuus, “Ani lafa irratti ibidda buusuufiin dhufe; ibiddichi odoo kanaan dura bobeeyfamee jiraatee akkamiin hawwaan ture.
[50] Cuuphaan ani cuuphamuun na irra jiru tokkoo tu jira, hanga inni raawwatamuttiis niin hiraarama!
[51] Addunyaa irratti nagaya buusuuf waaniin dhufe isinitti fakkaataa? Miti, addaan hiruufi malee.
[52] Ammaa jalqabee haaskaan mana tokkoo shanan murnaan wal irratti ka'u, sadih warra lamaan irratti, lamaaniis warra sadeen irratti ka'u.
[53] Abbaan ilma irratti, ilmi niis abbaa irratti, haati intala irratti, intalti niis haadha irratti, haati gurbaa niitii gurbaa isii irratti, niitiin gurbaa tiis haadha jaarsa isii irratti ni ka'u” jedhe.
[54] Yesuus ummataan akkana jedhe, “Karaa lixa-biiftuu tiin duumeeysaawaa hogguu dhufu, ‘Roobaa tu rooba’ jettu, eeyye ni roobaas.
[55] Qilleensi gara kibbaa hogguu deemu ammoo, ‘Oowaa tu dhufa’ jettu, eeyye akkasuma tahaas.
[56] Yaa warra fakkeeysitoota, bifa lafaa tii fi tan samii tiis ilaaltanii, waan tahuuf deemu himuu ni dandeeysu, waan wayti tun fiddu ammoo akkamitti hubachuu dadhabdan?
[57] “Isinummaanuu waan qaceelaa tahe maaliif hin murteeysine?
[58] Fakkeenyaaf namni tokko liqii waan si irraa qabuuf daanyaa irratti si kasasuuf yoo ka'e, karaa irra odoo jirtuu isaa wajjiin wal tahuuf jabeeysii yaali! Kanaa achi gara daanyaatti si harkifata, daanyaaniis waardiyyaa mana hidhaatti si kanna, inni ammoo mana hidhaatti si galcha.
[59] Kana booddee, saantiimni tokko illeen odoo hin hafin hanga kafaltutti, gonkumaa mana hidhaa san keeysaa akka ati hin baaneen sitti hima” jedhe.