[1] Bara san mootummaa warra Roomaa keeysa warri jiraatan hundinuu akka galmeeyfaman, Awugusxoos Qeesaar biraa ajajni bahe.
[2] Galmeeyfamuun namaa kun, kan jalqabaa ti ture; kuniis bara Qereenewos Sooriyatti bulchaa biyyaa ture tahe.
[3] Kanaaf namni hundinuu adduma addaan if galmeeysuuf jecha, gara magaalaa kutaa itti dhalatee ti deeme.
[4] Yoseef asara shanyii mooticha Daawwid waan tureef jecha, Galiilaa magaalaa Naazireet irraa ka'ee ti, Yihudaa keeysa Beetliheem magaalaa Daawwid dhaqe.
[5] Qaadhimaa isaa Maariyaam wajjiin galmeeyfamuuf dhaqe; isiiniis ulfa turte.
[6] Beetliheemuma odoo jiranii ti, waytiin Maariyaam itti deeysu geeyse;
[7] ilma isii angafaas ni deeyse; bakka bultii dhaa mana keeysummaa keeysaa dhabnaan, mucaa qeeydii dhaan martee ti, girgimii keeysa ciibsite.
[8] Tiiysitoonni tokko ammoo, naannoo sanitti, bobbaa horii isaanii halkan dirree keeysatti ni eegu turan.
[9] Maleeykaan Rabbii tokkoos, isaanitti mullate, nuurri durrii Gooytichaa tiis naannoo isaanitti ibse; hogguus isaan birratanii ti baaragan.
[10] Maleeykichi ammoo, “Hin sodaatinaa! Kunoo ani Oduu Gammachuu dhaa guddoo, tan ummata hundumaaf taatuun isinitti hima.
[11] Arra magaalaa Daawwiditti naja-baasoon isiniif dhalatee ti jira; inni niis Kiristoos Goofticha.
[12] Milikkinni isaa tiis kana, mucaa qeeydiin maranii girgimii keeysa ciisu agartu” isaaniin jedhe.
[13] Hogguusuma, dingatuma kunoo! Jundiin samii dhaa hedduun maleeykichaan wajjiin mullatanii ti;
[14] “Hamdiin Rabbiif samii gubbatti haa taatu, nagayni warra Rabbi itti gammadeef, lafa irratti haa tahu” jechaa Gooyticha ni faarsu turan.
[15] Maleeykoonni Rabbii isaan biraa deebi'anii eega samitti ol kutan booddee, tiiysitoonni, “Koottaa mee Beetliheem dheeynee, waan tahe kana, kan Rabbi waa'ee isaa nutti hime kana, haa ilaalluu!” waliin jedhan.
[16] Ariifachaa hogguu dhaqan, Maariyaamii fi Yoseef, ammaas mucicha girgimii keeysa ciisu arkan.
[17] Tiiysitoonni sun mucicha hogguu arkan, waan maleeykoonni Rabbii waa'ee isaa laalchisuun isaanitti himan hundumaa ni odeeysan.
[18] Warri dhagayan hundinuu, waan tiiysitoonni isaanitti himan hedduu dha ajaa'iban.
[19] Maariyaam ammoo, dubbii tana hundumaa garaatti qabattee, itti yaaddi turte.
[20] Tiiysitoonni sun, waan maleeykoonni Rabbii itti himan hundumaa dhagayanii, akkuma itti himame tahee ija isaanii tiin waan arkaniif jecha, Rabbiif hamdii dhiheeysaa, galateeyfachaa tiis bakka isaanitti deebi'an.
[21] Guyyaan saddeettaffaa guyyaa mucaan dheeyna itti qabamutti, akkuma maleeykaan Rabbii odoo inni garaa haadha isaatti hin qabamin dura himetti, maqaa isaa “Yesuus” jedhanii ti moggaasan.
[22] Akka seera Museetti, waytiin xaaharummaa isaanii raawwatamnaan, Rabbi Gooytaa duratti isa dhiheeysuuf, mucicha gara Yerusaaleem fidan.
[23] Seera Gooytichaa keeysatti, “Dhiirti angafni karra banu hundinuu Rabbiif addatti qulqullaawa” kan jedhu barreeyfamee ti jira.
[24] Kana malees akka seera Gooytichaa keeysatti jedhametti aarsaaf, “Himiimii lama yookiin ilmaan himiimii lama” dhiheeysuuf fidan.
[25] Bara sun, namticha maqaan isaa Simi'oon jedhamu tokkoo tu Yerusaaleem ture; namtichi kuniis, nama jireenya qaceelaa jiraatu, kan ammaas sodaa Rabbii qabu, najaata Israa'eliif dhufuuf deemu nama abdiin eeguu irra jiru ture; Ruuhal Qudusiis isa irratti bu'ee ti ture.
[26] Kanaan duraas Masiihii Gooytichaa, odoo hin arkin dura, akka hin duune Ruuhal Qudusiin isatti mullifamee ti ture.
[27] Hogguus Ruuhal Qudusiin geggeeyfamee, Beeytal Maqdas seene; Maariyaamii fi Yoseef akkuma seerri ajajutti waan barbaachisu raawwachuuf mucicha Yesuus Beeytal Maqdas ol naqan.
[28] Hogguus Simi'oon mucicha fuudhee, harka irra dagalfatee ti, Rabbi galateeyfachuuf,
[29] “Yaa Gooytaa, akkuma dubbattee turtetti gabricha kee nagayaan kaatimaan gahi!
[30] Waan ati qopheeysite ummata hundumaa duratti, najaata kee ija tiyyaan arkee tiin jira.
[32] Inni niis warra saba Israa'el hin tahiniif nuura mullata kee tii ti, ummata kee Israa'eliifiis durrii ulfina kee tii ti” jedhe.
[33] Haawwan isaa tiis, isa laalchisuun waan dubbatame hundumaa ni ajaa'iban.
[34] Kana booddee, Simi'oon isaan eeybisee ti, Maariyaam haadha mucichaa tiin ammoo, “Kunoo, mucaan kun ummata Israa'el keeysaa hedduun, akka isatti gufataniif, hedduuniis isaan akka ka'aniif, kan herregamee dha; ammaas milikkita mormiin irratti dubbatamee ti taha.
[35] Akkasitti yaadni dhokataan garaa namoota hedduu keeysaa zaahir baha; atiis yaa Maariyaam, naasuun ilmoo tee tii, akka qara billawaatti lubbuu tee si waraanti” jedheeni.
[36] Nabiyyittiin takka tan maqaan isii Haannaa jedhamtu, intala Faanu'el, tan gosa Asheer tu achi ture; isiin nama umriin duruun lafa guure turte, jaarsa dubrummaan isii fuudhee wajjiin, amatuma torba qofa jiraatte.
[37] Haannaan umriin amata saddeettamii afur hanga geeysutti gursummeeytummaan turte. Isiin Beeytal Maqdas biraa hin dhabamtu turte, halkanii fi guyyaas soomanaa fi kadhataan Gooytaa ni tajaajilti turte.
[38] Waytuma san isaanitti dhihaattee, Rabbi galateeyfattee, ammaas warra najaata Yerusaaleem abdachaa turan hundumaaf waa'ee mucichaa dubbatte.
[39] Yoseefii fi Maariyaam akka seera Gooytaatti, waan hojjatamu hundumaa eega raawwatan booddee, gara Galiilaa gara magaalaa isaanii Naazireetitti deebi'an.
[40] Mucichi ammoo guddachaa, jabaachaa, hikmaaniis cimaa ti deeme; ni'imaan Rabbii tiis isa irra turte.
[41] Haawwan mucichaa baruma baraan, Ayyaana Bira-Dabruu kabajuuf, Yerusaaleem ni dhaqu turan.
[42] Mucichi bara kudha lama hogguu guute, akkuma aadaa isaanii titti ayyaantichaaf ol bahan.
[43] Ayyaantichi eega raawwatame booddee, gara mana isaaniititti odoo deebi'aa jiranii, mucichi Yesuus Yerusaaleemitti jalaa hafe; haawwan isaa ammoo akka inni jalaa hafe hin beeyne.
[44] Saahiboota wajjiin waan jiru seehanii, amna guyyaa tokkoo eega deeman booddee, firoota isaanii tii fi warra beekan bira isa barbaadan.
[45] Dhabnaaniis isa barbaacha Yerusaaleemitti deebi'an.
[46] Guyyaa sadih booddee, mucicha Beeytal Maqdas keeysa, kan barsiisota jidduu taa'ee, isaan dhaggeeyfachaa, ammaas gaaffiis isaan gaafachaa jiru arkan.
[47] Warri isa caqasan hundinuu, hubannaa inni qabuu fi jawaaba inni deebisu ni ajaa'iban.
[48] Hogguu isa arkaniis ni rifatan; haati isaa hogguus, “Yaa ilma kiyya, maaliif akkanatti hemelaal nu goote? Kunoo, abbee tii fi aniis hedduu cinqamnee ti si barbaadaa turree bar!” jetteeni.
[49] Mucichi ammoo deebisee ti, “Maaliif na barbaaddan? Mana Abbaa kiyyaa keeysatti arkamuun akka ana irra jiru hin beeytanii?” jedhee ti isaan gaafate.
[50] Isaan ammoo wanni inni isaaniin jedhe hin galleef.
[51] Kana booddee mucichi isaan wajjiin Naazireetitti deebi'ee ti, isaaniif ajajamaa jiraate; haati isaa ammoo dubbii tana hundumaa garatti ni qabatti turte.
[52] Yesuus kunoo, Rabbii fi namoota birattiis jaalatama arkachaa, umrii ida'achaa, hikmaaniis guddachaa ti ture.