[1] Yesuus barattoota kudha lamaan walitti yaamee ti, ruuhaanota hamoo akka baasaniif, dhukkubsatoos akka fayyisaniif, humnaa fi amrii isaaniif kanne.
[2] Mootummaa Rabbii akka labsaniif, warra dhukkubsataniis akka fayyisaniif isaan erge.
[3] Inni isaaniin, “Karaaf humaa hin fudhatinaa, ulee yookiin qandii, nyaata yookiin horii, qamisa lama illee hin fudhatinaa!
[4] Hanga bakka sanii deemtanitti, manuma seentan taa'aa!
[5] Magaalaa warra isin hin simannee keeysaa bahaa; hogguu baatan ammoo akka ragaa isaanitti bahuuf jecha, dhukkee magaalaa sanii miila keeysan irraa achitti dhadhawadhaa!” jedheeni.
[6] Barattoonni niis ka'anii ti, ganda tokkoo kaanitti dabraa, bakka hundumatti Wangeela lallaban; warra dhukkubsataniis ni fayyisan.
[7] Herodis bulchaan Galiilaa, waan Yesuus hojjatee fi dubbate hundumaa dhagayee, gargar baafachuu dha dadhabe. Sababni isaa tiis, namoonni hangi tokko, Yohannis cuuphaa tu du'aa ka'e jedhan;
[8] warri kaan ammoo Eliyaas tu deebi'ee mullate, warri biraa ammoo nabiyyoota warra dur keeysaahi tokko ka'e jechaa ti turan.
[9] Herodis, “Ana! Kan Yohannis mataa isaa mursiisee ture, eegasuu namtichiniin ani oduu isaa akkanatti dhagayu kun eenyu ree?” jedhee ti gaafate; Yesuus arkuufiis ni barbaada ture.
[10] Ergamoonni niis deebi'anii, waan hojjatan hundumaa Yesuusitti himan; inni niis isaan if jala fuudhee ti, karaa magaalaa Beetesayidaa jedhamu tokko dhaquuf kophaa isaanii miila jalaa baafatan.
[11] Namoonni ammoo tana hubachuu dhaan isa duukaa bu'an; inni niis isaan simatee ti, waa'ee Mootummaa Rabbii isaanitti hime; warra aafihamuun isaan barbaachisees ni aafihe.
[12] Aduun hogguu dhiite, barattoonni kudha lamaan gara isaa dhufanii ti, “Danuun namaa kun gara gandeenii tii fi manneen nutti aanan kanneenii dhaqanii, bakka bultii tii fi waan nyaataa akka barbaaddataniif isaan gadi dhiisi; bakkiti nuti jirru tun lafa humaa irra hin jirre” jedhaniin.
[13] Yesuus ammoo, “Isinummaan waan isaan nyaatan kannaaf!” isaaniin jedhe. Barattoonni ammoo, “Yoo deemnee namoota kana hundumaaf nyaata binne malee, wanni nuti qabnu biddeena shanii fi kalluuna lama qofa” jedhaniin.
[14] Namoonni achitti arkaman dhiirti qofti kuma shan ni gahu turan; inni ammoo barattoota isaa tiin, “Shantam shantamitti hiraa tii murna murnaan teeysisaa!” jedheeni.
[15] Isaaniis akkasuma godhanii ti hunda isaanii teeysisan.
[16] Inni hogguus biddeena shananii fi kalluuna lamaan fuudhee, gara samii ol laalaa eeybisee, kukkutee ti jaraaf akka dhiheeysaniif, barattoota isaatitti kakkanne.
[17] Hundi isaaniituu nyaatanii ti quufan; barattoonni niis hambaa hafe walitti qabanii ti, safii kudha lama guutan.
[18] Gaaf tokko Yesuus kophaa isaa odoo kadhatuu, barattoota qofaa tu isaan wajjiin ture; inni ammoo, “Namoonni kun eenyu anaan jedhu?” jedhee ti barattoota isaa gaafate.
[19] Isaaniis, “Yohannis cuuphaa dha siin jedhu, warri kaan nabi Eliyaasi siin jedhu, kaan ammoo nabiyyoota dur keeysaa tokko siin jedhu” jedhanii ti deebisaniif.
[20] Inni ammoo ammaas, “Isinoo, eenyu anaan jettu?” jedhee ti gaafate; hogguus Phexiroos, “Ati Masiihii Rabbii ti!” jedhee ti deebise.
[21] Yesuus hogguus, “Tana nam tokkotti illee hin himinaa!” jedhee jabeeysee ti isaan dinniine.
[22] Hogguus, “Ilmi Namaa manguddootaa fi luboota warra angafootaan, ammaas barsiisota seeraa tiiniis hedduu dararamuu fi raawwatee tuffatamuun, du'atti kannamuuniis isa irra jira; guyyaa sadeeysaatti ammoo du'aa ni ka'a” jedhee ti isaanitti hime.
[23] Isaan hundaanuu, “Eenyu illeen Na duukaa bu'uu yoo fedhe, if kaadee, fannoo isaa tiis baadhatee, guyyuu ana duukaa haa bu'uu;
[24] namni lubbuu isaa jiraachisuu barbaadu, lubbuun isaa duraa fudhatamti; ammoo kan anaaf jecha lubbuu isaa kannu, isii ni jiraachifata.
[25] Namni guutummaa addunyaa dhaa fayyadamee, ammoo lubbuu isaa tuu dhabe, yookiin balleeyse, faaydaan isaa maali?
[26] Eenyu illeen anattii fi qoowlii tiyyattiis yoo qaanfate, Ilmi Namaa tiis ulfina durrii isaa tiin, kan Abbaa isaa tiin, kan qulqulloota maleeykootaa tiiniis hogguu dhufu, isatti ni qaanfata.
[27] Dhugumaan isinitti hima, namoota as dhadhaabbatanii jiran kanneen keeysaa, odoo hin du'in, warri Mootummaa Rabbii arku ni jiru” jedhe.
[28] Tana dubbatee hanga guyyaa saddeetii booddee, Phexiroosii fi Yohannis, Yaaqoobiis fudhatee ti kadhata godhuuf gara gaaraatti ol bahe.
[29] Inni odoo kadhatuu, fuulli isaa ni jijjiirame; uffanni isaa tiis adii walaqqisu tahe.
[30] Kunoo, namoonni lama, isaaniis Musee fi Eliyaas, isaa wajjiin haasawaa ti turan.
[31] Ulfinaan mullatanii ti, waan inni du'a isaa tiin Yerusaaleemitti raawwachuuf deemu irratti dudubbatan.
[32] Hogguus Phexiroosii fi kanneen isaa wajjiin jiran ni mugu turan; isaaniis hogguu dammaqan, ulfina Yesuusii fi namoota isaa wajjiin dhaabbachaa turan lamaaniis ni arkan.
[33] Museenii fi Eliyaas hogguu Yesuus biraa deemuuf ka'an, Phexiroos, “Yaa barsiisaa, as jiraachuun keenya nuuf gaarii dha, koottaa asitti gojoo sadih ni ijaarraa, tokko siif, tokko Museef, tokkoos Eliyaasiif” jedhe; waanuma dubbatu illee hin beeku ture.
[34] Odoo inni tana dubbachaa jiruu, duumeeysi dhufee ti hunduma isaanii hagooge; barattoonni niis duumeeysa keeysa hogguu seenan ni sodaatan.
[35] Sagaleen takka duumeeysa keeysaa, “Kun Ilma kiyya kaniin ani filadhee tii, isa dhagayaa!” tan jettu dhufte.
[36] Sagaleen sun eega dubbatte booddee, Yesuus kophaa isaa ti arkame. Barattoonni niis, waan arkan san takka illee hogguus, nam tokkotti illee odoo hin himin, caluma jedhanii ti turan.
[37] Borumtiis gaara gubbaa irraa hogguu gadi bu'an, namoonni hedduun Yesuus qunnaman.
[38] Jarreen san keeysaa namtichi tokko sagalee isaa ol fuudhee ti, “Yaa barsiisaa, ilma tokkicha kiyya kana, akka anaaf ilaaltuun si kadhadha.
[39] Kunoo, ruuhaan hamaan gurbaa kiyya ammumaa amma qabee hogguusuma ni iyyisiisa, lafaan dhawee dhidhiitachiisee, hoomachaas afaaniin yaasee ti rakkisa; akka laaftuttiis gadi isa hin dhiisu.
[40] Barattoonni kee akka isa keeysaa baasan kadhadhee tiin ture, isaan ammoo hin dandeenye” jedheeni.
[41] As irratti Yesuus, “Isin yaa amanti-dhablee fi dhaloota jallaa, hanga yoomittiin isin wajji jiraadhee isiniif obsa?” jedhee ti deebiseef; eegasii abbaa gurbichaa tiin, “Ilma kee as fidi!” jedheeni.
[42] Gurbichi gara Yesuus dhufaa odoo jiruu, ruuhaanichi hamaan lafaan isa dhawee ti dhidhiitachiise; Yesuus ammoo ruuhaa hamaa san oofee ti, gurbicha fayyisee, abbaa isaa tiif kanne.
[43] Quduraa humna Rabbii namni hundinuu ni ajaa'ibe. Namoonni hundinuu waan Yesuus hojjate hundumaa ajaa'ibaa odoo jiranii, inni barattoota isaa tiin,
[44] “Waaniin isinitti himuuf deemu tana qaceellotti dhaggeeyfadhaa! Ilmi Namaa harka namootaatti kannamuuf deema” jedheeni.
[45] Isaan ammoo jecha kana hin hubanne, akka isaaniif hin galle, duraa dhooyfamee ti ture; waa'ee jecha kanaa isa gaafachuufiis sodaatanii ti turan.
[46] Barattoota jiddutti, isaan keeysaa eenyuu tu hundumaa irra caala falamaa jettuu tu ka'e.
[47] Yesuus ammoo yaada garaa isaanii beekuu dhaan, mucaa tokko yaamee ti, if cinaa dhaabbachiise.
[48] Isaaniin ammaas, “Mucaa kana maqaa kiyyaan namni simatu ana simata, kan na simatuus isa na erge simata; isin keeysaa kan hundumaa irra xiqqaatuu tu, guddaa taha” jedheeni.
[49] Eegasii Yohannis, “Yaa barsiisaa, namticha tokko maqaa kee tiin ruuhaa hamaa odoo baasuu agarree ti, waan inni akkuma keenyatti si duukaa hin bu'iniif jecha, isa dhoorkine” jedhee ti Yesuusitti hime.
[50] Yesuus ammoo, “Isa hin dhoorkinaa! Kan isiniin hin mormine gara keeysan taha” isaaniin jedhe.
[51] Wayti inni gara samii itti ol fudhatamu dhihaannaan, Yesuus Yerusaaleem dhaquuf murteeyfatee ti ka'e.
[52] Ergamoonni warri inni if dura erge, bakka isaaf qopheeysuuf ganda warra Samaariyaa tokko seenan.
[53] Namoonni ganda sanii ammoo Yerusaaleem dhaquuf murteeyfachuu isaa waan dhagayaniif jecha, isa simachuu ni didan.
[54] Barattoonni isaa Yaaqoobii fi Yohannis tana hogguu hubatan, “Yaa Gooftaa, [akka Eliyaas godhe] ibiddi samii irraa bu'ee isaan haa fixu, jennee akka jarreen kanatti yaamnu ni barbaaddaa?” jedhaniin.
[55] Yesuus ammoo gara isaanitti garagalee ti isaan oofee, [“Ruuhaa haala akkamii irraa akka taatan hin beeytanii?
[56] Ilmi Namaa lubbuu namaa jiraachisuuf malee, bar balleeysuuf hin dhufnee,” jedheeni.] Kana booddee dabranii ti ganda biraa dhaqan.
[57] Odoo isaan karaa deemaa jiranii, namtichi tokko, “Garuma ati deemtuun si duukaa deema” jedhee ti Yesuusitti dubbate.
[58] Yesuus ammoo, “Jeedalloon boolla qabu, shimbirroonni niis goojoo dha qabu; Ilmi Namaa ammoo bakka mataa isaa jala kaayatu illee hin qabu” jedhee ti deebiseef.
[59] Namticha biraa tokkoon ammoo, “Na duukaa bu'i!” jedheeni; inni ammoo, “Yaa Gooftaa, dura mee deemee abbaa kiyya akkaan awwaalladhu naaf hayyami” jedheeni.
[60] Yesuus ammoo deebisee, “Warri du'oon du'aa isaanii haa awwaallatanii, ati ammoo deemii, Mootummaa Rabbii labsi!” jedheeni.
[61] Eegasii namtichi biraa tokkoos, “Yaa Gooftaa, si duukaa dhaan bu'aa, dura deemee haaskaa kiyyatti nagaya akkaan dhaammadhu natti dhiisi” jedheeni.
[62] Yesuus ammoo, “Eenyu illeen irfii harkaan qabee if duuba kan ilaalu Mootummaa Rabbii kaadamuuf hin gahu” jedheeni.