[1] Yaa kabajamaa Tewofilos! Waa'ee dubbii nu jiddutti raawwatamte sanii, namoonni hedduun seeneysuuf yaalanii ti jiru.
[2] Akkuma warri duruma irraa jalqabanii ragaa ijaa tii fi kaadamtoota qoowlichaa turan, nutti dabarsanitti,
[3] aniis jalqaba irraa kaasee qalbii dhaan waa hundumaa eegaan xiinxale booda, tartiibaan qindeeysee siif barreeysuun gaarii fakkaatee ti anatti mullate.
[4] Kana gochuun kiyyaas, mirkanummaa waan barsiifamtee turte sanii akka beeytuufi.
[5] Bara Herodis mootichi, Yihudaa bulchaa ture, warra luboota murna Abiiyaa keeysaa kan tahe, luba Zakkaariyaas kan jedhamu tokkoo tu ture; niitiin isaa tiis shanyii luba Aroon irraahi, maqaan isii tiis Elsaabex jedhama.
[6] Isaan lachuu heera Gooytaa tii fi seera isaa illaan maleetti raawwachaa, fuula Rabbii duratti warra jireenya qaceelaa jiraatu turan.
[7] Haa tahu malee, Elsaabex dhabduu waan turteef jecha, ilmoo hin godhanne; isaan lachuu tuu warra umriin lafa guure turan.
[8] Faraqaan murna isaa geenyaan, gaaf tokko Zakkaariyaas warra kaanii wajjiin fuula Rabbii duratti hojii lubummaa isaa hojjachuuf dhihaate.
[9] Akka aadaa hojii hirmaannaa isaanii titti, Zakkaariyaas libaanata aarsaa akka dhiheeysuuf, ixaan irra buunaan, Beeytal Maqdas ol seene.
[10] Hogguu za'aan aarsaa libaanataa geeyse, ummanni sagadaaf walitti qabame hundinuu alaa kadhaa irra ture.
[11] Hogguus kunoo, maleeykaan Rabbii bakka libaanatni itti aarfamu irraa gara mirgaa tiin dhaabbatee ti, Zakkaariyaasitti mullate.
[12] Zakkaariyaas hogguu isa arke, birraatee ti sodaate.
[13] Maleeykichi ammoo, “Yaa Zakkaariyaas hin sodaatin! Rabbi kadhata kee siif dhagaye, Elsaabex niitiin tee ilma siif ni deeysi, maqaa isaa tiis Yohannis jettee ti moggaafta” jedhee ti itti dubbate.
[14] “Inni gammachuu guddaa dha siif taha, dhalachuu isaa tiif warri ililchaniis hedduu dha.
[15] Inni fuula Gooytaa duratti guddaa dha taha, dhugaatii inabaa yookiin dhugaatii nama sakraansiftu hundumaa gonkumaa hin dhugu, garaa haadha isaa tii jalqabee Ruuhal Qudusiin ni guutama.
[16] Ummata Israa'el keeysaahiis namoota danuu gara Gooytaa Rabbii isaanitti deebisee isaan ni fida.
[17] Inni ruuhaa fi humna akka Eliyaasiin qalbii abboottanii gara ilmaan isaanitti, warra hin ajajamnees gara hikmaa tola Rabbitti, ummata Gooftaaf qophaawan dhiheeysuuf isa dura ni deema” jedhe.
[18] Zakkaariyaas hogguus maleeykichaan, “Kun akka tahu akkamittiin beeka? Ani kunoo dulloomee tiin jira, niitiin tiyyaas umriin isii deemee ti jira” jedhe.
[19] Maleeykichi ammoo, “Ani Jibriili, kan fuula Rabbii dura dhaabbadhu, Oduu Gammachuu tana sitti himuufiin ergame.
[20] Ati ammoo ergaan ani sitti hime, tan wayta isiitti raawwatamuuf deemtu tana waan hin amaniniif jecha, hanga kun tahutti didaa, jechuun nama dubbachuu hin dandeenye taata” jedhee ti deebiseef.
[21] Ummanni gadi bahuu Zakkaariyaas eeggachaa ture sun, Beeytal Maqdas keeysatti waan inni dhibaaweef isaani dhibe.
[22] Hogguu gadi bahees, inni isaanitti dubbachuu hin dandeenye; milikkita isaan argisiisuu malee, didaa tahee hafnaan, Beeytal Maqdas keeysatti mullata akka arkee turetti hubatan.
[23] Guyyoonni faraqaa isaa raawwatamnaan, Zakkaariyaas gara mana isaatti deebi'e.
[24] Kana boodde niitiin isaa Elsaabex ni ulfooyte, akkasitti ji'a shaniif dahoo keeysa turte.
[25] Isiiniis, “Tun hojii Gooytaa ti! Amma guyyaa inni itti ana yaadate kanneen itti, namoota jiddutti aybii na irra turte san ana irraa kaase!” jette.
[26] Elsaabex ulfooytee ji'a jahaffaatti, Jibriil maleeykichi, Rabbi biraahi, kutaa Galiilaa magaalaa Naazireet jedhamutti ergame.
[27] Ergaan isaa tiis gara intala Maariyaam jedhamtu takkaa ti ture; isiin namticha Yoseef jedhamu, kan shanyii Daawwid keeysaa dhalate tokkoof qaadhimamtee ti turte.
[28] Maleeykaan isitti mullatee ti, “Nagayni siif haa tahu, ati tan ni'imaa arkatte, kunoo Rabbi Gooytaan si wajjiin jira” jedheeni.
[29] Maariyaam ammoo, wanni inni dubbate hedduu isii rakkifnaan, “Nagayni akkasii tiis maali?” jettee ti qalbii keeysatti yaadde.
[30] Hogguus maleeykaan isii dhaan, “Yaa Maariyaam, Rabbi biraa ni'imaa arkattee ti jirtaa, hin sodaatin!
[31] Kunoo gadaameeysaa kee keeysatti ni ulfooyta, ilmaas ni deeysa, maqaa isaa tiis Yesuus jedhii tii moggaasi!
[32] Inni beekamaa dha taha, Ilma Gooytaa jedhamee ti yaamama, Rabbi Gooytaaniis arshii abbaa isaa tan Daawwid ni kannaaf.
[33] Mana Yaaqoob irratti bara baraan ni mooha, barri mootummaa isaa tiis dhuma hin qabu” jedhe.
[34] Maariyaam hogguus, “Ani dubra birkaa waaniin taheef jecha, kun akkamitti tahuu dandaya?” jettee ti maleeykaa gaafatte.
[35] Maleeykichi ammoo, “Ruuhal Qudus si irra dhufa, humniti Gooytichaa tiis siif gaaddiddeeysifti; kanaaf jecha mucichi qulqulluun si irraa dhalatu kun, Ilma Rabbii jedhamee ti yaamama.
[36] Kunoo firri tee Elsaabex illeen dulluma keeysa ilmoo ni arkatti; isiin dhabduu jedhamtee turte kunoo, dahuuf ji'a jahaffaa keeysa jirti.
[37] Rabbi biratti wanni hin dandayamne humaa takka illeen hin jirtu” jedhee ti deebiseef.
[38] Hogguus Maariyaam, “Ani gabrittiin Gooytaa kunoo ti asiin jira, akkuma ati dubbatte kana anaaf haa tahu!” jetteeni. Kana booddee maleeykaan bakka irraa dhufetti deebi'e.
[39] Kana booddee Maariyaam, jerjeraan qophooytee ti, kaatee gara magaalaa baddaa Yihudaa irra jiruu tokko dheeyxe.
[40] Mana Zakkaariyaas seentee ti Elsaabex nagaya gaafatte.
[41] Hogguu Elsaabex nagaya Maariyaam dhageeyse, mucichi garaa isii keeysa sossoohe. Elsaabex hogguus Ruuhal Qudusiin ni guutamte.
[42] Sagalee isii ol fudhattee dhageeysiftee ti, “Ati dubartoota hundumaa irra eeybifamtuu dha; mucaan ati garaatti baattuus eeybifamaa dha.
[43] “Amma gaa! Haati Gooftaa kiyyaa dhuftee na simachuun isii, hammam ayyaantuu dha na godhe?
[44] Akkuma sagaleen nagayaa tee gurra kiyya buuteen, mucichi gammachuu dhaan garaa kiyya keeysa utaale.
[45] Wanni Gooytaan isii dhaan jedhe, akka raawwatamu tan amante eeybifamtuu dha!” jette.
[46] Maariyaam hogguus, “Lubbuun tiyya Gooytaa kiyyaaf hamdii dha dhiheeysiti;
[47] ruuhaan kiyyaas Rabbi naja-baasoo kiyyaaf ni ililcha.
[48] Inni danboobamtuu gabrittii isaa yaadatee ti jira; kunoo, ammaa jalqabee dhaloonni hundinuu eeybifamtu anaan jedhu.
[49] Rabbi Abbaan quduraa, dandayaan, waan guddaa dha anaaf godhe; maqaan isaa qulqulluu dha.
[50] Araarri isaa warra isa sodaatan irratti, dhalootaa hanga dhalootatti.
[51] Inni humna isaa irree isaa tiin agarsiise; warra dhaytaawoo yaada garaa isaanii wajjiin bittimse.
[52] Mootoota siree mootummaa isaanii irraa isaan buuse; warra danboobaas ol isaan kaase.
[53] Warra beelawan waan gaarii dhaan quubse; taajiroota harka duwwaa isaan yaase.
[54] Kaadamaa isaa Israa'eliif dirmate; araara kannuuf ummata isaa yaadate;
[55] abbootii teenya waan abdachiise, Abrahaamii fi shanyii isaa tiifiis bara baraan eegee ti jira” jettee ti faarfatte.
[56] Maariyaam hanga ji'a sadihii takka Elsaabex wajji turtee ti, kana booddee mana isiitti deebite.
[57] Elsaabex, waytiin dahumsa isii geenyaan, ilma deeyse.
[58] Warri ollaa isii tii fi rahimman isii, Gooytaan araara isaa guddaa isii akka agarsiise hogguu dhagayan, isii wajjiin gammadan.
[59] Guyyaa saddeettaffaa isaatti mucicha dheeyna qabuuf warri dhufan, akka maqaa abbaa isaatti Zakkaariyaas jedhanii moggaasuuf yaadan.
[60] Haati isaa Elsaabex ammoo, “Hin tahu, maqaan isaa Yohannis haa jedhamu malee” jettee ti didde.
[61] Isaan ammoo, “Firoottan kee keeysaa maqaa kanaan tokko illeenuu hin yaamamne” jedhaniin.
[62] Eegasuu abbaan isaa Zakkaariyaas, mucicha eenyu jedhee akka moggaasuu fedhu, milikkitaan gaafatan.
[63] Zakkaariyaas ammaas, waan irratti barreeysu akka kannaniif gaafatee ti, maqaan isaa Yohannis jedhama, jedhee barreeysinaan, hundi isaanii tuu ni ajaa'iban.
[64] Hogguusuma Zakkaariyaas arrabni isaa hiikamee, dubbachuu dandayee ti, Rabbi galateeyfachuu jalqabe.
[65] Warri ollaa isaanii hundinuu ni birratan. Dubbiin tuniis, baddaa Yihudaa hunduma keeysatti ballinaan odeeyfamte.
[66] Warri tana dhagayan hundinuu, qalbii isaanii keeysatti qabatanii ti, “Mucaan kun maaluma tahuuf deema?” jechaa ni gaafatu turan, irreen Rabbii akka isaan wajji jirtuus mirkana jedhan.
[67] Zakkaariyaas abbaan mucichaa, Ruuhal Qudusiin guutamee ti raajii dubbate;
[68] “Rabbi Gooytaan Israa'el galateeyfamaa haa ta'u, inni ummata isaa simatee najaas baase.
[69] Shanyii gabricha isaa Daawwid keeysaa naja-baasoo amri-qabeeysaas nuuf kaase.
[70] Afaan qulqulloota nabiyyoota isaa keeysaan bara dheeraa durii jalqabee tana dubbatee ti jira.
[71] Adawwoota keenyaa fi ammaas irree warra nu jibbanii hundumaa najaa nu baasuuf,
[72] abbootii teenyaas araara agarsiisuuf, irbuu isaa qulqulluu yaadachuuf;
[73] abbaa keenya Abrahaamiif wa'ada kakateef, nuuf kannuu dhaaf.
[74] Irree diinota keenyaa jalaa nu baasee, nutiis sodaa malee akka isa ibaadnuuf;
[75] bara jireenya keenya hundumaa keeysatti, qulqullummaa fi qaceelummaan fuula Rabbii dura akka jiraannuufi.
[76] Ati yaa mucaa, nabiyyii Gooytaa ti jedhamta; Gooftaa dura deemtee kan karaa isaaf qopheeysitu taata;
[77] Diliin isaaniif oomfii godhamuudhaan, najaa bahuu ummata isaa barsiisuu;
[78] araarri Rabbii keenyaa abbaa rahamataa, akka nuura bariisaa dhaa samii irraa nu irratti ife;
[79] warra dukkanaa fi gaaddisa du'aa keeysatti arkamaniif ibsuuf, miila keenyaas xurree nagayaa irra geggeeysuuf” jedhe.
[80] Mucichi ni guddate, hubannaaniis cimaa ti deeme; hanga guyyaa zaahiritti hojii isaa ummata Israa'el keeysatti jalqabuttiis, huffee gammoojjii keeysa jiraata ture.