[1] Yesuus bakka takkatti kadhata irra ture; kadhata isaa eega dhaabe booddee, barattoota isaa keeysaa tokko, “Yaa Gooftaa, akkuma Yohannis barattoota isaa kadhachuu barsiisetti, atiis nu barsiisi!” jedheeni.
[2] Hogguus inni, “Hogguu kadhattan akkana jechaa kadhadhaa! ‘Yaa Abbaa, maqaan kee haa qulqullaawu, mootummaan tee haa dhuftu.
[3] Soora guyyaaf nu barbaachisu guyyuma guyyaan nuuf kanni!
[4] Dilii teenyaas oomfii nuuf godhi, akkuma nutiis warra nu yakkaniif oomfii goonutti; fitinattiis nu hin galchin’ jedhaa!” jedhee ti isaan barsiise.
[5] Yesuus hogguus barattoota isaa tiin, “Isin keeysaa namni tokko saahiba yoo qabaate, saahibni isaa suniis halkan waarii isatti dhaqee, ‘Yaa sahiboo, biddeena sadih anaaf liqeeysi.
[6] Saahibni kiyya tokko karaa odoo deemuu, anatti dhufnaan, waaniin itti dhiheeysuun dhabe’ haa jedhuun.
[7] Hiriyaan isaa sun mana keeysaa, ‘Aboo ana hin dararin! Balbalti cufamtee ti jirti, joolleen tiyyaas anaan wajjiin siree irra jiru; ani ol ka'eetuma waa takka illee siif kannuu hin dandayu’ ni jedhaan.
[8] Ani isinittiin hima, saahibummaa isaa tiif jecha ka'ee biddeena yoo kannuuf baate illee, waan inni waywaatee kadhateef jecha, ka'ee waanuma isa barbaachise ni kannaaf” jedheeni.
[9] “Eegasuu kunoo isinittiin hima, kadhadhaa isiniif ni kannamaa, barbaadaa ni arkattuu, balbala dhadhawaa isiniif ni banama.
[10] Kan kadhatu hundinuu ni fudhata, kan barbaaduus ni arkata, balbala kan dhadhawuufiis ni banama.
[11] Isin abbootii keeysaa tokko illeen, ilmi isaa kalluuna yoo kadhate, kalluunaa mannaa, bofa kan kannuuf ni jiraa?
[12] Yookiin ilmi isaa killee yoo kadhate, qajjeebbuu dha kannaafi?
[13] Irrattu isin hamoo taatanii odoo jirtanii, joollee teeysaniif kannaa gaarii kannuu eega beeytan, Abbaan keeysan inni samii irraa, harka meeqa irra caalchisee warra isa kadhataniif Ruuhal Qudus ni kanna!” jedheeni.
[14] Yesuus ruuhaa didaa tokko baasaa ti ture. Eega ruuhaan hamaan bahe booda, namtichi didaa turees ni dubbate; namoonni niis hedduu dha baaseeyfatan.
[15] Isaan keeysaa hangi tokko ammoo, “Inni humna Bi'el Zebuul, alaqaa ruuhaanota hamoo tiin ruuhaanota hamoo baasa” jedhan.
[16] Warri kaan ammoo isa fitinuuf jecha, milikkita samii irraa akka isaan agarsiisu gaafatan.
[17] Inni ammoo yaada garaa isaanii beekee ti, “Biyyuma fedhee huu taanaan tokkummaan isii yoo gargar caphe, mootummaan isii dhaabbattee hin turtu; haaskaan tokko wal didee yoo gargar bahe, warri san ni diigama.
[18] Eegasuu Sheeyxaanni Sheeyxaana irratti yoo ka'e, mootummaan isaa akkamitti dhaabbachuu dandaya? Tana jechuun kiyyaas isin, ‘Humna Bi'el Zebuuliin ruuhaanota hamoo baasa’ waan anaan jettaniifi.
[19] Ani yoon humna Bi'el Zebuuliin ruuhaanota hamoo baase, joolleen teeysan hoo maaliin baasu? Kanaaf jecha ijoolluma teeysanii tu daanyoota isinitti tahuuf taa'a.
[20] Ani ammoo, quba Rabbii tiin ruuhaanota hamoo kaniin baasu yoon tahe, eegasuu Mootummaan Rabbii isin irratti dhuftee ti jirti.
[21] Namni jabaan meeshaa lolaa qabu tokko, hundumaa qopheeyfatee mana isaa hogguu eeggatu, qabeenyi isaa hundinuu nagayaan taa'aaf.
[22] Ammoo namni isa irra jabaa tahe itti ka'ee yoo isa moohe, meeshaa lolaa kanneen inni duskate hundumaa isa irraa ni fudhata, boojii isaa tiis ni hira.
[23] Namni anaan wajjiin hin tahin mormituu kiyya; namni anaan wajjiin walitti hin qabnees, ni bittimsa” jedheeni.
[24] “Ruuhaan hamaan nama keeysaa hogguu bahu, bakka itti haara baafatu barbaachaaf, lafa bishaan hin jirre keeysa nannaannawa; bakka barbaadee hogguu dhabe, ‘Mana kiyya kaniin keeysaa bahe sanittiin deebi'ee gala’ jedha.
[25] Hogguu deebi'ee dhufu, manicha haramee qopheeyfame arkata.
[26] Kana booddees deemee ruuhaanota torba kan isa irra hammaatan ifitti dabalee ti dhufa; isaaniis manichatti galanii ti keeysa taa'u. Haalli namticha sanii kan gara booddee kun, haala isaa kan duraa irra kan itti hammaatu taha” jedhe.
[27] Yesuus odoo tana dubbachaa jiruu, namoota achi turan keeysaa, dubartiin takka sagalee isii ol fudhattee, “Gadaameeysaan si baadhatee fi harmi ati hoote eeybifamoo dha” jette.
[28] Inni ammoo, “Lakkii, eeybifamoon illeen, warra Qoowlii Rabbii dhagayanii hojii irra oolchanii dha!” jedheeni.
[29] Ummanni gara isaa dhufan hoddommaannaan Yesuus, “Dhaloonni kun dhaloota hamaa dha, milikkita barbaada, ammoo milikkita nabi Yoonaas malee, milikkinni biraa hin kannamuuf.
[30] Yoonaas ummata Nanawee tiif milikkita akkuma tahetti, akkasumatti Ilmi Namaa tiis dhaloota kanaaf milikkita taha.
[31] Mootittiin kibbaa guyyaa firditti dhaloota ammaa kanaa wajjiin kaatee ni mullatti yakkaas itti murti. Isiin hikmaa Solomoon dhaggeeyfachuuf jecha, fagoo irraa dhuftee ti jirti; amma ammoo, kunoo Solomoon irraa huu kan caaluu tu as jira!
[32] Namoonni Nanawee guyyaa firditti dhaloota ammaa wajjiin ka'anii ni dhihaatu, yakkaas itti muru. Isaaniis lallaba nabi Yoonaas dhagayanii toowbatanii ti jiru; amma ammoo kunoo Yoonaas irraa huu kan caaluu tu as jira” isaaniin jedhe.
[33] “Nam tokko illeen ibsaa qabsiisee, boolla keeysa yookiin taguuga jala hin kaahu; warri mana seenu ifa akka arkaniif jecha, madabaa irra kaahu malee.
[34] Ijji tee ibsaa qaama kee tii ti; ijji tee fayyaa yoo taate, qaamni kee hundinuu ifa taha; ammoo ijji tee dhukkubsattuu yoo taate, qaamni kee dukkanaawaa dha taha.
[35] Irrattuu ifni si keeysa jiru dukkana akka hin taaneef eeggadhu!
[36] Akana taanaan, qaamni kee hundinuu ifa eega qabaate, bakki takka illeen dukkana tahuu yoo baatte, akkuma ibsaan iftiina isaa tiin siif ibsutti, qaamni kee guutuun ni ifa” jedhe.
[37] Hogguu Yesuus dubbii afaanii fixate, Fariistichi tokko nyaataaf mana isaatti isa afeere. Inni niis akkasitti hogguus ol seenee ti maadditti taa'e.
[38] Fariistichi sun Yesuus harka isaa odoo xuluph hin godhin nyaatatti dhihaachuu isaa hogguu arke ni ajaa'ibe.
[39] Gooftaan ammoo, “Yaa Fariisota, isin geebaa fi qorii duuba isaanii ni dhiyxu, ammoo keeysi keeysan bololaa fi hammeenyaan warra takashamee dha.
[40] Isin yaa gowwoota, isuma duuba uumee tu keeysaas uume mitii ree?
[41] Meeshicha keeysa waan jiru dhoortoo kannaa tii, wanni hafe hundinuu isiniif xaaharama.
[42] Yaa Fariisota isiniif magan! Isin kanneen habasuuddaa fi mashoolbaa, ammaas kudra-mudraa irraa kudhan keeysaa tokko Rabbiif kannu, ammoo firdii haqaa tii fi jaalala Rabbii ni dhiiftu. Kudhan keeysaa tokko baasuus odoo hin dhiisin, isa kanaas raawwachuun isin irra jira ture.
[43] Yaa Fariisota isiniif magan! Mana sagadaa keeysaa barchuma ol aanu jaalattu, magaalaa keeysattiis namoonni gadi godhatanii akka nagaya isin gaafatan feetu.
[44] Isiniif magan! Isin akka qabrii milikkita hin qabnee, tan namni odoo hin beeyne irraan tarkaanfatuu ti” jedheeni.
[45] Barsiisota seeraa keeysaa tokko, “Yaa barsiisaa, dubbii tana hundumaa hogguu dubbattu nuus arrabsuu kee ti bar!” jedheeni.
[46] Yesuus ammaas, “Yaa barsiisota seeraa isiniifiis magan! Ba'aa ulfaataa duuyda namaa irratti feetu, ifii keeysanii ammoo qubaan illee hin tuuyxan.
[47] Isiniif magan! Nabiyyoota abbootiin teeysan ajjeesaniif warra qubbii ijaartan.
[48] Akkanatti isin, wanni abbootiin teeysan hojjatan sirrii tahuu fudhattanii ti ragaa baatan; isaan nabiyyoota ajjeesan, isin ammoo warra du'an saniif qubbii ijaartu.
[49] Sababa kanaaf Rabbi hikmaa isaa tiin akkuma dubbatetti, ‘Nabiyyootaa fi ergamoota isaanittiin erga; warra ergaman kana keeysaa hanga tokko ni ajjeesu kaaniis ni arihatu’ jedhe.
[50] Eegasuu kunoo, dhiiyni nabiyyoota hundumaa, kan uumama addunyaa tii jalqabee dhangalaafameef, dhaloota kanaa tu itti gaafatama.
[51] Dhiiga Abeelii jalqabee hanga dhiiga Zakkaariyaas kan bakka aarsaa tii fi Beeytal Maqdas jiddutti ajjeefame, eeyye, dhugumaan isinitti hima, dhiiga isaanii tiif dhaloota kanaa tu itti gaafatama.
[52] “Yaa barsiisota seeraa isiniif magan! Maftaa balbala beekumsaa, namoota duraa fuutanii ti jirtu; ifii keeysanii hin seenne, warra silaa seenuu barbaadaniis ni dhoorkitan” jedheeni.
[53] Yesuus hogguu achii deeme, barsiisonni seeraa tii fi Fariisonni niis aaraan gubbatanii ti, gaaffiin isa xaxuuf yaalan.
[54] Tana godhuun isaanii basaasanii waan inni jedhuun isa qabuuf ture.