[1] Yesuus hogguus barattoota isaa tiin, “Gufannaan dhufa hin hanqatu; ammoo, nama gufannaan karaa isaa tiin dhufu saniif magan.
[2] Warra xixiqqaa kanneen keeysaa tokko gufachiisuu mannaa, dhagaan daakuu morma isaatti hidhamee bahar keeysatti odoo darbamee irra wayyaaf ture.
[3] If eeggadhaa; obboleeysi kee yoo si yakke, loliin; yoo toowbate, oomfii godhiif.
[4] Guyyaa tokko keeysatti hogguu torba si yakkee, hoggaa torbanuu deebi'ee sitti dhufee, ‘Irraa toobbadhee oomfii naa godhi!’ yoo siin jedhe, oomfii godhuuf qabda” jedhe.
[5] Ergamoonni hogguus Gooftaan, “Amantii teenya nuuf guddisi!” jedhaniin.
[6] Gooftaaniis deebisee, “Amantii hanga firii zanaabii takka geeysu silaa qabaattanii, qilxuu tanaan, ‘Buqqa'ii tii bahar keeysa dhaabami!’ ni jettu; isiiniis isiniif ni ajajamti” jedheeni.
[7] Yesuus, “Isin keeysaa tokko hojjataa lafa qotu yookiin horii tiysu yoo qabaate, hojjataan sun hojii irraa hogguu galu, ‘Dafii koottuu maadditti taa'ii nyaadhu!’ ni jedhaniinii?
[8] ‘Lakkii! Nyaata qopheeysii anaaf dhiheeysi, hangaan ani nyaadhee dhugutti huccuu tee marxifadhuu ana tajaajili! Achiin booda atiis nyaattee ti dhuyda’ jedhaniin mitii ree?
[9] Hojjataa waan ajajame raawwate, inni wahi galateeyfataa?
[10] Akkasumatti isiniis ammaas waan ajajamtan hundumaa hogguu raawwattan, ‘Hojjachuun waan nu irra jiru qofa waan hojjanneef jecha, galateeyfamuun nu hin barbaachisu’ jedhaa!” isaaniin jedhe.
[11] Yesuus Yerusaaleemitti odoo deemaa jiruu, Samaariyaa fi Galiilaa jidduun dabre.
[12] Akkuma inni ganda tokko seeneen, namoonni kudhan warri uzrii coraa tiin gaddaafaman itti dhufan. Isaan fagoo dhaabbatanii ti,
[13] sagalee isaanii ol fudhatanii, “Yaa Yesuus barsiisaa, nuuf nahi!” jedhaniin.
[14] Yesuus isaan laalee ti, “Deemaa tii luboota if ilaalchisaa!” jedheeni; isaan oduma deemaa jiranii, kunoo ni fayyan.
[15] Isaan keeysaa tokko akka fayye if agarraan, sagalee guddaa dhaan Rabbiif hamdii dhiheeysaa, deebi'ee ti gara Yesuus dhufe.
[16] Miila Yesuus jalatti adda isaa tiin lafa gahee ti isa galateeyfate; namtichi sun nama Samaariyaa ti ture.
[17] Yesuus hogguus deebisee, “Namoonni fayyan kudhanii mitii? Saglan kaan hoo eeysa jiru?
[18] Namticha ambaa kana malee, namni deebi'ee Rabbiif hamdii dhiheeysu hin arkamnee?” jedhe.
[19] Yesuus hogguus namtichaan, “Ka'ii tii deemi, amantiin tee si fayyiftee ti jirti” jedheeni.
[20] Yesuus, Mootummaan Rabbii yoom akka dhuftu warra Fariisotaa tiin gaafatamee, jawaaba isaaniif deebise. “Mootummaan Rabbii akkaataa bayaana taheen hin dhuftu.
[21] Namoonni, ‘Kunoo as jirti yookiin achi jirti’ hin jedhan; Mootummaan Rabbii kunoo, isinuma jidduu dha jirti” jedheeni.
[22] Itti furee tiis barattoota isaa tiin, “Wayti isin guyyoota Ilma Namaa keeysaa guyyaa tokko arkuuf itti hawwitan dhufa jirti, ammoo isa hin agartan.
[23] ‘Kunoo, achi laalaa, yookiin as laalaa!’ isiniin jedhuuf taa'u, isiniis barbaacha, jala hin orihinaa!
[24] Ilmi Namaa guyyaa isaatti akkuma hangaasuu billiq jettee, samii xarafa tokkoo kaanitti ibsituu ti taha.
[25] Ammoo san dura, hiraar hedduu tu isa irra gahuu qaba, ammaas dhaloota kanaan fudhatama dhaba.
[26] “Bara Nohi akkuma tahee turetti, bara Ilma Namaattiis akkasuma taha.
[27] Namoonni hanga guyyaa Nohi markabatti galetti, bishaan badiidhaatiis dhufee hunduma isaanii balleeysetti, nyaachaa, dhugaa, fuudhaa, heerumaatiis turan.
[28] Bara Looxis akkanuma tahee ti ture, namoonni nyaachaa, dhugaa, bitaa, gurguraa, unkura dhaabaa, manaas ijaaraa ti turan.
[29] Guyyaa Loox Sodoomii bahe ammoo, ibiddaa fi dhagaan bobawu, samii irraa isaanitti gadi roobee hunduma isaanii ni fixe.
[30] Guyyaa Ilmi Namaa itti mullatuttiis akkanuma taha.
[31] “Guyyaa san namtichi wixina mana isaa gubbaa irra jiru, meeshaa isaa tan mana keeysa jirtu, fudhachuuf gadi bu'uu hin qabu; akkasumatti ammaas kan lafa qonnaa keeysa jiruus, waa takka illeef hin deebi'in!
[32] Niitii Loox yaadadhaa!
[33] Namticha lubbuu isaa jiraachifachuu barbaade, lubbuun isaa duraa fudhatamti; lubbuu isaa kan kannu ammoo isii ni jiraachifata.
[34] Ani isinittiin hima, halkan san, namoonni lama siree takka irra rafu, inni tokko ni fudhatama, inni kaan ammoo ni dhiifama.
[35] Dubartoonni lama wajjiin dhagaa tokkotti daaku, isiin takka ni fudhatamti, isiin taan ammoo ni dhiifamti.
[36] [Namoonni lama lafa qotiisaatti arkamu, inni tokko ni fudhatama, inni kaan ammoo ni dhiifama]” jedhe.
[37] As irratti barattoonni isaa, “Eeysatti, yaa Gooftaa?” jedhanii gaafannaan, inni ammoo, “Bakka raqni jirutti, hamarraan wal geeysi” jedhee ti isaaniif deebise.