[1] Kana booddee warri yaa'ii san keeysa jiran hundinuu ka'anii ti, Yesuus fuula Philaaxositti dhiheeysanii,
[2] “Namtichi kun, Qeesaariif gibira baasuu dhoorkuun, ani Kiristoos mootii dha ifiiniis jechuun, ummata keenya odoo dogongorsiisuu ti agarre” jedhanii ti isa kasasan.
[3] Hogguus Philaaxos, “Sihii mootiin Yihudootaa?” jedhee ti isa gaafate; Yesuus deebisee, “Akkuma atuu jette sani” jedhee ti deebiseef.
[4] Hogguu san Philaaxos, luboota warra angafootaa tiinii fi, namoota dila achi turaniiniis, “Ani nama kana irratti yakka tokko illee hin agarre” jedheeni.
[5] Isaan ammoo gadi jabeeysanii ti, “Inni, Yihudaa hundumaa, Galiilaa dhaa jalqabee hanga asitti illee, barsiisa isaa tiin ummata keenya kakaasa” jedhaniin.
[6] Philaaxos tana dhageenyaan, nama Galiilaa tahuu isaa ti gaafate.
[7] Yesuus, Herodis bulchu keeysaa tahuu isaa tiis hubannaan, gara Herodisitti isa erge. Herodisiis jidduu san Yerusaaleem ture.
[8] Herodis hogguu Yesuus arke hedduu dha gammade. Waa'ee Yesuus waan dhagayeef jecha, wayta dheeraaf isa arkuu ni hawwa ture; Yesuus milkita quduraa hogguu hojjatu arkuufiis abdachaa ti ture.
[9] Herodis gaaffii hedduu dha Yesuusitti dhiheeyse, inni ammoo jawaaba hin deebifneef.
[10] Luboonni warri angafoonninii fi barsiisonni seeraa tiis achi dhadhaabbatanii, jabeeysanii isa ni kasasu turan.
[11] Eegas Herodis loltuu isaa wajjiin isatti qoosanii ti ittiis hanjaman, uffata walaqqisaa itti uwwisee ti, Philaaxositti deebisee erge.
[12] Herodisii fi Philaaxos, warri achiin dura waliin diina turan, guyyuma san, saahiba waliif tahan.
[13] Philaaxos luboota warra angafoota, bulchoota biyyaa tii fi ummata walitti yaamee ti,
[14] isaaniin, “Namtichi kun ummata dogoggorsiisa jettanii, qabdanii ti gara kiyya fiddan; kunoo, ani isinuma duratti isa xiinxalee, waan itti isa kasastanitti, ani balleeysaa isa irratti hin agarre.
[15] Herodisiis akkasumatti yakka isa irraa dhabee deebisee ti nutti erge; kunoo, waan du'aan isa gahu, takka illee hin goone.
[16] Akkana waan taheef jecha, adabeetumaan isa gadi dhiisa” jedhe.
[17] [Ayyaana Bira Dabruu irratti warra hidhaman keeysaa tokko isaaniif gadi dhiisuun aadaa dha ture.]
[18] Namoonni sun hundinuu, “Namticha kana ajjeesii Barabbaas gadi nuuf dhiisi!” jedhanii ti itti iyyan.
[19] Barabbaas kun ammoo rabshaa magaalaa keeysatti tahe keeysaa harka waan qabuu fi ajjeechaa lubbuu namaattiis kan hidhame ture.
[20] Philaaxos illeen Yesuus gadi dhiisuu fedhee ti, ammaas deebisee isaanitti dubbate.
[21] Isaan ammoo, “Fannisi, isa fannisi!” jedhanii ti itti goohan.
[22] Hoggaa sadeeysaaf deebisee, “Maaliif? Maal balleeyse? Firdii du'aa tiin waan isa gahu yakka isa irratti hin agarre; eegasuu adabee tiin isa gadi dhiisa” isaaniin jedhe.
[23] Isaan ammoo akka inni fannifamuuf iyyansa jabaa dhaan kadhatan; gooti isaanii tiis isa ni oggolchiifte.
[24] Akkasitti Philaaxos gaaffiin isaanii akka raawwatamuuf firdii kanne.
[25] Namticha rabshaa biyyaa tii fi lubbuu namaa tiif hidhame san, ummanni nuuf gadi dhiisi jedhanii kadhannaan ni hiikeefi. Yesuus ammoo akka fedhan haa godhaniif, dabarsee isaanitti kanne.
[26] Yesuus fannisuuf odoo geeysaa jiranii, nama Qareenaa kan Simi'oon jedhamu tokko diidaa odoo galuu qabanii ti, muka fannichaa baadhatee Yesuus duukaan akka deemuuf irra kaayan.
[27] Ummata san keeysaa namoonni danuun isa faana yaa'u turan; isaan keeysaa dubartoonni waywaachaa booyaa ti turan.
[28] Yesuus ammoo isaanitti fuula garagalee ti, “Yaa dubartoota Yerusaaleem, ifii keeysanii fi joollee teeysaniif booyaa malee, anaaf hin booyinaa!
[29] Kunoo, ‘Dhabduun, tan ilmoo hin dahin, tan harmaas hin hoosisin eeybifamtuu dha’ guyyoonni itti jedhan dhufuuf taa'u.
[30] Gaafas gaaraan, ‘Nu irratti jigaa!’ tullootaaniis ‘Nu awwaalaa!’ jedhu.
[31] Irrattuu muka jiidhaa warri akkas godhan, muka goggogaa ammoo akkam haa godhu laata?” jedheeni.
[32] Namoota biraa lama, yakkamootaas, ajjeesuuf isaan wajjiin geeysan.
[33] Bakka “Killiyyuu mataa” jedhamtee yaamamtu takka hogguu gahan, achitti Yesuus fannisan; warra yakkamootaas, tokko gara harka mirga isaa tiin, kaaniis gara harka bitaa isaa tiin fannisan.
[34] Yesuus ammoo hogguus, “Yaa Abbaa, isaan warra waan godhan hin beeynee, oomfii godhiif!” jedhe; warri isa fannisaniis ammaas uffata isaa hixaa dhaan addaan hiratan.
[35] Namoonni achi dhadhaabbatanii ni daawwatu turan; warri bulchaniis itti qoosan. “Namtichi kun namoota biraa najaa baasee ti jira, inni Masiihii Rabbii filatame tokko yoo tahe, mee najaa if haa baasu!” jedhan.
[36] Warri loltuuniis itti malanii ti, isatti qoosan, daadhii inabaa dhangaggooytuu itti kannanii ti,
[37] “Ati yoo dhugumaan mooticha Yihudootaa dhaa taate, najaa if baasi!” jedhaniin.
[38] Barreeyfamni, “Inni kun mooticha Yihudootaa ti” jedhu tokko ammaas mataa isaa gararraa dha ture.
[39] Warra yakkamoota achitti fannifaman lamaan keeysaa inni tokko, “Ati Kiristoosii mitii? Najaa if baasi, nuus najaa baasi!” jedhee ti isatti hanjame.
[40] Inni yakkamaan kaan ammoo isa oofee ti, “Yaa namana, akkuma isaatti firdii takka jala odoo jirtuu, Rabbi illee hin sodaattuu?
[41] Nuti haqa akkuma hojii teenyatti arkanne, kunoo inni kun ammoo humaa hin yakkine!” jedheeni.
[42] Hogguus Yesuusiin, “Yaa Yesuus, mootummaa tee tiin hogguu dhuftu na yaadadhu!” jedheeni.
[43] Yesuus ammoo, “Dhugumaan siin jedha, guyyuma arraa kana, anaa wajjiin jannata keeysatti arkamta” jedheeni.
[44] Guyyaa keeysa waaree sa'aa kudha lammeeysa ture; ammoo, dukkanti hunda hagooydee ti, hanga waaree booda sa'aatii sadihitti turte.
[45] Golgaan Beeytal Maqdasii bakka lamatti addaan baqaqe.
[46] Yesuus hogguu sani, sagalee guddoo dhaan, “Yaa Abbaa kiyya, lubbuu tiyya kunoo harka kee tittiin kanna!” jedhee ti iyye. Akkuma tana jedheen, ruhiin keeysaa baate.
[47] Abbaan dhibbaaleeysaa waan tahe tana hogguu arke, “Namtichi kun dhugumaan, nama qaceelaa dha” jedhee ti Rabbiif hamdii dhiheeyse.
[48] Namoonni waan nama ajaa'ibsisaa laaluuf walitti qabamanii turan hundinuu, waan raawwatame hogguu arkan, qoma isaanii if dhawaa ti gala dacha'an.
[49] Warri isa beekan hundinii fi, dubartoonni Galiilaa dhaa Yesuus duukaa bu'aniis, halaala dhadhaabbatanii, ni daawwatu turan.
[50] Yihudaa magaalaa Armaatiyaa keeysa, miseensa yaa'ii biyyaa kan ture, nama gaarii ammaas qaceelaa, Yoseef jedhamu tokkoo tu ture.
[51] Inni akeeka fi gocha isaanii irratti odoo walii hin galin, ammoo Mootummaa Rabbii eeggachaa ti ture.
[52] Namtichi kun Philaaxos bira dhaqee ti reefka Yesuus kadhate.
[53] Akkasitti reefka isaa tiis fannoo irraa gadi buusee, wayaa quncee qoonxar irraa dhawamteen kafanee, qabrii garaa dhagaa keeysatti tolfamte, tan takkaa namni itti hin awwaalamin keeysa kaaye.
[54] Guyyaan Sanbataa jalqabuu bira waan gaheef jecha, namoonni qophaawuu irra turan.
[55] Dubartoonni Galiilaa dhaa, Yesuus duukaa dhufan sun, Yoseef wajjiin dhaqanii ti, bakka qabrichaa, ammaas akkaataa reefki isaa itti kaayamees ni hubatan.
[56] Achiin booda manatti deebi'anii ti waan reefkatti diban axiraan wajjiin qopheeysanii; guyyaa Sanbataa ammoo akkuma seerri ajajutti ni boqotan.