[1] Hogguus jarri tokko gara Yesuus dhufanii ti, waa'ee warra Galiilotaa, kanneen odoo isaan aarsaa dhiheeysanii, Philaaxos isaan ajjeesisee dhiiga isaanii dhiiga qalma aarsaa isaanii wajjiin waliin makee ti itti himan.
[2] Yesuus ammoo deebisee, “Warri Galiilaa sun Galiilota warra kaan hundumaa irra caalaa dilaawoota waan turaniif jecha, rakkoon tun kan irra geeyse isinitti fakkaataa?
[3] Miti, ani isinittiin hima, hundi keeysanuu yoo toowbachuu baattan akkuma kanatti dhumtu.
[4] Yookiin jarri kudha saddeettan kanneen bishaan Siilo'am cinaatti, kaabiin dhagaa dheertuun jiiydee isaan fixxe sun, ummata Yerusaaleem jiraate hundumaa irra caalaa kan yakkan isinitti fakkaataa?
[5] Miti, ani isinittiin hima, hundi keeysanuu yoo toowbachuu baattan, akkuma kanatti dhumtu” isaaniin jedhe.
[6] As irratti Yesuus fakkeenya kana isaanitti hime; “Namticha tokkoo tu muka habruu tan ooyruu isaa keeysa dhaabamte takka qaba ture; inni firii irra barbaaduuf dhaqee ti humaa irraa dhabe.
[7] Hogguus namticha ooyruu isaa eeguun, ‘Agartaa! Bara sadihiin muka kana irraa firii barbaacha dhufee, ammoo humaa irraa dhabe; kanaaf jecha muri, maaliif lafa balleeysiti?’ jedheeni.
[8] Namtichi sun ammoo deebisee, ‘Yaa gooftaa, mee bara kanaaf hangaan ani naannawa isii dongoree dikee itti naqutti itti dhiisi!
[9] Bar hegeree yoo firii godhate gaarii; yoo didde ammoo ni murta’ jedheeni” jedhe.
[10] Yesuus guyyaa Sanbataa mana sagadaa tokko keeysatti ni barsiisa ture.
[11] Kunoo dubartiin ruuhaa hamaa dhaan qabamtee, bara kudha saddeet dhukkubsatte takkaa tu achi ture; isiin goolloytee ol diriiruu hin dandeenye.
[12] Yesuus hogguu isii arke, yaamee ti, “Intalo, dhibdee tee ti irraa furamtee ti jirta” jedheeni.
[13] Harka isaa tiis isii irra kaaye; isiiniis hogguusuma diriirtee dhaabbattee, Rabbiif hamdii dhiheeysite.
[14] Hoogganaan mana sagadaa ammoo, Yesuus guyyaa Sanbataatti fayyisuu isaa tiif waan dallaneef jecha, warra achi turaniin, “Guyyoonni jaha kanneen hojii itti hojjachuuf namaaf kannaman jiru; guyyoota sanitti kottaa tii fayyifamaa malee, guyyaa Sanbataatti hin tahu!” jedhe.
[15] Kana booddee Gooftaan hooggantichaan, “Isin fakkeeysitoota, isin keeysaa guyyaa Sanbataatti sa'a isaa yookiin harree isaa hidhaa irraa hiikee, bishaan obaa kan hin geeysine eenyu mee?
[16] Kunoo, dubartittiin tun, intalti Abrahaam, Sheeyxaanni bara kudha saddeetiif isii hidhee tan turte, guyyaa Sanbataatti hiikamuun isii irra hin jiruu ree?” jedheeni.
[17] Hogguu inni tana dubbate, warri isaan morman hundinuu if qaanfatan; namoonni hundinuu waan ajaa'iba inni hojjate hundumatti gammadan.
[18] Hogguus Yesuus, “Mootummaan Rabbii maal fakkaatti? Maalittiin isii fakkeeysa?” jedhee ti gaafate.
[19] “Mootummaan Rabbii, firii zanaabii tan namni fuudhee ooyruu isaa keeysa buusee, isiin ammoo biqiltee, guddatee mukaas taatee, shimbirroonni dhufanii damee isii irratti tan goojoo ijaarratan fakkaatti” jedhe.
[20] Yesuus ammaas, “Mootummaa Rabbii maalittiin fakkeeysa?” jedhee ti gaafate.
[21] “Mootummaan Rabbii, rushii dubartiin takka fuutee daakuu quunnaa sadihitti maktee, rushiiniis hunduma isii bukeeysitutti fakkaatti” jedhe.
[22] Yesuus mandarootaa fi gandeen keeysa dabre hundumaatti barsiisaa, gara Yerusaaleem deemaa ti ture.
[23] Namtichi tokko, “Yaa Gooftaa, namuma waa xiqqo qofaa tu najaa bahuuf deemaa?” jedhee ti gaafate. Yesuus ammoo hunduma isaanii tiin,
[24] “Balbala dhiphoo dhaan ol seenuuf tattaaffadhaa; ani kunoo isinittiin hima, namoonni hedduun achiin seenuuf ni hawwu, ammoo hin dandayan.
[25] Eega abbaan manaa ka'ee takka balbala cufe, isin ammoo ala dhaabbattanii balbala dhadhawaa, ‘Yaa gooftaa nu irraa bani!’ jettanii ni waywaattu; abbaan manaa ammoo, ‘Ani, isin bakka irraa dhuftan hin beeku’ jedhee ti isiniif deebisa.
[26] Hogguus isin, ‘Nuti Ssii wajjiin nyaannee, dhuynee ti jirraa bar, karaa keenya irrattiis barsiiftee ti jirtaa’ ni jettu.
[27] Inni ammoo, ‘Ani bakka isin irraa dhuftan hin beeku; isin warri hamaa hojjattan hundinuu, ija tiyya duraa badaa!’ isiniin jedha.
[28] Abrahaam, Yisihaaq, Yaaqoobii fi nabiyyoota hundumaa, Mootummaa Rabbii keeysatti hogguu agartan, ifii keeysan ammoo alatti darbamuu keeysan hogguu hubattan, booyichaa fi ilkaan waliin qaruu tu isin mudata.
[29] Namoonni baha-biiftuu tii fi lixa-biiftuu, ammaas kaabaa fi kibba irraahiis Mootummaa Rabbii keeysatti, maadditti dhihaachuuf ni dhufu.
[30] Warra hundumaa booddee jiran keeysaa, warra duraa tahuuf kan deeman ni jiru, warra dura jiran keeysaahiis warra hundumaa booddee kan tahuuf taa'aniis ni jiru” jedhe.
[31] Waytuma san warra Fariisotaa keeysaa namoonni muraasni gara Yesuus dhufanii ti, “Herodis waan si ajjeesuu barbaaduuf jecha asi irraa deemi!” isaan jedhan.
[32] Inni ammoo, “Deemaa tii, jeedalloo saniin, ‘Ani kunoo, arraa fi boruus ruuhaanota hamoo niin baasa, warra dhukkubsataniis niin fayyisa, guyyaa sadeeysaattiis hojii tiyya niin raawwadha.
[33] Waanuma fedhee huu haa tahuu, arraa fi boru iftaaniis karaa kiyya ittiin fura, kuniis nabiyyiin tokko Yerusaaleemii irraa alatti du'uun waan isa irra hin jirreefi!’ jedhaa” isaaniin jedhe.
[34] Yesuus ammaas itti furee, “Yaa Yerusaaleem! Yaa Yerusaaleem! Ati tan nabiyyoota ajjeeftu, warra sitti ergamaniis tan dhagaa dhaan rukuttu, hoggu meeqan akkuma lukkuun ilmaan isii goblaa isii jalatti walitti qabattutti, joollee tee walitti qabuu barbaade; ammoo sii fi joolleen tee tiis hin barbaanne.
[35] Kunoo, manni keeysan onee ti isin irratti hafa; hanga wayti isin ‘Maqaa Gooytaa tiin kan dhufu galateeyfamaa dha’ itti jettan dhuftutti akka ana hin agarreen isinitti hima” isaaniin jedhe.