[1] Ayyaanni Qiinxaa Maattiraat, Ayyaana Bira Dabruu kan jedhamu dhihaatee ti ture.
[2] Luboonni warri angafoonninii fi barsiisonni seeraa ummata waan sodaataniif jecha, Yesuus ajjeesuuf karaa itti malu ni barbaadu turan.
[3] Hogguus Sheeyxaanni, Yihudaa nama Keriyot warra kudha lamaan keeysaa tokko kan turetti seene.
[4] Hogguus inni deemee ti, akkaataa inni itti Yesuus dabarsee isaanitti kannuu dandayu irratti, luboota warra angafootaa tii fi shuumoota Beeytal Maqdas wajjiin marihate.
[5] Isaaniis gammachuun maallaqa isaaf kannuuf waliif galan.
[6] Yihudaan wali-galtee tana fudhatee, bakka ummanni hin jirretti Yesuus dabarsee isaanitti kannuuf carraa dha eeggata ture.
[7] Ayyaanni Qiinxaa Maattiraat guyyaan itti hoolaan Bira Dabruu qalamuun irra jiru geenyaan;
[8] Yesuus Phexiroosii fi Yohannisiin, “Deemaa tii, hiraata Bira Dabruu akka nyaannuuf nuuf qopheeysaa!” jedhee ti isaan erge.
[9] Isaan ammoo, “Eeysatti akka qopheeysinu jaalatta?” jedhaniin.
[10] Inni ammaas, “Hogguu mandaricha seentan, namticha tokko kan okkotee bishaanii baadhatee tu isinitti dhufa; isiniis isa duukaa mana inni itti galu dhaqaa.
[11] Abbaa manaa tiin, ‘Manni keeysummaa kaniin ani barattoota kiyyaa wajjiin keeysatti hiraata Bira Dabruu nyaadhu eeysa? siin jedha barsiisaan’ jedhaan.
[12] Namtichi hogguus qallaa gubbatti mana ballaa tokko kan meeshaan guututti qophaawe isin agarsiisa, achitti qopheeysaa!” jedheeni.
[13] Hogguu deeman, akkuma inni isaanitti hime tahee arkanii ti, achitti hiraata Bira Dabruu qopheeysan.
[14] Za'aan itti hiraata Bira Dabruu nyaatan hogguu gahe, Yesuus ergamoota isaa tiin wajjiin maadditti taa'e.
[15] Inni isaaniin, “Hiraarfamuu kiyyaan dura, hiraata Bira Dabruu kana isin wajjiin nyaachuuf hedduun hawwee jira.
[16] Hanga guyyaa Mootummaa Rabbii keeysatti guutummatti raawwatamutti, ani deebi'ee hiraata Bira Dabruu akkaan hin nyaanne isinittiin hima” jedheeni.
[17] Geeba fudhatee ti, Rabbiif galata galchee, “Hoodhaa, waliin gahaa dhugaa!
[18] Ammaa jalqabee Mootummaan Rabbii hanga dhuftutti cuunfaa inabaa irraa akkaan hin dhuyneen isinitti hima” jedhe.
[19] Biddeenaas fuudhee ti, Rabbiif galata galchee, kukkutee isaaniifiis kannee, “Kun jasada kiyya kan isiniif kanname, kanaas yaadannoo kiyyaaf godhaa!” jedhe.
[20] Akkasumatti hiraata booddee geebaas fuudhee ti, “Geebni kun irbuu haaraya dhiiga kiyyaa kan isiniif dhangala'ee dha.
[21] Ammoo kunoo, harki namticha dabarsee na kannu anaa wajjiin gabatee irra jira.
[22] Ilmi Namaa ti illeen akkuma dur herregameefitti ni deema, ammoo namticha dabarsee isa kannu saniif magan!” jedhe.
[23] Isaan ammaas, isaan keeysaa namtichi tana godhu eenyu akka tahe wal gaggaafatan.
[24] Eegasii kunoo isaan keeysaa eenyuu tu caala irratti, barattoota jiddutti falamaan kaatee ti turte.
[25] Hogguus Yesuus, “Mootoonni saboota qomoo Israa'el hin tahinii, amrii isaanii saba isaanii irratti agarsiisu; warri amrii qaban sun ammaas, gargaartuu biyyaa ti, ifiin jechisiisu.
[26] Isin ammoo akkas tahuun isin irra hin jiru; isin keeysaa kan hundumaa irra caalu akka nama hundumaa irra xiqqaa dhaa, inni hoogganuus akka nama kaadamaa dhaa haa tahu.
[27] Nama maadditti taa'u moo, nama kaadimaa tu irra caala? Nama maadditti taa'u mitii? Ani gaa kunoo, isin jiddutti akka kaadimaa ti.
[28] Isin fitinama kiyya keeysatti warra anaa wajjiin dhaabbattanii dha.
[29] Akkuma Abbaan kiyya mootummaa ana irra kaayetti, aniis akkasumattiin isin irra kaaya.
[30] Mootummaa tiyya keeysatti gabatee tiyya irraa ni nyaattu, ni dhuydu, barcumman mootummaa irra teeysanii, gosa Israa'el kudha lamaan irratti firdiis ni kannitu” jedheeni.
[31] Yesuus, “Simoon, yaa Simoon, Sheeyxaanni akka qamaditti isin gingilchuuf kadhatee ti jira.
[32] Ani ammoo, amantiin tee akka hin badneef jechaan, siif kadhadhee tiin jira; ati hogguu gara kiyyatti deebite, obboleeyyan kee tiis jajjabeeysi!” jedheeni.
[33] Inni ammoo, “Yaa Gooftaa, ani kunoo siin wajji mana hidhaatti, gara du'attis deemuuf qophee dha” jedheeni.
[34] Yesuus deebisee, “Ani sittiin hima, yaa Phexiroos, edanuma lukkuun odoo hin iyyin dura, anuma beekuu kee ti illee, hoggu sadih inkaaruuf teeysa” jedheeni.
[35] Hogguus Yesuus isaaniin, “Maallaqa, qalqalloo, kophees odoo hin fudhatin hogguun ani isin erge, waa takka illeen isinitti irratee?” jedhee ti gaafate; isaan ammoo, “Humaa nutti hin irranne” jedhanii ti jawaaba kannaniif.
[36] Inni ammaas itti dabalee, “Amma ammoo, maallaqa, ammaas qalqalloos namni qabu haa fudhatuu; habalee namni hin qabne, qamisa isaa gurguree takka haa bitatuu!
[37] Kitaaba keeysatti, ‘Warra seera-dhablee wajjiin lakkaawame’ jedhamee kan barreeyfame kun, anatti raawwatamuun akka irra jiru isinittiin hima. Eeyye, wanni ana laalchisuun barreeyfame xumuramee raawwatamuu irra gahe” jedhe.
[38] Barattoonni deebisanii, “Kunoo Gooftaa, habalee lamaa tu as jira” jennaan, inni niis deebisee, “Ni gaha” isaaniin jedhe.
[39] Yesuus magaalaa keeysaa bahee, akkuma aadaa isaa gara Gaara Ejersaa ti deeme; barattoonni isaa tiis isaa wajjiin deeman.
[40] Bakka san hogguu gahe, “Fitinatti akka hin seenneef kadhadhaa!” isaaniin jedhe.
[41] Inni hanga darbannaa dhagaa takkaa isaan irraa fagaatee ti, jilbiiffatee kadhate,
[42] “Yaa Abbaa, fedha kee yoo tahe, geeba hiraar kana Ana irraa fuudhi; ammoo akka fedha kiyyaa odoo hin tahin, akka fedha kee tii haa tahu!” jedhe.
[43] [Hogguus maleeykaan Rabbii samii irraa itti mullattee ti isa jajjabeeysite.
[44] Hiraar keeysattiis ittuma jabaatee ti kadhate; deeyfi isaa tiis akka dhaph-dhaphii dhiigaatti lafatti gadi dhimmisa ture.]
[45] Kadhata irraa ka'ee, gara barattoota isaa hogguu deebi'e, barattoonni gaddaan caraqamanii rafanii ti arke.
[46] Inni ammoo, “Akkamitti rafuu dandeeysan? Ka'aa, fitinamatti akka hin galleef kadhadhaa!” isaaniin jedhe.
[47] Odoo Yesuus tana dubbachaa jiruu kunoo, ummanni danuun ni dhufan; barattoota kudha lamaan keeysaa tokko Yihudaa nama jedhamuu tu isaan fidee, Yesuus dhungachuuf gara isaa dhihaate.
[48] Yesuus ammoo, “Yihudaa, dhungoon Ilma Namaa dabarsitee kannitaa?” jedheeni.
[49] Yesuusii wajjiin warri turaniis waan tahuuf deemu hogguu hubatan, “Yaa Gooftaa, habaleen dhooynuu?” jedhaniin.
[50] Tokko isaanuma keeysaa, gabricha angafa lubootaa dhawee ti, gurra mirgaa irraa mure.
[51] Yesuus ammoo, “Lakkisaa, waan akkana itti hin deebi'inaa!” jedhee ti gurra namtichaa tiis qaqqabatee ti fayyise.
[52] Kana booddee Yesuus luboota warra angafoota, hooggantoota waardiyyaa Beeytal Maqdas akkasumatti manguddoota warra isa qabuuf bahaniin, “Akka warra shiftaa qabuuf bahanitti habalee fi jirmaan yaatanii?
[53] Guyyuu Beeytal Maqdas keeysatti, ani isiniin wajjiin ture, aa qabuuf harka keeysan anatti hin laanne; amma ammoo wayti tun teeysani, tan dukkanti itti mootomtu” jedheeni.
[54] Kana booddee Yesuus qabanii, fuudhanii ti deeman, gara mana angafa lubootaa tiis ni geeysan; Phexiroos ammoo irraa fagaatee ti, duukaa dha deema ture.
[55] Hogguu namoonni abaada keeysatti ibidda bobeeysanii wajjiin taa'an, Phexiroosiis isaan wajjiin taa'e.
[56] Intalti kaadamtuun takka isa kan ifa ibiddaa keeysa taa'u agartee, ija itti dhaabdee laaltee ti, “Namtichi kuniis isaa wajjiin ture” jette.
[57] Inni ammoo, “Intalo, ani isa hin beeku” jedhee ti inkaare.
[58] Waa xiqqo booddee namni biraa tokkoos isa arkee ti, “Atiis isaan keeysaa tokko” isaan jedhe; Phexiroos ammoo, “Anaa miti, namtichana” jedheeni.
[59] Akka sa'aatii takkaa booddee namni biraa tokko ammaas mirkaneeysee ti, “Dhuguma namtichi kuniis isaa wajjiin ture, inni kunoo nama Galiilaa ti” jedhe.
[60] Phexiroos deebisee ti, “Namtichana, waanuma ati jettu huu ani hin beeku” jedheeni; odoo inni tana afaanii qabu, kunoo lukkuun ni iyyite.
[61] Gooftaan hogguus garagalee Phexiroos fuulletti laale; Phexiroos hogguus jecha Gooftaan, “Arrumaan tana lukkuun odoo hin iyyin hoggu sadih na kaadda” isaan jedhee ture san yaadatee ti,
[62] gadi bahee mararfatee ti booye.
[63] Warri Yesuus qabanii eegaa turaniis, isatti hanjaman, ni garafaniis.
[64] Ija isaa tiis hidhanii ti, “Eenyuu tu si rukute? Nabiyyummaa tee tiin nutti himi!” jechaa tiin turan.
[65] Kana malees waan biraa tiin hedduu dha isa arrabsan.
[66] Hogguu barihees yaa'iin manguddoonni ummataa, luboonni warri angafoonninii fi barsiisonni seeraa tiis walitti qabamnaan, Yesuus yaa'ii isaanii duratti dhiheeysisan.
[67] Isaaniis, “Ati Kiristoos yoo taate nutti himi!” isaan jedhan. Inni ammoo, “Yoon ani isinitti hime illee hin amantan.
[68] Yoon ani isin gaafadhees anaaf hin deebiftan.
[69] Ammoo Ilmi Namaa ammaa jalqabee, gara harka mirga Rabbii hundumaa dandayuu taa'uuf jira” jedheeni.
[70] Hundi isaanii tuu, “Eegasuu ati Ilma Rabbii tii ree?” jedhaniin; inni ammoo, “Isa tahuu kiyya isinuu jettan” jedheeni.
[71] As irratti isaan, “Nuti ifii keenyaa afaan isaa irraa kunoo dhageenye, ragaan kana irra caalu maal barbaachisa?” jedhan.