[1] Yesuus Ruuhal Qudusiin guutamee Yordaanos irraa hogguu deebi'e, ruuhaan huffee gammoojjii keeysa guyyaa afurtamaaf geeyfame.
[2] Sheeyxaanaaniis fitinamaa ti ture. Guyyoota san hundumaa, humaa hin nyaanne; dhuma guyyoota sanii irrattiis ni beelawe.
[3] Sheeyxaantichi hogguus Yesuusiin, “Ati dhugumaan Ilma Rabbii yoo taate, dhagaa kanaan biddeena tahi jedhii tii ajaji!” jedheeni.
[4] Yesuus ammoo deebisee ti, “‘Namni biddeena qofaan hin jiraatu’ jedhamee barreeyfamee ti jira” jedheeni.
[5] Sheeyxaantichi itti aansee ol isa baasee ti, hanga liphuu ijaa takkatti, mootummaa addunyaa hundumaa isa agarsiise.
[6] Hogguus akkana jedheeni, “Amrii hunduma isaan irrattii fi ulfina isaanii tiis siifiin kanna; isaan kun hundinuu anaaf dabarfamanii ti jiru, aniis ammaas abbumaan fedheef kannuu niin dandaya.
[7] Eegasuu ati yoo anaaf sujjuudde, hundinuu kee ti tahu” jedheeni.
[8] Yesuus ammoo deebisee, “‘Rabbi Gooytaa kee tiif sujjuudi, isuma qofaas ibaadi!’ kan jedhu barreeyfamee ti jira” jedheeni.
[9] Sheeyxaantichi ammoo Yerusaaleem isa geeysee ti, fiinxa tuuttoo Beeytal Maqdas irra fittetti isa dhaabbachiisee, “Dhugumaan ati Ilma Rabbii yoo taate, as irraa gadi if darbi!
[10] Kunoo barreeyfamee ti jiraasi, ‘Akka gaaritti si eeysisuuf inni maleeykoota isaa siif ni ajaja,
[11] miilli kee akka dhagatti hin gufanneef isaan harka isaanii irratti si baadhatu’” jedheeni.
[12] Yesuus hogguus, “‘Rabbi Gooytaa kee hin fitinin!’ jedhamee ti jira” jedhee ti deebiseef.
[13] Sheeyxaantichi eega fitinaa kanneen hundumaa raawwate booddee, waytumaaf isa dhiisee ti biraa deeme.
[14] Kana booddee Yesuus, qiwwaa Ruuhal Qudusiin Galiilaatti deebi'e. Oduun isaa tiis naannoo san jiran hundumatti odeeyfamte.
[15] Inni niis manneen sagadaa isaanii keeysatti barsiise, hundi isaanii tiis isa ni faarsan.
[16] Bakka itti guddate Naazireet dhufee ti, guyyaa Sanbataa, akkuma aadaa isaa mana sagadaa isaanii dhaqee, Kitaaba dubbisuuf ol ka'e.
[17] Kitaaba nabi Isaayyaas itti kanninaan, maraa Kitaabtichaa diigee, bakka dubbiin tanatti aantee jirtu, itti barreeyfamte arkatee ti dubbise.
[18] “Ruuhaan Gooytichaa ana irra jira, Oduu Gammachuu warra miskiinaaf akkaan lallabuuf jecha na muudee ti jira; warri booji'aman akka gadi dhiifaman labsuuf; warra jaamaniif ija isaanii banuuf; warra cunqurfaman bilisa baasuuf;
[19] bara ni'imaa jaalala Gooytaa labsuuf na ergee ti jira” kan jedhu ture.
[20] Kitaabtichaas maree, namticha tajaajilaa mana sagadaa sanitti kannee ti gadi taa'e; ijji warra mana sagadaa san keeysa turan hundinuu isa irratti hafte.
[21] Hogguus Yesuus, “Kunoo, dubbiin Kitaabaa tun, dhagayuu keeysaniin guyyaa arraan tanaa raawwatamte” isaaniin jeche.
[22] As irratti hundi isaanii isa irraa gammadanii, dubbii ni'imaa tan afaan isaa keeysaa yaatuus ajaa'ibaa, “Sa kun ilmuma Yoseefii mitii?” jedhanii ti gaafatan.
[23] Hogguus Yesuus deebisee, “Dura mee ifuma kee tuu fayyisi, yaa ogeeysa fayyaa, jettanii anatti makmaakuun hin hafu; ammaas waan kanneen Qifirnaahomitti hojjachuu kee dhageenye, akkasumatti magaalaa itti guddatte kanattiis hojjadhu naan jechuun keeysaniis mirkana” isaaniin jedhe.
[24] Itti dabalee tiis, “Ani dhugumaan isinitti hima, nabiyyiin tokko illeen magaalaa itti dhalate keeysatti, fudhatama hin arkatu” jedheeni.
[25] “Zamana nabi Eliyaas, wayta roobni bara sadihii fi baatii jahaaf roobuu hanqatee, san hundumatti abaar guddaan tahe, dubartiin gursummeeytiin hedduun Israa'el keeysa akka turan mirkana.
[26] Ammoo Eliyaas gara gursummeeytii magaalaa Saraaphtaa, tan kutaa Sidoon keeysa jirtutti malee, warra kaan keeysaa takkatti illee hin ergamne.
[27] Akkasumatti ammaas zamana nabi Elsaa'i, Israa'el keeysa warra uzrii coraa tiin gaddaafaman namoota hedduu tu ture; haa tahu malee, Nahamaan namticha Sooriyaa san qofa malee, warra kaan keeysaa tokko illeen hin fayyine” jedhe.
[28] Namoonni mana sagadaa san keeysa turan hundinuu, waan inni dubbate tana hogguu dhagayan, hedduu dha isatti aaran.
[29] Akkasitti ka'anii Yesuus magaalaa isaanii keeysaa baasanii, fiinxa gaara mandarri isaanii irratti ijaarame irratti ol isa baasan; tanaas wanni godhaniif, bililee irraa gadi isa darbuuf ture.
[30] Inni ammoo isaanuma jidduun dabree ti, karaa isaa irra bu'e.
[31] Eegasii Yesuus Galiilaa keeysaa, gara magaalaa Qifirnaahom jedhamu tokkootti gadi bu'ee ti, guyyaa Sanbataa namoota barsiisu irra ture.
[32] Qoowliin inni dubbatu amri-qabeeytii waan turteef jecha, ummanni barsiisa isaa ni ajaa'ibe.
[33] Kunoo nama ruuhaa hamaan qabame tokkoo tu mana sagadaa san keeysa ture; inni sagalee guddaa dhaan,
[34] “Hayyee, yaa Yesuus nama Naazireet, maaluma nu irraa barbaadda? Sa nu balleeysuuf dhuftee? Eenyu akka ati taate ani siin beekaa bar, yaa qulqulluu Rabbii!” jedhee ti iyye.
[35] Yesuus ammoo, “Cal jedhii, keeysaa bahi!” jedhee ti ruuhaanicha hamaa oofe. Hogguus ruuhaan hamaan sun, namoota jiddutti namticha lafaan dhawee ti, odoo waa takka illee isa hin godhin, keeysaa bahe.
[36] As irratti isaan hundinuu birratanii, “Maal barsiisni akkanaa kun, ruuhaanota hamoos amrii fi humnaan ajaja; isaaniis ni bahu” waliin jedhan.
[37] Oduun isaa tiis naannawa san keeysa bakkuma hunda wal geeyse.
[38] Yesuus ka'ee mana sagadaa tii bahee ti, mana Simoon dhaqe; haati niitii Simoon dhukkuba leeydaa jabduu qabuun qabamtee ti ciifti turte, akka isii fayyisuuf itti himaniif.
[39] Kanaaf itti dhihaatee, siree isii cinaa dhaabbatee, dhukkuba leeydaa san oofe. Leeydaaniis gadi isii dhiifte; isiiniis hogguusuma kaatee ti isaan tajaajilte.
[40] Aduun hogguu seente, namoonni dhukkubsataa isaanii, kanneen uzrii adda addaa tiin rakkachaa turan hundumaa, gara isaa ti fidan; inni hogguus harka isaa tokko tokkoon hunduma isaanii irra kaayee ti isaan fayyise.
[41] Hogguus ruuhaanonni hamoon inni Kiristoos akka tahe beekanii waan turaniif, “Ati Ilma Rabbii ti” isaan jedhanii ti iyyan namoota hedduu keeysaa hiis ni bahu turan. Inni ammoo isaaniin ni lole, akkasitti dubbachuus isaanitti hin dhiifne.
[42] Bariisaa ganamaan achii deemee ti, gara lafa umnaa takka dhaqe; ummanni ammaas isa barbaadanii ti jala dhufan. Hogguu isa arkaniis, deebi'ee akka isaan dhiisee biraa hin deemne godhuuf ni yaalu turan.
[43] Inni ammoo, “Ani Oduu Gammachuu Mootummaa Rabbii, mandaroota warra kaanittiis lallabuu tu ana irra jira, aniis wannummaan ergamee fuu tana” isaaniin jedhe.
[44] Akkasitti manneen sagadaa warra Yihudootaa keeysatti lallabaa ti ture.