[1] Yesuus Yerikoo seenee ti keeysa dabraa ture.
[2] Namticha Zakkewoos jedhamu tokkoo tu achi ture; inni angafa warra qaraxxuu, ammaas nama taajira ture.
[3] Zakkewoos kun, Yesuus eenyu akka tahe arkuu dha barbaade; ammoo inni nama gabaabaa waan taheef jecha, hoddomina namaa tiif isa arkuu hin dandeenye.
[4] Tanaaf karaa Yesuus irra dabraa jiru irra dura fiigee ti, isa laaluuf jecha, muka qilxuu takka irratti ol bahe.
[5] Yesuus hogguu achi gahe, ol millatee ti, “Yaa Zakkewoos, dafii gadi bu'i, arra mana kee gahuu tu na irra jira” jedheeni.
[6] Zakkewoosiis dafee ti gadi bu'ee, gammachuu dhaan Yesuus simate.
[7] Warri tana arkaniis, “Kunoo gaa! Keeysummaa namticha dilaawaa kanaa ta'uuf seene” jedhanii ti, hundinuu Yesuus irratti guunguman.
[8] Zakkewoos ammoo ol ka'ee ti Gooftaan, “Abeet yaa Gooftaa koo, walakkaa qabeenya kiyyaa miskiinaaf niin kanna, kana malees, abbuma fedhe irraa huu, akkaan maletti wanniniin fuudhe yoo arkamte, dachaa afur godhee tiin deebisee kafala” jedheeni.
[9] Yesuus deebisee ti, “Arraan tana, najaatni mana kana dhufe; inni niis ilma Abrahaami.
[10] Ilmi Namaa tiis wanni dhufeef, nama bade barbaadee najaa baasuufi” jedhe.
[11] Namoonni dubbii kanneen dhaggeeyfachaa odoo jiranii, Yerusaaleemitti waan dhihaateef, ummanni niis Mootummaan Rabbii hogguusuma tan mullatu waan isaanitti fakkaateef jecha, Yesuus dabalee ti fakkeenya kana isaanitti hime.
[12] “Namticha kabajamaa tokkoo tu, mootummaa fudhatee deebi'uuf, fagoo dhaqe.
[13] Kaadamtoota isaa keeysaa nama kudhan yaamee ti, adduma addaan ziqeeya waqeeta tokko tokko itti kannee ti, ‘Hangaan ani deebi'uu ittiin naggadaa’ jedheeni.
[14] Ummanni isaa ammoo isa waan jibbeef jecha, ‘Namtichi kun akka nu irratti mootomu hin barbaannu’ dhaamsa jedhuun, gartuu takka isa boodaan ergan.
[15] “Inni ammoo mootummaa fudhatee hogguu deebi'ee gale; naggadanii maal akka faaydeeysan beekuuf jecha, kaadamtoota isaa warra inni horii itti kanne sunitti, nama ergee ti akka dhufan ajaje.
[16] Inni duraa, ‘Yaa Gooftaa, ziqeeya ati anatti kanniteen ziqeeya biraa waqeeta kudhan faaydeeyse’ jedheeni.
[17] Mootichi ammoo, ‘Tolchite yaa kaadamaa gaarii, waan jibir irratti waan amanamteef jecha, ani ammoo bulchaa magaalaa kudhanii godhee, si shuume’ jedheeni.
[18] Inni lammeeysaaniis dhihaatee ti, ‘Yaa Gooftaa, ziqeeya ati anatti kanniteen, ziqeeya biraa waqeeta shan faaydeeyse’ jedheeni.
[19] Isa kanaaniis, ‘Siis bulchaa mandaroota shanii godhee, si shuume’ jedheeni.
[20] Inni kaaniis dhihaatee ti, ‘Yaa Gooftaa, ziqeeyni kee kaniin ani mandiilaan maree dhooysee kaaye kunoo ti;
[21] ati nama rahamata hin qabne, waan hin kaahin kan fudhattu, waan hin facaasiniis kan haammattu waan taateef jechaan sodaadhe’ jedheeni.
[22] Gooftaan isaa ammoo, ‘Ati yaa kaadamaa faaydaa hin qabne, jechuma kee tii niin sitti farada. Ani nama rahamata hin qabne akkaan tahe, waaniin hin kaahin kan fudhadhu, waaniin hin facaasiniis kan haammadhu tahuu kiyya eega beeytee fuu,
[23] ziqeeya kiyya warra dhalaan fuudhan bira maaliif anaaf hin kaahin ree? Aniis gaafaan dhufu, faaydaa isaa tiin wajji, silaa niin fudhadhaan ture’ jedheeni.
[24] Eegas booda, warra achi dhadhaabbachaa jiraniin, ‘Ziqeeyicha harkaa fuudhaa tii, kan ziqeeya waqeeta kudhan qabuuf kannaa!’ jedheeni.
[25] ‘Yaa Gooftaa, inni durumaanuu kunoo ziqeeya waqeeta kudhan qaba’ jedhaniin.
[26] ‘Ani isinittiin hima, namicha waa qabuuf dabalamee ti kannamaaf, isa humaa hin qabne irraa ammoo waanuma silaa qabuu huu irraa fuudhama.
[27] Amma ammoo, adawwoota kiyya kanneen akkaan ani isaan irratti mootomu hin barbaanne san as fidaa tii, ija tiyya duratti isaan ajjeesaa!’ jedhee ti ajaje” jedhe.
[28] Yesuus waan kanneen eega dubbate booddee, Yerusaaleemitti ol bahuuf isaan dura bu'e.
[29] Beetfaagee dhaa fi Bitaaniyaatti, gaara Gaara Ejersaa jedhamu tokkotti hogguu dhihaate, barattoota isaa keeysaa lama erge.
[30] “Ganda fuullee teeysan jiru san dhaqaa tii, akkuma achi seentaniin, nyagoo, tan nam tokko illeen takkaa irra hin taa'in hidhamee ti agartuu; hiikaa tii fidaa!
[31] Namni, ‘Maaliif hiiytan?’ jedhee yoo isin gaafate, ‘Gooftaa tu itti haajame’ isaan jedhaa!” jedheeni.
[32] Barattoonni ergaman dhaqanii, akkuma Yesuus isaanitti hime tahee ti arkan.
[33] Odoo isaan nyagoo san hiikutti jiranii, warri nyagoo san qaban dhufanii ti, “Maaliif nyagoo tana hiiytan?” jedhanii ti isaan gaafatan.
[34] Isaan ammoo, “Gooftaa tu itti haajame” jedhanii ti deebisaniif.
[35] Akkasitti nyagoo san gara Yesuus fidan, uffata isaanii tiis irra kaayanii ti, Yesuus irra kaayan.
[36] Yesuus akkasitti odoo deemuu, namoonni uffata isaanii karaa inni irra dabru irra afan.
[37] Magaalaa Yerusaaleemitti dhihaachaa, gadoo Gaara Ejersaa hogguu gahe, tuutni barattootaa hundinuu, hojii quduraa kanneen arkan hundumaaf gammadanii ti, sagalee guddaa dhaan Rabbiif hamdii dhiheeysutti ka'an.
[38] “Mootichi maqaa Gooytaa tiin dhufu galateeyfamaa dha; nagayni samii irratti, durriin ulfinaa tiis ol samii gubbatti!” jedhan.
[39] Ummata san keeysaa Fariisonni hangi tokko, “Yaa barsiisaa, barattoota kee tiin naamusa godhaa jedhiin!” jedhaniin.
[40] Yesuus ammoo, “Ani isinittiin hima, isaan kun silaa callisanii, dhagaaggeen kunuu ni lallabu turan” jedhee ti deebiseef.
[41] Yesuus magaalaa Yerusaaleemitti dhihaatee hogguu isii arke, ni booyeef.
[42] “Atummaan guyyuma arraa kana illee, silaa waan nagaya fidu odoo beeytee akkam! Amma ammoo ija tee jalaa dhokatee ti jira.
[43] Guyyoonni adawwoonni kee dallaya sitti ijaaranii, si marsanii, karaa hundumaaniis si muddan, sitti dhufuuf deemu.
[44] Wayta Rabbi najaa si baasuuf dhufe, ati waan hin hubatiniif jecha, sii fi joollee tee tiis ammaas warra dallaya keeysa jiraniis, lafaan isin dhawu, dhagaa tokko illee wal irratti siif hin dhiisan” jedhe.
[45] Yesuus Beeytal Maqdas seenee, warra daldaalota manicha keeysaa gadi yaasuu dha jalqabe.
[46] “‘Manni kiyya mana kadhataa ti’ jedhamee barreeyfamee ti jira, isin ammoo holqa hattuu ti isa gootan” isaaniin jedhe.
[47] Yesuus guyyuu Beeytal Maqdas keeysatti barsiisaa ti ture; luboonni angafoonninii fi barsiisonni seeraa, hooggantoonni ummataa tiis, isa ajjeesuuf ni barbaadu turan.
[48] Haa tahu malee, ummanni hundinuu qoowlii isaa tiin waan maxayfamaniif jecha, akkaataa itti isa waa godhan dhaban.