[1] Guyyaa Sanbataa tokko, Yesuus ooyruu qamadii keeysa dabraa ti ture; barattoonni isaa ammoo ashiita ciratanii harka isaanii tiin shukkuumanii ti nyaatan.
[2] Hogguus Fariisota keeysaa jarri tokko, “Guyyaa Sanbataa waan godhuun seeraan dhoorkame maaliif gootu?” jedhanii ti isaan gaafatan.
[3] Yesuus deebisee, “Daawwid namoota isaa wajjiin wayta beelawe waan godhe isin inumaa tuu hin dubbifnee?
[4] Inni kunoo mana Rabbii seenee, biddeena ilaalchaa Rabbii tiif dhihaate fudhatee nyaatee ti, namoota isaa wajjiin turaniifiis kanne; biddeena kana luboota qofa malee, warri biraa nyaachuun seeraan dhoorkamee ti ture” jedhe.
[5] Itti dabalee tiis, “Ilmi Namaa Gooftaa Sanbataa ti” isaaniin jedhe.
[6] Sanbata biraa tokkottiis Yesuus mana sagadaa seenee ti barsiise; namtichi harki isaa kan mirgaa naaffate tokkoos achi keeysa ture.
[7] Barsiisonni seeraa tii fi Fariisonni, sababa Yesuus ittiin kasasan arkachuuf, Sanbataan namticha kana, yoo kan fayyisu tahe laaluuf jecha, ni basaasu turan.
[8] Yesuus ammoo waan jarri garaa isaanii keeysatti yaadan beekee ti, namticha harki isaa naaffate saniin, “Ka'ii tii, gara fuula duraa as koottu!” isaan jennaan, namtichi niis ka'ee ti achi fuula dura dhaabbate.
[9] Hogguus Yesuus jaraan, “Isinumaan gaafadhaa, seerri keenya guyyaa Sanbataatti maal akka goonu nu ajaja? Gaarii dalaguu dha moo hamaa? Lubbuu namaa du'a irraa oolchuu dha moo yookiin ajjeesuu dha?” jedheeni.
[10] Naannoo isaa warra turan hundumaa tokko tokkoon eega laale booddee namtichaan, “Harka kee diriirsi!” jedheeni; hogguus inni harka isaa ni diriirse, harki isaa tiis deebi'ee ti fayye.
[11] Jarri ammoo hedduu aaranii ti, Yesuus kana akkam godhuun akka isaan irra jiru, wal marihatan.
[12] Jidduu san keeysaa guyyaa tokko Yesuus gara gaaraatti ol bahee ti, achitti halkan guutuu Rabbi kadhachaa bule.
[13] Bariisaan dhufnaan, barattoota isaa warra turan hundumaa ifitti yaamee ti, isaan keeysaa kudha lama filate; warri inni ergamoota jedhee moggaasees isaan kana.
[14] Maqaan isaanii tiis Simoon kan inni Phexiroos jedhee moggaase, Indiriiyaas obboleeysa Phexiroos, Yaaqoob, Yohannis, Filiphoos, Bartolomewos,
[15] Maatewos, Toomaas, Yaaqoob ilma Alfewos, Simoon kan “Hinaafticha” jedhamee beekame,
[16] Yihudaa ilma Yaaqoob, Yihudaa Keriyot; inni ammoo booddee Yesuus dabarsee kan kannee dha.
[17] Yesuus isaanii wajjiin gaara gubbaa irraa gadi bu'ee ti, lafa shiiraa takka dhaabbate; barattoota isaa danuu fi ummata dila, kanneen Yihudaa hundumaa fi Yerusaaleem keeysaa, akkasumatti ammaas mandaroota bahar cinaa, Xiiroosii fi Sidoon keeysaa hiis ummanni hizaaba hin qabne isaanii wajjiin turan.
[18] Isaan kanneen Yesuus dhaggeeyfachuu fi, ammaas uzrii isaanii irraa hiis fayyuuf dhufan; warri ruuhaa hamaa dhaan rakkachaa turaniis ni fayyan.
[19] Humniti isa irraa baatee, isaan hunda fayyisaa waan jirtuuf jecha, ummanni hundinuu isa harkaan tuquuf ni yaalu turan.
[20] Hogguus inni gara isaanitti garagalee barattoota isaa daawwachaa akkana jedheeni; “Isin warri miskiinonni eeybifamoo dha, Mootummaan Rabbii teeysani.
[21] Isin warri amma beeloytan eeybifamoo dha, quufuuf teeysu; isin warri amma boochan eeybifamoo dha, kofluuf teeysu.
[22] Sababa Ilma Namaa tiif jedhanii namoonni hogguu isin jibban, hogguu if irraa isin baasanii isin arrabsaniis maqaa keeysan balleeysanii isin lagataniis isin eeybifamoo dha!
[23] Abbootiin isaanii tiis nabiyyoota akkasuma gochaa ti turan; tun yoo isin mudatte gammadaa, kuruphisaa, samii irratti sawaabni keeysan guddaa dha taha.
[24] Ammoo isin kanneen warra taajira taataniif magan, raahaa teeysan isin duruun fudhattan.
[25] Isin warra amma quufoo taataniif magan, beelawuuf teeysu; isin warra amma kofaltaniif magan, booyuu fi waywaachuuf deemtu.
[26] Isin warra namoota hedduun faarfamtaniif magan, abbootiin isaanii tiis nabiyyoota kijiboo akkasuma itti gochaa ti turan” jedheeni.
[27] Yesuus itti furee, “Ani ammoo isin warra na dhaggeeyfachaa jirtaniiniin jedha; adawwii teeysan jaaladhaa, warra isin jibbaniifiis gaarii godhaa!
[28] Warra isin abaaran eeybisaa, warra isin arrabsaniifiis kadhadhaa!
[29] Nama mallaa tee gara tokkoon si kabaleef, tan gara kaanii tiis dura qabi! Nama qamisa kee si irraa fudhatu, koota kee ti illee isa hin dhoorkatin!
[30] Abbuma si kadhateef kanni, qabeenya kee nama si duraa fudhatuus, naa deebisi jettee, hin gaafatin!
[31] Waan namoonni akka isiniif godhan jaalattan, isiniis akkasuma isaaniif godhaa!
[32] Warra isin jaalatan qofa yoo jaalattan, galanni keeysan maali? Warri hin amanne illeen warra isaan jaalatan numa jaalatu.
[33] Warruma gaarii isiniif godhan qofaaf gaarii yoo gootan, galanni keeysan maali? Warri hin amanne illeen akkasuma godhu.
[34] Warra isiniif deebisuu dandayan qofaaf yoo liqeeysitan, galanni keeysan maali? Warri dilaawoonni illeen waan liqeeysan deebisanii arkachuuf dilaawootatti ni liqeeysu.
[35] Isin ammoo adawwii teeysan jaaladhaa, gaariis godhaa, nuuf deebisu jettanii odoo hin abdatiniis liqeeysaa! Sawaabni keeysan guddaa dha taha, joollee Gooytaa tiis ni taatu; inni kunoo warra galata hin qabnee fi warra hamoof illee arjaa dha.
[36] Abbaan keeysan rahamata-qabeeysa akka tahe isiniis rahamata-qabeeysa tahaa!” jedheeni.
[37] Yesuus itti furee, “Namatti hin faradinaa, isinittiis hin faradamu; yakka hin murinaa, yakki isinittiis hin muramu; oomfii godhaa, Rabbiis isiniif oomfii ni godha.
[38] Kannaa, isiniifiis ni kannama; saffaraa gaarii kan gadi takashamee walitti lulamee, gubbaaniis dhangala'ee tu isiniif kannama; quunnuma itti namaaf saffartaniin isiniifiis saffarama” jedheeni.
[39] Yesuus ammaas fakkeenya kana isaanitti hime; “Namni jaamaan tokko nama jaamaa biraa, karaa agarsiisuu ni dandayaa? Lachuu tuu waliin boollatti hin kufanii?
[40] Barattuun tokko barsiisaa isaa irra hin caalu; tahu illee namni akka gaaritti leenjifame akka barsiisaa isaa ti taha.
[41] Maaliif huuba ija obboleeysa kee tii keeysa jiru ilaalta? Kullooda ija tee keeysa jiru hin hubattuu?
[42] Atuu kan kullooda ija tee keeysa jiruu huu hin agarre, akkamitti obboleeysa kee tiin, ‘Yaa obboleeysa koo, lakkii huuba ija tee keeysa jiru kanaan si irraa baasa’ jettaani ree? Ati yaa fakkeeysituu, duraan dursitee, kullooda ija tee keeysaa if irraa baasi, eegas booda huuba ija obboleeysa kee tii keeysa jiru baasuu dandeeysa” jedheeni.
[43] Yesuus barsiisa isaa itti furee, “Mukni gaariin firii hamaa hin godhatu, akkasumatti ammaas mukni hamaaniis firii gaarii hin godhatu.
[44] Mukni hundinuu, firii inni godhatuun beekama; firii habruu walleensuu irraa, firii inabaa tiis qajimaa irraa hin guuran.
[45] Namni gaariin, gaarummaa garaa isaa keeysaa, waan gaarii ni baasa; namni hamaaniis, hammeenya garaa isaa keeysaa, waan hamaa ni baasa. Namni waanuma garaa isaa keeysa guutee dhangala'u afaaniin dubbata” jedhe.
[46] Yesuus itti dabalee, “Waaniin ani jedhuu huu hin gootanii, ‘Yaa Gooftaa, Yaa Gooftaa’ jettanii maaliif na yaamtu?
[47] Namuma gara kiyya dhufee qoowlii tiyya dhaggeeyfatee hojii irra oolchu, eenyu akka inni fakkaatuun isin agarsiisa.
[48] Inni akka nama gadi fageeysee qotee, bu'ura mana isaa dhagaa irratti dhaabee ijaarrate fakkaata. Hogguu galaanni guutee, mana isaa dhawe ammoo, sababa inni bu'ura jabaa qabuuf jecha sossoosuu hin dandeenye.
[49] Namni qoowlii tiyya dhagayee hojii irra hin oolchine ammoo, nama bu'ura mana isaa gadi fageeysee odoo hin dhaabin, biyyee irratti ijaarrate fakkaata. Hogguma galaanni isa dhawe, jiga hambaa hin qabne jiga” jedhe.