[1] Kana booddee ammoo Gooftaan warra biraa nama torbaatamii lama ramadee ti, gara mandarootaa fi gandoota ifii dhaquuf deemu hundumatti, lama lamaan isaan if dura erge.
[2] Inni isaaniin, “Oomishni bash-bashi, hojjatoonni oomishan ammoo muraasa. Kanaaf hojjatoota midhaan oomishan akka itti erguuf, abbaa oomishaa kadhadhaa.
[3] “Ammaas kunoo, akka ilmoolee hoolaattiin, yayyii keeysatti isin erguufiin deemaa.
[4] Maallaqa, qandii fi kophees hin fudhatinaa, karaa irrattiis nam tokko illee nagaya gaafachuuf hin dhaabbatinaa.
[5] Mana tokko hogguu seentan, dura ‘Nagayni mana kanaaf haa tahu!’ jedhaa!
[6] Ilmi nagayaa yoo achi jiraate, nagayni keeysan isa irra bu'a; yookaan nagayni keeysan isiniif deebi'a.
[7] Manuma san keeysa turaa, waan isaan isiniif dhiheeysan nyaadhaa tii dhugaa, hojjataan mindaa isaa arkachuun haqa; manneen irraas hin labinaa!
[8] Magaalaa tokko seentanii yoo isin simatan, waanuma isiniif dhihaate nyaadhaa!
[9] Dhukkubsataa achi keeysa jiran fayyisaa, ‘Mootummaan Rabbii isinitti dhihaattee ti jirti’ jedhaa tii isaanitti himaa!
[10] Magaalaa tokko seentanii, yoo isin simachuu didan ammoo, karaa isaa irratti achi bahaa tii;
[11] ‘Dhukkee magaalaa keeysan keeysaa, miila keenyatti qabate illee, if irraa ni dhadhooyna; ammoo Mootummaan Rabbii akka dhihaatte beekaa!’ jedhaan.
[12] Guyyaa san, firdiin warra Sodoom firdii magaalaa kanaa irra akka sablattuun isinitti hima” jedheeni.
[13] Yesuus itti furee, “Siif magan yaa Koraaziin, siif magan yaa Beetesayidaa, hojiin humna Rabbii, tan isin keeysatti godhamte, odoo Xiiroosii fi Sidoonaa keeysatti waan godhamte taatee, ummanni isaan keeysa jiraatu silaa wayta tana, uffata gaddaa uffatee, daaraa keeysaas taa'ee, toowbachuu isaa ni mullisa ture.
[14] Eegasuu guyyaa san, isin irra caalaa, Xiiroosii fi Sidooniif, firdiin ni sablatti.
[15] Ati ammoo yaa Qifirnaahom, hanga samitti ol kaafamuu dha barbaaddee? Hunquuftuu hoonga hin qabnetti gadi darbamta” jedheeni.
[16] Barattoota isaa tiin, “Namni isin dhagayu, ana dhagaya; namni isin dhagayuu didu, ana dhagayuu dha dida, namni ana dhagayuu diduus, isa na erge dhagayuu dha dida” jedheeni.
[17] Jarri torbaatamii lamaaniis gammachuun deebi'anii dhufanii ti, “Yaa Gooftaa, maqaa kee tiin hogguu isaan ajajne, ruuhaanonni hamoon illeen nuuf ajajaman” jedhaniin.
[18] Yesuus ammoo deebisee, “Sheeyxaanni akka bakakkaatti, samii keeysaa odoo kufuutiin arke.
[19] Ani, kunoo, jawwee irra, qajjeebbuu irraas akka ejjattan, humna diinaa hunduma akka moohattaniif, amrii isiniif kannee tiin jira; waa takka illeen isin hin miidhu.
[20] Haa tahu malee, ruuhaanonni hamoon waan isiniif ajajamaniif jecha, hin gammadinaa; ammoo, maqaan keeysan samii irratti waan barreeyfameef jecha, hedduu gammadaan isiniin jedha” jedhe.
[21] Wayta san Yesuus, gammachuu Ruuhal Qudusiin guutamee ti, “Yaa Abbaa, Gooytaa samii fi dachii dhaa, waan kanneen warra bebbeekoo fi aaqiloota jalaa dhooysitee, wallaalotatti waan mullifteef jecha, siin galateeyfadha; eeyye, yaa Abbaa, kun fedha jaalatamaa kee ti” jedhe.
[22] Itti furuu dhaan ammaas, “Abbaan kiyya waan hundumaa dabarsee anatti kannee ti jira. Abbaa qofa malee, Ilmi, eenyu akka tahe kan beeku hin jiru; Ilmaa fi namticha Ilmi isa itti mullisuu barbaade qofaa tu Abbaa beeka malee, Abbaan eenyu akka tahe kan beeku hin jiru” jedhee ti dubbate.
[23] Kana booddee ammaas gara barattoota isaatti garagalee ti kophatti, “Ijji waan isin agartan tana agartu eeybifamtuu dha!
[24] Nabiyyoota hedduu fi mootoonni hedduuniis, waan isin agartan tana arkuuf kajeelanii odoo hin arkin akka hafanii fi, waan isin dhageeysaniis dhagayuuf kajeelanii odoo hin dhagayin akka hafaniin, isinitti hima” isaaniin jedhe.
[25] Kunoo, barsiisaan seeraa tokko ka'ee ti, Yesuus fitinuuf, “Yaa barsiisaa, jireenya bara baraatti seenuuf, maal godhuu tu ana irra jira?” jedhee ti gaafate.
[26] Yesuus ammoo, “Seera keeysatti maaltu barreeyfamee jira? Akkamitti dubbifta?” jedhee ti isa gaafate.
[27] Hogguus namtichi, “‘Garaa kee hundumaan, ruhii tee hundumaan, humna tee hundumaan, qalbii tee hundumaaniis Rabbi kee Gooyticha jaalachuu tu si irra jira; ollaa kee tiis akkuma if jaalattutti jaaladhu!’ jedha” jedhee ti deebise.
[28] Yesuus hogguus, “Jawaabni kee sirrii dhaa, atiis tanuma godhii, ni jiraatta!” jedheeni.
[29] Barsiisichi seeraa ammoo, nama qaceelaa if godhuu barbaadee ti, “Ollaan kiyya eenyu?” jedhee ti Yesuus gaafate.
[30] Yesuus ammaas deebisee ti, “Namtichi tokko Yerusaaleem irraa gara Yerikootti odoo gadi deemuu ti, warra saamtuu afaan bu'e; uffata isaa tiis irraa baafatanii, eega tumanii isa butuchan booda, du'aa fi jireenya jiddutti isa dhiisanii ti biraa deeman.
[31] Lubni tokkoos akkuma ayyaanaa karaa san odoo gadi deemaa jiruu, namticha san lafatti arkee ti, irraa maqee cinaan dabre.
[32] Akkasumatti ammaas namtichi gosa Leewii tokkoos, bakka san gahee hogguu isa arke, irraa maqee ti, cinaa kaaniin bira dabre.
[33] Namtichi qomoo Samaariyaa tokko ammoo, odoo karaa deemuu achi gahee, hogguu isa arke, ni naheefi.
[34] Itti dhihaatee tiis, madaa isaa zeeta dibee, daadhii inabaa itti naqee eega hidheef booda, harree ifii isaa irra kaayee, mana qubata keeysummaa ti isa geeysee ti, achitti isa tajaajile.
[35] Borumtiis saaqa meetaa lama fuudhee, namticha qubata keeysummaa san eegutti kannee ti, ‘Hadaraa ittiin tajaajili; kana irra caalaa yoo itti baaftees, hogguun deebi'uun siif kanna’ isaan jedhe” jedhe.
[36] Yesuus itti furee, “Eegasuu jara sadeen kanneen keeysaa, isa kamtu namticha warra saamtuu afaan bu'e kanaaf ollaa tahuu isaa mirkaneeyseef sitti fakkaata?” jedhee ti gaafate.
[37] Barsiisaan seeraa suniis deebisee “Isa naheef sani” jedheeni; Yesuus eegasuu, “Atiis deemii, akkasuma godhi!” isaan jedhe.
[38] Yesuus barattoota isaa wajjiin odoo yaa'anii ganda tokko hogguu gahan, dubartiin Maartaa jedhamtu takka mana isiitti isa simatte.
[39] Isiin obboleeytii Maariyaam jedhamtu takka qabdi; Maariyaam tuniis tan miila Gooftichaa jala teeysee, qoowlii isaa dhaggeeyfattee dha.
[40] Maartaan hojii mana keeysaa tiin qabamtee kush-kushii irra odoo jirtuu, isa bira dheeyxee ti, “Yaa Gooftaa obboleeytiin tiyya kophaa akkaan hojjadhu na irratti dhiisuu isii tana ittuma dhiiftaa? Akka na gargaartu itti naa himi kaa!” jetteeni.
[41] Gooftaan ammoo deebisee ti, “Yaa Maartaa, yaa Maartaa, ati if cinqitee waan hedduttiis if butuchita.
[42] Waanuma takkaa tu nama barbaachisa, Maariyaam waan gaarii tahe kan isii duraa hiis hin fudhatamne filatte” jedheeni.