[1] Sanbanni eega dabre booda, Maariyaam Magdalaa, Maariyaam haati Yaaqoob, Salomeeniis deemanii jasada meeyxaa Yesuus muuduuf axira bitatan.
[2] Guyyaa jalqaba torbaanii, Dilbata, ganama bariisaa futtuqii aduutti, bakka qabrii dhaquuf yaa'an.
[3] Karaa irratti ammoo, “Eenyuu tu dhagicha balbala qabrii irraa nuuf garagalcha?” waliin jechaa ti turan.
[4] Dhagaan sun hedduu guddaa dha ture; ol jedhanii laalaan kunoo, dhagichi balbala qabrii irraa duruun garagalfamee ti arkan.
[5] Qabricha keeysa akkuma ol seenaniin kunoo dargaggeeysa tokko, huccuu adii dheertuu, uffatee gara mirgaa tiin odoo taa'uu arkanii ti rifatan.
[6] Inni ammoo, “Abshir, hin birratinaa! Isin Yesuus nama Naazireet isa fannifamee ture barbaaddu; inni kunoo ka'ee ti jira! As hin jiruu, laalaa, bakka isa ciibsanii turan.
[7] Ammoo deemaa tii, barattoota isaatti Phexiroosittiis, ‘Inni isin dura gara Galiilaa ti deema, akkuma isinitti hime sanitti achitti isa arkitu’ jedhaa tii itti himaa!” isaaniin jedhe.
[8] Isaan hedduu birratanii hollachaa waan turaniif, achi keeysaa bahanii ti dheefa orihan. Waan sodaataniif jechaas, nama tokkotti illee humaa hin himne.
[9] Yesuus, guyyaa jalqaba torbaanii Dilbata, ganama bariisaa hogguu du'aa ka'e, dura Maariyaam Magdalaatti mullate; Maariyaam tun tan inni ruuhaanota hamoo torba keeysaa baasee turee dha.
[10] Isiin warra isaa wajjiin turan, kanneen nahanii booyutti jiranitti dheeyxee ti, tana isaanitti himte.
[11] Isaan ammoo Yesuus jiraataa tahuu fi, akka isiin isa agartees, hogguu isii irraa dhagayan, hin amanne.
[12] Kana booddee ammaas, jarreen lamaan tokko imaltuu odoo deemanii ti Yesuus uunkaa biraa tiin isaanitti mullate.
[13] Jarreen kuniis deebi'anii ti warra hafanitti himan; jarri ammoo, dubbii isaan kanaa tiis hin amanne.
[14] Eegasii ammoo Yesuus, barattoota kudha tokkan, warra maadditti taa'anii jiranitti mullate. Jarri kanneen, warra eega inni du'aa ka'e booda arkanii isaanitti himan san, waan hin amaniniif jecha, amanti-dhablummaa isaanii tii fi mata-jabina isaanii tiif isaaniin lole.
[15] Inni, “Gara addunyaa hundumaa deemaa! Uumama hundumaattiis Wangeela lallabaa!
[16] Namni amane, ammaas kan cuuphame najaa dha baha; nama hin amannetti ammoo firdii itti godhama.
[17] Warra amanan duukaa milikkitoota kanneen tu isaan duukaa arkama; isaan maqaa kiyyaan, ruuhaanota hamoo ni baasu, afaan haarayootaaniis ni dubbatu.
[18] Bofa yoo harkaan qaban yookiin summii nama ajjeeftu yoo dhuganiis, isaan hin miidhu; harka isaanii warra dhukkubsatoo irra ni kaahu, isaaniis ni fayyu” isaaniin jedhe.
[19] Yesuus Gooftaan, eega isaanii wajjiin dubbate booddee, gara samitti ol fudhatamee ti mirga Rabbii tiin taa'e.
[20] Eegasii barattoonni deemanii ti bakka halletti Wangeela lallaban; Gooftaan ammaas isaanii wajjiin hojjate, qoowlichaas milikkitoota arkamaniin ni mirkaneeyse.