[1] ربدن اِرِمیایا بو سؤز نازئل اولدو:
[2] «ربّئن معبدئنئن دروازاسیندا دور و اورادا بو سؤزو اعلان ادئب دِه: ”ای بوتون یهودا، ربّه عئبادت اتمک اوچون بو دروازالاردان گئرنلر، ربّئن سؤزونه قولاق آسین!
[3] ائسرایئلئن تاریسی اولان قوشونلار ربّی بله دیئر: یوللارینیزی و عمل‌لرئنئزی ائصلاح ادئن و من سئزی بو یرده یاشاماغا قویارام.
[4] بورادا ربّئن معبدی وار، ربّئن معبدی وار، ربّئن معبدی وار دیئب آلدادیجی سؤزلره بِل باغلامایین.
[5] اگر یوللارینیزی و عمل‌لرئنئزی دوغرودان ائصلاح اده‌سئنئز، اگر قونشونوزلا، دوغرودان عدالتله رفتار اده‌سئنئز،
[6] اگر قرئبه، یِتئمه، و دول آروادا ظولم اتمیه‌سئنئز، بو یرده گوناهسیز قان تؤکمیه‌سئنئز، باشقا آللاهلارین طرفداری اولماییب اؤزونوزه ضرر وورمایاسینیز،
[7] او زامان بورادا، ابدئلئک آتالارینیزا وردئیئم تورپاقدا، سئزی یاشاماغا قویارام.
[8] باخ، سئز فایداسیز اولان آلدادان سؤزلره بِل باغلاییرسینیز.
[9] مگر اولار کی، اوغورلوق اده‌سئنئز، آدام اؤلدوره‌سئنئز، زئنا اده‌سئنئز، یالاندان آند ائچه‌سئنئز، بَعَل بوتلرئنه بوخور یاندیراسینیز، تانیمادیغینیز باشقا آللاهلارین طرفداری اولاسینیز،
[10] سونرا منئم آدیملا چاغیریلان بو معبده گلئب حوضورومدا دوراسینیز و بئز اَمئن-آمانلیقداییق دئیه‌سئنئز کی، گدئب بوتون بو ائیرنج ائشلرئن اتمه‌سئنه داوام وره‌سئنئز؟
[11] مگر منئم آدیملا چاغیریلان بو معبد، سئزئن نظرئنئزده، قولدور یوواسینا چِورئلئب؟ باخین، من، بلی من، سئزئن نه اتدئیئنئزی گؤرورم.“» رب بویورور.
[12] «ائندی آدیمی ائلک دفه قویدوغوم شئلوداکی مسکنئمه گدئن و گؤرون کی، خالقیم ائسرایئلئن پئسلئیئنه گؤره اونا نه اتدئم.»
[13] رب بویورور: «ائندی کی، سئز بوتون بو ائشلری گؤردونوز، دفه‌لر سئزئنله دانیشدیغیم حالدا قولاق آسمادینیز، سئزی چاغیردیغیم حالدا جاواب ورمه‌دئنئز،
[14] بونا گؤره، شئلوها نه اتدئم، منئم آدیملا چاغیریلان، بِل باغلادیغینیز بو معبدله، سئزه و آتالارینیزا وردئیئم بو یِرله ده اِله اده‌جیم.
[15] اِفرایئم نسلئندن اولان هموطنلرئنئزی نجه آتدیم، سئزی ده گؤزومون قاباغیندان اِله آتاجاغام.
[16] سن آمّا، (ای اِرِمیا)، بو خالق اوچون دوعا اتمه، اونلار اوچون یالواریب خاهئش اتمه، حوضورومدا دا شفاعت اوچون دایانما؛ چونکی سؤزونه قولاق آسمایاجاغام.
[17] مگر گؤرمورسن کی، یهودا شهرلرئنده، اورشلئم کوچه‌لرئنده نه ادئرلر؟
[18] اوشاقلار اودون ییغیرلار، آتالاری اود یاندیریرلار، آروادلار دا گؤی ملکه‌سئنه خمئر توتوب فطئر پئشئرئرلر. اونلار باشقا آللاهلارا مایع تقدئملری ورئرلر کی، منی قضبه گتئرسئنلر.»
[19] رب بویورور: «مگر منی قضبه گتئرئرلر؟ مگر اؤزلرئنی ائنجئتمئرلر، مگر اؤزلرئنی روسوای اتمئرلر؟»
[20] بونا گؤره ده پروردئگار رب بله دیئر: «باخ، بو یِرئن اوستونه، ائنسانلارین، حیوانلارین، چؤل آغاجلارینین، تورپاغین محصولو اوستونه قضبئم و حئدّتئم تؤکوله‌جک؛ آلیشیب یاناجاق و سؤنمیه‌جک.»
[21] ائسرایئلئن تاریسی اولان قوشونلار ربّی بله دیئر: «یاندیرما قوربانلارینیزی باشقا قوربانلارینیزا قاتیب اَت ییئن.
[22] چونکی آتالارینیزی مئصئر تورپاغیندان چیخاردان واخت، یاندیرما قوربانی و باشقا قوربان باره‌ده اونلارا امر ورمه‌دئم و بئر سؤز دِمه‌دئم.
[23] آنجاق اونلارا بونو امر ادئب ددئم: ”سؤزومدن ائطاعت ادئن. او واخت من سئزئن تارینیز اولارام، سئز ده منئم خالقیم اولارسینیز. هر باره‌ده سئزه امر اتدئیئم یوللا گِدَرسئنئز و اوغور قازانارسینیز.“
[24] آمّا ائطاعت اتمه‌دئلر، قولاق آسمادیلار. بونون عوضئنه اؤز ائستکلرئنه موطابئق، پئس اورَکلرئنئن عئنادکارلیغینا موطابئق حرکت اتدئلر، ائره‌لئیه یوخ، گِرئیه گتدئلر.
[25] آتالارینیز مئصئر تورپاغیندان چیخدیقلاری گوندن بو گونه قدر، قوللاریم پیغمبرلری هر گون دفه‌لرله یانینیزا گؤندَ‌ردئم.
[26] آمّا منی اشئتمه‌دئلر، قولاق آسمادیلار، عئنادکارلیق اتدئلر، آتالاریندان دا پئس ائشلر گؤردولر.
[27] سن بوتون بو سؤزلری اونلارا دئیه‌جکسن، لاکئن سنه قولاق آسمایاجاقلار؛ اونلاری چاغیراجاقسان، لاکئن سنه جاواب ورمه‌یه‌جکلر.
[28] سن اونلارا دِه: ”بو همئن خالقدیر کی، اؤز تاریسی ربّئن سؤزونه قولاق آسمادی و جزادان عئبرت آلمادی؛ حقئقت یوخ اولوب و اونلارین آغزیندان کَسئلئب.
[29] ای اورشلئم، ساچینی کَسئب آت، لوت تپه‌لر اوستونده مرثئیه اوخو، چونکی رب قضبلَندئیی نسلی ردّ ادئب، ترک ادئب.
[30] اونا گؤره کی، یهودا اؤولادلاری گؤزومده پئس اولان ائشلر گؤروبلر.“ رب بویورور. ”منئم آدیملا چاغیریلان معبده ائیرنج بوتلرئنی قویوب اورانی نجئسله‌یئبلر.
[31] اونلار بِن‌هئنّوم دره‌سئنده‌کی توفِت پرستئشگاهلارینی تئکئبلر کی، اوغوللار و قیزلارینی اوددا یاندیرسینلار. من بله بئر شیی نه امر اتدئم، نه ده آغلیما گتئردئم.“
[32] رب بویورور: ”بونا گؤره ده، باخین، اِله گونلر گله‌جک کی، اورایا توفِت و یا بِن‌هئنّوم دره‌سی یوخ، قیرغین دره‌سی دیئله‌جک. توفِتده یِر قالمایانا قدر اؤلولری باسدیراجاقلار.
[33] بو خالقین جسدلری گؤیده‌کی قوشلارا، یرده‌کی حیوانلارا یمک اولاجاق، اونلاری قورخودوب قاچیردان دا اولمایاجاقدیر.
[34] یهودا شهرلرئنده، اورشلئم کوچه‌لرئنده سِوئنج و شادلیق سَسئنی، بَی-گلئن سَسئنی کَسه‌جیم، چونکی اؤلکه وئران اولاجاق.“»