[1] بو، مئلّتلر باره‌ده اِرِمیا پیغمبره نازئل اولان ربّئن سؤزودور.
[2] مئصئر حاقّیندا: مئصئر پادشاهی فئرعون نِکونون قوشونو باره‌ده نازئل اولان سؤز بودور. بابئل پادشاهی نِبوکَدنِصّر بو قوشونو یهودا پادشاهی یوشئیا اوغلو یِهویاقئمئن پادشاهلیغینین دؤردونجو ائلئنده، فَرات چایینین قیراغیندا اولان کَرکِمئشده مغلوب اتدی.
[3] «قالخان و سئپر حاضیرلاییب دؤیوشه گئرئن!
[4] آتلارینیزی یَهَرله‌یئن، توسنلرئنئزه مئنئن، ای آتلی‌لار! دَبئلقه گِیئنئب سیرایا دوزولون، نئزه‌لرئنئزی جئلالاییب زئرِه گِیئنئن!
[5] نه گؤرورم؟ دهشتده‌دئرلر، گری دؤنورلر، دؤیوشچولری مغلوب اولوبلار، آرخایا باخمایاراق قاچیرلار، هر طرفده دهشتدئر!» رب بویورور.
[6] «بَرک قاچان، قاچا بئلمئر، گوجلو اولان دا قورتولا بئلمئر. شئمالدا، فَرات چایینین قیراغیندا، بودره‌یئب ییخیلیرلار.
[7] نئل کئمی قالخان بو کئمدئر؟ سولاری سل کئمی چالخالانان بو کئمدئر؟
[8] نئل کئمی قالخان، سولاری سل کئمی چالخالانان مئصئردئر. او دیئر: ”قالخیب یِر اوزونو باساجاغام. شهرلری و اورادا یاشایانلاری هلاک اده‌جیم.“
[9] ای آتلار، قالخین! ای دؤیوش عارابالاری، دَلی کئمی جومون! ای قالخانلا سئلاحلانمیش کوش و پوت دؤیوشچولری، ای اوخ آتان لودلولار، ائره‌لی گدئن!
[10] لاکئن او گون قوشونلار ربّی پروردئگارین گونودور، دوشمنلرئندن قئصاص آلماسی اوچون قئصاص گونودور. اونلاری قیلینج یِیئب دویاجاق، قانلارینی ائچئب سوسوزلوغونو یاتیرداجاق. چونکی شئمال اؤلکه‌سئنده، فَرات چایینین قیراغیندا قوشونلار ربّی پروردئگار قوربان کَسه‌جک.
[11] ای باکئره قیزا بَنزه‌یَن مئصئر، گئلعادا چیخ، مَلحم آل. چوخلو درمان ائچمه‌یئن عبث‌دئر؛ سنئن دردئنه شفا یوخدور.
[12] مئلّتلر سنئن روسوایچیلیغینی اِشئده‌جکلر؛ فریادین یِر اوزونو بورویه‌جک. دؤیوشچو باشقا دؤیوشچونو بودره‌ده‌جک، ائکئسی ده بئردن ییخیلاجاقلار.»
[13] بابئل پادشاهی نِبوکَدنِصّرئن گلئب مئصئر تورپاغینا هوجوم اده‌جیی باره‌ده، رب اِرِمیا پیغمبره بو سؤزلری نازئل اتدی:
[14] «مئصئرده بئلدئرئن، مئگدولدا اشئتدئرئن؛ نوف و تَخپِنخِسده اعلان ادئب دیئن: ”سیرایا دوزول و حاضیرلاش، چونکی اطرافیندا اولانلاری قیلینج یِیئب قورتاریر.“
[15] جنگاورلرئن نه اوچون یِره ییخیلاجاقلار؟ دایانا بئلمئرلر، چونکی رب اونلاری یِره ووراجاق.
[16] دفه‌لرله بودره‌یه‌جکلر؛ بئربئرلرئنئن اوستونه ییخیلاجاقلار. دئیه‌جکلر: ”قالخین ظالئملرئن قیلینجیندان قاچیب اؤز خالقیمیزین یانینا، دوغما وطنئمئزه قاییداق.“
[17] اورادا اونلار باغیراجاقلار: ”مئصئر پادشاهی فئرعون آنجاق بئر بوش‌بوغازدیر، او، فورصتی اَلدن ورئب.“
[18] آدی قوشونلار ربّی اولان پادشاه بویورور: ”وارلیغیما آند اولسون، بئری گله‌جک کی، داغلار آراسیندا اولان تابور کئمی، دهنز قیراغیندا اولان کَرمِل کئمی‌دئر.
[19] ای مئصئرده یاشایان قیز، سورگونلویه گتمک اوچون اشیالارینی حاضیرلا. چونکی نوف وئران اولوب یاناجاق، ائچئنده بئر ساکئن قالمایاجاق.
[20] مئصئر چوخ گؤزل بئر بوزوودور، لاکئن شئمالدان اوستونه آت چئبئنی گلئر.
[21] اونون موزدلو عسگرلری ده کؤکَلمئش دانا کئمی‌دئر. حتّا اونلار دا اوز چِوئرئب بئرلئکده قاچاجاقلار، یِرلرئنده دورمایاجاقلار. چونکی فلاکت گونو باشلارینا گلئر، جزالارینین واختی یِتئشئر.
[22] دوشمن قووّتله گلرکَن، مئصئر سورونوب آرادان چیخان ائلان کئمی فیشیلتایاجاق؛ اونون ضئدّئنه آغاج کَسَنلر کئمی، بالتا ائله گله‌جکلر.
[23] مِشه‌سئنی کچئلمز اولسا دا، کَسه‌جکلر.“ رب بویورور. ”چونکی اونلار چَیئرتکه‌لردن چوخدورلار، حسابا گلمزلر.
[24] مئصئر قیزی اوتاندیریلاجاق، شئمال خالقینا تسلئم ادئله‌جک.“
[25] ائسرایئلئن تاریسی اولان قوشونلار ربّی دیئر: ”باخ، من نوف شهرئنئن آللاهی آمونو، فئرعونو، مئصئری، اونون آللاهلارینی، پادشاهلارینی و فئرعونا بِل باغلایانلاری جزالاندیرجاغام.
[26] اونلاری، اونلارین جانلارینی آلماق ائسته‌ینلره یعنی بابئل پادشاهی نِبوکَدنِصّره و اونون اعیانلارینا تسلئم اده‌جیم. لاکئن سونرا اوّللر اولدوغو کئمی، آداملار گئنه مئصئرده ساکئن اولاجاقلار.“ رب بویورور.
[27] ”قورخما، ای قولوم یعقوب، دهشته دوشمه، ای ائسرایئل. چونکی سنی اوزاق یِرلردن، نسلئنی اسئر اولوندوغو اؤلکه‌دن قورتاراجاغام. یعقوب گئنه راحاتلیق تاپیب اَمئن آمانلیقدا ساکئن اولاجاق، اونو قورخودان اولمایاجاق.
[28] قورخما، ای قولوم یعقوب، چونکی من سنئنله‌یم.“ رب بویورور. ”سنی آرالارینا قوودوغوم مئلّتلرئن هامیسینی یوخ اتسم ده، سنی کامئل محو اتمیه‌جیم. سنی آنجاق عدالتله تربئیه اده‌جیم؛ دوغرودان دا جزاسیز قالماغینا ائجازه ورمه‌یه‌جیم.“»