[1] منه ربّئن بو سؤزو نازئل اولدو:
[2] «اؤزونه آرواد آلما، بو یرده اوغوللارین و قیزلارین اولماسین.
[3] چونکی بو یرده دوغولان اوغوللار و قیزلار اوچون، اونلاری دوغان آنالار و اونلاری عمله گتئرن آتالار اوچون رب بله دیئر:
[4] ”اونلار اؤلومجول ناخوشلوقلاردان اؤله‌جکلر. اونلار اوچون یاس توتولمایاجاق، باسدیریلمایاجاقلار، تورپاغین اوستونده پِیئن کئمی اولاجاقلار. قیلینج و آجلیقلا قیریلیب تؤکوله‌جکلر. جسدلری ده گؤیده‌کی قوشلارا و یرده‌کی حیوانلارا یِم اولاجاق.“
[5] چونکی رب بله دیئر: ”یاس اِوئنه گئرمه، آغلاماق اوچون گتمه، باش‌صاغلیغی دا ورمه، چونکی بو خالقین آراسیندان صولحومو، محبّتئمی و مرحمتئمی گؤتورموشم.“ رب بله بویورور.
[6] ”بو اؤلکه‌ده بؤیوکلر ده، کئچئکلر ده اؤله‌جکلر، قبئره قویولمایاجاقلار، آداملار اونلار اوچون یاس توتمایاجاقلار، اونلار اوچون هچ کس اؤزونو یارالاییب ساچلارینی قیرخمایاجاق.
[7] هچ کس اؤلولردن اؤتری یاس توتانا یمک ورمه‌یه‌جک کی، اونا تسلّی ورسئن. هچ کس ده اونلارا تسلّی اوچون بئر کاسا سو ائچئرتمیه‌جک، حتّا آناسینا یا دا آتاسینا گؤره.
[8] ضئیافت کچئرئلَن بئر اِوه گئرمه و اونلارلا اوتوراراق یِیئب-ائچمه.“
[9] چونکی ائسرایئلئن تاریسی اولان قوشونلار ربّی بله دیئر: ”باخ، بو یرده، سئزئن گونلرئنئزده، گؤزلرئنئزئن قاباغیندا، شادلیق و سِوئنج سَسئنه، بَی-گلئن سَسئنه آخیر قویاجاغام.“
[10] بوتون بو سؤزلری خالقا بئلدئرَنده، اگر سندن سوروشسالار: ”نه اوچون رب ضئدّئمئزه بله بئر بؤیوک بلا اعلان ادئب؟ تقصئرئمئز نه‌دئر؟ تاریمیز ربّه نه گوناه اتمئشئک؟“
[11] او واخت اونلارا بله دِه: ”اونا گؤره کی، سئزئن آتالارینیز منی ترک اتدئلر.“ رب بویورور. ”آیری آللاهلارین دالینجا گتدئلر، اونلارا قوللوق و سجده اتدئلر، منی ترک ادئب قانونوما عمل اتمه‌دئلر.
[12] لاکئن سئز آتالارینیزدان دا آرتیق پئسلئک ادئبسئنئز. گؤرون نجه هر کس منه قولاق آسمایاراق اؤز پئس اوره‌یئنئن عئنادی ائله رفتار ادئر.
[13] بونا گؤره ده سئزی بو اؤلکه‌دن اِله بئر اؤلکه‌یه آتاجاغام کی، نه آتالارینیز تانی‌ییب نه ده سئز اؤزونوز. اورادا گجه-گوندوز باشقا آللاهلارا قوللوق اده‌جکسئنئز، چونکی سئزه اصلا لوطف اتمیه‌جیم.“»
[14] بونا گؤره ده، رب بویورور: «گونلر گله‌جک کی، ائنسانلار آرتیق دِمیه‌جکلر: ”آند اولسون او ربّئن وارلیغینا کی، ائسرایئل اؤولادلارینی مئصئر تورپاغیندان چیخارتدی.“
[15] آمّا دئیه‌جکلر: ”آند اولسون او ربّئن وارلیغینا کی، ائسرایئل اؤولادلارینی شئمال اؤلکه‌سئندن و قوودوغو بوتون باشقا اؤلکه‌لردن چیخارتدی.“ چونکی اونلاری آتالارینا وردئیئم تورپاغا قایتاراجاغام.»
[16] رب بویورور: «آمّا ائندی من چوخلو بالیقچی گؤندَ‌ره‌جیم و اونلاری توتاجاقلار. اوندان سونرا من چوخلو شئکارچی گؤندَ‌ره‌جیم، هر داغ و تپه اوستوندن، قایا اویوقلاریندان اونلاری شئکار اده‌جکلر.
[17] گؤزلرئم اونلارین بوتون یوللارینی ائزله‌یئر. اونلار مندن گئزلَنه بئلمزلر، تقصئرلری ده منئم نظرئمدن قاچا بئلمز.
[18] تقصئرلرئنئن و گوناهلارینین عوضئنه اونلارا ائکی‌قات جزا وره‌جیم. چونکی ائیرنج بوتلرئنئن جسدلری ائله اؤلکه‌می نجئسله‌یئبلر، مولکومو ائیرنجلری ائله دولدوروبلار.»
[19] یارب، قووّتئم و قالام، سیخینتی گونونده سیغیناجاغیم! مئلّتلر دونیانین اوجقارلاریندان سنئن یانینا گلئب دئیه‌جکلر: «آتالاریمیز ساختا و پوچ بوتلره، هچ بئر فایدا گؤرمه‌دئکلری شیلره وارئث اولدولار.
[20] آدام دا اؤزونه مگر آللاه دوزَ‌لدر؟ آخی اونلار تاری دیئل.
[21] بونا گؤره ده اونلارا گؤرسده‌جیم، بو دفه اونلارا قووّت و قودرتئمی تانیتدیراجاغام. او واخت بئله‌جکلر کی، آدیم ربدئر.