[1] رب بویورور: «ای ائسرایئل، اگر گری قاییداسان، منه طرف قاییداسان، ائیرنج بوتلرئنی گؤزومون قاباغیندان گؤتوره‌سن، بئر داها یولدان آزمازسان؛
[2] حقئقت، عدالت و صالحلئکله ”وار اولان ربّه آند اولسون!“ دیئب آند ائچَرسن، او زامان مئلّتلر رب واسئطه‌سی‌ائله برکت آلارلار، و اونونلا فخر اِدَرلر.»
[3] چونکی رب یهودا آداملارینا و اورشلئمه بله دیئر: «اؤزونوز اوچون تزه اَکئن یری شوخوملایین؛ تئکانلار آراسیندا اَکمه‌یئن.
[4] ای یهودا آداملاری و اورشلئمده یاشایانلار، اؤزونوزو رب اوچون ختنه ادئن، اوره‌یئنئزئن ختنه اَتئنی کَسئن. یوخسا پئس عمل‌لرئنئزه گؤره، قضبئم اود کئمی پوسکوروب یاندیراجاق، سؤندورن اولمایاجاق.
[5] یهودادا اعلان ادئن، اورشلئمده جار چکئب دیئن: ”اؤلکه‌ده کَره‌نای چالین!“ اوجادان قیشقیریب امر ادئن: ”گلئن، ییغیلیب قالالی شهرلره گئرَک!“
[6] صحیونا گِدن یولو گؤرسه‌دن بئر بایراق قالدیرین، پناه یری آختارین، دایانمایین. چونکی من شئمالدان بلا و بؤیوک قیرغین گتئره‌جیم.»
[7] آصلان یوواسیندان چیخیب، مئلّتلری محو ادن، یولا دوشوب. اؤز یِرئندن چیخیب کی، اؤلکه‌نئزی وئران اتسئن. شهرلرئنئز یِرله بئر اولاجاق، اورادا ساکئن اولان بئری قالمایاجاق.
[8] بونا گؤره ده چول گِیئنئن، یاس توتوب آغلایین. چونکی ربّئن آلوولانان قضبی بئزدن دؤنمه‌یئب.
[9] «او گون پادشاهین و باشچیلارین اوره‌یی دوشه‌جک.» رب بله بویورور. «کاهئنلر مات قالاجاق، پیغمبرلر دوناجاق.»
[10] من ددئم: «آه، ای پروردئگار رب! یقئن کی، سن بو خالقی و اورشلئمی کامئل آلدادیبسان. ”سئزئن اوچون اَمئن-آمانلیق اولاجاق“ دیئبسن، حال بو کی، قیلینج بوغازیمیزا دئره‌نئر.»
[11] او واخت بو خالقا و اورشلئمه دیئله‌جک: «صحراداکی چیلپاق تپه‌لردن، خالقیما طرف ائستی بئر کولَک اسئر. بو کولَک دن سووورمایاجاق، تاخیل تمئزله‌میه‌جک.
[12] منئم امرئمله بوندان دا گوجلو بئر کولَک اَسه‌جک و من ده ائندی اونلارا اؤز حؤکمومو بئلدئره‌جیم.»
[13] باخ، دوشمن بولودلار کئمی، اونون دؤیوش عارابالاری دا قاسیرغا کئمی اوجالیر، آتلاری قارتاللاردان ائتی گِدئر. وای حالیمیزا! چونکی برباد اولدوق.
[14] ای اورشلئم، اوره‌یئنی پئسلئکدن یویوب-تمئزله کی، خئلاص اولاسان. پئس فئکئرلرئن نه واختا قدر ائچئنده قالاجاق؟
[15] آرتیق داندان بئر سَس گلئر، اِفرایئمئن داغلیق بؤلگه‌سئندن شرارت اِشئدئلئر.
[16] «بونو مئلّتلره ائندی خبر ورئن! اورشلئمه خبر چاتدیرین کی، اوزاق بئر اؤلکه‌دن گلن قوشون اونو موحاصئره‌یه آلاجاق، یهودا شهرلرئنئن قاباغیندا نعره چکه‌جک.
[17] اونلار زَمی گودوکچولری کئمی هر طرفدن شهره طرف گلئرلر، چونکی او، منئم ضئدّئمه عوصیان ادئب.» رب بویورور.
[18] «اؤز ائشلرئن، اؤز عمل‌لرئندئر کی، بونلاری سنئن باشینا گتئرئر. سنئن جزان نه آجی‌دیر، لاپ اوره‌یئنه چاتیب.
[19] آی جانیم، آی جانیم! عذابدان قیوریلیرام. اوره‌یئم ائچئمده چیرپینیر، ساکئت قالا بئلمئرَم. چونکی، ای جانیم، کَره‌نای سَسئنی، دؤیوش نعره‌سئنی اشئدئبسن.
[20] قیرغین اوستونه قیرغین گلئر، بوتون اؤلکه خارابا قالیب. چادیرلاریم قَفلَتَن، پرده‌لرئم بئر آندا داغیلیر.
[21] نه واختا قدر بایراق گؤره‌جیم، کَره‌نای سَسی اِشئده‌جیم؟
[22] حقئقتن، خالقیم آخماقدیر، منی تانیمیر. اونلار جاهئل اؤولادلاردیر، درّاکه‌لری یوخدور، عاغیللاری پئسلئک اتمه‌یه چاتیر، یاخشیلیق اتمه‌یئن نه اولدوغونو بئلمئرلر.»
[23] من، اِرِمیا، یِر اوزونه باخدیم، شکئلسئز و بوشدور. گؤیلره باخدیم، ائشیقلاری یوخدور.
[24] داغلارا باخدیم، تئتره‌یئردئلر، بوتون تپه‌لر یِرلرئندن قوپوردو.
[25] باخیب گؤردوم کی، بئر آدام قالماییب، گؤیده‌کی قوشلارین هامیسی اوچوب گدئبدئر.
[26] باخیب گؤردوم کی، بَهَرلی تورپاق صحرایا چِورئلئب، ربّئن قاباغیندا بوتون شهرلری، اونون آلوولانان قضبی ائله داغیلیب
[27] بلی، رب بله دیئر: «بوتون اؤلکه وئران اولاجاق، آنجاق قویمایاجاغام کی، کامئل بئر شکئلده محو اولسون.
[28] بونا گؤره یِر یاس توتاجاق، یوخاریدا گؤیلر قارالاجاق، چونکی بونو من دمئشم، بونا من قصد اتمئشم، فئکئرئمی دیئشدئرمیه‌جیم، سؤزومدن دؤنمه‌یه‌جیم ده.
[29] بوتون شهرلرئن اهالئسی آتلی‌لارین و اوخ‌آتانلارین گورولتوسوندن قاچیر. اونلار سیخ مِشه‌لره گئرئر، قایالارا دیرماشیر. بوتون شهرلر ترک ادئلمئش، اونلاردا کئمسه یاشامیر.»
[30] بس سن، ای وئران شهر، نه اده‌جکسن؟ قیرمیزی پالتار گِیئنسن ده، قیزیل بَزَکلر تاخسان دا، گؤزلرئنه سورمه سورتسن ده، عبث یِره اؤزونو بَزه‌یئرسن. اویناشلارین سنه خور باخیرلار، جانینی آلماق ائسته‌یئرلر.
[31] بئر سَس اشئتدئم؛ دوغوش آغریسی چکن بئر آروادین سَسئنه بَنزه‌ر. ائلکئنی دوغوران آروادین چکدئیی عذابی! بو، اَللرئنی اوزاتمیش، نفسی کَسئلمئش صحیون قیزینین سَسی‌دئر. باغیریر: «وای حالیما! چونکی قاتئل‌لرئن قاباغیندا جانیم طاقتدن دوشور.»