[1] رب بله دیئر: «من بابئلده و لِب-قامایدا یاشایانلارین ضئدّئنه هلاک اِدئجی بئر کولَک اَسدئره‌جیم.
[2] بابئله تاخیل سووورانلار گؤندَ‌ره‌جیم کی، اونو سوووروب اؤلکه‌سئنی بوش قویسونلار؛ اونلار اونون قارا گونونده، هر یاندان اونا هوجوم اده‌جکلر.
[3] اوخچو کامانینی چکمه‌سئن، زئرِهئنی گِیمه‌سئن. اونون جاوانلارینا رحم اتمه‌یئن، قوشونونو کامئل محو ادئن.
[4] اؤلدورولَنلر کَلده اؤلکه‌سئنده، یارالی‌لار اونون کوچه‌لرئنده یِره سَرئله‌جکلر.
[5] چونکی اؤزلرئنئن تاریسی قوشونلار ربّی ائسرایئل و یهودا خالقلارینی ترک اتمه‌‌یئب. گرچی ائسرایئلئن موقدّسئنئن ضئدّئنه، اؤلکه‌لری تقصئرله دولودور.
[6] بابئلئن ائچئندن قاچین! هر کس جا‌نینی قورتارسین! اونون گوناهینا گؤره محو اولمایین. چونکی ربّئن قئصاص زامانی‌دیر؛ اونا اؤز عوضئنی وره‌جک.
[7] بابئل ربّئن اَلئنده بئر قیزیل کاسا ائدی؛ بابئل بوتون دونیانی مست اتدی. مئلّتلر اونون شرابینی ائچدئلر، اونا گؤره ده دَلی اولوبلار.
[8] بابئل قَفلَتَن ییخیلیب تئکه-تئکه اولاجاق، اونون اوچون شئون ادئن! یاراسینا ملحم سورتون؛ بلکه شفا تاپار.
[9] بابئله شفا وِرَردئک، لاکئن صاغالا بئلمز؛ گلئن، اونو ترک اِدَک، هر بئرئمئز اؤز اؤلکه‌مئزه قاییداق. چونکی بابئلئن حؤکمو گؤیلره چاتیر، بولودلارا قدر اوجالیر.
[10] رب بئزه برائت ورئب؛ گلئن تاریمیز ربّئن نه‌لر اتدئیئنی صَحیوندا اعلان اِدَک!
[11] اوخلاری ائتئله‌یئن، سئپرلری گؤتورون! رب ماد پادشاهلارینی قالدیریب، مقصدی بابئلی یوخ اتمکدئر. رب اؤز قئصاصینی، معبدئنئن قئصاصینی آلاجاق.
[12] بابئل دووارلارینین ضئدّئنه بایراق اوجالدین! کشئکچی‌لری چوخالدین، نؤوبتچئلری اؤز یرئنه قویون، کمئنده دورون! چونکی رب بابئل خالقینین ضئدّئنه نئیّتئنی، اعلان اتدئیئنی یرئنه یتئره‌جک.
[13] ای چوخلو سولارین قیراغیندا یاشایانلار، چوخلو خزئنه‌لری اولانلار، آخیرینیز گلئب، کَسئلئب آتیلما واختینیز یِتئشئب.»
[14] قوشونلار ربّی اؤز وارلیغینا آند ائچئب: «سنی چَیئرتکه سوروسو ائله دولدوران کئمی قطعن عسگرلرله دولدوراجاغام، سنه ظفر تاپدیقلاری اوچون نعره چکه‌جکلر.»
[15] رب قودرتی ائله یِر اوزونو یاراتدی؛ حئکمتی ائله دونیانی قوردو، درّاکه‌سی ائله گؤیلری یایدی.
[16] او گورلایاندا گؤیده‌کی سولار گورلاییر، یِرئن اوجقارلاریندان بولودلاری اوجالدیر، یاغیش اوچون شئمشَک چاخدیریر، آنبارلاریندان کولَک چیخاردیر.
[17] هر کس عاغیلسیزدیر، معرئفتسئزدئر. هر زرگر دوزَلتدئیی بوتدن اوتانیر، چونکی اونون تؤکدویو بوت پوچدور، اونلاردا نفس یوخدور.
[18] اونلار بوش شیدئرلر، مَسخره‌دئرلر، جزا واختلاری گلن زامان، محو اولاجاقلار.
[19] آمّا یعقوبا نصئب اولان اونلارا بَنزه‌مَز، چونکی ائرث قبئله‌سی ائله بئرلئکده هر شیی یارادان اودور. اونون آدی قوشونلار ربّی‌دئر.
[20] «سن منئم توپّوزوم، دؤیوش سئلاحیمسان، سنئنله مئلّتلری قیریرام، سنئنله پادشاهلیقلاری محو ادئرم.
[21] سنئنله آتلاری و آتلی‌لاری قیریرام، سنئنله دؤیوش عارابالاری و اونلاری سورَنلری قیریرام،
[22] سنئنله کئشی و آروادی قیریرام، سنئنله قوجا و جاوانی قیریرام، سنئنله جاوان اوغلان و قیزی قیریرام.
[23] سنئنله چوبان و سوروسونو قیریرام، سنئنله اَکئنچی و اؤکوزلرئنی قیریرام، سنئنله والئلر و باشچی‌لاری قیریرام.
[24] آمّا بابئلده و کَلده اؤلکه‌سئنده یاشایانلارا صَحیوندا اتدئکلری بوتون پئس عمل‌لرئنئن عوضئنی گؤزلرئنئزئن قاباغیندا وره‌جیم.» رب بویورور.
[25] «باخ، سنه ضئدّم، ای هلاک ادن داغ ای بوتون دونیانی هلاک ادن!» رب بویورور. «سنه اَلئمی قالدیریب سنی قایانین باشیندان هِل‌لَده‌جیم، سنی یانمیش بئر داغا چِوئره‌جیم.
[26] سندن کونج و بونؤوره داشی گؤتورمیه‌جکلر، چونکی سن ابدی بئر وئرانه اولاجاقسان.» رب بویورور.
[27] «یِر اوزونده بایراق قالدیرین! مئلّتلر آراسیندا کَره‌نای چالین! مئلّتلری بابئلئن ضئدّئنه دؤیوش اوچون حاضیرلایین! آرارات، مئنّی و اَشکه‌ناز پادشاهلیقلارینی اونون ضئدّئنه ییغین. اونون ضئدّئنه بئر سرکرده تعیئن ادئن، اوستونه چَیئرتکه سوروسو قدر آتلار گؤندَ‌رئن.
[28] مئلّتلری-ماد پادشاهلارینی، والئلرئنی و بوتون باشچیلارینی، باشچیلیقلاری آلتینداکی بوتون اؤلکه‌لری بابئلئن ضئدّئنه دؤیوش اوچون حاضیرلایین!
[29] اؤلکه تئتره‌یئب لرزه‌یه گلئر! چونکی ربّئن بابئله ضئدّ نئیّتی - اورانی ساکئنسئز بئر وئرانه‌یه چِوئرمه نئیّتی یرئنه یِتمه‌لی‌دئر.
[30] بابئل دؤیوشچولری ووروشماقدان اَل چکئبلر، اؤز قالالاریندا قالیبلار. گوجلری تؤکه‌نئب؛ آروادلار کئمی اولوبلار. یاشادیقلاری یِرلر اودا ورئلئب، دروازا سورگولری قیریلیب.
[31] قاصئد، قاصئد دالینجا، خبرچی، خبرچی دالینجا گلئر، بو خبری بابئل پادشاهینا چاتدیریر: ”شهر هر طرفدن آلیندی،
[32] چای کِچئدلری توتولدو، قامیشلیقلار یاندیریلدی، دؤیوشچولر دهشته دوشدو.“»
[33] ائسرایئلئن تاریسی اولان قوشونلار ربّی بله دیئر: «واختی گلنده خرمن یری نجه تاپدالانیر، بابئل قیزی دا اِله تاپدالاناجاق. اونون دا بئچئن زامانی عنقرئب یِتئشه‌جک.»
[34] «بابئل پادشاهی نِبوکَدنِصّر منی یِیئب، منی گئجلئیه سالیب، بوش بئر قابا چِوئرئب. جاناوار کئمی منی اودوب، گؤزل یمکلرئمله قارنینی دویوروب. سونرا دا منی قوسوب.
[35] صحیون ساکئنلری دیئرلر: ”منه و جانیمین ضئدّئنه ادئلَن قدّارلیق بابئلئن باشینا گلسئن.“ اورشلئم دیئر: ”تؤکولَن قانیمین حاقّی-حسابی قوی کَلدانئلردن سوروشولسون.“
[36] بونا گؤره رب بله دیئر: ”محکمه‌ده ائشئنئزه من باخاجاغام، قئصاصینیزی من آلاجاغام. اونون چایینی قوروداجاغام، بولاغینین سویونو کَسه‌جیم.
[37] بابئل داش قالاقلارینا، چاقّال یوواسینا دؤنه‌جک. حیرت هدفی اولاجاق، ائستِهزا ائله اونا فئت چالاجاقلار. اورادا هچ کس یاشامایاجاق.
[38] خالقی جاوان آصلانلار کئمی نعره چکه‌جک، شئر بالالاری کئمی نَرئلده‌یه‌جک.
[39] لاکئن قیزیشدیقلاری واخت، ضئیافت دوزَ‌لدئب اونلاری مست اده‌جیم. قوی کِف اتسئنلر، ابدی یوخویا گتسئنلر، هچ واخت اویانماسینلار.“ رب بویورور.
[40] ”اونلاری قوزو، قوچ و کِچی کئمی کسمیه آپاراجاغام.“»
[41] شِشَک بوتون دونیانین اونون حاقّیندا قورورلاندیغی یِر، نجه آلیناجاق! بابئل مئلّتلر آراسیندا، نجه حیرته سالان حالا دوشه‌جک.
[42] بابئلی دهنز باساجاق، اونو گورلایان شپه‌لر اؤرته‌جک.
[43] شهرلری وئران اولاجاق، تورپاقلاری هچ کسئن یاشامادیغی، هچ کسئن کچمه‌دئیی قوراق بئر چؤله دؤنه‌جک.
[44] بابئلده بِل بوتونو جزالاندیرجاغام، اودّوغونو اونا قوسدوراجاغام. مئلّتلر آرتیق اورایا آخین-آخین گلمیه‌جکلر، بابئل دووآری دا ییخیلاجاق.
[45] اورادان چیخین، ای منئم خالقیم! هامینیز جانینیزی قورتارین! ربّئن آلوولانان قضبئندن قاچین!
[46] اؤلکه‌ده اشئتدئیئنئز شایئعه‌لره گؤره جسارتئنئزی ائتئرئب قورخمایین. بو ائل بئر شایئعه گلئر، او بئری ائل باشقاسی. اؤلکه‌ده قدّارلیق، باشچینین باشچییا ضئدّ چیخماسی باره‌ده شایئعه‌لر یاییلیر.
[47] «بونا گؤره ده، باخ، بابئلئن بوتلرئنی جزالاندیراجاغیم گونلر گلئر؛ بوتون اؤلکه روسوای اولاجاق، اؤلدورولَنلری اونون اورتاسیندا یِره سَرئله‌جک.
[48] او زامان یِر، گؤی و اونلارداکی هر شی بابئلئن باشینا گلنلره سِوئنه‌جک. چونکی شئمالدان گلن محو ادنلر اونا هوجوم اده‌جکلر.» رب بویورور.
[49] «ائسرایئلئن اؤلدورولَنلرئنه گؤره بابئل ده محو اولمالی‌دیر، نجه کی یِر اوزونده اؤلدورولَن هر کس بابئله گؤره ییخیلیب.
[50] ای قیلینجدان قورتولانلار، قاچین، لَنگئمه‌یئن! ربّی اوزاقدان یادا سالین، اورشلئم باره‌ده دوشونون!»
[51] بئز اوتانج آلتینداییق، چونکی تحقئر اولونموشوق، اوزوموزو روسوایچیلیق اؤرتور. چونکی یاد اِللی‌لر ربّئن معبدئنئن موقدّس یِرلرئنه گئرئبلر.
[52] «آمّا او گونلر گلئر کی، بوتلرئنی جزالاندیراجاغام، بوتون اؤلکه‌ده یارالی‌لار ائنئلده‌یه‌جک.» رب بویورور.
[53] «بابئل گؤیلره چیخسا دا، اوجالارداکی قالاسینی مؤحکملَندئرسه ده، محو ادنلری اوستونه دؤندَره‌جیم.» رب بویورور.
[54] «بابئلدن فریاد، کَلدانئلرئن اؤلکه‌سئندن بؤیوک قیرغین سَسی اِشئدئلئر.
[55] رب بابئلی محو اده‌جک، اونون های-کویونو سوسدوراجاق. دوشمن شپه‌لری چوخلو سولار کئمی کوکره‌یه‌جک، سَسلرئنئن گورولتوسو اوجالاجاق.
[56] چونکی بابئلئن ضئدّئنه بئر محو ادن چیخاجاق، دؤیوشچولری اسئر توتولاجاق، کامانلاری قیریلاجاق. چونکی رب عوض ورن بئر تاری‌دیر، عوضئنی کامئل وره‌جکدئر.
[57] بابئل باشچیلارینی، حئکمتلی‌لرئنی، والئلرئنی، باشچیلارینی، دؤیوشچولرئنی اِله مست اده‌جیم؛ اونلار ابدی یوخویا گده‌جکلر، هچ واخت اویانمایاجاقلار.» آدی قوشونلار ربّی اولان پادشاه بویورور.
[58] قوشونلار ربّی دیئر: «بابئلئن قالین دووآرلاری یِرله بئر اولوناجاق، اوجا دروازالارینا اود وورولاجاق. خالقلار بوش-بوشونا زحمت چکئرلر، مئلّتلرئن چکدئیی اذئیّت، اودا تسلئم ادئله‌جک.»
[59] یهودا پادشاهی صئدقئیانین پادشاهلیغینین دؤردونجو ائلئنده، مَخسِیا اوغلو نِرئیا اوغلو قوشون تَصَرّوفاتچیسی سِرایا، صئدقئیا ائله بئرلئکده بابئله گِدَرکَن، اِرِمیا پیغمبر اونا بو پیامی تاپشیردی.
[60] اِرِمیا بابئلئن باشینا گله‌جک بوتون فلاکتلری، بابئل باره‌ده یازیلمیش بوتون بو سؤزلری بئر طومارا یازدی.
[61] اِرِمیا سِرایایا ددی: «بابئله چاتاندا بوتون بو سؤزلری اوجا سَسله حتمن اوخو.
[62] دِه کی: ”یارب، بورانی داغیداجاغینی، ائچئنده ائنسانین دا، حیوانین دا یاشامایاجاغینی، اؤلکه‌نئن ابدی وئران قالاجاغینی دیئبسن.“
[63] بو طوماری اوخویوب قورتاراندا، اونا بئر داش باغلاییب فَرات چایینین اورتاسینا آت.
[64] سونرا دِه: ”قوی بابئل ده بله باتسین و منئم اونون باشینا گتئره‌جَیئم فلاکتدن بئر داها چیخا بئلمه‌سئن، قوی اونون خالقی ییخیلسین.“» اِرِمیا‌نین سؤزلری بورایا قدردئر.