[1] ربّئن سؤزو منه نازئل اولوب ددی:
[2] «گت، اورشلئمئن قولاقلارینا اعلان ات کی، رب بله دیئر: ”من سنئن جاوانلیغینداکی مِهرئنی، گلئن اولانداکی محبّتئنی، صحرادا، اوت بئتمه‌ین تورپاقدا دالیمجا گلدئیئنی خاطیرلاییرام.
[3] او واخت ائسرایئل ربّه وقف اولموشدو و اونون محصولون نوباری ائدی. اوندان یئیَنلرئن هامیسی خاطاکار چیخدیلار، اوستلرئنه بلا نازئل اولدو.“» رب بویورور.
[4] ای یعقوب نسلی، ای ائسرایئل نسلئنئن بوتون طایفالاری، ربّئن سؤزونو اِشئدئن،
[5] رب بله دیئر: «آتالارینیز منده نه حاقسیزلیق تاپدیلار کی، مندن اوزاقلاشدیلار و پوچلوغون دالینجا گدئب اؤزلری ده پوچ اولدولار؟
[6] داها دِمه‌دئلر: ”هارادادیر او رب کی، مئصئر تورپاغیندان بئزی چیخارتدی، صحرادان، اوچوروملارلا دولو چؤل‌لردن، اؤلوم کؤلگه‌سئنده قالان قوراق تورپاقدان، بئر ائنسانین کچمه‌دئیی، هچ کسئن یاشامادیغی دئیاردان بئزی کچئرتدی؟“
[7] من سئزی برکتلی تورپاغا گتئردئم کی، اونون میوه‌لرئندن و نعمتلرئندن یئیه‌سئنئز. آمّا سئز گلدئنئز و تورپاغیمی نجئس اتدئنئز، منئم ائرثئمی ائیرنج بئر یِره چِوئردئنئز.
[8] کاهئنلر دِمه‌دئلر: ”رب هارادادیر؟“ شرئعت موعلّئملری منی تانیمادیلار، رهبرلر ده منئم ضئدّئمه عوصیان اتدئلر، پیغمبرلر بَعَلئن آدی ائله نبئلئک اتدئلر و فایداسیز شیلرئن دالینجا گتدئلر.
[9] بونا گؤره من گئنه سئزئنله داعواچی اولاجاغام، من اؤولادلارینیزین اؤولادلاری ائله ده داعواچی اولاجاغام.» رب بویورور
[10] «سئز کئتّئم ساحئل‌لرئنه گدئب گؤرون، قِدارا آدام گؤندَ‌رئب دئقّتله باخین. گؤرون بله بئر شی هچ اولوب؟
[11] آللاهلار اولمادیقلاری حالدا، هچ اولوب بئر مئلّت آللاهلارینی دَیئشدئرسئن؟ لاکئن منئم خالقیم اؤز شؤوکتئنی فایداسیز شیلره دَیئشئب.
[12] ای گؤیلر، سئز بونا مات قالین، تئر-تئر اَسئن، وئران قالین.» رب بویورور.
[13] «چونکی منئم خالقیم ائکی پئس عمل ادئب: منی، آخار سولارین منبعئنی، آتیب اؤزلرئنه حوووضلار، سو ساخلامایان چاتلاق حوووضلار دوزَ‌لدئبلر.
[14] مگر ائسرایئل قولدور؟ مگر او، قول دوغولوب؟ بس نه اوچون قارت مالی اولوب؟
[15] اونون اوستونه جاوان آصلانلار نَرئلده‌یئب، سَسلرئنی اوجالدیبلار. اؤلکه‌سئنی وئران ادئبلر. شهرلری یانیب، اوندا یاشایان هچ کس قالماییب.
[16] نوف و تَخپِنخِس ساکئنلری سنئن باشینی یاریبلار.
[17] سنی یوللا آپاران تارین ربّی ترک اتمکله، مگر بو ائشی سن اؤز باشینا گتئرمه‌یئبسن؟
[18] بس ائندی شئخور سویوندان ائچمک اوچون مئصئره نئیه گِدئرسن؟ فَرات سویوندان ائچمَک اوچون آشورا نئیه گِدئرسن؟
[19] سنی اؤز پئسلئیئن جزالاندیراجاق، دؤنوکلویون سنی ائصلاح اده‌جک. اونا گؤره بئل و گؤر کی، تارین ربّی آتماغین، مندن قورخماماغین پئس و آجی شیدئر.» قوشونلار ربّی پروردئگار بویورور.
[20] «سنئن یوغونو چوخ زامان قاباق قیردیم، ائپلرئنی قوپارتدیم. آمّا سن ددئن: ”سنه قوللوق اتمیه‌جیم!“ اوسته‌لئک هر اوجا تپه‌نئن اوستونده، بول یارپاقلی هر آغاجین آلتیندا فاحئشه کئمی یِره یاتیبسان.
[21] من سنی یاخشی مِینه، تَر-تمئز توخوم کئمی اَکمئشدئم. نجه اولدو کی، عَلِیهئمه چیخیب قرئب مِینه‌‌یه دؤندون؟
[22] گرچی سن اؤزونو گئل‌آبی ائله یویورسان، بول کول سویو ائشله‌دئرسن، لاکئن گوناهینین لکه‌سی حله ده حوضورومدا قالیر.» پروردئگار رب بویورور.
[23] «نجه دئیه بئلرسن کی، ”نجئس دیئلم، بَعَل بوتلرئنئن یولو ائله گتمه‌مئشم؟“ دره‌ده نجه رفتار اتدئیئنه باخ، نه اتدئیئنی گؤر! سن قیزیشان، اورا-بورا قاچان دئشی دَوه کئمی‌سن،
[24] شهوتله هاوانی ائیله‌ین، صحرایا اؤیرَشمئش وحشی اِششَک کئمی‌سن. قیزاندا اونو کئم ساخلایا بئلر؟ اونو ائسته‌ینلر اؤزلرئنی یورمازلار، جوتلَشمه واختی اونو تاپارلار.
[25] آیاغی یالین گَزمه، بوغازین سوسوزلوقدان قوروماسین. آمّا سن ددئن: خِیر، فایداسی یوخدور! چونکی من یاد آللاهلاری سِومئشَم و اونلارین دالینجا گده‌جیم.
[26] اوغرو توتولاندا نجه اوتانیر، ائسرایئل نسلی ده پادشاهلاری، باشچیلاری، کاهئنلری و پیغمبرلری ائله بئرلئکده اِله‌جه اوتانیرلار.
[27] اونلار آغاجا ”آتامسان“، داشا دا ”منی سن دوغدون“ دیئرلر. چونکی منه طرف اوزلرئنی یوخ، آرخالارینی چِوئرئبلر. لاکئن اوستلرئنه بلا گلنده دئیه‌جکلر: ”قالخ و بئزی قورتار.“
[28] لاکئن اؤزون اوچون دوزَلتدئیئن بوتلرئن هارادادیر؟ باشینا بلا گلدئیی واخت، اگر سنی قورتارا بئلرلر، قوی اونلار گلسئنلر. چونکی سنئن آللاهلارین، شهرلرئنئن سایی قدردئر، ای یهودا!
[29] نه اوچون منئمله داعواچی‌سینیز؟ سئز هامینیز منئم ضئدّئمه عوصیان ادئبسئنئز.» رب بله بویورور.
[30] «اؤولادلارینیزی بوشونا جزالاندیرمیشام؛ چونکی اونلار یولا گلمه‌دئلر. اؤز قیلینجینیز پیغمبرلرئنئزی ییرتیجی آصلان کئمی تلف ادئب.»
[31] ای بو زامانین اؤولادلاری، ربّئن سؤزونه دئقّت ادئن: «مگر من ائسرایئل اوچون بئر صحرا اولموشام؟ و یا بئر ظولمت اؤلکه‌سی اولموشام؟ خالقیم نه اوچون دیئر کی، ”بئز اؤز-اؤزوموزه آغاییق، بئر داها سنه طرف گلمیه‌جیئک؟“
[32] مگر قیز اؤز بَزَکلرئنی، گلئن ده اؤز گلئنلئک قورشاغینی یاددان چیخاردا بئلر؟ آمّا منئم خالقیم اوزون مودّت منی یاددان چیخاردیب.
[33] اویناشلارینین دالینا دوشمکده نه قدر ماهئرسن! لاپ پئس آروادلار بِله، سندن درس آلا بئلر.
[34] سنئن اَتَکلرئن قیریلان مؤحتاج و معصوم آداملارین قانینا بولاشیب؛ حال بو کی اونلاری اوغورلوق اوستونده توتمادین. حله بونونلا بِله،
[35] سن دیئبسن: ”من تقصئرسئزم، ربّئن قضبی قطعن مندن یان کچه‌جک.“ باخ، من سنی موحاکئمه اده‌جیم، چونکی گوناه اتمه‌دئیئنی دیئرسن.
[36] نه اوچون تِز-تِز دولانیب یولونو دَیئشئرسن؟ آشوردا خجئل اولدوغون کئمی مئصئرده ده خجئل اولاجاقسان.
[37] اورادان دا اَل‌لرئنله باشینی توتوب چیخاجاقسان، چونکی بِل باغلادیقلارینی رب ردّ ادئب، اونلارلا اوغور قازانا بئلمیه‌جکسن.»