[1] یهودا پادشاهی یوشئیا اوغلو یِهویاقئمئن پادشاهلیغینین اوّلئنده ربدن بو سؤز نازئل اولدو:
[2] «رب بله دیئر: ”ربّئن معبدئنئن صحنئنده دور، عئبادت اتمک اوچون یهودا شهرلرئندن گلن بوتون آداملارلا دانیش. سنه امر اتدئیئم هر شیی اونلارا بئلدئر؛ اوندان بئر سؤز بله اَسکئلتمه.
[3] بلکه قولاق آسارلار و هر کس اؤز پئس یولوندان دؤنَر. من ده عمل‌لرئنئن پئسلئیئنه گؤره باشلارینا گتئره‌جیئم فلاکتدن اَل ساخلارام.“
[4] اونلارا دِه: رب بله دیئر: ”اگر سئزه وردئیئم قانونا گؤره رفتار اتمیه‌سئنئز، منه قولاق آسمایاسینیز،
[5] دفه‌لرله سئزئن یانینیزا گؤندَردئیئم قوللاریم پیغمبرلرئن سؤزلرئنه قولاق آسمایاسینیز-نجه کی قولاق آسماییبسینیز دا -
[6] او زامان بو معبدی ده شئلو کئمی اده‌جیم، بو شهری یِر اوزونون بوتون مئلّتلری آراسیندا لعنته دوچار اده‌جیم.“»
[7] کاهئنلر، پیغمبرلر و بوتون خالق اِرِمیا‌نین ربّئن معبدئنده ددئیی بو سؤزلری اشئتدی.
[8] اِرِمیا ربّئن خالقا چاتدیرماسینی امر اتدئیی سؤزلری دیئب قورتاردیقدا، کاهئنلر، پیغمبرلر و اوراداکی بوتون خالق اونو توتوب ددئلر: «سن اؤلمه‌لی‌سن!
[9] نه اوچون ربّئن آدی ائله نبئلئک ادئب دیئرسن: ”بو معبد شئلو کئمی اولاجاق، بو شهر خارابا قالاجاق، اورادا یاشایان اولمایاجاق“؟» ربّئن معبدئنده اولان بوتون خالق اِرِمیا‌نین اطرافینا ییغیلدی.
[10] یهودا باشچیلاری بونلاری اشئدن واخت، پادشاه ساراییندان چیخیب ربّئن معبدئنه گتدئلر و معبدئن تزه دروازاسینین گئره‌جیئنده اوتوردولار.
[11] او زامان کاهئنلر و پیغمبرلر باشچیلارا و بوتون خالقا ددئلر: «بو آدام اؤلومه لایئقدئر، چونکی بو شهرئن ضئدّئنه نبئلئک ادئب. نجه کی، سئز اؤزونوز ده اؤز قولاغینیزلا اشئدئبسئنئز.»
[12] او واخت اِرِمیا بوتون باشچیلارا و خالقا ددی: «رب منی گؤندَ‌ردی کی، بو معبدئن و بو شهرئن ضئدّئنه اشئتدئیئنئز بوتون نبئلئک سؤزلرئنی بئلدئرئم.
[13] ائندی یوللارینیزی و عمل‌لرئنئزی ائصلاح ادئن. تارینیز ربدن ائطاعت ادئن. او زامان رب سئزئن ضئدّئنئزه اعلان اتدئیی بلادان اَل ساخلار.
[14] لاکئن منه گلئنجه؛ من سئزئن ائختئیارینیزدایام. گؤزونوزده نه یاخشی و دوزدور، منئمله اِله ادئن.
[15] آنجاق یاخشی بئلئن کی، اگر منی اؤلدوره‌سئنئز، گوناهسیز قانین مسعولئیّتئنی اؤزونوزون، بو شهرئن و اورادا یاشایانلارین اوستونه گؤتورموش اولورسونوز. چونکی رب، حقئقتن، منی یانینیزا گؤندَ‌ردی کی، بوتون بو سؤزلری سئزه چاتدیریم.»
[16] باشچیلار و بوتون خالق کاهئنلره و پیغمبرلره ددئلر: «بو آداما اؤلوم حؤکمو چیخارتماق اولماز! او بئزئمله تاریمیز ربّئن آدیندا دانیشیب.»
[17] اؤلکه آغساقّاللاریندان بئر نچه‌سی قالخیب ییغیلمیش بوتون خالقا ددئلر:
[18] «یهودا پادشاهی خئزقئیانین دؤورونده مورِشِتلی مئکا نبئلئک ادئب بوتون یهودا خالقینا ددی: ”قوشونلار ربّی بله دیئر: صحیون زمی کئمی شوخوملاناجاق، اورشلئم داش قالاغینا، معبدئن تئکئلدئیی داغ دا مِشه‌لی تپه‌لره چِورئله‌جک.“
[19] مگر یهودا پادشاهی خئزقئیا و یا یهودا خالقیندان بئری اونو اؤلومه تسلئم اتدی؟ مگر خئزقئیا ربدن قورخمادی و اونون لوطفونو قازانماق ائستمه‌دی؟ مگر رب ده اونلارا گؤندَ‌ره‌جیئنی ددئیی بلادان اَل ساخلامادی؟ بئز ائندی اؤزوموزون ضئدّئنه بؤیوک بئر پئسلئک ادئرئک!»
[20] شِمَعیا اوغلو قئریَت‌یِعه‌ریئملی اورئیا آدلی بئر آدام دا ربّئن آدی ائله نبئلئک ادئردی؛ او دا اِرِمیا کئمی دانیشاراق بو شهرئن و اؤلکه‌نئن ضئدّئنه نبئلئک اتدی.
[21] پادشاه یِهویاقئم، بوتون جنگاورلری و باشچیلاری اونون سؤزلرئنی اشئدنده، پادشاه ائسته‌دی کی، اونو اؤلومه ورسئن. آمّا اورئیا بوندان خبردار اولوب قورخدو و مئصئره قاچدی.
[22] پادشاه یِهویاقئم عَکبور اوغلو اِلناتانی بئر نچه نفرله مئصئره گؤندَ‌ردی.
[23] اونلار اورئیانی مئصئردن چیخاردیب پادشاه یِهویاقئمئن یانینا گتئردئلر. پادشاه اونو قیلینجلا اؤلدوروب جسدئنی عومومی قبئرئستانلیغا آتدیردی.
[24] لاکئن شافان اوغلو اَخئقام اِرِمیانی قورویوردو، بونا گؤره ده اؤلدورولمَک اوچون خالقین اَلئنه ورئلمه‌دی.