[1] رب منه بله ددی: «گت، اؤزونه بئر کتان قورشاق ساتین آل و بِلئنه باغلا، آمّا قویما او سویا دَیسئن.»
[2] من ربّئن ددئیی کئمی قورشاق آلدیم و اونو بِلئمه باغلادیم.
[3] منه گئنه ربّئن سؤزو نازئل اولدو:
[4] «بِلئنده‌کی آلدیغین قورشاغی گؤتور و قالخ، پِراتا طرف گت. اونو اورادا قایانین اویوغوندا گئزلَت.»
[5] من ربّئن امر اتدئیی کئمی پِراتا گتدئم و اونو اورادا گئزلَتدئم.
[6] اوزون مودّت سونرا رب منه ددی: «قالخ، پِراتا طرف گت و او قورشاغی کی، سنه گئزلَتمه‌سئنی امر اتدئم، اورادان گؤتور.»
[7] من پِراتا طرف گتدئم و قورشاغی گئزلَتدئیئم یردن قازیب گؤتوردوم. گؤردوم کی، قورشاق چورویوب و داها هچ نه‌یه یارامیر.
[8] او زامان منه ربّئن بو سؤزو نازئل اولدو:
[9] «رب بله دیئر: ”یهودانین تکبّورونو و اورشلئمئن بؤیوک تکبّورونو بله‌جه چوروده‌جیم.
[10] سؤزلرئمه قولاق آسمایان، اورَکلرئنئن عئنادکارلیغی دالینجا قاچان، باشقا آللاهلارا قوللوق و پرستئش ادن بو پئس خالق هچ بئر شیه یارامایان همئن قورشاق کئمی اولاجاق.“
[11] رب دیئر: ”قورشاق ائنسانین بِلئنه نجه یاپیشیر، بوتون ائسرایئل نسلئنی و یهودا نسلئنی اؤزومه اِله‌جه یاپیشدیردیم کی، اؤز خالقیم اولوب منه شؤهرت، تعرئف و عئزّت گتئرسئنلر، آمّا اونلار قولاق آسمادیلار.“
[12] اونلارا دِه: ائسرایئلئن تاریسی رب بله دیئر: ”هر تولوق شرابلا دولاجاق.“ اگر سنه دِسه‌لر: ”هر تولوغون شرابلا دولاجاغینی بئز ده مگر بئلمئرئک؟“
[13] او زامان اونلارا دِه: رب بله دیئر: ”بوتون بو اؤلکه‌ده یاشایانلاری، داوودون تختی اوستونده اوتوران پادشاهلاری، کاهئنلری، پیغمبرلری، بوتون اورشلئمده یاشایانلاری مست اولانا قدر شرابلا دویدوراجاغام.“
[14] رب بویورور: ”من اونلاری آتا و اوغوللاری ائله بئرلئکده بئربئرلرئنه چیرپاجاغام. اورَک یاندیرمادان، رحم اتمه‌دن، شَفقَت گؤرسدمه‌دن هامیسینی محو اده‌جیم.“»
[15] اِشئدئن و قولاق آسین، کئبئرلی اولمایین، چونکی رب بله دیئب.
[16] او نه قدر کی قارانلیق چؤکدورمه‌یئب، ظولمت داغلاریندا آیاقلارینیز بودره‌مه‌یئب، تارینیز ربّی عئزّتلَندئرئن. سئز ائشیق گؤزله‌یئرسئنئز، آمّا رب اونو اؤلوم کؤلگه‌سئنه چِوئره‌جک، درئن ظولمته دؤندَره‌جک.
[17] لاکئن اگر اونا قولاق آسمایاسینیز، سئزئن کئبئرئنئز اوچون گئزلئجه آغلایاجاغام؛ گؤزلرئم آجی-آجی آغلایاجاق، سل کئمی یاش تؤکه‌جک. چونکی ربّئن سوروسو اسئر آپاریلاجاق.
[18] پادشاها و آنا ملکه‌سئنه دِه: «آشاغی یرده اوتورون، چونکی شرف تاجینیز باشینیزدان دوشه‌جک.»
[19] نِگِب شهرلرئنئن دروازالاری باغلاناجاق، اونو آچان اولمایاجاق. بوتون یهودا اسئر ادئلده‌جک، هامی اسئر آپاریلاجاق.
[20] باشینیزی قالدیریب شئمالدان گلنلری گؤرون. سنه ورئلَن سورو، سنئن گؤزل قویونلارین هارادادیر؟
[21] رب موتّفئق کئمی حاضیرلادیغین آداملاری سنه حاکئم قویاندا نه دئیه‌جکسن؟ دوغان آروادین چکدئیی سانجی کئمی مگر سنی ده آغری توتمایاجاق؟
[22] اگر اوره‌یئنده دئیه‌سن: «بوتون بونلار نه اوچون باشیما گلئب؟» بئل کی، گوناهینین چوخلوغوندان اَتَکلرئن آچیلدی، تجاووز اولوندون.
[23] مگر کوشلو اؤز دَرئسئنی، پلنگ اؤز خال‌لارینی دیئشدئره بئلر؟ پئسلئک اتمه‌یه آلیشمیش سئز ده یاخشیلیق اده بئلمزسئنئز.
[24] «سنی چؤل کوله‌یی ائله سوورولان سامان چؤپو کئمی سپه‌لیه‌جیم.
[25] سنه دوشَن پوشک، منئم سنه آییردیغیم پای بودور.» رب بله اعلان ادئر. «چونکی منی یاددان چیخاردیبسان، یالان اولانا بِل باغلاییبسان.
[26] من اؤزوم سنئن اَتَکلرئنی اوزونه قالدیراجاغام کی، عاییبین گؤرونسون.
[27] چؤلده‌کی تپه‌لر اوستونده گؤردویون ائیرنج ائشلری، زئناکارلیغینی، شهوتله کئشنَمه‌یئنی، حیاسیز عئفّتسئزلئیئنی گؤرموشم. وای حالینا، ای اورشلئم! نه واختا قدر نجئس قالاجاقسان؟»